Album Kenangan

1. Mengikuti Rapat Pendeta HKBP Distrik X Medan Aceh di : Hotel Sibayak Berastagi

   

   Trina Melati Banjarnahor Am.k
   

   
2. Yolia Mau pulang salaman dulu sama ibu guruya

   

   Sekolah Pendeta HKBP Seminarium Sipholon Kunjungan Gereja Ke HKBP Pangururan Kota Agustus 2009
   

   Di Topi ni Tao Tobai..(Foto PJS)

   
3. Tanpa Kasih, semua pekerjaan tidak bernilai. Tetapi sekecil apapun yang dilakukan atas dasar Kasih ia akan berbuah lebat. Sebab Allah lebih memperhatikan besarnya kasih yang mendorong seseorang ketimbang apa yang ia capai ninna amanta Thomas a Kempis

   
   
4. 

   
   

   HKBP Wahidin Baru Medan

   
5. 

   Nyonya Meneer Mau Ke Gereja

Jamita Minggu XXIV Dung Trinitatis 10 November 2013 ( Edisi Hata Simalungun )

Jamita: Minggu 24 dung Trinitatis                            Oleh : Pdt BN Siregar                            

Tanggal, 10 Nopember 2013                                                   Sibasaon : Poda 26: 17-28

Patujolo:

Di buku Rom Bindu  1-11, mansai godang do do dipikirkon apostel Paulus, jala dibaritahon masalah-masalah dogmatika (=pangajaran Kristen na polin). alai  di bindu 12 on diuluhon jana ditogihon ibanaa do huta  Rom asa magulahon pangajarannia i.  Sude parenta na mangamudihon parlagutan i diusahoon ia do manuju tu sada ajakan dohot arop ni roha, halak na porsaya bisa do mulai mancuba anso mangolu marhombar dohot halak na humaliang na, jana anso tongtong manghangoluhon hasintongan hata ni Tuhan. Sian turpuk jamita on, tarboto do bahaso keadaan kota Rom na so mandukung tu parngoluon ni angka halak na posaya tu Jesus di si. Bahkan adong indikasi bahaso bahat halak Kristen diperlakuhon inda wajar jana inda adil, basa ma muse ay.12-15, huhut pamanat ay. 17-21.

Dibagasan situasi hamaolon na tarjadi tu halak Kristen,  gabe dipodahon si Paulus ma, anso martahan halahi dibagasan haporsayaan na sintong tu Kristus, jana tongtong manghaholongi halak na asing. Marsihaholongan ma na sada tu na asing.  Maksudnia ima, holong nada hum pandohan hata sajo, tapi manghangoluhon dohot mangkarejohon na, gabe tujuan na lobi ponting.

Adong do 2 hal na diparjuangkon si Paulus:

Na porjolo, ngolu na adong di parlagutan i sandiri. Diarop rohania do anso marsihaholongan nasida, marsipasangapan di angka pambaenan na denggan, mangurupi halak na marhahurangan, mangalehen inganan di halak napaisolat na mamorluhon, bisa gabe inganan manompang (sonang ma roha manjagit haroro ni halak tu bagas na), saroha sapikiran, tongtong ma martangiang, jana melayani Tuhan.  

Na paduahon, ngolu na marhadomuan tu na marmasyarakat dohot halak na adong di sakitar na. Dipodahon apostel i do anso sobar muda ro hasusaan ni ngolu,  mamasumasu halak namarpanghaciti, jana ulang mamburai, ulang mamaloskon hajahatan dohot hajahatan, manghaholongi musu dohot pambaenan.

