PARTURE NI ACARA
PARTANGIANGAN
PASSION
PAIHUTIHUT SITAONON NI TUHAN JESUS KRISTUS
HKBP EBENEZER RESORT MUTIARA
~~~~~~~~ Pangaradeon diri / tangiang na
hohom~~~~~~~~~~
Joujou Tu Parsaoran : U: Uluan ; H: Huria
U : Huria na hinophop ni Tuhanta, di bagasan unduk dohot serep ni rohanta naeng paihutihutonta barita panaonon ni Tuhan Jesus andorang so gantung do pe Ibana di hau parsilangi. Di partangiangan passion on naeng gorga tu bagasan rohanta hinahansit
dohot hinabernit na ditaon Tuhanta i.
Nunga huparade rohangku paihutihut barita ni panaonon ni Tuhanki, anggiat lam huantusi pambahenan
ni Tuhan i di ngolungkon.
H: Bidang pe laut lobi
umbidang do holongNa, bagas pe laut lobi umbagas holongNa, timbo pe langit lobi
tumimbo asiniroha
ni Debata.
U: Antong ta
tanda ma si tobus nasa dosanta, asa unang marisuang panghophopNa i. Puji ma Ibana ale tondingku, tung unang
halupahon denggan ni basaNa.
Antong
hamuna huriaNa, huarahon ma hita saluhutna paihutihut na masa andorang so
tarpajal Jesus di hau silangi, tapasiding ma angka pingkiran na boi mambahen
dao rohanta
paihutihut siak ni bagi na masa tu Jesus, asa anggiat
holong roham tu na manghohop Ho. Marende :
1. Marende No. 88: 1,4 “Jesusku Naung Manobus Ahu”
V Jesusku naung manobus ahu, sai
naeng haholonganku Ho. Tu dolok Golgatha Ho lao nionjar ni holongMu do. Hupuji nasa asiMi, alai
gumodang holongMi.
V
Bagas uhirhon tu rohangku, panghophopMi humophop au. Tusi ma togu
pingkiranku, guru di Ho sambing ma au. Hupuji nasa asiMi, alai gumodang holongMi.
2.
Votum
–Introitus–Tangiang :
U : Marhitehite Goar ni
Debata Ama dohot goar ni AnakNa Tuhan Jesus Kristus dohot Goar ni Tondi
Parbadia, na manompa langit dohot tano on. Amen! Tongon do angka sahitta
diusung Ibana, jala angka pardangolanta diporsan. Ala ni pangalaosionta Ibana
tartullang, binahen ni hajahatonta Ibana mabugang. Ampe tu Ibana pinsangpinsang
parhitean ni hasonanganta, jala binahen ni bugangNa malum hita. Haleluya! Martangiang ma hita: Ale Amanami Parasiroha
na sumurung, Debata ni hatuaonnami. Huingot hami do di angka ari on panaonon
dohot hamamate ni Tuhan Jesus Kristus, Tuhannami. Pahibul ma rohanami jala
parbadia mamingkiri sude na tinaonNa i.
H: Patandahon ma tu hami dosanami, asa
diarsakhon rohanami dosanami i.
U; Huhut asa hupompomi hami hisaphisap dohot
sangkapsangkap ni rohanami na roa i, jala asa hupasaut hami lomo ni roha ni na
manobus hami, asa martua hami sian i ro di saleleng ni lelengna. Sai patupa ma
i di hami marhitehite Tuhan Jesus Kristus, Anak haholongan ni rohaM. Amen
3.
Marende BE No. 83 : 1 “Na lao do Birubiru i”
V Na lao do Birubiru i mamorsan angka dosa. Ni
nasa hajolmaon i di benget ni rohana. Diporsan do sahitta i dilehon do DiriNa i. Tu
tangan ni pamunu ditaoni do na bernit i. Ro di na tos hosaNa I, Didok : Naeng
porsanonku.
4. Barita Parjolo: Dibaritahon Jesus hinarjorbut ni Angka Naeng Masa
U : Alai lam torop do angka si ihuthon Jesus, ragam do angka tanda-tanda
halongangan na mambehen lam sogo roha ni torop halak parise dohot siboto surat!
