JAMITA EPHORUS HKBP , JAMITA TAON BARU 1 JANUARI 2025 Mateus 25:24-38

 

JAMITA TAON BARU 1 JANUARI 2025

Mateus 25:24-38

Apala di bona ni taon on tung sian rohanta parbagasan i ma hita mamuji Tuhanta i. Dipabongot hita tu taon na imbaru on ndada ala burjunta, gogonta, hamaloonta, manang sinadonganta. Tung sian haburjuon dohot holong ni roha ni Tuhanta i do. Na adong dope sangkap na uli sian Tuhanta i umbahen diloas hita mangolu jala bongot tu taon na imbaru on. Las ma rohanta nuaeng dibagasan Tuhan i.

 

Taparungkilhon do na sipata dibagasan langgus ni roha na deba mandok “ise pabotoboto na adong surgo i, so ise hea dope sian i, tarmasuk angka parhalado i”, ninna rupani. Sai unang ma adong sian hita na masuk tu horong parlanggus ni roha dohot pargaiton na mangait tu dosa na songon i. Jala molo adong donganta na mandok na songon i dibagasan holong dohot halambohon ma hita paingothon.

Hata ni Tuhanta do na mandok adong surgo manang ngolu salelenglelengna jala adong do api naroko. Molo Tuhanta mandok, hata haposan do i. Mamungka sian Mateus bindu 24 tolhas tu bona ni bindu 25 on dipaandar do hinaringkot ni ngolu na ingkon sai jaga manang jamot, asa marbisuk mangadopi angka na masa dohot manulak nasa na mangaliluhon, asa hot marhaporseaon, asa marpambahenan na denggan na marmual sian haporseaon di Tuhan i.

 

Tuhanta na mamanghulingi angka siseanNa i najolo, laos Ibana do mamanghulingi hita sadari on marhite umpama on. Ndang tarsirang umpama songon na tabege di turpuk jamita on sian dua halak nari, i ma na manjalo lima bagian dohot na manjalo dua bagian.

 

Ia tuan na nidokna di umpama on martudutudu tu Tuhan i do i. Nuaeng tatangihon ma jolo pandok ni Jesus tu dua halak na manjalo lima bagian dohot dua bagian. Tu duansa nasida didok: “Taho ma i, ale naposo na denggan roha jala haposan…”. Ndang godang ni pangomoan diida Tuhan i, ndang godang ni na niula na rumingkot diida Tuhan i. Ai ndang didok “mansai malo do ho manggandahon”. Ndang didok “mansai godang do dapotmu”. Ndang i didok! “Dengan ni roha dohot na haposan” do sintuhuna. I do na rumingkot di Tuhan i.

 

Na songon i ma na so jumpang di na manjalo sada bagian i. Sada bagian on didok di hata Indonesia “satu talenta”. Molo di hatiha i sada talenta marasam ma i hira gaji ni sahalak pangula saleleng ni 6000 ari, manang sarupa tu gaji marhira 19 taon. Jadi dohonon mansai godang do nang pe sada bagian manang satu talenta. Molo martimbanghon tu na lima bagian i idaon hira na otik na sada bagian. Alai taida ndang didok dilehon tuan i tu sahalak

“saotik”. Sada bagian do didok. Lapatanna, na sada bagian i pe sasintongna tung godang do i.

 

Boasa marasing sian na sada tu na sada dilehon Tuhan i? Adong lima bagian, adong tolu bagian, adong sada bagian. Ringkot do on mansai tangkas di hita. Didok, “ganup marguru tu gogona”. Jadi, marguru manang hombar tu panandaon ni Tuhanta do si lehonlehonNa tu hita be.

 

Marojahan tu hata ni Tuhanta di turpuk on, adong ma sipasidingon di ngolu on. Ia na manjalo na sada bagian i marsidalian do jala pasintong diri. Songon pandohan ni halak Batak, “Horbo ni padangbolak manjampal di balian, molo so disi roha godang do sidalian”. Dia do didok Tuhan i tu angka na songon on? On ma: naposo na jahat roha jala na losok. Gari na ringgas alai jahat ndang mararga haringgason. Lamu mardomu ma roha na jahat dohot halosohon.

