Ev. Markus 7 : 24 - 37 Ep. Psalmen 125: 1-5 Topik : Nunga Denggan Saluhutna Dibahen Jesus / Yesus Menjadikan Segala-galanya Baik

 

Senin, 19 Agustus 2024 tu Minggu, 08 September 2024 (XV dung Trinitatis)

Ev. Markus 7 : 24 - 37 Ep. Psalmen 125: 1-5

Topik : Nunga Denggan Saluhutna Dibahen Jesus / Yesus Menjadikan Segala-galanya Baik

1. Patujolo

Adong dua namasa na disurathon di bagasan Markus 7 : 24-37 on. Ima na parjolo haruruar ni sibolis sian boru ni sada ina sian bangso Siroponisia dohot hamamalum ni sahalak na nengel huhut ngungu. Dua peristiwa on patuduhon ondolan na sarupa, ima “Jolma na porsea dapotan hamamalum dohot haluaon”. Jala marhite namasa on, gonop ma naung disuriranghon panurirang Jesaya di Jesaya 35 5-6a “Buhaanna ma disi mata ni halak na mapitung jala marbinege bahenonna pinggol ni angka na nengel. Marhajingjang ma disi halak na pangpang songon ursa”. Laos i do dibaritahon Markus di evangeliumna on. Nunga monang Tuhan i jala talu sibolis. Ingkon baritahononhon do hamonanga ni Tuhan marhite Jesus Kristus tu saluhut houm dohot bangso; ndada holan tu na hisar pamatang dohot do tu angka na marsahit; ndada holan tu halak Israel sambing, tu saluhut bangso do tahe.

2. Hatorangan

Ayat 24: Dung marsoal Jesus tu halak Parise na ro sian Jerusalem borhat ma Ibana tu luat Tirus: borhat sian luat Nasaret, huta hagodangan Na ji tu luat ni angka halak sileban (parbegu). Sai hira diajari Jesus angka natorop i asa malua sian pamingkirion ha-jahudi-on na hopit i. Dietong roha ni halak Jahudi (Israel) do ummarga adat nasida sian angka adat na asing. I do umbahen dipatihi do sahalak Jahudi asa unang saor tu bangso/halak sileban. Sipata mamolusi huta sileban pe sitongka do di nasida. Baliksa Jesus ditondong do mandalani luat ni angka parbegu, i ma Tirus. Dang dialang rohaNa sorang tu sada jabu di luat i. Nian di rohaNa dang pola botoon ni natorop haroroNa, alai dang tarbahensa.

Ayat 25: Dang piga dan dibege sada inaina barita paboa naung di luat i Jesus. Dibaritahon do di ayat on partondi na hodar boru ni inanta i. I do umbahen dihalaputi ibana ro tu Jesus marsinggang, mangido hanamalum ni boruna i.

Ayat 26: Tangkas dipabotohon dison paboa parbegu inaina i, sian bangso Siroponisia. Dang marpardoren halak Jaludi tu halak Siroponisia. Alai dipangido inanta ij do asa dipahali nian Sibolis i sian boruna i.

Ayat 27: Tangkas do alus ni Jesus taringot tu pangidoan ni parompuan Siroponisia i. "Loas jolo bosur angka dakdanak", ninna Jesus. Lapatanna unang ambati hasosonggop ni hatuaon / haluaon na sian Jahowa tu bangso Israel. Ai tu bangso Israel do dipamasa haluaon i. Nasida do bangso naung pinillit ni Jahowa. Di duru ni bangso Israe! digombarhon do nasida tu sada hata na tung mansai sungka (kasar). Dipatudos do nasida tu biang. Pahanpahanan na tung mansai lea di pangantusion ni halak Jahudi. "Dang tama buaton sipanganon ni angka dakdanak, laho mandabuhonsa tu jolo ni angka biang. Naeng dohononna disi i ma paboa Israel (halak Jahudi) do dakdanak (anak ni Debata), alai biang do angka bangso parbegu (bangso Siroponisia pe dohot do disi).

