PANGUHUMAN NA PARPUDI, Sepania 1 : 1 – 7

 

                                                       ( Pdt Budianto Sianturi, S.PAK)

MINGGU, 23 NOVEMBER 2025

UJUNG TAON PARHURIAON

 

 

1. Marende     : BE No. 562 : 1 - 2              “HAMUNA ALE JOLMA”

2. Votum         : A.XVIII.A.1 – D.XX.75

3. Epistel         : Pangungkapon 20 : 11 – 15

4. Marende     : BE No. 25 : 1      “HATAMI ALE TUHANKU”

5. Jamita         : Sepania 1 : 1 – 7

 

PANGUHUMAN NA PARPUDI

 

Dongan Sahaporseaon  !  Molo di sungkun nuaeng tu hita. Porsea do hita adong tingki ari panguhuman na parpudi? Alusna, porsea, jala turpukon patoranghon Panguhuman na Naparpudi. Antong songon dia do panguhuman na parpudi i?. Ari panguhuman na parpudi i, i ma ari haroro ni Tuhanta Jesus na paduahalihon lao manguhumi jolma; angka na porsea i dapotan hangoluan salelenglelengna,  jala na so porsea i manjalo uhuman saleleng ni lelengna. Ndang adong ise pe hita  naumboto tangkas sadiharina , alai pasti do i ro. Songon panangko borngin do haroroNa (pat 2 Petrus 3 : 10) ndang adong na umbotosa. turpuk on paboahon ari ni Tuhan i  “ nunga jonok” alai ndang apala dipaboa tingki sadiharina unang marnalemba, lalap holan manarihon na ringkot di pardagingon, alai lupa manarihon na ringkot di tondina.

Dipalumba Panurirang Sepania do bangsoi ,  ala nunga dao sian lomo ni roha ni Debata. Masa do disi angka baoa na marhanalom tuak huhut mandok dibagasan rohana : ndang adong na denggan manang na jat bahenon ni Jahowa (1 :12 ). Pangisi ni Juda dohot Jerusalem  nunga “mardua roha, dohot mardua haporseaon” ima marhite  na manomba tu Debata Jahowa huhut marsomba tu Baal dohot Malkom, siula hajahaton, patupa pargasipon dohot lan ulaon na maralo tu lomo ni roha ni Debata. Ala ni i,  dilumbahon panurirang Sepania  do tu nasida: molo so marhamubaon nasida, ingkon ro ma uhumon ni Debata Jahowa tu nasida. SiaphononNa do pasipasi ni Baal dohot goar ni angka pangarunding dohot angka malim dohot angka na marsomba tu angka parangan ni langit, na marmangmang tu Jahowa huhut marmangmang tu Malkom. Manguhum angka jolma na marbalik sian Jahowa, angka na so mangalului Jahowa jala ndang marpanungkun tu Jahowa asa  “mangalului Jahowa jala mangalului hatigoran dohot haserepon, anggiat diondingi nasida di ari pangarimason ni Jahowa “ (2 : 3 ). Jala molo tapaihuihut pardalanan ni ngolu ni bangso i,  di uhum Debata do bangso na tangkang tu habuangan marhite assur dohot babel alai laos Debata sandiri do tong paluahon nasida sian habuangan i.

“Hohom ma hamu maradophon Tuhan Jahowa” Molo di dok hohom ndang mnamarlapatani i gabe pasif manang mauhom ma nasida paimahon haroro ni Tuhan i , manang gabe so mula ulaon dohot so patupa na denggan, alai ingkon gabe pahohom diri ma lao mangulahon na jat ( Berhenti dari perbuatan jahat dan dosa ) jala rade manjalo Tuhan i. Hohom na nidokna dison rade manjalo uhuman hombar tu ulaonna na jat, ndang gabe mamintori diri tarlumobi mangalului sidalian manang manalahon angka na asing. Hohom na marlapatan do tong bulus manjalo keadilan ni Debata na manguhum jolma parjahat jala porsea di asi ni roha ni Dabata.