 

Hamu angka dongan hinaholongan ni Tuhanta.

Mangasahon asi dohot holong ni roha ni Tuhan i naeng siding hita sian jahat ni roha dohot halosohon. Naeng jumpang ni Tuhanta i hita gabe angka naposo na denggan roha jala haposan. Ah ndang tolapniba on. Di portibi on dope iba. Daging dope iba, ndang surusuruan, ninna na deba sipata dalan mangampini diri. Naeng tangkas di hita: ia hata ni Tuhanta on tu hita jolma do ndang tu surusuruan. Tu hita na di hasiangan on dope, ndang tu angka na di surgo.

 

Atik tung sipata manang tongon jumpang Tuhanta i hita nuaeng sogon “naposo na jahat jala na losok”, tama dibagasan unduk serep ni roha tasolsoli dirinta. Di adopan ni Tuhanta na basa i, na tongtong raphon hita sahat tu ombas on! Boi ma marhite na sian nasa rohanta mangendehon songon hata ni endenta i: Husolsoli do rohangku na gok dosa i tongtong. Ai godang ariaringku na hubahen ambolong.” Alai mangihut ma semangat na imbaru laho marhaseanghon tingki binasahon ni Debata dohot nasa silehonlehonNa songon angka “naposo na denggan roha jala haposan” hita.

Siala ni i, on ma jolo naeng tung apala tandap di rohanta be. Tapasonang jolo rohanta satongkin. Unang mampar jolo pingkiranta tu na asing. Adong songon on na mansai ringkot suan tu rohanta be saonari:

 

Ditanda Debata do hita tangkas. Sude hita ganup marsada-sada. Sian Debata do ngolunta on.

Sian Debata do nasa silehonlehon na uli na dong di hita be nuaeng.

Sian Debata do gogo mandalani ngolu on dohot patupa na boi siulaonta. Sian Debata do tingki jala dibasahon i tu hita.

Jadi, tung apala singkop do dilehon Debata tu hita.

Tung tangkas ma jolo tarimangi on di bona ni taon on jala taparata dibagasan sataon bolon on di na diloas Tuhanta dalananta tu jolo. Molo tangkas taokui jala tahaporseai tung apala sian Tuhanta do singkop dilehon di hita sian asi ni rohaNa, dihorhon i do di hita na umotikna na opat na mangihut on:

 

Parjolo, las ni roha na polin. Mansai ringkot do las ni roha di ngolu on. Ala ditontuhon las ni rohanta dibagasan Tuhan i do nasa panggulmiton ni ngolunta. Kadar sukacita kita di dalam Tuhan menentukan seluruh gerak hidup kita!

 

Tajamothon ma asa unang adong mambuat las ni rohanta di partingkian on. Sada sian na boi paorothon las ni rohanta di zaman on, i ma na ginoaran brain rot (habusukon ni utokutok). Ndang na mandok utokutok i busuk, alai na patuduhon hasesega ni parrohaon dohot pamingkirion ala pagodanghu pasuda tingki manjaha media sosial rupani na so marguna jala na so sipanumpak tu na uli, gariada na mambahen soratan manang humasusa pingkiran, gabe marsak roha, sahat tu na mambahen mandate, patubu sogo ni roha, muruk dohot na suman tusi. Naeng sai dibagasan las ni roha dohot hadameon hita.

 

Paduahon, pujipujian tu Debata. Ndang tama hita mamuji diri manang mangahut hasangapon tu diri, ai tung tangkas do tahaporseai holan asi ni roha ni Tuhan i do ngolu on dohot nasa na adong di hita. Halak na mamuji Debata do na martua.