Ayat 29-30: Umbege i Jesus mamintor dialusi do tangkas inanta i; "Alani hatami, laho ma ho nunga ruar Sibolis sian borumi!” Dang pola be adong dalan / proses na ingkon sibolusonna, pintor hamalumon sian parsahion nama jaloonna.

Ayat 31-32: Naeng mamolus ma Jesus sian tongatona ni sada huta na margoar sisampulu huta. Diboan ma sahalak na nengel huhut ngungu tu adopan Na. Adong na mamboan na marsahit i, ndada na ro sandiri. Tutu ala na nengel huhut na ngungu do ibana, na ingkon do adong mangusung huhut manghatahon pangidoanna. Dielek na mamboan j Jesus asa diampehon rangan Na tu na marsahit i.

Ayat 33-35: Diampehon Jesus do tangan Na maradophon na marsahiti? Jumolo do "diboan holang sian natorop", asa tangkas diida angka jolma i aha na masa. “Dijullukhon jarijari Na...marsirijur manjama dilana" naeng patuduhon praktek hadatuon naung somal diula ditongatonga ni angka halak parbegu. Sai hira na dilesemi Jesus do angka pangalaho (gestur) si songon i laho pamalum angka sahit. Marhosa godang Ibana huhut ‘manaili tu ginjang’. Naeng ajaran Na angka jolma i paboa sian banuaginjang (Debata Jahowa) do haroroan ni nasa hamalumon sian parsahiton. "Mungkap mal" sada parenta sian banuaginjang laho manotas dalan angka na sompol di pinggol dohot simangkudap ni na ngungu i. Jala tutu masa ma songon i.

Ayat 36-37: Dipopai Jesus angka natorop i unang dipaboaboa angka na masa i ru halak. Dipasiding Jesus do angka roha na paburnangbumang diri. Di hata si nuaeng didok pencitraan. Alai tung so tarbunihon ni angka natorop i do longang ni rohana maradophon angka na masa i. Laos panindangion nasida do mandok nunga denggan saluhutna dibahen Jesus.

3. Panimpuli

Haporseaonta mandok haluaon & hatuaon do binoan ni Jesus sian banuaginjang. Tung sude do taruli sian angka na niulaNa i. Alai pigapiga sian hita sai ngorngot sipata rohanta mandok holan hita do pinaina, pinature ni Jesus. Hape tang sude do hape. Angka na di bagasan parsahiton pe taruli do di Barita Na Uli sian Tuhan Jesus. Tarsurat gabe halak Kristen ibana manang pe dang. Tung so tarambat di angka di bilangbilang ni hajolmaon on do asi dohot holong ni roha ni Tuhanta di portibi on. Tahalashon ma holongNa na balga huhut na so hasuhatan i, asa dipature/dipadenggan luhut gulmit ni ngolunta. Amen.

MANGHALOMOHON PATIK NI DEBATA MENCINTAI HUKUM ALLAH ENDE 2:8-13

 

MANGHALOMOHON PATIK NI DEBATA

MENCINTAI HUKUM ALLAH

ENDE 2:8-13

Huria ni Tuhanta ia buku angka ende on marisihon panghataion ni oroan dohot pangoli ( Mempelai Wanita dan mempelai Laki laki ) na nirahut ni holong nabadia ( Cinta kasih yang kudus),  songonima gombaran ni hubungan ni Debata tu bangsoNa Israel, lapatanna hasososolhot ni Debata dohot bangsoNa di gombarhon songon holong ni pangoli tu boru oroan na satia salelenglelengna. Di Mateus 25:1-13 mansai tangkas do di gombarhon Oroani ima Huria i, jala pangoli i ima Jesus Kristus. Songoni ma hadodonok ni Debata tu Huriai songon holong ni pangoli tu boru oroan na satia salelenglelengna. 

