Jamita Minggu Reminiscere, 16 Maret 2025 “Paidaida Hinadengan Ni Jahowa / Menyaksikan Kemurahan Tuhan” Psalmen 27 : 1 –

 

Konvent Pangula Na Gok Tingki HKBP Distrik XIII Asahan-Labuhanbatu Bahan Sermon Jamita Minggu Reminiscere, 16 Maret 2025

“Paidaida Hinadengan Ni Jahowa / Menyaksikan Kemurahan Tuhan” Psalmen 27 : 1 – 6

HKBP Aek Loba

I.  Patujolo

Pardalanan ni ngolu di partingkian na hatop mubauba on mambahen jolma gok mangadopi ragam ni ketidakpastian, tantangan ni parngoluan na boi mamboan tu hatahuton. Molo ndang hot ojahan ni ngolu na, boi do masa ragam ni haliluon. Di situasi na sisongon on ma ditorangi jala dipaingot hata ni Debata marhite Psalmen 27: 1-6 paboa adong do hagogoon jala panghirimon na manongtong di jolma i, ima Haporseaon di Debata Jahowa. Psalmen on manogihon hita asa hot hajongjonganta di tonga ni angka habahaba na taadopi saleleng di portibi on dope. Jala dipaingot hita paboa Debata do panondang, hatuaon jala partanobatoanta. Mansai balga do asi ni Roha ni Debata na satia mangondingi, mangiringi jala mangalehon hasonangan di angka na porsea di Ibana. On ma hinadenggan ni Debata Jahowa na sai tongtong tapaidaida jala tapujipuji. Turpuk on ima Ende sian si Daud, na marlapatan paboa marhite Psalmen on idaonta ma si Daud namangadopi hatahutonna marhite parsihohotanna tu padan ni Jahowa.

II.  Hatorangan ni Turpuk

a.  Debata do panondangi na manaluhon saluhut hatahuton (ay.1)

Tung mansai ringkot situtu do panondang molo tongon di haholomon. Na boi tubu do biar ni roha molo sai lalap di haholomon i. Digombarhon si Daud do Debata i panondang na manaluhon haholomon na ni adopan ni ibana. Di budaya timur kuno digombarhon do na torang i simbol hatigoran dohot hasonangan. Sabalikna, haholomon i ima gombaran ni angka parjahat na ro mangarongrong ibana nang angka mara na manosak ngolu dohot angka musu na naeng

mangulahon hajahaton. Tudos ma on tu Poda 4: 19 mandok “Ia dalan ni halak parjahat tudos tu na holom marimpotimpot, ndang diboto nasida partuktuhannasida i.” Di Psalmen on dihaporseai si Daud umbalgaan do huaso ni Debata sian ragam ni angka ancaman dohot hajahaton na ingkon niadopan ni ibana. Holan sian Debata do hatuaon na manongtong i. Debata panondang na mangalehon dalan hatiuron jala haluaon mangadopi angka ogaoga. Ai Ibana do partanobatoan na mambohali mangadopi nasa na mambahen hatahuton. Molo nunga Jahowa na gabe panondang, ndang adong be na ingkon sihabiaran.

Dipartingkian sinuaeng on godang do angka ancaman na niadopan ni angka jolma na olo gabe tarboan tu haholomon molo ndang togu panghirimon na tu Tuhan jala molo ndang hot haporseaonna. Lomos ni roha (kecemasan), panahit, konflik di rumah tangga, parsaoran na so denggan di angka na humaliang, akar pahit na jotjot mambahen jolma i mandao sian Debata, ketidakdilan na binahen ni angka parhuaso na so pajongjong hatigoran asa dapotan hasonangan tu dirina sambing, bagian ni haholomon i ma on. Tung songon dia pe bentuk ni ogaoga i (ancaman) sada na tongtong gomos ditiop jala dihaporseai paboa holan Debata do na tuk manaluhon i. Ndang mandok gabe hohom manang gabe mabiar alai marhite sondang na sian Debata dohot haluaon na pinasahatNa ido na patuduhon dalan dia na ingkon sipatupaonta molo tongon mangadopi haholomon asa dapotan hatiuron na mamboan tu haluaon.

b.  Patar do Haluaon Na Sian Debata di Ragam ni Angka Ogaoga nang Mara (2-3)

Dihatindanghon si Daud do Haluaon na sian Tuhan i ndada holan ilusi manang angan-angan sambing. Alai na patar situtu do i di angka ancaman na tongon niadopanna. “Molo tung ro angka parjahat....martinggangan do nasida jala marragean (ay.2), “nang pe marhoronhoron parangan...ndang mabiar rohangku, nang pe hehe parmusuon...sai pos do rohangku (aku tetap percaya)”. Sian struktur kalimat on kemungkinan besar martudutudu tu tentara Saul, bangso Filistin manang songon metafora ni angka hajahaton. Panghatindanghonon on borhat sian angka na naung niadopan ni si Daud. Patar

jala tangkas do taboto na mago do tutu angka ancaman i di ujungna . Molo di Epistel ta gombaran ni hajahaton on didok Paulus do marhite pandohan “musu ni silang ni Kristus” jala hamagoan do ujungna. Didok di Filipi 4: 18-19 “Torop do marpangalaho, gabe musu ni silang ni Kristus.Hamagoan do ujungnasida, butuhanasida do dipardebata, sihailahononna dihasangaphon, angka na di tano on diparrohahon” Sai na ingkon adopan do tutu angka ogaoga ni portibion, angka mara nang hajahataon na jotjot mambahen gabe tubu biar ni roha. Alai na lao mago do angka hajahaton i molo Debata na gabe panondang di ngolunta. Ndada haholomon i be na mambahen hita gabe mabiar, ai ndang tu haholomon pandang situjuonta alai di banua ginjang do sambulonta, sian i do tapaimaima Sipangolu hita, Tuhan Jesus Kristus i (Filipi 3:20).