Nuaeng di paingot Turpukon ma hita, Ia Debatanta i Debata partigor jala na adil, Namanguhumi jolma saguru tu naniulana, (Yoh 5:39) angka siula hajahaton hehe do tuhamatean sisalelngnilengna, alai  naporseai dohot sibahen harigoran hehe ma tu hangoluan si saleleng ni lelengna. Tajalo ma Jesus gabe sihonghop jala sipalua hita , binsan dilehon dope hosa hangoluan tu hita talului ma Jahowa, taradoti ma angka uhumNa , talului ma hatigoranNa, jala tongtong ma hita d bagasan haserepon. Tapangke ma tingki na pinasahat ni Debata tu hita sadenggandengganna. Tajamothon ma dirinta, mangolu ma hita hombar tu lomo ni rohaNa. Sigop ma hita paima haroroNa i, hot jala somubauba , Taingot ma Hata ni Endenta 802 :1 na mandok  “ Pangke Tingkim saonari dapothonma Tuhani unang godang sidalian ingot Jempek Ngolumi”  Lagu Rohani “ Hidup Ini Adalah Kesempatan” Saluhutna jolma ingkon rade, unduk tu Debata jala marhatopothon : Ibana do Tuhan na tutu jala paruhum na tigor. Rade ma hita Managam Ari ni Tuhani , Nunga jonok Panguhuman na parpudi i  marhamubaon ma hita , Unang be langgus jala lemba hita , taeahi ma ngolu na marhabadiaon dao sian hajahaton , Taingot ma pandohan “Patejora” Pate mar Tuhan,  Jora Mardosa.  Mateus 3:2 “Pauba hamu ma rohamuna ai nunga songgop harajaon banua ginjang i” Rade, Tagam , Hobas jala Hibas, Amen

Diskusi :

a.      Ala nunga Jonok Ari ni Tuhan i “Ari Paruhuman Parpudi” Songon di ma pangaredonta laho managami?

b.      Aha do di pangido Debata sian ngolum binsan tingki ari parasian dope

6.    Marende   : BE No. 258 : 1 + 4 “SAI HUTUJU”

7.    Tangiang  : Sian ruas na ro

8.    Marende   : BE No. 539 : 1 + 3 “SAI HUTAGAM DO TUHANHU”

9.    Tangiang  : Sian na manjabui

10.  Marende   : BE No. 464 : 1 … “HUBOAN MA DIRINGKU”   (Pelean)

11.  Tangiang Ale Amanami – Pasupasu.

Pdt. Budianto Sianturi, S.PAK

(Pendeta HKBP Resort Kisran)

I Johannes 4 : 7 – 12 DIHAHOLONGI JAHOWA DO SALUHUT BANGSO

 MINGGU, 16 NOVEMBER 2025

XXII DUNG TRINITATIS

 

1.    Marende       : BE No. 187 : 1 – 2          “DENGGAN DO PANOGUM”

2.    Votum          : A.XV.A.3 – D. XIII.48

3.    Epistel          : Maleaki 1 : 1 – 6

4.    Marende       : BE No. 467 : 1 – 2          “ASI NI ROHAM HUPUJI”

5.    Jamita            : I Johannes 4 : 7 – 12

 

                                                               HKBP KISARAN KOTA

DIHAHOLONGI JAHOWA DO SALUHUT BANGSO

 

Hamu angka dongan na hinaholongan ni Kristus Jesus….

            Molo gabe so dihaporseai do hajolmaon ni Jesus, magopo ma hamamate ni Kristus di hau pinarsilang i ala dietong ndang tutu (pat. 1 Korint 15 : 17). Hape holong ni roha ni Debata na  tutu do na binahenNa tu saluhut jolma. Ndang relevan be (diragukan) holong ni Debata di ngolu ni jolma, molo so tutu do hajolmaon ni Yesus, pagalehon semangat ni ruasNa laho manghaholongi donganna jolma. Jala pangantusion na lipe taringot tu haholongon ni Debata, jala boi do i mambahen sada pangantusion na lipe di na mangulahon holong i. 

            Singkop do pambahenan holong ni roha ni Debata dibagasan ngolunta, ia ala ndang hita na jumolo manghaholongi Ibana, alai Ibana do na jumolo manghaholongi hita dibagasan goar ni AnakNa Tuhan Yesus Kristus (ay. 9, 19). Molo apala tung songon i do holong ni Debata laho manghaholongi hita, ingkon ma nian hita pe marsihaholongan, ala sian Debata do holong i (ai haholongon do Debata), jala ganup na marholong ni roha,  i ma tubu sian Debata jala ditanda do Debata (ay. 7 - 8). Molo masihaholongan hita, mian ma Debata di bagasan hita, jala tipak ma holong ni rohaNa I dibagasan hita (ay. 11 – 12).