Marjea ma hamu sibotosurat dohot Parise, hamu pangansi! Ai suman do
hamu tu tanoman na hinapur, angka na denggan berengon sian duru, hape marisi
holiholi ni na mate do dohot nasa na rotak! Pola didok hamu: Aut hami uju di
ngolu ni angka ompunami, ndang tagamon dohot hami parsala di mudar ni angka
panurirang i! Dibahen i, ida ma, Ahu marsuru tu hamu angka panurirang dohot
parroha na tigor hape: Bunuonmuna jala parsilang-kononmuna ma deba sian nasida, na deba
linsinganmuna do di parguruanmuna jala leleanmuna sian huta tu huta. Dibunu ho
do angka panurirang jala didangguri ho do angka na sinuru manopot ho. Nunga
piga hali naeng papunguonku do nian angka anakmi, sobokkon pidong na papunguhon
anakna tu toru ni habonghabongna; alai ndang dung olo hamu! Ai hudok ma tu
hamu: Na so idaonmuna be Ahu olat ni on, paima dohononmuna: Pinasupasu ma na ro
marhitehite Goar ni Tuhan i! Jadi diarahon Jesus ma
na sampuludua i jala didok ma tu nasida: nangkok ma hita tu Jerusalem, jala
tulus ma tu Anak ni jolma i sasudena, na tarsurat di buku ni angka panurirang,
na mandok:
H: Ai pasahaton ma Anak ni jolma i tu angka sintua ni malim dohot tu
sibotosurat, gabe
insahanna, leaanna jala tijuranna ma Ibana, ingkon marutang hosa, pola mate Ibana bunuonna, dungi
pangoluonNa do Ibana muse di ari patoluhon.
U: Dung i didapothon ina ni anak ni si Sebedeus rap
dohot angka anakna i ma Ibana, disomba ma, laho pasahathon pangidoanna. Jadi
ninna Jesus ma mandok ibana: Aha dipangido rohamu? Dung i didok ma tu Ibana:
Loas ma hundul sogot anakku na dua on, na sada di siamunMu, na sada nari di
hambirangmu, di harajaonMi!
Alai ninna Jesus ma mangalusi: Ndang diboto hamu
na pinangidomuna. Tung tarinum hamu ma siinumon na naeng inumonKu (jala tarparidi hamu ma
paridion siparidionKu)?
Jadi didok nasida ma: Tarbahen hami do!
Dung i didok ma tu nasida: Tutu nian, inumonmuna
do siinumonKi; jala paridihononmuna do pandidion siparidihononKi; alai ndang guru di Ahu
na mambahen hundul di siamunKu dohot di hambirangKu. Damang i do padirihon
i tu angka panahatanna i. Alai ndang diantusi
angka sisean i agia otik na hinatahon ni Tuhan Jesus. Buni do hata i sian
rohanasida, ndang diboto nasida na hinatahonNa i.
H : Jadi bobonosan
situtu ma rohanasida. Dung i diarahan si Petrus ma Ibana, disaritai ma, ninna
do: Asi ma roha ni Debata di Ho Tuhan. Unang ma songgop i tu Ho.
Alai humusor ma anggo Ibana mandok tu si
Petrus: Laho ma ne ho bolis. Gasip do Ho di Ahu, ai ndang diparrohahon ho angka
na di Debata, angka na di jolma do. Dung i didok Jesus ma tu angka siseanNa:
Nasa na giot mangihuthon Ahu, disoadahon ma dirina, diporsan ma silang na tu
ibana; diihuthon ma Ahu.
H: Ai na naeng
paluahon hosana, mangagohonsa do; alai na agoan hosa alani Ahu, ido na
jumpangan.
Ai
aha ma antong gunana di jolma nang liat portibi on diomo, anggo mago do
tondina? Aha ma tarlehon jolma bahen tobus ni tondina? Ai na ro ma sogot Anak
ni jolma i di bagasan hasangapon ni AmaNa rap dohot angka surusuruanNa, dung i
balosonNa ma tu ganup, hombar tu na niulana.
5. Marende, No. 182: 3 “Tu
JoloM O Debatangku”
V Sai jotjot do hutadingkon, dalanMi
na tigor i. Kristen au hape hutondong, dalan hamagoan i.
6. Barita Paduahon :
“Dimiahi si Maria Pat ni Jesus”
U : Dung i onom ari nari asa
dapot pesta Paska i, sahat ma Jesus tu huta Betania, na niinganan ni si
Lassarus, na sinunggul ni Jesus sian na mate. Jadi dipauli nasida ma disi
panganon ujuan di Ibana: si Marta do manghobasi, si Lassarus ma sada donganna
mangan disi.
H: Gabe
dibuat si Maria ma sahati miak nardus na arga na so marsaor, dimiahi ma pat ni
Jesus, obukna ma dibahen mangalapu. Jadi digohi uap ni miak i ma bagas i.
U:
Jadi sada sian angka siseanna, si Judas Iskariot na naeng manjehehon Ibana,
mandok: Boasa so ginadis miak na arga tolu ratus hupang, bahen silehonlehon
nian di angka na pogos.
Alai ndada na pogos sinarihonna, umbahen na didok ibana
songoni, panangko do ibana tahe, diusung do asiasi ni halak, ai tu ibana
dipasahat puro i.