c.                Paidaida Hinadenggan ni Jahowa ima dalan hamonangan / kunci kemenangan (4-6)

“Naeng mian ahu di bagasan joro ni Jahowa....”, ayat on ndada holan na mandok mangalului inganan parlinggoman manang partabunian alai parsaoran na manongtong rap dohot Jahowa. “Mian di bagas joro” gabe sada tindakan nyata paidaida hinadenggan ni Jahowa i. Di halak Israel pasca Pembuangan, Bagas Joro na naung dipauli gabe sada simbol pemulihan iman. Jadi, hata “bagas joro” ndada holan martudutudu tu inganan fisik sambing alai sada inganan hadameon (ruang aman/safe space) di tongatonga ni ragam pergumulan hidup. Secara psikologis, adalah kebutuhan dasar manusia untuk merasa aman dan merasa terlindungi dari ancaman fisik, emosional maupun sosial. Debata Jahowa gabe ruang aman mangadopi ragam ni tantangan hidup isarana stres, kecemasan, depresi. Gabe “ruang aman” ala marhite i ma ilalaon hinadenggan dohot hinauli ni Jahowa na mambahen monang maralohon haholomon.

Uli do tutu panghatindanghonon ni si Daud paboa Jahowa do ruang aman i    marhite    hata    “paidaida                                                           hinadenggan         ni    Jahowa  ”

(hinadenggan/kemurahan/no’am = keindahan). Hinadenggan martudutudu tu hamuliaon, holong ni roha dohot haulion ni huaso ni Debata. Jala on ma sumber identitasta na ditompa tumiru rupaNa (1 Musa 1:27). Ai pauboanna do daging ni jolma na lea i, gabe doshon dagingNa na sangap i (Flpi 3:21). Ala ni i ingkon

tama ma hita marsihohot di bagasan Tuhan jala marsada ni roha dibagasan Ibana. Identitasta ndada musu ni silang ni Kristus songon na nidok na di Epistel i, alai si jalo holong dohot asi ni roha ni Jahowa marhite Kristus na naung tarsilang i do. On do na mambahen hita gabe dapotan hamonangan

III. Sipahusorhusoron

Marhamonangan do angka na porsea i molo tongtong mardalan dibagasan asi ni roha ni Debata. Paidaida hinadenggan ni Debata patoguhon rohanta asa unang tarlalap hita mabiar molo ingkon mardalan mangadopi angka haholomon ni portibi on. Taingotma, adong do Debata Jahowa na gabe panondangi di ngolunta, na gabe partanobatoan di hita. Tongtong ma hita paidaida hinadenggan ni Jahowa dibagasan Jesus Kristus na gabe Panondang di portibi on, na mangapuli angka na marsak dohot na manesa dosa huhut ma tadok “Sai ingot ma, ale Jahowa, angka denggan ni basam dohot asi ni roham!” (Reminiscere). Martua mahita molo tongtong tapaidaida hinadengganNa i anggiat lam dipatau hita gabe panondang di portibion, gok di Debata ma ngolunta on angka na hinophopNa. Amen.

 

PHD INA EPESUS 6:10-18

 

                                                                             

                                                                              PHD INA

          EPESUS 6:10-18

Pembahasan 

Roha na Togu di Bagasan Tuhan (ayat 10) 

Sai adong dope na deba na marpangantusion mandok ia molo dung jonok tu Tuhan i, marhite angka parsaoran manang marhite angka tangiang jala togu marhaporseaon tu Jesus Kristus, ndang tagamon be jumpang angka hamaolon dohot ragam ni angka parsoalan di bagasan ngolu ni hajolmaon. Ala ni pangantusion na si songon i, sipata gabe olo do na deba mandele ala tarhirim di angka na denggan songon pangantusion si songon i. 

Hape olo do sipata, ia dung lam dipajonok parsaoranna tu Tuhan i, songon na lam godang do angka parungkilon na diadopi, lam godang muse do angka na olo mambahen rohana gabe gale. Alai asa unang gabe madabu jolma i tu roha na gale dipargogoi Debata do hita marhite HataNa. Jala tandi do hagogoon na sian Tuhan i maralohon angka hagogoon na adong di portibi on. 

Didok Apostel Paulus di ayat 10 " ... gabe togu ma rohamuna di bagasan Tuhan i ... ." Lapatanna ingkon barani do angka na porsea i manghatindanghon Tuhan i di ngoluna jala dipeop ma, na Tuhan i do na margogoihon ngoluna di ragam ni angka hamaolon i. Gabe ndang mura be madabu di bagasan hagaleon, ala gogo na sian Tuhan i do gogo na mangalo angka ragam ni hamaolon i. 

Sian dia ma hataridaanna di ngolu si ganup ari paboa naung manghangoluhon gogo na sian Tuhan i? Ingkon tangkas do tarida i di ngolu parsaoran dohot Tuhan i, ingkon tangkas do panindangionta di Tuhan i ndang gabe mandele jala laos ditadingkon Tuhan i. 

Manolukhon Pahean Sinjata Sian Debata (ayat 11) 

Didok di ayat 11 "Solukhon hamu ma pahean sinjata na sian Debata ... ." Molo tu sahalak soldadu didok asa mamangke pahean nang sinjata nunga be diantusi boasa ingkon pangkeonna i, jala boasa ingkon mamangke sinjata. Pintor diantusi do paboa ingkon paradeonna dirina laho marporang, mangalo angka musu. Jala nda tung pola mangarade diri mamangke angka pahean parporangan nang sinjata molo holan pangkeonna sambing songon i. Muse pe nda tung marporang nasida so pangkeonna angka pahean parporangan nang sinjata molo laho mangalo angka musu. 