Hamu angka Dongan didok Dr Andar Ismail di bukuna seri“ Selamat bagi Tuhan ” Hubungan Manusia dengan Allah  adalah ibarat hubungan cinta, orang yang saling mencintai mereka seperti orang mabuk kepayang, di rumah maupun di jalan, pagi maupun petang si dia terus terbayang, orang yang sedang jatuh cinta itu menjadi egois dalam arti bahwa yang dicintai nya itu adalah miliknya seorang .Huria ni Tuhanta molo tapadomui dalam konteks hubungan ta tu Tuhani boha tutu nunga tutu songoni? , tongtong do taingot Tuhani jala tahalomohon patikNa di tingki di jabu, di dalan , manogot dohot botari? Jala holan patik ni Tuhani do tahalomohon? Ido na pinaandar ni turpuk on taida ma di ayat 8-9 Ndi, rupa suara ni hasudungan ni rohangku do i! Ida ma, nunga ro ibana maringkat sian angka dolok, marhajingjang di atas ni angka robean Tudos do hasudungan ni rohangku * tu sada hije, manang tu anak ni ursa. Ida ma, jongjong do ibana di balik ni dorpi, mandulo sian jandela, marlinanglinang ibana mandulo sian tarali. Suang songon ido nang angka na porsea i tu Tuhanna. Ingkon songoni do hita marlasniroha jala marinjak injak manghalomohon patik ni Debata, marlojong songon hije laho mamaritahon hatana, unang losok, ai di ida Debata do angka haringgasontai sian HabangsaNa .Marhite jamita on digombarhon do kwalitas ni holong ni Kristus tu bangsoNa na mamolin pola di patudos tu angka bunga na uli na mansai hushus, ima patuduhon holong na satia naso marlaok.

Huria ni Tuhanta di ayat 10-13 ima gombaran na ro ma Debata manjou bangsoNa asa ro bangsonai mandapothon Debata,  asa mulak tu Debata jala marsada dohot Debata dibagasan holong nabadia, na hot rodi salelengnilelengna, ai nunga tingkina bangsoi mulak, jonok jala lam solhot tu Debata.  lobi sian boru oroan dohot pangoli i do  hadodonokta tu Debata , tarida do hadodonok ta tu Debata marhite tangiang , marhite tangiang tapanghilalahon do na mansai jonok hita tu Debata , di bagasan rohanta do Ibana maringan mamboto huhut manghilalahon sude pangidoanta  songon ni dok ni angka endei “Dia hanya sejauh doa”, ( jotjot do sai tadok di tangiangta di banua ginjang pe Ho Tuhan Jonok do Ho di angka na manjou goarMu ) ima patuduhon jonok do Debata di lambungta . Antong mangihuthon Topik ni jamita on “Manghalomohon Patik ni Debata” Aha ma nanaeng soarahonon na tu hita? di Halomohon Debata do angka jolma na tinompaNai,  di boto Debata  do sude na di rohantai alani i tahalomohon ma hataNa, patikNa dohot uhumNa, boha do hita manghalomohon patik ni Debata di 5 Musa 6:4-9 didok :  “Tangihon ma, ale Israel, anggo Jahowa Debatanta i, Jahowa Sasadasa do.Jala ingkon haholonganmu Jahowa, Debatam sian nasa roham dohot sian nasa ateatem dohot sian nasa gogom.Jala ingkon parateatehononmu luhut hata on, angka na hutonahon tu ho sadarion.

Jala ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse.Jala ingkon rahuthononmu angka i bahen partinandaan di atas tanganmu, jala bahen parningotan di holangholang ni matam. Jala ingkon surathononmu angka i tu tohang ni jabum dohot tu panggumbanganmu”

Manghaholongi Debata dohot manghalomohon patik ni Debata, ingkon sian nasa roha, sian nasa ate ate, dohot sian nasa gogo. Manghalomohon Patik ni Debata ndang boi holan di hata alai ingkon mardongan pangulaon dohot pambahenan ima marhite na mangajarhon tu angka anakkon, manaringoti hata ni Debata di sude  inganan jala manurathon angka hata ni Debata di angka sude media panghobasionta  Amen

Sungkun sungkun

1.      Songon dia ma pangauhononta molo naung tadok nunga tahalomohon patik ni Debata?

2.      Nunga taajarhon , tataringoti jala ta ulahon Patik ni Debatai dingolunta siap ari?

 

 

Pdt Budianto Sianturi, S.PAK

 

Pandita HKBP Resort Kisaran

Trina Melati Banjarnahor, AMK

 

Yosepha Sianturi

 Yosepha Sianturi