Dung i ninna Jesus ma: Pasombu ma Ibana, ai diparade do i hira tu ari
hatatanomHi. Ai tongtong adong na pogos ditongatongamuna jala asal ma olo hamu,
tarpatongon hamu do na denggan tu nasida: Alai anggo Ahu ndang manongtong
dihamuna. Intap
na tarbahensa do na niulana i, na manjoloani do ibana mamiahi pamatangku songon
di na mananom. Situtu do hatangkon tu hamu: manang didia liat portibion
dijamitahon muse Barita na uli on, hatahononna do binahenna i gabe baritana. Dung i torang ni ari na
i dibege halak na torop na ro tu pesta i na naeng ro ma Jesus
tu Jerusalem, jadi dibuat nasida ma angka maremare, lao manomunomu Ibana huhut
manjoujouhon;
H:
Hosianna! Pinasupasu ma na ro marhitehite goar ni Tuhan i, Raja ni Israel!
U:
Dungi dapot Jesus ma halode sada,
ima dihunduli. Hombar tu na tarsurat: Unang ho mabiar boru Sion, ida ma rajam
do na ro,
marsihundul di anak ni halode, dohot di anak ni halode inaina.
H: Jadi deba sian natorop i mandok: Orai ma
antong angka siseanmi, Guru.
U; Alai
ninna ma mangalusi: Hudok ma di hamu: aut mauhom nasida, manjoujou ma angka
batu. Alai di bongoti si bolis do si Judas na margoar Iskariot,
sahalak sian sampuludua i, gabe laho ma ibana martuptup dohot angka sintua ni
malim rap dohot angka panunggane i manang dia dalanna pasahathon Jesus tu
nasida.
Jadi sian las ni
roha nasida marpadan ma nasida mengalehon hepeng tu ibana.
Di oloi si Judas ma i, jadi dilului ma tingki na une pasahathon Ibana so sian
pamotoan ni na torop i.
7. Marende No. 711:
3 “Songon Ursa Na
Binuru”
V
TungkiMi Ale tondingku, tung beasa rusak ho ? Sai
haposi Debatamu, ndang tadinghononNa ho. Pujionku do muse Tuhan Debata dope,
Hatuaon ni bohingku na tongtong naeng haposanmu.
8. Barita Patoluhon: Jesus Tu Huta Jerusalem
U : Dipansang sintua ni malim dohot angka Parise
ma rapot godang, didok nasida ma: Aha ma bahenonta? Ai lan do tanda dibahen
halak i! Molo itapasombu Ibana, porsea ma halak saluhutna di Ibana, gabe ro ma
halak Rom maon mangarampas tanonta dohot bangsonta.
H; Alai hehe ma sada
sian nasida ima si Kayapas, sintua ni malim di na sataon i, didok ma tu nasida:
Na hurang roha do hamu!
U: Ndang
dipingkiri rohamuna, dengganan do mate sada halak humophop natorop i, unang
laho mago sandok bangso i.
H: Alai ndang sian rohana sandiri dihatahon i, ala sintua ni malim ibana di na
sataon i umbahen na di surirangkon, na naeng mate ma Jesus humophop bangso.
U: Alai tahe, ndada holan manghophop bangso i, alai
naeng papunguonna angka anak ni Debata, angka na marserak dope, laho pasadahon.
Asa olat ni na sadari i martuptup ma nasida laho mamusa Ibana. Alai didok
nasida ma: Unang ma dipesta i, sotung guntur na torop i!
9.
Marende No. 719 : 1
“Hubege Soaram O Jesus”
V Hubege soaraM O Jesus, hubege soaraM O Jesus. Hubege soaraM
O Jesus na manjouhon ihuthon ma Au. Togu au Jesus Tuhanhu, iringiring ma
langkangku. Patuduhon ma dalanMu, asa unang, unang lilu au.
10. Barita Paopathon : Diburi Tuhan Jesus Pat ni angka SiseanNa
U :
Alai di ari parhobason parjolo ni pesta
Paska i didapothon sisean i ma Jesus, angka ninna ma:
H: Tu dia
ma patureonnami di Ho panganon Paska i, dipangido roham?
U Gabe
didok ma: Laho ma hamu tu huta i manopot si Anu, dok hamu ma tu ibana:
H: Tona
ni Guru i, na dapot ne ma tingkingku, di ho ma ahu sorang laho mangan Paska
i dohot siseanKu.
U: Jadi saut ma disuru Ibana siseanna dua halak
jala didok ma tu nasida: Molo laho hamu tu huta, pajumpang ma hamu disi dohot
sada halak na mangusung aek sahudon, ibana ma ihuthon hamu. Tu ibana ma dok
hamu;
H: Didia
do bilut inganan, asa disi dipangan hami Paska i?