            Holong ni roha ni Debata ndang marnida hadirion/ keadaanta, ai haholongon do Debata. Ala nunga tubu hita sian Debata/ targoar anak-anak ni Debata (3 : 9 – 10), Ala ni i, laho memahami makna holong ni Debata di ngolunta, ingkon taida do dirinta ia halak pardosa, gabe objek rimas ni Debata, alai ala ni holongNa, disuru do AnakNa, bahen pardengganan pasaehon dosanta (ay. 10). On ma na tatanda holong agape. Holong agape i ma holong na tutu jala ias (tulus, tanpa pamrih). Kasih yang “sekalipun”; sekali pun/ tung sura rara dosamuna songon abit bunga dapdap manang abit hasumba, bontar do bahenonku songon itak manang songon hapas do muse (Yesaya 1 : 18b). Abit bunga dapdap manang abit hasumba, i ma warna ni abid na mansai rara (warna merah yang kuat dan mencolok), jadi songon dia pe dipaias/ parbasuna (sudah dicuci/ dibersihkan dengan apapun), tarida dope warnana (berbekas). I ma na gabe gombaran ni dosanta, na so tarbasuh/ tarsesa (dibersihkan/ diampuni) agia aha pe dungkhon panesa ni na pinatupa ni holong ni Debata sandiri, ala ni holongNa. Alai godangan dope hita manghaholongi mamangke holong philia, storge manang eros; kasih yang “karena” keadaan  (kasih yang “karena” ;  karena/ ala ni donganku do ho, gabe huhaholongi ho (holong philia); ala ni keluargaku do ho, anakku do ho, gabe huhaholongi ho (holong storge); ala uli ni rupam, ala burju ho tu ahu, gabe hohaholongi ho (holong eros), gabe burju ahu tu ho; HMH “Holong Mangalap Holong”/ holong na marpambuat, bahkan lam ngali do holong i (pat. Mat. 24 : 12b). Ndada holong na sisongon i na pinarsinta ni Debata di bagasan holongta.  Alai holong na diparsinta ni Debata, i ma holong na tutu (kasih yang sempurna, yang tidak terbatas oleh apapun atau oleh siapapun).

Boasa boi lam ngali holong i? Jala aha ma na boi bahenonta asa unang lam ngali holong i? Lam ngali haholongon ni roha di jolma godangan ala : lam rarat na so uhum (meningkatnya kedurhakaan dan keegoisan; Mat. 24 : 12a); pagodanghu manghirim sian dongan jolma, gabe mampangkorhon hacit ni roha dohot pandelean (pat. Pslm 146 : 3), dlna. Asa unang lam ngali holong i : ingkon tabahen ma holong i gabe hadirionta (identitas) songon anak ni Debata (1 Yoh. 3 : 1); tabahen ma holong i mamboan hita tu hamubaon ni rohanta; menjadi lebih sabar, lebih lembut dan lebih menyerupai Kristus (pat. Rom. 13: 8). Jala ingkon boi do holong i mamboan dame dohot las ni roha (Pilemon 1 : 7). Ala ni i, tahangoluhon ma holong i asa unang ngali. Jala ganup na marholong ni roha, i ma na naung tubu sian Debata (anak-anak Allah) jala ditanda do Debata. Songon topik minggu di Minggu jamita on, “Dihaholongi Jahowa Do Saluhut Bangso/ Tuhan Mengasihi Segala Bangsa”. Ala ni i, tapataridahon ma holong ni Debata tu saluhut bangso, marhite holongta tu angka donganta. Amen.

 

Diskusi :

a.       Adong dope sian hita na maol mangulahon/ manghangoluhon holong i? Boasa?

b.       Aha ma motivasita asa margogo hita mangulahon holong i?

 

6.    Marende       : BE No. 203 : 2 – 3  “HOLONG DO ROHANGKON”

7.    Tangiang            : Sian ruas na ro

8.    Marende       : BE No. 206 : 1 + 3  “ NA DISON DO AU TUHANKU”

9.    Tangiang            : Sian na manjabui

10.  Marende       : BE No. 71 : 1 … “BALGA DO HOLONGMI”    (Pelean)

11.  Tangiang Ale Amanami – Pasupasu.

Pdt. Jernita Siregar, S.Th

(Pendeta HKBP Persiapan Resort Agape)

3 MUSA 19 : 9 – 18 MANGARAMOTI DIRI DI BAGASAN HOLONG NI ROHA

 MINGGU, 09 NOVEMBER 2025

XXI DUNG TRINITATIS

 

1.    Marende        : BE No. 10 : 1 – 2  “HUPUJI HUPASANGAP HO”

2.    Votum            : A.XV. A21 – D.XIII. 57

3.    Epistel            : Judas 1 : 17 – 23

4.    Marende        : BE No. 116 : 1 – 2  “DITOMPA HO DO AU”

5.    Jamita             : 3 MUSA 19 : 9 – 18

 

MANGARAMOTI DIRI DI BAGASAN HOLONG NI ROHA

 

Dongan na hinaholongan di bagasan Jesus Kristus. Hata haholongan on, nunga mansai jotjot tabege,  dohot  tahatahon, jala diulahon. Holong  i ma inti ni roha ni jolma, na boi menunjukkan kepribadian ni jolma.  Manghaholongi dongan jolma dohot manghaholongi Debata, ima perintah utama huhut pamusatan ni patik ni Debata. Jadi, manghaholongi Debata dohot manghaholongi dongan jolma,  termasuk do  mangulahon hata ni Debata, ai Ibana do mangaturhon i  sian mula ni mulana.