Tudos tusi ma tona ni Apostel Paulus di turpuk on. Dipatudos ibana do ngolu ni jolma i songon ngolu na mangadopi parporangan, hinorhon ni i ingkon pangkeon ma pahean sinjata na sian Debata. Boasa pola ingkon pangkeon pahean sinjata na sian Debata i? Tutu di tonga ni ngolunta na marhaporseaon, sai na adong do angka musu, jala na gogo do musu i. Molo tapangke do gogonta sandiri mangalo angka musu i, ndada tolap hita disi. Molo so tapangke sinjata na sian Debata ndang boi talu angka musu i. Musu na nidok na, i ma utiutian ni sibolis. Na gabe sungkunsungkun, aha do pahean sinjata na sian Debata i? I ma ngolu ni partondionta, habadiaonta mangihuthon Hata ni Tuhanta, i do na boi mangondingi hita sian utiutian ni sibolis i. 

Parungkilon ni na Porsea Maralohon Angka Huaso ni Hajahaton (ayat 12) 

Musu na ingkon sialoon na dipatuduhon di turpuk on i ma ndada parungkilon laho mangalo mudar dohot sibuk, alai angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i (ayat 12). Sude angka huaso na dipatuduhon di ayat i, i angka ma huaso ni portibi on na boi mamboan jolma i tu bagasan haholomon. Jala ndang na mura mangalo angka huaso i. Alai asa boi monang maralohon saluhutna i ndada boi hita holan mangasahon hagoonta sambing. Ingkon marhagogoon di bagasan Tuhan i do hita asa boi manghamonanghon parporangan i. Ala ni i molo pe sai ro angka paraloan di tongatonga ni huria nang di ngolunta, ndada sian Tuhan i angka i, alai sian huaso ni portibi on do i. Alai nang pe songon i, ingot ma hita holan sinjata na sian Tuhan i do na boi manghamonanghon hita maralohon saluhutna i. 

Pahean Sinjata na Sian Debata Mangalo Angka na Jat (ayat 13) 

Didok di ayat 13 "Dibahen i, jalo hamu ma pahean sinjata na sian Debata, asa tarbahen hamu mangalo di ari na jahat i, jala hot jongjong dung dipatunduk hamu sasude." Hita halak angka na porsea di Kristus, ingkon tapahot do hajongjongan ni haporseaonta di Tuhan i. Ingkon berjuang do hita mangalo angka hamusuon i di portibi on mangasahon Hata ni Tuhanta. 

Marhohoshon Hasintongan jala Manolukhon Baju Partahanan Hatigoran (ayat 14) 

Haradeon marporang mangalo hamusuon i di portibi on, ingkon do marhohoshon hasintongan di gonting (ayat 14). Molo nunga denggan hita marhohos tanda ni haradeon do i marporang marhite hasintongan. Dia do hasintongan i? I ma parsitutuonta, i ma sian ias ni rohanta mangalo hamusuon i. Ndang mabiar manang gabe mundur sian hasintongan i. 

Marsipatu Pardamean Mamaritahon Barita na Uli (ayat 15) 

Marsipatu ma patmuna. Molo nunga tapangke sipatu lao marporang, i ma hataridaan ni kesiapan laho mangalangka mangalo hamusuon i, ndang be mabiar hita mangalangka. Mangalangka huhut mamaritahon Barita na Uli, ndang mabiar jala ndang ragu. 

Lombulombu Haporseaon nang Tahuluk Haluaon dohot Podang ni Tondi (ayat 16-17) 

Jalo hamu ma lombulombu haporseaon. Lombulombu i ma songon sada pertahanan di diri, mangondingi sian sinjata ni musu manang panah. Lombulombu i ma na dipature sian hau huhut dilapisi muse mamangke kulit ni binatang. Jadi lombulombu i ingkon togu do, asa boi mangondingi diri sian anak panah dohot sinjata ni musu. Aha do lombulombu i? I ma haporseaonta i. Haporseaon i do na paluahon hita, haporseaon i do namangondingi hita sian angka hamusuon na ro sian sibolis na marhuaso di portibi on. Lombulombu haporseaon ni halak Kristen i ma haheheon ni Jesus Kristus sian hamatean dohot hamuliaonNa na di banua ginjang na mangatasi saluhut huaso ni portibi on. Debata do na manjagai angka na porsea di Ibana, jala Hata ni Debata i ma na gabe podang di hita marporang maralohon sibolis parjahat i. 

Jugul Martangiang huhut Dungo (ayat 18) 

Martangiang ma hamu. Apostel Paulus manosohon asa martangiang mardongan sandok pangidoan sian nasa unduk ni roha dohot sian nasa elekelek. Martangiang huhut dungo jala jugul tumangianghon saluhut angka na badia. On ma na pataridahon di angka halak na porsea, anggiat marhite sian i asa dijugulhon ma martangiang, lapatanna ndang holan parsahalian, ndang mansohot, jala marpanghirimon na ingkon pasahaton ni Debata do saluhut angka na tapangido i marhite tangiang. 

Marhiras ni Roha Pabotohon Hahomion ni Barita na Uli (ayat 19-20) 

Apostel Paulus pe, tongtong do ibana martangiang tu Tuhan i asa dipargogoi laho pasahathon hahomion ni Barita na Uli i, naung paboahon tu hita nunga be sada halak Jahudi dohot halak na so Jahudi (non-Jahudi), gabe sada huria na imbaru, sada daging di parsaoran na di bagasan Kristus. Holan Debata do partanobatoanta. Di bagasan Ibana do jumpang hita haluaon, songon si Paulus na martangiang mangido tu Tuhan i asa dipargogoi ibana manghatahon HataNa i, nang pe tarrante ibana. Alai pos do rohana di Tuhan i, na so tadinghonon ni Debata ibana molo pe marsitaonon angka naposoNa, i ma angka na porsea tu Ibana. 