U: Jadi
patuduhononna ma tu hamu bilut parginjang sada, na lambas na tipak hinembangan,
disi ma pature hamu di hita. Jadi borhat ma siseanna, dibongoti ma huta i, jadi
jumpang nasida ma tutu songon na nidokNa i, dipature ma Paska i.
H: Asa
dung bot ari, ro ma Jesus dohot na sampuludua i. Asa dung dapot tingkina, hundul ma Ibana rap dohot angka
apostel.
U: Dung i ninna ma mandok nasida: Mansai
masihol rohangku naeng mangan birubiru paska on rap dohot hamu tagan so songgop
dope sitaononki. Ai hudok ma di hamu “na so tupa panganonku be i; ia so dapot
hagogokna i di harajaon ni Debata”. Jadi di na mangan nasida, hehe ma Jesus
sian na mangan i, ditanggali ma ulosNa, dibuat ma basahan ditapolhon tu Ibana.
Dohot basahanNa na tinapolhonNa i. Dung i sahat ma Ibana tu
si Simon Petrus jadi didok ma mandok Ibana:
H: Tung
Ho ma ale Tuhan, mamuri pathu?
U: Dung
i ninna Jesus ma mangalusi ibana; Ndang diantusi ho pambahenanKu na tu ho anggo
nuaeng, muse pe botoonmu i.
H: Dung i didok si Petrus ma tu Ibana: Matua tano on, ndang burionMu
pathu!
U: Dung i ninna Jesus ma
mangalusi Ibana: Molo so burionKu ho, ndang partohap ho di Ahu.
H: Dung i ninna si
Simon ma: Ale Tuhan, unang ma holan pathu, dohot ma tangan dohot ulungku.
U: Gabe
didok Jesus ma tu ibana: Halak naung maridi i, ndang be burion; ai nunga sude
ibana ias. Naung ias do anggo hamu, alai ndang luhut hamu. Ai ditanda do
sipasahat Ibana, umbahen na didok: Ndang saluhut hamu ias. Asa dung diburi Jesus
pat nasida,
dipangke ma muse ulosNa, hundul ma Ibana, didok: Ai diantusi hamu do pambaenki
tu hamu? Digoar hamu do Ahu Guru dohot Tuhan, jadi ture do pandokmuna disi, ai
i do, Ahu tutu. Asa molo Ahu Tuhan jala Gurumuna mamuri patmuna, tama ma nang
hamu masiburian pat! Ai sitiruon do hulehon tu hamu, asa dibahen hamu songon na
hubahen i tu hamu!
H: Na tutu situtu do na hudok tu hamu: Ndang
umbalga anaksomang sian indukna,
ndang sumurung suruan sian na marsuru ibana. Molo diboto hamu i, martua
ma hamu mangulahonsa!
U: Jadi di na mangan i nasida, ninna Jesus
ma: situtu do na hudok on tu hamu. Sada sian hamu naeng pasahathon Ahu! Dung i
marsak situtu ma nasida, gabe dipandok be ma tu Ibana:
H: Nda tung ahu i Tuhan?
Alai ninna ma mangalusi; Ia i na rap dohot Ahu manurdukhon
tanganna tu paringkauan, ido na pasahathon Ahu! Tong do nian ujung ni Anak ni jolma i!
Tagonan unang ma sanga tubu ibana tu hasiangan on!
11. Marende, No. 162: 3,6 “O Debata Mansai Balga”
V I pe tu Ho na ma au ro, sai unang
tulak ahu.
Paombun ma O Debata, rimasMu mida
ahu.
V
Ajari au na jat padao, paias ma rohangku.
Jorai au on di ngolungkon
tu surgo tait rohangku
12. Barita Palimahon: Judas manjehehon Jesus
U: Alai adong ma sada sian angka siseanna i, na
hundul jumonok tu Ibana haholongan ni Jesus i. Ima dihilap si Petrus jadi ninna
ma mandok ibana: Sungkun ma, ise na nidokNa i.
H; Jadi dipajonok ma tu lambung ni Jesus mandok tu Ibana:
Tuhan, ise i?
U; Gabe dialusi
Jesus ma: Ia tusi hulehon na santopik na husornophon on, ima ibana! Jadi
disornophon ma santopik, dilehon ma tu si Judas Iskariot, anak ni si Simon. Jadi dung dibondut i,
dibongoti sibolis i ma ibana. Dung i didok Jesus ma tu ibana: Humatop ma ulahon
siulaonmu!
H: Asa dung dijalo si Judas na santopik i, pintor
laho do Ibana tu balian, alai borngin ma uju i.”