Diturpuk on, dipaboa do angka sipaingot na sai jotjot diulahon jolma di parngoluon siganup ari. Ay 18 paingothon : ingkon haholonganmu donganmu jolma  songon dirim… secara teori nunga sude mamboto pandohan on di halak Kristen. Alai di praktekna, godang do halak Kristen na so boi  mangulahon i  secara keseluruhan. Molo sebagian, tar miduk do na boi mangulahon i. Nunga lam ngali holong i… jotjot do pandohan on dihatahon na deba. Boi do tarjalo roha , ala dipartingkian nuaeng, nunga godang na berubah.  Mangihuthon perubahan ni jaman, perkembangan ni ilmu, teknologi, lam berkembang ma dohot cara  berpikir ni jolma, termasuk cara manghaholongi. Tutu do maol mangulahon i molo sian dirinta sandiri, ala dang adong jolma na singkop boi mangulahon i. Holan pangurupion sian Tondi ni Debata, marhite haporseaonta, ipe asa boi jolma mangulahon i.

Manghaholongi dongan songon dirinta sandiri, sebenar na ndada sian gogo ni jolma i  boi diulahon, nda holan ala ni haporseaon tu Debata do umbahen na boi ibana manghaholongi donganna jolma. Godang do taida bentuk bentuk manghaholongi  jolma di partingkian saonari, boi do i secara langsung, baik bantuan materi, moril dohot angka pangurupion na boi menyentuh roha ni dongan, merubah parngoluonna, baik secara fisik manang mental.  Alai manghaholongi dongan di turpuk on  ndada ulaon na mar meam-meam, parsahalian manang na bersyarat. Jotjot do halak manghaholongi donganna dengan berbagai syarat, apalagi molo nga berhubungan tu angka parhepengon manang tu angka sinadongan, praktik pinjam dan meminjamkan, balas budi dohot balas jasa, bahkan  boi marujung tu balas dendam.

Alai laos adong do muse na menyalahgunakan angka holong ni dongan na burju jala tulus mangurupi. Adong  na berpurapura kecelakaan, burju roha ni na mamolus, hape nunga adong dongan naeng mamusa na manolong  i. Songon i muse molo adong na ro tu jabu, dijangkon denggan, alai marsogot na i  nunga lintun jala adong barang ni parjabu i na mago, dohot angka bentuk  kejahatan na asing na  “memanfaathon”  ajaran holong ni halak Kristen.  Na deba maminjam hepeng maradu tangis tangis, marsomba. Tiba giliran ditagih, gabe bada do dipungka. gabe parjoraan ma i di angka na mangurupisa, huhut gabe dilema. Mangurupi alai ditipu, dang diurupi alai diingot ma i  ajaran ni Tuhan i. marhite  angka pengalaman na masa di pigapiga halak, naeng tangkas botoonta, mangurupi ingkon tepat waktu, tepat guna, tepat sasaran, asa unang marisuang manang siasia holong na taulahon i.

Aalai naeng dohononna do, holong ni Debata do na tutu na so marpambuat, na murni, tulus jala na pangoluhon. Selagi jolma dope na mangulahon holong i, sai tetap do i marpangantan, marpilih, sebagian bersyarat. Alai marhite  turpuk on, diajari do hita mangasahon haporseaonta dohot holongta tu Debata,  i do pangkeonta alasan lao manghaholongi, asa unang gabe menyesal hita manghaholongi dongan, nang pe dang boi taharaphon na denggan sian nasida. Jala manghaholongi dongan, ima parbue ni haporseaonta do i, ndada asa dibaloshon tu hita songon na tabaen tu ibana, alai ala ni holongta do tu Debata, na memampukan hita mangulahon holong tu dongan jolma.

Alai na rumingkot, molo tung pe dang boi ho manghaholongi dongan jolma, pinomat unang manusai pingkiran ni jolma. Ai dang boi hita mamaksa asa haholongan ni jolma hita, alai hita sandiri do na mangatur, mendikte pikiranta, laho manghaholongi dongan jolma. Dang ala naeng adong jaloonta sian ibana, alai ala naung tajalo do holong ni Debata di ngolunta.  Laos holong Na i  do tapake lao manghaholongi dongan jolma.

 

Diskusi :

a.       Boasa olo hita marhosom tu dongan ? aha do boncir na ?

b.      Songon dia ma ho laho mengatasi i,  asa unang gabe ro angka mara na umbalga hinorhon ni hosom i  ?