Bahat do halak na so lomo roha na mida halak Kristen hara ni angka pambaenan si songoni. Bisa dohonon, angkon do dipatuduhon halak Kristen di ngolu na, bahaso ia porsaya di Tuhan, baru pe ligion jana botoon na, Tuhan mambaen gabe maruba ngolunia. Di son ma payak ni arop ni roha ni si Paulus bahaso halahi gabe pasupasu tu halak na asing, jana padaohon ngolu anso ulang mambaloskon hajahatan dohot hajahatan. Disosoi ia do anso parlagutan i mangalo halak na so lomo roha na mida halak Kristen, dohot cara mambaen angka na denggan jana marpupu patuduhon pambaenan na denggan i.

Di halak na porsayai porlu do adong inisiatif aktif anso adong hadameon, apa lagi anso gabe marpangunsandean ma angka na so lomo roha na tu halak Kristen, gabe marsigantung jana manjagit ma di angka haputusan ni halahi. Hara ni ima, marpambaenan na denggan tu sude halak jana nada mardia imbar, gabe ciri ngolu ni na porsaya tu Tuhan Jesus.

Hatorangan:

Ay. 17, ulang ma baloskon na jat tu na jat

Pandohan na umum, na denggan do bahenon laho mambaloskon angka na jat. Jana madung gabe bagian poda na dipateankon do i tu bangson ta di Indonesia sebagai “nilai-nilai luhur bangsa”. I ma tanda na bangsonta bangso na marugamo jana bangso beradab na membudayahon angka na denggan. “Air susu jangan di balas dengan air tuba”, sada hata mutiha na sangat terjaga anso adong ngolu na dame tu angka ragam na adong di negaranta sebagai bangsa na godang na manjagahon parbedaan na adong; ugamo, bahasa, adat, warna kulit, suku, dohot angka na asingi do pe.  Sebagai halak Kristen, nada pola pemahaman na asing i, hara na muloi do hita sian na menek madung diajarkon do holong, jana anso angka na denggan diparayak di ngolu on, patudos 2 Tim. 3: 15-17.

Semangat ngolu partondion ni halak Kristen na parjolo i pe, anso gabe maduma ngolu na laing songoni do. Jabat do muncul prinsip ngolu na mandok “non multa shed multum”, na bahat i belum tentu denggan-tapi na denggan i bahat sajo do pe. Angka na denggan madung diparmudarkon ha-Kristenon sian na jolo. Par-Masmur pe muda diramoti pangokuan na tu Tuhan, sai tongtong do manyoarahon, paradehon angka na denggan tu angka na manangihon, anso marsangap Tuhan na ni somba ni halak Israel. Anso bangso na sian habincaran lopus tu hasunduton, sian utara tu dangsina ro tu Jerusalem, patuduhon pambaenan na denggan sebagai tanda holong ni Tuhan manongtong ro di salolotnilolot nadung lalu tu halahi jana manghangoluhonsa, Msm. 145: 9; Gal. 6: 10.  Hara ni i ma porlu disoarahon sada tanda ngolu ni halak na porsaya laho mangadope ragam ni na masa na so denggan, marpambaenan nadenggan ma di parayak anso gabe pasupasu ngolu on tu na asing.

Ay. 18, ngolu na dame tu sasude na

Pambaenan na denggan cenderung do jana pasti bisa mangamudihon, anso angka na jat nada menggerogoti situasi dohot keadaan ni ngolu hara ni angka parbedaan. Parbedaan, jumojjot do mambaen tarjadi parsalisian, porang, teror, hagunturon, hakorason, pambaenan na so adil, pangayahion, parmusuon, hotel (hosom, olat, teal, elat, late), gutgut, jana madung gabe virus na maol situtu sibanterason. Sude pangalaho hara ni parbedaan na di ginjang, madung dimasuhi virus on di halak Kristen manurut turpuk on. Hara ni ima, marporang do tondinta anso patuduhon pambaenan na denggan anso gabe jumpangan ngolu na mardame. “Civic pacem para bellum”, ninna hatiha i, sanga ise na marhagiot adong dame-angkon rade do masuk tu porang. Porang na ni karejohon saonnari, ima mangalo hagiot ni sibuk na so manongtong, tapi tondi na tongtong parayakhon na denggan goaron ma halahi gabe dakdanak ni Debata si oban dame, Mat. 5: 9. Sebagai dakdanak ni Debata anso gabe pasupasu ngolu na tu sude halak, mardame ma ngolu na nian tu sude halak, anso ulang hona uhum ia di ari sogot.