U: Jadi di na mangan i nasida, dihindat Jesus ma
roti, dipasupasu ma, diponggoli ma jala diparlehon ma tu angka siseanna. Huhut
ma didok: “Jalo hamu, pangan ma, dagingKu do on”, na nilehon humophop hamu. Ula
hamu ma i bahen parningotanmuna di Ahu. Dung sun nasida mangan, dihindat ma
panginuman, didok ma mauliate, dilehon ma tu nasida. Huhut ma didok: Ia
panginuman on, padan na imbaru do i marhitehite mudarHu, na durus humophop
hamu. Sude hamu manginum sian i. Alai hudok ma tu hamu: na so tupa be inumonKu
olat ni on sian parbue ni hau anggur i sahat ro di ari sogot: Disi ma inumonKu
na imbaru rap dohot hamu di harajaon ni Damang.
13. Marende No. 152 : 1 “Jesus Na Mamorsan”
V
Jesus na mamorsan dosa ni portibi on pangolu hami. Jesus na mamorsan dosa ni portibi
on pangolu hami. Jesus na mamorsan dosa ni portibi on, sai pasonang hami. Amen, Amen, Amen
14. Barita Paonomhon: Jesus di Getsemane
U: Jadi dung diendehon nasida endeende pujipujian
i, ruar ma nasida tu dolok Jetun. Disi ma didok Jesus tu nasida: saluhut do
hamu naeng targasip mida Ahu di na saborngin on. Ai na tarsurat do: Lombutanku
ma Parmahan i, gabe marserak ma birubiru na sapunguan i.
H; Alai
ninna si Petrus ma mangalusi Ibana: Agia sude nasida targasip mida Ho, anggo ahu, na so tupa targasip.
U: Alai
ninna Jesus ma mandok Ibana: “O Simon, Simon nunga dipangido sibolis naeng
segeonna hamu songon dahanon. Alai Ahu do manangiangkon ho, unang mintop
haporseaonmi. Jadi dung mulak sogot roham, pargogoi ma roha ni angka
hahaanggim!”
H: Alai ninna si Petrus ma mandok ibana: “Tuhan,
na hobas do ahu mandongani Ho tu hurungan, nang tu hamatean
pe!”
U; Alai
ninna Jesus ma: “Hudok ma tu ho, Petrus: Ndang martahuak manuk saborngin on; so
jolo tolu hali soadahononmu na so tinandam Ahu. Dung i sahat ma Jesus rap
dohot nasida tu porlak sada margoar Getsemane. Jadi didok ma tu angka sisean i:
“Hundul ma hamu jolo dison saleleng disan Ahu martangiang.”
H: Dungi ditogihon ma si Petrus
dohot anak ni si Sebedeus na dua i gabe marsak situtu ma Ibana jala bobonosan.
U: Jadi didok ma tu nasida:
“Mansai marsak situtu do rohangku, hira na mate do. Dison ma hamu dungo rap
dohot Ahu.”
H: Dungi laho ma Ibana saotik tu
jolo, dipatungkap ma bohiNa tu tano martangiang, ninna ma:
U: Ale
Amang, namun na tarbahen salpuhon ma siinumon on sian Ahu! Alai tahe, unang
marguru tu rohangKu, rohaM do!
H: Dungi mulak ma Ibana tu angka
siseanNa jala tarpodom do nasida didapot, jadi didok ma tu si Petrus:
U: “Ndang
margogo hamu hape dungo rap dohot Ahu nanggo sangombas? Dungo ma hamu jala
martangiang asa unang hamu bongot tu pangunjunan, ai na girgir do nian tondi i,
alai gale do ia daging.
H:
”Dungi laho ma Ibana paduahalihon martangiang ninna ma:
U: “Ale
Amang, molo na so tarbahen salpu on, nda ingkon huinum, sai saut ma lomo ni
rohaM!”Dung i ro i Ibana, tarpodom nasida didapot, ai mansai dokdok
salibonasida.
Jadi ditadingkon ma laho martangiang patoluhalihon mandok
hata ondeng. Dung i didapothon ma muse angka siseanNa jadi didok ma tu nasida:”
Datdatanmuna dope modom
dohot maradian? Nunga dapot tingkina nuaeng, sahat ma Anak ni jolma i tu tangan
ni pardosa. Hehe ma hamu, laho ma hita! Ndi! Nunga ro na pasahathon Ahu!”
15. Marende, No. 249: 1 “Ngot Ma Ho, O Tondingki”
V
Ngot ma ho, o tondingki dungo martangiang. Asa unang musu i, tole so tinagam. Bisuk ni setan i, do manait tu dosa lan na bonar roha.
16. Barita Papituhon: Haroro Ni Angka Soldadu
U: Alai diboto si Judas siparjehe i do inganan i,
ai jotjot do marpungu Jesus tusi dohot angka siseanNa. Ia si Judas diarahon ma
angka soldadu dohot angka naposo ni sintua
ni malim, didapothon ma tusi mantat sulusulu, palito dohot sinjata. Diboto
Jesus do saluhut na naeng songgop tu Ibana, jala ruar ma Ibana, didok ma tu
nasida: “Ise do na jinalahanmuna i?” Gabe ninna nasida ma
mangalusi Ibana.