 

6.    Marende        : BE No. 715 : 1 – 2  “BALGA DO HOLONGMI”

7.    Tangiang        : Sian ruas na ro

8.    Marende        : BE No. 666 : 1  “INGKON DO BOANONTA BARITA”

9.    Tangiang        : Sian na manjabui

10.   Marende            : BE No. 640: 1 -“HAHOLONGON SIAN”    (P.Pel)

11.  Tangiang Ale Amanami – Pasupasu.

 

Pdt. Patar Hutagalung, S. Th

(Pendeta HKBP Resort Hutabaru)

Jakobus 5 : 12 – 18 DITANGIHON DEBATA DO TANGIANG NI NAPOSONA

 

MINGGU, 02 NOVEMBER 2025

XX DUNG TRINITATIS

 

 

1. Marende     : BE No. 811 : 1 - 2     “DI AU MA HO TUHAN”

2. Votum         : A.XV.A.20 – D.XIII.45       

3. Epistel         : Nehemia 1 : 1 – 11  

4. Marende     : BE No. 743 :  2   “O TUHAN TOGUTOGU MA”

5. Jamita         : Jakobus 5 : 12 – 18

 

DITANGIHON DEBATA DO TANGIANG NI NAPOSONA

 

Dongan sahaporseaon di bagasan Jesus Kristus Tuhan ta i! Surat jakobus on termasuk do on gabe surat katolikhos. Tujuan ni akka surat on, ima laho dipasahat tu saluhut halak Kristen di portibion. Marhite surat katolikhos on ma diondolhon na sahat do asi ni roha ni Debata tu saluhut jolma na porsea, dang holan di haporseaon ni halak Jahudi. Hatihai disurathon on laho manopot akka halak na porsea na adong di saluhut portibion, akka na targasip, akka na tarpasiding dohot akka na diolati tahi-tahi ni portibion. Gomos dipangidohon si Jakobus marhite surat na on asa tang haporseaon ni jolma i maradophon Debata, unang lilu haporseaon nasida jala asa diingot nasida padan na tu Debata. Mansai porlu do hataridaan ni parulaon na ro sian haporseaon. Ido na dipangidohon di turpuk ta on. Porlu do haroro ni tondi na ias dibagasan parrohaon, panghataion nang pangalaho. Unang bonom jolma i di hadosaon nang akka rumang ni pangalaho na so ture. Margabus do jolma na mandok togu haporseaon na alai dang ture parulaon na. Sipalessem do molo didok jolma na ingot ibana di Tuhanna alai dang ingot ibana di hatana. Di bagasan parngoluan na di hasiangan on godang do akka rumang ni parungkilon, gok ni akka siadopan, sipikkiran na sai marganti sorin, partikkian na muba-uba, dohot akka haporluan na lam mandosak. Marhite surat jakobus on diondolhon do asa sude jolma manuan haporseaon di bagasan parngoluanna be. Adong tolu impola na naeng pasahaton marhite turpuk on, ima:

 

Hasatiaon di bagasan Hata (Ayat 12)

Dengke ni sabulan tu tonggina tu tabona, manang ise si ose padan tu ripurna tu magona. Pangalapation na bagas do on taringot tu parngoluan na sai godang marsipalensem, alai dang ditapu parbue ni hata i. Sai dipandok hatana, alai dang dipadasip dirina laho mangulahonsa. Na marpadan do hita on tu Debata. Parpadananta tu Debata do na taulahon di haporseaon ta asa paluaon na hita sian hamatean. Lam gomos haporseaon i, lam asi roha ni Debata laho paluahon hita. Molo di ose sahalak jolma do padanna dohot Debata, hamagoan ma jambarna jala hamatean ma ujungna. Dang jadi sahalak jolma manolon marhite goar ni Debata. Na manghosom Debata do nasida disi. Sai unang ma nean ala ni hata na manolon na haruar sian pamangan ta gabe parohon jea tu parngoluan ta.

 

Hadaulaton di Parngoluan (Ayat 13)

Ngolu na marhadaulaton ima ngolu na mansai ringkot di tingki parngoluan sinuaeng. Molo idaonta na masa sinuaeng ndang adong be biar ni roha ni jolma laho mangulahon dosa. Torop do jolma mangulahon hadaulaton holan hasomalon sambing jala ndang marparbue. Aha do tua (pasupasu) na didapot ni angka na manghangoluhon ngolu hadaulaton. Hata daulat dison marlapatan tongam, jala adong karisma na denggan di ngoluna. Dohot do sude angka pinomparna dapotan tua i. Jala laos diuduti muse tu na mandapot pasupasu sundut ni angka partigor, ima angka pinompar na sai mian di ngolu na marhadaulaton i. Laos diuduti di hamoraon na marlobilobi na so boi habilangan di jabuna, jala hot do hatigoranna (kebijaksanaan) i ro di salelenglelengna. Hadaulaton ikkon badia, jala na daulat ikkon tigor do marroha. Tung na so jadi hurangan manang aha sogot ngolu ni angka partigor manang ngolu ni halak na daulat marroha. Sai na taruli do di angka na denggan sian Jahowa, jala margogo do dagingna dohot tondina laho mangoloi Jahowa. Taida ma ngolu ni si Abraham na sai tongtong manghangoluhon hadaulaton di adopan ni Jahowa.