Ay. 19-20, ulang mambaen pambaloson, angke Tuhan do nampuna ari pambaloson i

Mambaloskon aha na dibaen ni dongan sanga na nibaen musu, angka na jat tu dirinta, sanga na beha pe pasti do tubu di roha giot mabaloskon i. Ninna roha jat na dibaen tu hita, angkon laing na jat do baloskonon. Na denggan na dibaen tu hita pasti do laing na denggan baenon balos ni i. Sanga adong muse do kemungkinan na, nadenggan na dibaen jolma tu hita bisa sabalikna na jat ro balos na. Jarang, bahkan hampir nada adong na jat dibaen halak tu hita, gabe na denggan ro balos na. Pambaenan na homogen (nasarupa) dohot na heterogen (namarbeda) sebagai sebab akibat, madung gabe hataridaan ni alus manang alasan,  bagian sian angka pambaenan na tarjadi di ngolu on. Nang pe satutuna adong do patik sanga norma na mangatur dohot na mangevaluasi sude pambaenan na denggan sanga pe pambaenan na jat. On ma gaya hidup, ngolu ni jolma na so sian satutuna dope manjagit holong ni Kristus. Seolah-olah jolma sebagai mandataris ni Debata di portibi on, adong do hak na mambaen pambalosan. Uhum alam marlaku. Uhum “homo homini lopus” (ise na gogo ia ma na gabe markuaso) diparaktekkon.  Jamita on paingothon hita sebagai halak na porsaya, nada songon i. Halak nadung dohot masuk dibagasan holong ni Kristus, nada adong hak ni jolma mambaen pamboloson. Tuhan do nampuna pamboloson di sude angka pambaenan na denggan sanga na jat. Taparrohahon jana tabege do liturgi di hatiha mananom na mate, “... mangihut tu halahi do na binaen ni halahi”, na denggan sanga na jat uju di ngolu na paima ro ari na godang i, Hal. 14: 13.

Ay. 21, taluhon ma na jat markite hadengganan

Pambaenan na bertolak belakang di sapanjang sejarah ni hajolmaon, dung madabu jolma tu bagasan dosa sai tongtong do i tarida gabe “seni hidup” na angkon diramoti. Na denggan alo na na jat, lambok alo na kasar, godang alo na menek, sonang alo na marungkil, pistar alo na oto, lomlom alo na bontar, tigor alo na pelgok, sehat alo na sahit, gincat alo na toruk, tondi alo na daging sanga sibuk, bonar alo na sala, porsaya alo na kafir, ngolu alo na mate, jana bahat sun do pe di si. Seni ngolu sanga dinamika na tarjadi di ngolunta pe nada luput sian angka paraloan, hara ni na saling bertolak belakang. Giot ni roha nian baenon ma na denggan tu halak indu, tapi gabe sala di roha na deba. Dirippu do parlaboan hape gabe hamamago. Hagiot ni na marsuru mambaen angka na denggan sian Tuhan do ro panggora ni i anso takarejohon. Muda pe sala di roha ni jolma na marnida na denggan na tapatupa tu na asing i, pupuon ta do mambaen angka na denggan i. Sarupa do i tu halak na sai mangkritik angka na denggan hita karejohon, hara ni na so bisa do ia mambaen songon na takarejohon i, na sai marnida na denggan sebagai hal na relatif. Turpuk jamita on mandok angkon taluhonon ma na jat markite angka na denggan. Jadi nada relatif. Na denggan di au belum tentu denggan tu halahan. Tapi na denggan di Tuhan na takarejohon angke ido hagiotNia, mutlak, absolut, jana i do na denggan sebagai halak na porsaya, patudos ma Gal. 6: 10.  