H:
Gabe ninna nasida ma mangalusi Ibana: “Jesus halak Nasaret i do!”
U: Dung
i ninna Jesus ma mangalusi nasida: “Ahu do i!” Alai dohot do si Judas
si parjehe i jongjong di lambungnasida. Asa dung didok tu nasida: “Ahu do i”,
sumurut ma nasida, angka martinggangan ma tu tano. Dung i diulahi ma manungkun
nasida: “Ise do na niluluanmuna?” Jadi didok nasida ma:
H: “Jesus,
halak Nasaret i do!”
U: Dung
i didok Jesus ma: “Ahu do i! Asa molo Ahu dilului hamu, loas ma laho angka on! Ai naeng do jumpang na nidokna i: Ndang adong na mago hubahen agia sada
sian angka na nilehonMi tu Ahu.” Alai nunga dipabotohon
parjehe i hian partinandaan tu nasida, ai didok do, “ia i na huumma, Ibana ma
i, i ma tangkup hamu!” Asa pintor didapothon ma Jesus, didok ma:
H: “Tabi di Ho, Guru!” Laos
diumma.
U: Alai
ninna Jesus ma mandok Ibana: “Marhua ho tuson anggia? O Judas, pangummaon do
hape dibahen ho, pasahathon Anak ni jolma i? “Dungi ro ma nasida, dilaluhon ma
tangan nasida
tu Jesus manangkup Ibana. Dung i, adong ma sada
sian nasida angka dongan ni Jesus mangalaluhon tanganna, disintak ma podangna,
ditampulhon ma tu naposo ni sintua ni malim sahalak, dipisikhon ma pinggolna.
H: Jadi
didok Jesus ma tu ibana: “Pasarung podangmi, ai na manintak podang, mago ma
bahenon ni podang!
U: Ai
na so tarbahen Ahu do di roham mangido sian Damang asa dipadiri di Ahu saonari
lobi sian sampuludua loksa surusuruan?
H: Alai
songon dia ma disi saut hata ni surat i na mandok “Ingkon masa do songon i?
U: Uju
i ma didok Jesus tu angka na torop i:Hira na dompak panamun do hamu hehe,
marpodang jala marlombutlombut manangkup Ahu. Ariari do Ahu nian hundul
mangajari di bagas joro, so adong ditangkup hamu Ahu.
H: Alai na masa do sudena on, asa jumpang hata
ni angka panurirang i. Dung i ditadingkon saluhut sisean i ma Ibana laho
maporus.
17. Marende BE. No. 83: 4 “
Na Lao Do birubiru”
V Saleleng na mangolu au, naeng ingotonku Jesus. Sude na
binaenMi di au, hataM naeng hupatulus. Ho naeng haholonganku do, huhut
ihuthononku Ho di dalan hangoluan. Tung ingkon Ho, nampuna ahu, mangolu manang mate au. Sai Ho do tioponku
18. Barita Paualuhon : Jesus di Jolo ni Sintua ni Malim
U: Jadi
bongot ma ibana rap dohot Jesus tu alaman ni malim i. Alai disungkun sintua ni
malim i ma Jesus taringot tu angka siseanNa dohot taringot tu podaNa i. Jadi dialusi Jesus ma
ibana ninna ma: “Patar do hatangki dihatoropan. Na tongtong do Ahu mangajari na
sailaon dibagasan
parguruan nang dibagas joro pe, parpunguan ni saluhut halak Jahudi. Ndang adong
manang aha huhatahon marsibuni. Boasa Ahu disungkun ho? Nasida naung umbege
hatangki, i ma sungkun! Ai diboto nasida do na huhatahon i.” Dung didok Jesus songon
i,
Dipastap
sada oppas na jongjong disi ma Ibana, huhut ma didok:
H: “Songon i pangalusiM tu
sintua ni malim i?
Dung i ninna Jesus ma mangalusi ibana: “Ia na
hurang na hudok, hajongjonghon na hurang; alai anggo na hona do, boasa
pastaponmu Ahu? Asa disuru si Hannas ma Ibana naung tinali i tu sintua ni malim
si Kayapas, disi do marpungu siboto surat dohot sintua ni natorop.
U: Alai
anggo angka sintua ni malim ro di sandok rapot godang mangalului panindangion
gapgap dompak Jesus, na tuk mambahen Ibana marutang hosa. Alai nang pe hehe
torop sitindangi gapgap ndang adong jumpangsa na tau mambahen Ibana uhumon.