 

Parale-aleon dohot Debata (Ayat 14-15)

Di bagasan parale-aleon dohot Debata do mardomu holong na bagas. Tarida mai sian haradeon ni akka na porsea laho mangulahon parsuruon ni Debata. Dihalomohon Debata do hita asa gabe alealeNa. Hea do tarpingkir hita gabe aleale ni sada Hadirion na tumimbul di hasiangan on? Si Abraham, na ujui digoari do ibana aleale ni Debata. Angka halak na asing pe na disurat di Bibel manghilala paralealeon tu Debata jala dipasupasu do nasida. Saonari pe, torop do halak di liat portibi on nunga gabe aleale ni Debata. Hita pe boi do gabe aleale ni Debata. Maraleale tu Debata dumengganan sian maraleale tu jolma. Ndang hea Debata pajuthon roha ni angka aleale na marsihohot tu Ibana. Gabe aleale ni Debata dumengganan do sian mararta hamoraon. Di tingki mate halak na mora, gabe di halak na asing do hepengna. Alai, angka halak naung manghilala parealealean tu Debata dapotan arta na so boi ditangko manang ise pe. Gabe aleale ni Debata i ma na sun denggan na boi ta hilala. Na laho ajaran ni Debata do hita asa boi martua jala dame; paluaonNa ma hita sian angka haporseaon na sala dohot pangalaho na parohon jea. TangihononNa do angka tangiangmu. UrupanNa ma hita asa manghilala hadameon ni roha dohot marpos ni roha. Diurupi Debata do hamu tingki jumpang hasusaan. Jala, lehonon ni Debata do basabasa-Na tu hita on, i ma hangoluan salelenglelengna.

 

 

 

Ias ni Roha di Bagasan Tangiang (Ayat 16-18)

Jugulhon martangiang! Porlu do nihajugulhon laho mangelek asi ni roha ni Debata, unang dipalua hita sian gonggomanna. Diondolhon turpuk on do sada pandohan “Margogo situtu do tangiang ni partigor, molo dihaburjuhon”. Tung jotjot sahalak jolma martangiang, alai ragam na pinangido na, sursar pikkiran na, jala dang diboto aha na nidok na di bagasan tangiang na be. Nungnga tung torop jolma na martangiang holan laho mangido tamba ni basa-basa sian Debata, so jolo diharinghothon mandok mauliate tu na marhuaso i. Ikkon takkas do roha i manghamauliatehon naung adong i, asa marpangidoan muse tu Debata mangelek asi ni roha-Na. Jala ingot hita di hata na mandok “Pangido hamu ma, sai na lehononna do i tu hamu; lului hamu ma, sai na jumpangan do hamu; tuktuki hamu ma, sai na ungkaponna do i di hamu.”Mateus 7:7. Unang lilu haporseaon i. Disi mangido tu Debata, di papos ma rohana uju mandok “Amen!” na oloan ni Debata do tangianghu! Unang mardua roha, alang las alang ngali. Gomos dipangido di bagasan tangiang na be, asa tarida holong ni roha ni Debata marhite tangiang i. Amen

 

Diskusi:

1.      Dipartikkian saonari on, tung godang jolma na manolon/marpadan (bersumpah) di bagasan goarni Debata. Alai laos diporso manang dilaosi do padan naung binaen nasida i. Aha do mambahen i?

2.      Dia do tagonan, martangiang ditikki hasusaan manang ditikki hasonangan?

 

6.   Marende         : BE No. 487 : 1 + 3 “TUNG HALAK NA MARGOGO”

7.   Tangiang         : Sian ruas na ro

8.   Marende         : BE No. 814 : 1 – 2  “SAI AJARI AU TUHANHU”

9.   Tangiang         : Sian na manjabui

10. Marende         : BE No. 789 : 1-“LULUI HAMU HARAJAON” (Pelean)

11. Tangiang Ale Amanami – Pasupasu

 

 

 

Pdt. Sopar Mangido Tua Manurung

Pendeta HKBP Ressort Persatuan Tanjung Balai

 

Psalmen 84: 1 – 7 RIMPAS JALA HOBAS TU NASA ULAON NA DENGGAN HURIA NA HINAHOLONGAN !