Kesimpulan dan Refleksi 

Marhite naung dipasahat Apostel Paulus sada tudosan di angka na porsea songon na mangadopi parporangan jala diparbohali marhite pahean sinjata ni halak Kristen, sasintongna nunga singkop jala nunga rade be hita laho mangadopi parporangan i. Ai nunga diparbohali Tuhanta hita marhite pahean sinjata i. Boha do tu hita nuaeng, nunga tapangke sinjata na sian Debata mangalo angka hamusuon, maralohon angka huaso na adong di portibi on? Nunga gomos hita martangiang songon Apostel Paulus na manongtong ibana martangiang pajonok dirina tu Debata nang pe marsitaonon ibana? 

Ingkon lam tapajonok do dirinta tu Debata asa lam margogo hita laho mandalani ngolu di portibi on. Unang mabiar, jala unang gabe sarombang hita dohot portibi on molo mangadopi angka na masa hita di ngolunta di portibi on. Ingkon porsea do hita, na donganan ni Debata do hita mangadopi saluhut angka na masa si adopanta i. Tapangke ma pahean sinjata na sian Debata. Ala ni i unang ganggu be roha nang pingkiranta. 

 

BAHAN SERMON MINGGU PASKAH I (20 April 2025) TOPIK : INGKON HEHE IBANA SIAN NA MATE (YESUS BANGKIT DARI ANTARA ORANG MATI)

 

BAHAN SERMON MINGGU PASKAH I (20 April 2025)

TOPIK : INGKON HEHE IBANA SIAN NA MATE

(YESUS BANGKIT DARI ANTARA ORANG MATI)

Ev : Johannes 20 : 1-10                                                                     Ep : Psalmen 115 : 9-1

I.                   Pendahuluan

                     Paskah ima pesta na tumua di halak Kristen. Didok Paus Leo (440-461) mandok ringkot ni ulaon Paskah umbahen na didok festum festorum-perayaan dari semua perayaan.

                     Di Padan Na Robi dohot di Padan Na Imbaru, hata “Paskah” adong didok 80 kali, manggombarhon hinaringkot ni pesta Paskah di ibadah ni Israel Kuno dohot di ibadah di partingkian on. Piga-piga hata na dipake mandok paskah ima, di Bahasa Latin páscha, Yunani : paskha, Bahasa Aram: pasha, Bahasa Ibrani: pesah jala di Bahasa Inggris: Passover, na marlapatan manalpuho (melewatkan). Adong do muse tradisi na dienet sian mitologi Yunani na mandok easter. Di Israel, pesta paskah ima ari parningotan na haluaon nasida sian parhatobanon Mesir, alai nuaeng hita mamestahon ni Tuhan Jesus Kristus na paluahon hita sian hamatean marhite haheheon ni Yesus na manaluhon huaso ni hamatean (dosa).

            Di dasar ni par-Mingguon nian adong do muatan ni pesta Paskah. Ala sai dipaingot do hita laho manghamauliatehon holong ni Debata na mansai balga laho paluahon hita sian hamatean alani dosa, ala holong ni rohaNa tu saluhut na tinompa. Alani  Paskah ima ari haheheon ni Tuhan Jesus. Marningot na monang do Jesus Kristus manaluhon dosa dohot hamatean, Jala on ma na gabe dasor haporseaon ni Halak Kristen. Songon na tarsurat di 1 Korint 15: 14, “Ai anggo so hehe Kristus sian angka na mate, rumar ma jamita nami, laos rumar ma nang haporseaonmuna”.

II.                Hatorangan

                     Maria Magdalena, na secara harafiah didok Maria Magdalena siala na ro sian Magdala, huta ni parjala (sibuat dekke). Di Lukas 8: 2-3 dipatorang ia si Maria Magdalena ima sada sian parompuan na dohot mangurupi panghobasion ni Jesus marhite hamoraon na. Ibana sahalak parompuan Jahudi na satia mangihuthon Jesus.  Dipatorang do muse na dipalao (diusir) Jesus pitu tondi (roh jahat) sian si Maria Magdalena.

            Ro ma si Maria Magdalena sogot di na holom i dope tu tanoman i, jadi diida ma naung dihindat batu sian tanoman i na dirippu ibana nunga dibuat halak Tuhan i sian tanoman. Marlojong ma ibana manopot si Petrus dohot siscan na sada nari paboahon na masa i. Jadi borhat ma si Petrus dohot sisean na sada nari tu tanoman i jala tong dang be di ida Tuhan i disi. Gabe gok halongangan ma rohanasida jala tahuton. Alai disi ma unokia, naung dipabalik Tuhan i lapatanni hamatean. Apa yang dulu diangggap sebagai akhir yang menakutkan, nuaeng marhite Haheheon ni Jesus gabe dalan laho bongot tu hangoluan na imbaru. Marhite Jesus, hamatean dang gabe ujung ni saluhutna, alal gabe parmulaan ni ngolu haimbaruon.

Dosa do na mamboan jolma tu hamatean. Hamatean bongot tu portibion alani pemberontakan ni jolma maradophon Debata. Dosa mambahen jolma tarsirang sian Mual ni Hangoluan. Panghorhon i dosa, ima hamatean na ingkon jaloonta. Ro ma Jesus menanggung saluhutna dosa i di hau pinarsilang jala diboan tu hamatean. Dung Hebe ibana, angka dosanta i ditadinghon, terkubur salelengna.