Alai parpudi ro ma dua halak ninna do:
H: “Didok halak on: Tarbahen Ahu do mangalohai
joro ni Debata jala pajongjonghoni sumuang di bagasan tolu ari. ”Dung i hehe ma
sintua ni malim i, mandok tu Ibana:
“Ndang alusanMu na hinatindangkonnasida dompak Ho?”
H:
Alai sai hohom do anggo Jesus.
U: Dung i dipangkulingi sintua ni malim i ma
Ibana: ”Hupatolon ma Ho tu Debata Siparngolu i, asa dipaboa Ho tu hami manang
na tutu Ho, Kristus, Anak ni Debata!”Dung i didok Jesus ma tu ibana: “Songon nidokmi
ma tutu! Alai hudok ma tu hamu: “Olat ni on ma idaonmuna Anak ni jolma i,
hundul di siamun ni hagogoon jala ro di atas ombun ni langit.”Gabe diribakhon
sintua ni malim ma paheanna mandok:
”Na mangaleai Debata do
Ibana! Pola luluan dope sitindangi? Nunga dibege hamu pangaleaina i! Beha do
dirohamu?”
H: “Ingkon marutang hosa ma Ibana!”
U: Jadi
ditijuri nasida ma bohiNa, na deba manompuk, na deba mangalinsingi huhut
mandok: “Surirangi hami, Kristus, ise do na mamunu Ho?” Alai sai mangihut do si
Petrus mandaodao sahat tu alaman ni sintua ni malim i. Laos bongot ma ibana tu
bagasan, laho hundul tusi rap dohot angka naposo marnida ujungna. jadi didapothon sada
parompuan ma ibana mandok:
Dohot do ho dongan ni
Jesus, na sian Galilea i!
Jadi disoadahon ma di
jolonasida saluhutna, ninna ma:
Ndang huboto na nidokmi!
Dung i di na naeng
haruar ibana, diida parompuan na asing ma ibana, didok ma tu angka na disini:
On
do sada dongan ni Jesus na sian Nasaret!
Jadi diulahi ma
mansoadahon, pola manolon:
Tung na so hutanda do
Halak i!: Ndang hutanda Ibana, inang!
Alai dung satongkin
nari, didapothon angka na jongjong disi ma si Petrus mandok: Sintong tahe,
dohot do ho sada sian nasida, ai pangkulingmi do patandahon ho! Dung i
dipambuburahon ma dirina huhut manolonnolon:
Tung na so hutanda do
Halak i, ndang na tutu i, amang!
Jadi pintor martahuak ma
manuk. Jadi diingot si Petrus ma na hinatahon ni Jesus tu ibana: Tolu hali
soadahononmu Ahu, tagan so martahuak dope manuk. Dung i laho ma si Petrus tu
balian tumatangis situtu.
19. Marende No.
81: 2 “Jesus mual
ni ngolungku”
V
Haleaon, insakinsak, reherehe tijur pe. Tali dohot pastappastap tung
ditaonhon Ho sude. Paluahon au na pogos, sian tangan ni sibolis Alani hupuji Ho, tung
marribu hali do.
Barita Pasiahon : Jesus di Jolo ni si Latus ( Ba : Baoa; Pr:
Parompuan )
U: Asa ditogihon nasida ma Jesus
tu jolo ni si Kayapas tu kantor. Alai sogot ma i manogot i. Ndang na bongot
anggo nasida tu kantor asa unang tarsubang nasida laho manganhon Paska i. Gabe
ruar ma si Latus mandapothon nasida, didok ma: Pangaluan dia do diboan hamu
dompak halak on?
H: Dungi
ninna nasida ma mangalusi: Aut unang sibahen na jahat halak on, ndang tagamon
pasahatonnami Ibana tu ho.
U: Gabe didok si Latus ma mandok nasida: Boan hamu
ma Ibana, uhum hamu ma Ibana marguru tu adatmuna.
H: Alai ninna angka Jahudi ma
mandok ibana: Ndang jadi pusaonnami manang ise. Jadi dialuhon nasida ma Ibana,
ninna ma:
Na dapot hami do on
pabalikbalikhon bangsonami jala mangorai mangalehon guguan tu Kesar i,
dipandok, Raja Kristus do Ibana.
U: Jadi
dibongoti si Latus muse kantorna, dijou ma Jesus, didok ma tu Ibana: Atehe, Ho
do Raja ni Jahudi? Ro
ma alus ni Jesus: “Na sian roham do na nidokmi, manang na nidok ni halak do i
tu ho taringot tu Ahu?”
H: Gabe
dialusi si Latus ma mandok: Bangsomi dohot angka sintua ni malim i do pasahathon Ho tu
ahu. Aha do na binahenmu?