 MINGGU, 26 OKTOBER 2025

MINGGU XIX DUNG TRINITATIS

 

1.   Marende : BE No. 565 : 1 – 2   “LAS ROHANGKU LAO MAMUJI”

2.   Votum   : A.XV.B.2 – D.XIII.59

3.   Epistel     : 2 Timoteus 3: 10 – 17

4.   Marende : BE No. 769 : 1  “TU DEBATA DO PANGHIRIMON ”

5.   Jamita    : Psalmen 84: 1 – 7

 

RIMPAS JALA HOBAS TU NASA ULAON NA DENGGAN HURIA NA HINAHOLONGAN !

 

Huria nahinaholongan dibagasan Jesus Kristus Tuhanta i…

 

Turpuk Jamita (Epistel) on mangarahaon hita asa songon parpsalmon on, na mansai masihol naeng pajumpang dohot Debata, mansai masihol ro tubagas joroni Debata. Ndada holan ro boti songon rutinitas ro tu parmingguon manang tu partangiangan. Ndang ! alai naeng solhot situtu, mardongan, bergaul, bersahabat intim dohot Tuhan do. Turpuk on, on ma ende ni pinompar ni si Korah na pinabangkit gabe si jaga pintu (harbangan) ni bagas joroi. Diboto par Perpsalmen on do, paboa kebahagiaan/lasni roha ndada tarida holan di ruhut parduru, alai naeng tarida di ruhut partondion. Ganup ari do nian nasida manghobasi ulaonni Debata di bagas Joroi. Alai ndang cukup holani. Ianggo apala na membahagiakan ima hasolhotan tu Debata do, mardongan Gomos dohot Tuhani. Sada sosososo doi nang tu hita angka na somal marhalado manang beraktifitas di gareja. Uli doi, alai andul ummuli dope molo tatiru parpesalmen on, nasai masihol solhot tu Debata. Unangma adong manghilala, molo dung jotjot tu Gareja (marminggu, partangiangan) naung solhot Ibana tu Debata. Ai olo do, rot u gareja, hundul, marende, marhobas di garejai, alai anggo rohana ndang disi. Hira hasomalan sambaing doi di ula, manang holan ala roster, manang holan patudu status. Alai joujou nueng, molo jotjot hita tu gareja, naeng mai lam pasiholhon rohanta  sai solhot tu Debata. Mansai uli molo tasorohon hohom di jol oni langgatani manghatahatai dohot Debata.

 

Amanami Inanami nahinaholongan……

Boasa songoni siholni psalmen on solhot tu Debata ? Ala tangkas di boto ibana namansai masihol do nang Debatata laho pajumpang dohot hita. Taida doi sian ayat 4, na mandok, gariada amporik dohot leangleang pe di paloas do maringanan bahkan marjabu di bagas joronai, nang pe mamboan kotoran doi jala rebut mangganggu ibadah. Hita pe tung di halomohon Debata ro tubagas joronai, asal ma ro hita dohot motivasi na sintong, songon nidok ni ayat 3 i. Songoni ma di Rohani Jahowa, sai songon si Maria hita nian, nasai olo hundulhundul manghatahatai dohot Tuhan Jesus. Nang pe gok dosa hita, mansai lomo do Rohani Debata molo ro hita tu lambungna. Ido alana dilehon Debata Anaknai gabe jolma, asa boi mansai solhot hita. Gariada tahe olo Debata mangula marhite Tondi Parbadia asa boi solhot situtu hita dohot Debata jala Debata solhot dohot hita. Hita dibagasan Debata jala Debata dibagasan hita.  Molo songoni antong, songon nidokni parPsalmen 42:2-3 i ma: Songon pangalugunhonni ursa di angka guluan, songoni do pangalungunhon ni tondingku di ho ale Debata. Mauas do tondingku di Debata…. Andigan pe ahu tolhas, asa huida bohini Debata ? Ndang apala hamoraon manang arta, manang na asing di hasiholi Ibana sian Debata. Alai, tung holan naeng pjumpang dohot Debata do. Hira na sosonang do panghilalaanna molo sojumpang dohot Debata. Bayangkon hamu ma songon halak na di padang pasir, na masihol mandai aek. Boi doi songon siholni halak namasihaholongan, tung satongkin pe ndang olo sirang. Boi doi songon siholni halak na masihaholongan, tung satongkin pe ndang olo sirang. Songon endeni si Maia Natalia tahe: waktu makan aku ingat kamu, waktu tidur aku ingat kamu….songoni do parPsalmen on. Dia mendambakan selalu hadir bersamasama dengann Allah. Tung satongkin naian unang sirang ibana sian Debata. Sai naeng di joroni Debata nian torus manorus. Pola di Psalmen 27:4 didok: Sada do naung hupangidohon sian Jahowa, sai ido hulului ! naeng mian ahu bigasan joroni jahowa saleleng mangolu ahu, paidaida hinadengganni jahowa dohot mamingkiri ganup sogot di bagasan joronaai. Jala di Psalmen 143:6 pe didok do muse: songon tano naso maraek do panghalungunhonni tondingku tu ho. Boasa ? tajaha ma di Psalmen 84:11-12, didok: Ai dumenggan do sadari di angka alamanmu sian saribua ari na asing; tagonan do di pangido rohangku si jaga pintu ahu dibagasni Debatangku, asa maringan di angka undungundungni parjahat. Ai Debata Jahowa do matani ari dohot lombulombu, dilehon Jahowa do asini roha dohot hamuliaon, ndang di holit na denggani di angka naburju marpangalaho.