 

Songon na didok Apostel Paulus di 1. Korint 15:55 “Jo hamatean, didia hamonanganmi? Jo hamatean, didia soropmi? Pandohan on, dang holan ungkapan hamonangan ni Jesus, alai dohot do hamonanganta na porsea di Ibana. Marhite haheheonNa, ditaluhon Jesus do dosa dohot hamateanta. Kubur kosong gabe tanda, ia manang aha pe na tahabiari, hamatean nang basalaan, dang be marhuaso tu angka naporsea. Di tingki diida si Maria Magdalena tanoman i, responna parjolo dang na marlas ni roha. Dang manigor mangantusi ibana ia naung Hehe Jesus i. baliksa, dirippu ibana na dibuat halak do bangke ni Jesus. Songoni nang si Petrus dohot sisaean na sada nari, dang diantusi dope dohot denggan na masa i. Disurat si Johannes ia Jesus ingkon hehe Ibana sian na mate Joh 20:9. Reaksi ni si Maria dohot si Petrus manggombarhon kekhawatiran dohot ketidakpastian di ganup jolma. Sipata, di tingki taadopi angka hasusaan na so hasuhatan ni pingkiranta, responta parjolo ima khawatir manang gabe tahuton. Alai, dang na gabe i ujung ni cerita. Disurathon si Johannes do di turpuk on ia sisean na sada nari marnida gabe porsea 20:8. Atik pe dang singkop pangantusionna tu na masa i, mulai tubu haporseaon dibagasan rohana. Songon sahalak dakdanak na marsiajar mardalan do proses ni haporseaon i. jotjot madabu, alai adong dorongan na mambahen bangkit dohot mangulahon marulak-ulak, gabe boi mardalan.

Haporseaon i dang selalu siat di pingkiran, bahkan jotjot tubu di tonga-tonga ketidakpastian. Ditingki humaliangta dang be bersahabat jala dang taboto aha do na naeng bahenon ni Debata, disi ma haporseaonta di uji jala dipargogoi. Laos gabe on ma tona Barita Na Uli, bahwa sekalipun kita berada di tengah kebingungan Tuhan sedang bekerja dan iman kita sedang dipupuk. Jotjot do hita naeng mangalapati jumolo saluhut na masa andorang so porsea. Alai kisah Maria Magdalena patuduhon ia haporseaon jotjot mangalumbahon pangantusion, Anselmus “Fides Quaerens Intelectum” (Iman Mencari Pengertian). Dang ingkon tapaima asa jumolo tangkas dungi  porsea hita tu Tuhan. Haheheon ni Jesus mangontang hita asa porsea di Ibana, atik pe dang singkop hita mangantusi songon dia Ibana mangula dibagasan ngolunta. Rom 6:4 mandok “Antong, naung tartanom do hita rap dohot Ibana marhitehite pandidion i tu bagasan hamatean, asa marparange hita di bagasan ngolu na imbaru, songon Kristus naung hehe sian angka naung mate hinorhon ni hasangapon ni Amana”. Songoni ma nang hita ingkon mangolu dibagasan haimbaruon. Ngolu na imbaru ima ngolu na diuluhon Tondi Parbadia. Dang be dibagasan hatoban ni dosa hita. Di ngolu siganup ari, tontu taadopi dope angka godaan dohot tantangan, alai ngolunta na imbaru nuaeng marurathon di bagasan Asi ni Roha ni Debata. Haheheon i mangalehon hita kesempatan untuk memulai Kernbali setiap hari dengan sukacita yang baru.

III. Panutup

Dibagasan haheheon ni Jesus do adong panghirimon na mangolu, hadirionNa tuk paubahon ganup situasi. Sian na kosong gabe gok, sian na mate gabe mangolu. Alani i, talangkahon ma dibagasan ngolunta na imbaru on mardongan haporseaon na togu, pos roha ia Tuhan I naung manaluhon dosanta dohot hamateanta. Kristus naung hehe, hita pe rap hehe dohot Ibana.

EVANGGELIUM MINGGU PALMARUM (13 APRIL 2025), PSALMEN 68 : 25 - 36

 

BAHAN SERMON HKBP DISTRIK XIII ASAHAN LABUHAN BATU

EVANGGELIUM MINGGU PALMARUM

(13 APRIL 2025), PSALMEN 68 : 25 - 36

LEHON HAMU MA HAHORMATON TU DEBATA

 

I.     Pamuhai

Adong do ende na mandok “Na sonang au dung na mar Tuhan”. Ende i naung patuduhon, dung na mar Tuhan ahu, dilehon di ahu angka na pinangido ni rohangku, jala lumobi sian i dilehon hamonangan di ahu maradophon manang aha pe. Jadi sonang do au dung na mar-Tuhan. Songoni do gombaran ni turpuk on. Sada gombaran las ni roha ni bangso i na ro Debata di tongatonga nasida, jala na tongtong Debata mandongani nasida, jala marhite i dapotan nasida angka hamonangan. Hamonangan ni Debata maradophon huaso manang hagogoon ni portibi on, songoni nang angka debata na asing. Debata na mangatasi saluhutna.

 

Turpuk on, ima Ende las ni roha alani hamonangan na pinasahat ni Debata, na nilehon ni Debata tu nasida, jala saor nasida rap dohot Debata di tongatonga ni sada parpunguan Pesta na bolon, jala adong di si simbol kehadiran Tuhan (poti parpadanan). Ende pamujion mangolophon Debata na gabe Raja Sasadasa di Jerusalem (Psalmen 24:76, 97-99, Panguhum 4:12, 5:13).