Hahonaan na:

Ngolu on tu halak na porsaya nada secara kebetulan adong. Ngolu on na dilehen Tuhan do sebagai selehenlehen (anugerah) tu hita songon dia na nibaritahon di Bibel i. Ragam ni angka na denggan dipabotohon do tu hita anso taparayak ma mangkarejohon na.

“Denggan” ima impola ni ngolu na dipatongon Tuhan tu na nitompaNia. Pola do didok Ia di Pamungkaan 1: 31, “sun ma dengganna sude na i diida Debata”. Harana hadengganan do puncak ni panompaon ni Tuhan di jolma, gabe dilehen ma tu jolma karakter na khusus sian angka na nitompaNia na asing i, markhite hasagambaran tu Debata dohot tudos tu pangalahoNa. Astuan na, aha na di parhagiot ni Debata di portibi na nitompaNia on, angkon tulus ma hombar tu hagiotNia. Tapi angka na sabalikna do na tarjadi.

Laing dibaritahon muse do nian ragam ni angka hajahatan, ima na parohon uhuman. Ingot ma barita ni si Kain, si Akhan, Nimrod, jolma hatiha masa ni si Noak, Huta Sodom dohot Gomora, Raja Saul, Daud, Ananias dohot Saphira, na mora na so parduli tu si Lazarus, pambaenan ni halak Jahudi tu Jesus, jana bahat do pe di Buku na Badia i.

Di bagasan praktek ngolu siganup ari tarida ma parngoluon on gabe karakter ngolu na nyato i ma: ”parayak ma mambaen na denggan jana ulang mambaen na jahat” saurdot dohot hagiot ni Tuhan. Mulak tu Tuhan mangihutkon parentaNia marpambaenan na denggan, nada hum hata na tinggal janji i, tapi angkon parayahon do i gabe sada pambaenan na denggan tu hagiot ni Tuhan laho manghagigihon na jahat. Jana disi ma botoon ni halak na porsayai hapastian ni Tuhan namanjanjihon “mangolu ma hamu”. Marpambaenan na denggan on bisa muse do songon klise, hatahata na hum bolus sambing  napatabotabo simanangi, tapi dipaudut do dohot “hajongjonghon hamu ma na tigor, anso dapotan ibo ni roha ni Tuhan na mambaen dapotan ngolu, ligi Am. 5: 14-15.

Antong biasi Tuhan mangijinkon marragam hajahatan, sanga mungkin do Tuhan mangijinkon hajahatan na marragam  i tarjadi? Sanggup dope hita mangatasi hajahatan moral na dipudian ni ari on mur borat jana ganas songon sahit kanker na mangararati na tu ujungna hamatean ?

Dipangokuon ni halak Kristen, porsaya do hita Tuhan do na manjadihon, mamaliaro, manjagahon jana mangatur portibion (Conservatio). Tuhan padiarhon adong hajahatan, harana Ia do na manguhumi dosa. Ima mambaen disosoi do halak na porsaya i anso parayakhon na denggan.

Ima na mambaen anso sai tongtong do hita diajari martangiang, “tulus ma lomo ni rohaMu songon di Banua Ginjang songoni muse di tano on”. Banua Ginjang i nada tarpapinda hita di tano on, tapi anso tulus si songon i di tano on, karejohon ma na denggan jana parayak ma hatigoran. Sobok dohot on laing diajari do jolma i ditangiang na anso “sesa ma dosa nami songon hami manyesa dosa ni dongan nami na mardosa di hami”, na marastuan diparhagiot Tuhan do anso mangolu jolma i sasuai dohot hatiha “ibo ni roha” na sian Ia. Antong mulak ma hita tu Tuhan anso mangolu hita. Manghaholongi na denggan jana manghajongjongkon na tigor, gabe sada jaminan dihaporsayaanta do i laho mandalankon “Patik Raya” na sian Tuhan, manghaholongi Tuhan sian na sa roha, gogo dohot ateate, songon i manghaholongi dongan tudos tu diri sandiri. Basa Pang. 6: 5-6; Mat. 22: 37-39.