 

Huriani Tuhanta nahinaholongan dibagasan Jesus Tuhantai………

Aha ma na dapot hita molo solhot hita tu Debata jala masihol ro tu joronai ?, parjolo: tajaha ma di ayat 6a:  “martuma halak ia di bagasan hagogoonna”. Hasolhotan tu Debata mangalehon hagoon dihita mardalan tu jolo. Nangpe taboto do, gok do rintangan, hamaolon, sitaonon adopanta di jolo, alai ndang mabiar hita mangalangka molo solhot hita tu Debata. Ai pasti urupanna do jala pargogoanna do hita. I do alana didok endentai………Debata baem donganmi… paduahon, di ayat 6b: “ia roha nasida dibagasan manuju dalan na tigor”. Molo solhot hita tu  Debata, ndang dalananta be dalan na sala. Alai togutoguonni tondinai nama hita mardalan di natigor. Ido alani didok endentai “Debata baen donganmi, molo Debata donganmu nadang tarbaen ho be lilu….”. Molo solhot do hita tu Debata lam burju ma hita mangulahon hatana. Songon nidokni 2 Timoteus 3:10-17 i, tung mansai marguna do hatani Debata laho mangajarhon mengajarkan yang benar, untuk meenegur ddan mambetulkan yang salah,dan untuk mengajar manusia supaya hidup menurut kemauan Allah, akan melengkapi kita dengan sempurna untuk segala macam pekerjaan yang baik. Molo didok, ia siulaonta diu tahun Transformasi on, ima patupa pembaharuan Karakter, sada do dalan asa tarpatupa hitai, ima solhot tu Debata, burju mangulahon hatana. Firman Tuhan mampu membentuk karakter kita. Patoluhon, di ayat 7: angka na umbolus rura partangisan, ibana do dibaen mualna, gabe maruli pasupasu nasida.. Dipardalananni ngolunta pasti do adopanta na hansit,  na mambahen hita tangis. Ido ala didok endentai “Partangisan do hape anggo hasiangan on. Alai molo solhot hita tu Debata, sai apulanna do hita, jala patoguonna asa torus mardalan tujolo.

Alani angka dongan…..taboto ma, ndang adong na asing na boi mangalehon kebahagiaan di hita so holan hasolhoton tu Debata. Naeng ma mapu hita mandok songon ni dokni parPsalmen di Psalmen 73:28: “Alai anggo au, untungku do hasolhoton tu Debata (tetapi bagiku sungguh baiklah berada dekat Allah, Tuhan Allah kujadikan tempat perlindunganku)”. Mansai balga las ni roha, pasupasu, sonang ni roha na dapot hita molo solhot tu Debata. Ai molo dao hitasian Debata, gabe gersangma ngolum, songon tano na mahiang ma ngolum, gok arsak, gok boban, nadokdok mandondoni. Alai molo di hasiholi ibana, ianggoi dapotmu ma godang sinamot, ibana  ma na gabe pangondinganmu, pangurupim, namangalehon  semangat, lasni roha, di ngolum.   Amen.

 

Diskusi:

a.       Aha do Parbue na dapot di najonok ngolunta on tu Debata.

b.      Beha do bahenonta laho Pajonok ngolu on asa solhot tu Debata.

 

 

6.    Marende : BE No. 458 : 1 – 2  “BARITA NA UMULI”

7.    Tangiang : Sian ruas na ro

8.    Marende : BE No. 670 : 1  “TARBEGE SORA NA JOUJOU”

9.    Tangiang : Sian na manjabui

10.  Marende : BE No. 669 : 1 …  ”RINGGAS AU PABOAHON”        (Pel.)

11.  Tangiang Ale Amanami – Pasupasu

 

 

 

Pdt. Robinson Marpaung

(Pimpinan Jemaat HKBP Simpang Dolok Resort Labuhan Ruku)