 

II. Hatorangan ni Turpuk

 

a.  Ayat 25-28

Di pesta las ni roha i, manggombarhon pawai kemenangan. Jala bangso ni Debata na manomunomu jala marnida Debata mamongoti bagas habadiaonNa.  Ala diakui nasida, Debata do na mambahen nasida dapotan hamonangan. Disi ma hira na diida nasida bongot Debata tu JoroNa di Jerusalem. Sude manomunomu marhite olopolop dohot suraksurak.  Mardalan ma dijolo angka parende, di pudina parsarune na mamalu doal. Jala sude mangendehon ” Pinuji ma Debata di bagasan luhutan”. Angka na marbaju marende dohot mamalu odap mamuji Debata, songoni nang si Miryam iboto ni Musa dohot Aron, rap dohot donganna na marende di topi ni laut Arung (2 Mus. 15:20, 2 Sam. 6:5). Ende ni angka parompuan i, mansoarahon asa sandok angka na sian mual ni Israel mamuji Debata. Mual ni Israel lapatanna angka jolma na marharoroan sian pinompar ni si Jakob, di goari ma dua marga Israel Selatan i ma sian marga Benjamin, i ma marga ni raja Saul dohot Jehuda i marga ni raja Daud, jala dua marga Israel Utara, i ma Sebulon dohot Naptali.

 

Di tingki Raja Saul dohot Raja Daud di Israel, godang do hamonangan ni Israel maralohon bangso na asing. Songoni nang Sebulon dohot Naptali tarbarita do hasurunganna rade sumeahon hosana tu hamatean laho mangadopi angka musu nasida asa dapot hamonangan (Panguhum 5:18). Sian opat marga i gombaran ni hamonangan maralohon musu, tarsongon hamonangan ni Debata maralohon saluhut huaso na di portibi on.

 

b. Ayat 29-30

Di si ma nasida tongtong pasahat panghirimonnasida tu Debata. Hibul do soara nasida manjouhon : “ Sai pargogoi ma ale Debata na pinatupam tu hami – Kerahkanlah kekuatanMu ya Allah, tunjukkanlah kekuatanMu ya Allah, engkau yang telah bertindak bagi kami ”. Marhite i ma tangkas pangidoannasida, asa tong di patudu Debata hagogoonNa, asa lam marhamonangan nasida. Laos sada pos ni roha do i di nasida, paboa tung na so mabiar do nasida mangadopi musu dohot situasi dia pe, saleleng Ibana na mandongani nasida. Jala diparhatopot nasida do, tung Debata na sun gogo jala marmulia do Jahowa. Alani i dihaporseai nasida do, ingkon sude bangso marsomba jala pasahat silehonlehonna tu Debata.

 

 

c. Ayat 31-32

Udut ni tangiang ni bangso Israel dipangido do asa disonggahi Debata angka buea (dikiaskan sebagai binatang buaya di muara Sungai Nil-Teberau), i ma gombaran ni huaso dohot hagogoon ni bangso Misir na boi mangancam Jerusalem. Jala bangso Israel di sada tingki, ingkon ditanda jala ro marsomba huhut pasahat pelean bangso Misir tu Debata, songon i halak Kus ingkon ro marsomba tu Debata (Jes.19: 21, Sep. 3:10, Psalm 87:4).

 

d. Ayat 33-36

Paboaboa hamu ma di tongatonga ni angka parbegu: Jahowa do raja! Hot ma antong portibi on, ndang tagamon humordit, uhumonna ma sogot angka bangso di bagasan hatigoran (Psalm 96:10). On ma sai tongtong lohot di roha ni halak Israel. Ditogihon parpsalmen do sude angka harajaon na di portibi on mamuji Tuhan jala mangalehon hahormaton tu Debata. Debata ima Raja di saluhut bangso na di portibion, talup do pamujion dohot hahormaton pasahaton tu Debata, ai hamuliaonNa do gumomgom Israel, jala di banua ginjang sahali do hagogoonna. Songkal do Debata (Dahsyat) ro sian inganan angka na badia, Debata ni Israel do Ibana silehon hagogoon dohot hamuliaon tu bangsoNa i. 

 

III. Panimpuli

·        Turpuk on manggombarhon sude bangso i dohot di bagasan sada arak-arakan laho mangendehon hasangapon ni Debata, hamonangan na sian Debata. Menyanyikan kehadiran Tuhan di tengah-tengah umatNya. Songon gombaran ni parmingguonta di na marsaor hita dohot Debata, pajumpang dohot Debata marhitehite pamujionta, tangiangta dohot hata ni Debata na tatangihon, disi ma godang dapot hita pasupasu, hasesaan ni Dosa, hagogoon di na mangadopi ngolu siganup ari dohot hamonangan maradophon saluhut angka tantangan na masa.

 

·        Turpuk jamita di minggu palmarum on ima manomunomu parningotan ari hamamate dohot haheheon ni Tuhan Jesus. Naeng ma nian sipatupaonni angka na porsea asa tangkas mamujimuji Debata naung mangalehon angka hamonangan di hita, na mangalehon pangurupion tu hita. Paposhon rohanta asa tung unang mabiar hita mangadopi parporangan rohani nang tantangan portibi on. Jala sai tajouhon ma di rohanta joujou dohot suraksurak ” Hosana, Hosana ” palua ma hami nuaeng, jala pargogoi ma ale Debata na pinatupam tu hami.

 

·        Tontu hamonangan ni Debata di Padan Narobi songon na tarsurat di turpuk tarida do i marhitehite Tuhan Jesus Kristus. Di epistel minggu on mansai ampit do berengonta keteladanan ni Jesus uju na hundul Ibana di atas halode mamongoti Jerusalem uju masa pesta paska Jahudi. Laos i do gombaran tu parsuruanta do i ima mamboan hadameon di tongatonga ni portibi na gok partontangan on. Asa angka siboan dame halak Kristen i di ganup inganan dohot tu ise pe marsaor.

 

·        Marlas ni roha do bangso Israel ala hagogon dohot hamonangan ni Debata Jahowa, tanda ni las ni roha i ima marhite na mangelehon hahormatan tu Debata. Boha do rumang ni hahormatan i ima marhite ngolunta na tongtong di bagasan lomo ni roha ni Debata, manjaga hamuliaonNa di ngolunta.