 

Patoluhon, sabam ni roha. Manjalo diriniba sandiri dohot na adong di hita dibagasan sonang ni roha. Ndang sanga mangiburu tu na asing. Gariada las roha molo tarpasupasu dongan jolma. Ndang olo tarunjun mambandinghon diriniba dohot dongan. Ai matua hasusaan do molo sai girgir sasahalak mambandinghon dirina tu na asing. Boi masa do ndang las roha ni sasahalak di ngolu on ndada ala na hurangan alai ala diida di donganna godang jala marsigorgor hagiotna asa songon halak na asing.

 

Paopathon,taronjar roha patupa na uli na denggan, mamelehon na umuli tu Debata na marmual sian panandaon na tangkas di Debata dohot nasa pambahenanNa di ngolunta.

Nasa pambahenan na nionjar ni haporseaon tu Tuhan i, tarida do i marhite hajuarabagason na sintong di na pinalumehon ni Debata. Nasa na denggan na boi patupaon patupaonta ma i marojahan tu ojahan “antara aku dan Tuhan”, “parsaoranhu dohot Tuhan”, ndada asa diboto jala dipuji halak. Molo taurupi angka dongan na so mardihadiha, na marungkil, tarmasuk do i hataridaan ni “na denggan roha jala haposan” hita.

Saleleng mangolu hita sai adong do na boi tapatupa. Gari haradeon manangihon dongan na marsak manang na marhoi pe boi do i rajuman songon pelean na arga.Ndang adong sibahenon ni tangan, nanggo manangianghon dohot manungkoli di hata na mangalambohi dohot patogu haporseaon.

 

Laos hombar do usahanta patupa na denggan on tu transformasi na gabe joujou tu hita sandok HKBP di taon 2025 on dohot tu angka taon na mangihut. Haradeonta dipaimbaru Tuhanta i ngolu nang panghobasionta tu na lobi umuli dope. Sada sian i naeng pangkeon ni Tuhanta hita “hadir sebagai bagian dari solusi bukan memperparah apalagi sumber masalah” di portibi on. Isarana, mangihuthon angka pande bisuk, sada sian sampulu ancaman global (saportibi), na umbalga i ma hasesega ni natinompa ni Tuhanta on. Dohot ma hita pangkeon ni Tuhanta mangaramoti tano dohot portibi nampuna ni Tuhanta on jala diloas hita mian sangombas di hasiangan on.

Martua situtu do hita ala balga HKBP on dibahen Tuhanta na marruashon marhira 6,5 juta halak. Molo ganup hita “na denggan roha jala haposan”, ndang holan tu Indonesia on pangontakna alai boi do dihilala portibi on panghorhon na uli pinatupa ni Debata marhite hita songon hataridaan ni na denggan roha jala haposan hita. Gabe marsinondang Tuhanta i marhite huriaNa HKBP, marhite ruas nang parhaladoNa.

 

Asa on ma na mansai ringkot hangoluhononta di tingki parasian na binasahon ni Tuhan i tu hita.

·         Tangkas ma tatanda jala tahaporseai Debata dohot nasa silehonlehon nang pambahenanNa tu hita be.

·         Martangiang ma hita sian nasa roha jala dibagasan haporseaon na togu tu Tuhan i.

·         Marlas ni roha ma hita dibagasan Tuhan i, mamuji goarNa jala dibagasan semangat na marsigorgor mandalani ngolu on.

·         Mangula         sadenggan-dengganna          dohot         sasintong-sintongna mangasahon dohot dibagasan parsaoran dohot Tuhan i.

Angka i do tanggung jawab manang sipatupaonta, anggo na mambahen parbuena Tuhanta do. Jala nasa na marharoroan sian Tuhanta dihorhon i do di hita dame dohot las ni roha di ngolu on. Uli tohapta di hasiangan on nang di hangoluan sogot i. Amen.

Pearaja Tarutung, 1 Januari 2025 Ephorus HKBP,

Pdt Victor Tinambunan