Nada adong guna na mambaloskon sada pambaenan na tarjadi tu pambaenan na sarupa, songon i muse do muda marpupu mambaen na denggan ditaluhon ma hajahatan. Ido bukti dame, syalom nadung ro tu portibion, anso sebagai dakdanak ni Debata kehadiran ni na porsayai gabe sioban dame. Sanga di jamitanta Minggu Trinitatis on di dok, anso pasupasu ma hita tu sasude na, jana dibagasan sasudena. Tahangoluhon ma HataNai gabe tongtong ma marpambaenan na denggan, angka na jat i pe mandao jana mandipur manjalahi sitondongon na.

Pangarimpunan:

Na denggan di Tuhan ima habonaran na mutlak, tapi habonaran di jolma belum tentu, bisa do gabe relatif sifatna. Bisa do bonar di jolma tapi sala di Tuhan. Isarana, na bonar jana denggan dongan ni panangko angkon laing panangko do, na denggan di parkarosuan angkon laing dongan na markarosuan do, na bonar jana denggan di pargabus angkon laing pargabus do, na denggan di koruptor dongan na angkon laing koruptor do, dohot tahe disude sisi hajahatan ni jolma i. Gabe pangalaho na marhuria (kejahatan berjemaah) do angka na jat i, muda di padiardiar. Habonaran ni parjahat nada adong kompromi ni i di Tuhan. Hara ni i dingolu haKaristenon nada bisa dohonon adong do sitiruon sian si bolis, ima “haringgasonnai”, manopot jolma, tapi mambaen na jahat do. Ari pambaloson sian Tuhan marlaku jana pasti do tarjadi.

Muda sonang roha  jana marhaluaan hara ni Tuhan, aha ma he na so tarkarejohon hita?. Aha na angkon takarejohon pasti do angkon maradopan dohot pambaenan na jahat dohot sihagigian. Tapi nada padiaron pamikiran dohot parngoluan na songon i markuaso dibagasan ngolunta, harana on do na sering mambaen jolma martindak nada tigor, hakorason, mamisat angka jolma na asing, jana mandao sian angka pambaenan na denggan.

Tanggal 10 Nopember Minggu sadari on dirayahon bangsonta do gabe “Hari Pahlawan”, ima anso takarejohon ma angka na denggan na pasonang rohanta, pasonang donganta, pasonang lingkunganta, angke di si ma adong hadameon. Madung marlojaloja hita mamorangi sandok hajahatan, penjajahan, ketertindasan, bahat korban di arta, hosa dohot hatiha, saonnari hatiha na ma tataluhon bentuk-bentuk hajahatan dinamangkarejohon na denggan i. Talu do na jat dibaen na denggan.

Tahaporluhon do ngolu na dame, songon dia ma hita mardame tu dongan jolma, dohot Tuhan, dohot diri sandiri. Sasudena i bisa tarjadi jana jagitonta markite Tuhan dohot HataNa na gabe Aer Ni Loba Na Mijur Sian Surgo.

Mare ma hita mangido pangurupion ni Tuhan anso dilehen bisuk na sian ginjang i, dibagasan manguhal arti ngolu dohot hangoluan na adong diparngoluan na denggan, marayak tu tujuan ni ngolu na polin laho manuju dalan ngolu na di bagasan Tuhan. Antong hagigihon hamu ma na jahat, haholongi hamu ma na denggan, jana hajongjongkon hamu ma na tigor, basa Am.5: 15. Taparayak ma angka na denggan, jana marpupu marpambaenan na denggan i, jana taamenkon ma, nada talu na denggan baenon ni na jat.

                                                                                                           

A m e n

                                                                                                               Pdt. B.M. Siregar