 

JAMITA EPHORUS HKBP , JAMITA TAON BARU 1 JANUARI 2025 Mateus 25:24-38

 

JAMITA TAON BARU 1 JANUARI 2025

Mateus 25:24-38

Apala di bona ni taon on tung sian rohanta parbagasan i ma hita mamuji Tuhanta i. Dipabongot hita tu taon na imbaru on ndada ala burjunta, gogonta, hamaloonta, manang sinadonganta. Tung sian haburjuon dohot holong ni roha ni Tuhanta i do. Na adong dope sangkap na uli sian Tuhanta i umbahen diloas hita mangolu jala bongot tu taon na imbaru on. Las ma rohanta nuaeng dibagasan Tuhan i.

 

Taparungkilhon do na sipata dibagasan langgus ni roha na deba mandok “ise pabotoboto na adong surgo i, so ise hea dope sian i, tarmasuk angka parhalado i”, ninna rupani. Sai unang ma adong sian hita na masuk tu horong parlanggus ni roha dohot pargaiton na mangait tu dosa na songon i. Jala molo adong donganta na mandok na songon i dibagasan holong dohot halambohon ma hita paingothon.

Hata ni Tuhanta do na mandok adong surgo manang ngolu salelenglelengna jala adong do api naroko. Molo Tuhanta mandok, hata haposan do i. Mamungka sian Mateus bindu 24 tolhas tu bona ni bindu 25 on dipaandar do hinaringkot ni ngolu na ingkon sai jaga manang jamot, asa marbisuk mangadopi angka na masa dohot manulak nasa na mangaliluhon, asa hot marhaporseaon, asa marpambahenan na denggan na marmual sian haporseaon di Tuhan i.

 

Tuhanta na mamanghulingi angka siseanNa i najolo, laos Ibana do mamanghulingi hita sadari on marhite umpama on. Ndang tarsirang umpama songon na tabege di turpuk jamita on sian dua halak nari, i ma na manjalo lima bagian dohot na manjalo dua bagian.

 

Ia tuan na nidokna di umpama on martudutudu tu Tuhan i do i. Nuaeng tatangihon ma jolo pandok ni Jesus tu dua halak na manjalo lima bagian dohot dua bagian. Tu duansa nasida didok: “Taho ma i, ale naposo na denggan roha jala haposan…”. Ndang godang ni pangomoan diida Tuhan i, ndang godang ni na niula na rumingkot diida Tuhan i. Ai ndang didok “mansai malo do ho manggandahon”. Ndang didok “mansai godang do dapotmu”. Ndang i didok! “Dengan ni roha dohot na haposan” do sintuhuna. I do na rumingkot di Tuhan i.

 

Na songon i ma na so jumpang di na manjalo sada bagian i. Sada bagian on didok di hata Indonesia “satu talenta”. Molo di hatiha i sada talenta marasam ma i hira gaji ni sahalak pangula saleleng ni 6000 ari, manang sarupa tu gaji marhira 19 taon. Jadi dohonon mansai godang do nang pe sada bagian manang satu talenta. Molo martimbanghon tu na lima bagian i idaon hira na otik na sada bagian. Alai taida ndang didok dilehon tuan i tu sahalak

“saotik”. Sada bagian do didok. Lapatanna, na sada bagian i pe sasintongna tung godang do i.

 

Boasa marasing sian na sada tu na sada dilehon Tuhan i? Adong lima bagian, adong tolu bagian, adong sada bagian. Ringkot do on mansai tangkas di hita. Didok, “ganup marguru tu gogona”. Jadi, marguru manang hombar tu panandaon ni Tuhanta do si lehonlehonNa tu hita be.

 

Marojahan tu hata ni Tuhanta di turpuk on, adong ma sipasidingon di ngolu on. Ia na manjalo na sada bagian i marsidalian do jala pasintong diri. Songon pandohan ni halak Batak, “Horbo ni padangbolak manjampal di balian, molo so disi roha godang do sidalian”. Dia do didok Tuhan i tu angka na songon on? On ma: naposo na jahat roha jala na losok. Gari na ringgas alai jahat ndang mararga haringgason. Lamu mardomu ma roha na jahat dohot halosohon.

 

Hamu angka dongan hinaholongan ni Tuhanta.

Mangasahon asi dohot holong ni roha ni Tuhan i naeng siding hita sian jahat ni roha dohot halosohon. Naeng jumpang ni Tuhanta i hita gabe angka naposo na denggan roha jala haposan. Ah ndang tolapniba on. Di portibi on dope iba. Daging dope iba, ndang surusuruan, ninna na deba sipata dalan mangampini diri. Naeng tangkas di hita: ia hata ni Tuhanta on tu hita jolma do ndang tu surusuruan. Tu hita na di hasiangan on dope, ndang tu angka na di surgo.

 

Atik tung sipata manang tongon jumpang Tuhanta i hita nuaeng sogon “naposo na jahat jala na losok”, tama dibagasan unduk serep ni roha tasolsoli dirinta. Di adopan ni Tuhanta na basa i, na tongtong raphon hita sahat tu ombas on! Boi ma marhite na sian nasa rohanta mangendehon songon hata ni endenta i: Husolsoli do rohangku na gok dosa i tongtong. Ai godang ariaringku na hubahen ambolong.” Alai mangihut ma semangat na imbaru laho marhaseanghon tingki binasahon ni Debata dohot nasa silehonlehonNa songon angka “naposo na denggan roha jala haposan” hita.

Siala ni i, on ma jolo naeng tung apala tandap di rohanta be. Tapasonang jolo rohanta satongkin. Unang mampar jolo pingkiranta tu na asing. Adong songon on na mansai ringkot suan tu rohanta be saonari:

 

Ditanda Debata do hita tangkas. Sude hita ganup marsada-sada. Sian Debata do ngolunta on.

Sian Debata do nasa silehonlehon na uli na dong di hita be nuaeng.

Sian Debata do gogo mandalani ngolu on dohot patupa na boi siulaonta. Sian Debata do tingki jala dibasahon i tu hita.

Jadi, tung apala singkop do dilehon Debata tu hita.

Tung tangkas ma jolo tarimangi on di bona ni taon on jala taparata dibagasan sataon bolon on di na diloas Tuhanta dalananta tu jolo. Molo tangkas taokui jala tahaporseai tung apala sian Tuhanta do singkop dilehon di hita sian asi ni rohaNa, dihorhon i do di hita na umotikna na opat na mangihut on:

 

Parjolo, las ni roha na polin. Mansai ringkot do las ni roha di ngolu on. Ala ditontuhon las ni rohanta dibagasan Tuhan i do nasa panggulmiton ni ngolunta. Kadar sukacita kita di dalam Tuhan menentukan seluruh gerak hidup kita!

 

Tajamothon ma asa unang adong mambuat las ni rohanta di partingkian on. Sada sian na boi paorothon las ni rohanta di zaman on, i ma na ginoaran brain rot (habusukon ni utokutok). Ndang na mandok utokutok i busuk, alai na patuduhon hasesega ni parrohaon dohot pamingkirion ala pagodanghu pasuda tingki manjaha media sosial rupani na so marguna jala na so sipanumpak tu na uli, gariada na mambahen soratan manang humasusa pingkiran, gabe marsak roha, sahat tu na mambahen mandate, patubu sogo ni roha, muruk dohot na suman tusi. Naeng sai dibagasan las ni roha dohot hadameon hita.

 

Paduahon, pujipujian tu Debata. Ndang tama hita mamuji diri manang mangahut hasangapon tu diri, ai tung tangkas do tahaporseai holan asi ni roha ni Tuhan i do ngolu on dohot nasa na adong di hita. Halak na mamuji Debata do na martua.

 

Patoluhon, sabam ni roha. Manjalo diriniba sandiri dohot na adong di hita dibagasan sonang ni roha. Ndang sanga mangiburu tu na asing. Gariada las roha molo tarpasupasu dongan jolma. Ndang olo tarunjun mambandinghon diriniba dohot dongan. Ai matua hasusaan do molo sai girgir sasahalak mambandinghon dirina tu na asing. Boi masa do ndang las roha ni sasahalak di ngolu on ndada ala na hurangan alai ala diida di donganna godang jala marsigorgor hagiotna asa songon halak na asing.

 

Paopathon,taronjar roha patupa na uli na denggan, mamelehon na umuli tu Debata na marmual sian panandaon na tangkas di Debata dohot nasa pambahenanNa di ngolunta.

Nasa pambahenan na nionjar ni haporseaon tu Tuhan i, tarida do i marhite hajuarabagason na sintong di na pinalumehon ni Debata. Nasa na denggan na boi patupaon patupaonta ma i marojahan tu ojahan “antara aku dan Tuhan”, “parsaoranhu dohot Tuhan”, ndada asa diboto jala dipuji halak. Molo taurupi angka dongan na so mardihadiha, na marungkil, tarmasuk do i hataridaan ni “na denggan roha jala haposan” hita.

Saleleng mangolu hita sai adong do na boi tapatupa. Gari haradeon manangihon dongan na marsak manang na marhoi pe boi do i rajuman songon pelean na arga.Ndang adong sibahenon ni tangan, nanggo manangianghon dohot manungkoli di hata na mangalambohi dohot patogu haporseaon.

 

Laos hombar do usahanta patupa na denggan on tu transformasi na gabe joujou tu hita sandok HKBP di taon 2025 on dohot tu angka taon na mangihut. Haradeonta dipaimbaru Tuhanta i ngolu nang panghobasionta tu na lobi umuli dope. Sada sian i naeng pangkeon ni Tuhanta hita “hadir sebagai bagian dari solusi bukan memperparah apalagi sumber masalah” di portibi on. Isarana, mangihuthon angka pande bisuk, sada sian sampulu ancaman global (saportibi), na umbalga i ma hasesega ni natinompa ni Tuhanta on. Dohot ma hita pangkeon ni Tuhanta mangaramoti tano dohot portibi nampuna ni Tuhanta on jala diloas hita mian sangombas di hasiangan on.

Martua situtu do hita ala balga HKBP on dibahen Tuhanta na marruashon marhira 6,5 juta halak. Molo ganup hita “na denggan roha jala haposan”, ndang holan tu Indonesia on pangontakna alai boi do dihilala portibi on panghorhon na uli pinatupa ni Debata marhite hita songon hataridaan ni na denggan roha jala haposan hita. Gabe marsinondang Tuhanta i marhite huriaNa HKBP, marhite ruas nang parhaladoNa.

 

Asa on ma na mansai ringkot hangoluhononta di tingki parasian na binasahon ni Tuhan i tu hita.

·         Tangkas ma tatanda jala tahaporseai Debata dohot nasa silehonlehon nang pambahenanNa tu hita be.

·         Martangiang ma hita sian nasa roha jala dibagasan haporseaon na togu tu Tuhan i.

·         Marlas ni roha ma hita dibagasan Tuhan i, mamuji goarNa jala dibagasan semangat na marsigorgor mandalani ngolu on.

·         Mangula         sadenggan-dengganna          dohot         sasintong-sintongna mangasahon dohot dibagasan parsaoran dohot Tuhan i.

Angka i do tanggung jawab manang sipatupaonta, anggo na mambahen parbuena Tuhanta do. Jala nasa na marharoroan sian Tuhanta dihorhon i do di hita dame dohot las ni roha di ngolu on. Uli tohapta di hasiangan on nang di hangoluan sogot i. Amen.

Pearaja Tarutung, 1 Januari 2025 Ephorus HKBP,

Pdt Victor Tinambunan