U: Jadi dialusi Jesus ma: Ndang sian portibi on harajaonKu, aut sian portibion
harajaonKu, ndang tarbahen so mangalo angka naposongKu asa unang sahat Ahu tu
tangan ni angka Jahudi. Alai ndang sisongoni harajaonKi.
H: Dungi
ninna si Latus ma mandok Ibana: Asa Raja do Ho? Jadi ninna Jesus ma mangalusi:
U:
Songon na nidokmi ma tutu, Raja do
Ahu! Umbahen na tubu Ahu jala umbahen na ro Ahu tu portibi on, asa
huhatindangkon hasintongan i. Ganup na sian hasintongan i, tangihonon ni i do
soarangKu.Ninna
si Latus ma mandok Ibana:
H:
“Aha ma i hasintongan i?”
U: Jadi dung didok songoni, ruar ma ibana muse
manopot angka Jahudi mandok tu nasida: “Ndang jumpang ahu manang dia salana.”
H: Dungi
ditogu si Latus ma Jesus, didokkon ma linsinganna. Jadi didandani angka soldadu
ma sungsang duri bahen tumpal, diampehon ma tu uluNa; Baju dapdap ma dialithon
tu dagingNa. Dungi ro ma nasida tu joloNa mandok:
Tabi di Ho ale Raja ni Jahudi! Laos dipastapi
ma Ibana.
U: Dungi ruar ma muse si Latus, didok ma tu
angka Jahudi: Ida hamu ma, hutogihon do Ibana tu jolomuna asa diboto hamu na so
adong jumpang ahu salana. Laos ruar ma Jesus manjujung sungsang duri jala
marbaju dapdap. Jadi didok si Latus ma tu nasida:Ida hamu ma jolma
i! Asa dung diida sintua ni malim dohot angka naposo Ibana, dijouhon nasida ma:
H: Parsilangkon, Parsilangkon
ma Ibana:
U: Boan hamu ma Ibana, parsilangkon hamu ma; ai
ndang jumpang ahu salana. Gabe dialusi Jahudi ma ibana, ninna ma:
H: Padao, padao ma
i; Parsilangkon ma Ibana!
U: Dungi didok si Latus ma tu nasida:
Parsilangkononku ma Rajamuna? Jadi dialusi angka sintua ni malim ma:
H: Ndang adong
rajanami dungkon ni Kesar i. Marguru tu patiknami ingkon marutang hosa Ibana,
ai dibahen do diriNa anak ni Debata.
U: Umbege i si Latus, lam ganda ma biarna. Dungi
diulahi muse tu kantorna, didok ma tu Jesus: Sian dia do Ho? Alai ndang dialusi
Jesus ibana. Dungi didok si Latus ma tu Ibana: Ndang angkupanMu ahu
manghatai? Ndang diboto Ho marhuaso ahu paluahon Ho jala marhuaso parsilangkon
Ho? Jadi dialusi Jesus ma: Ndang adong huasom mangago Ahu, aut unang ni lehon i tu ho sian
ginjang. Dibahen i gumodang do dosa ni na pasahathon Ahu tu ho. Jadi olat ni i
ma dilului si Latus dalan paluahon Ibana. Alai manjujui ma angka
Jahudi, ninna do:
H: Molo dipalua ho on, ndang
aleale ni Kesar ho! Ai na mangalo Kesar i do ganup na mambahen dirina gabe
raja.
U: Asa dung dibege si Latus hata i, ditogihon ma
Jesus haruar, laos hundul Ibana di habangsa paruhuman i na diinganan na
margoar: Pantar batu alai anggo di hata Heber: Gabbata. Ima na masa di ari
parhobasan Paska, mareak hos ni ari. Asa dung diida si Latus,
na so marguna hatana, lam ganda tahe gaorna, dibuat ma aek mamuri tanganna
dijolo ni natorop i huhut mandok: Lias do ahu sian mudar ni on, hamu do na sari
disi! Dungi ninna sude natorop i ma:
H: Marsapata tu hami
dohot ianakkonnami ma mudarNa i!
U: Alai peam do dipalua panguhum i di pesta i
sada halak na tarhurung, marguru tu na tinodo ni natorop.
H: Alai adong ma tarhurung uju i
sada halak parjahat na sumalin na margoar si Barrabas. Jadi di na pungu i
nasida, didok si Latus ma tu nasida;
U: Ise do dipangido hamu
paluaonku, si Barrabas manang na targoar Kristus? Alai sai
disosoi angka sintua ni malim rap dohot sintua ni bangso i natorop, asa
dipangido nasida, malua si Barrabas, alai pusaon do anggo Jesus. Dungi ninna
panguhum i ma mandok nasida: Ise sian na dua i dipangido hamu paluaonku? Dungi
didok nasida ma:
H:
“Si Barrabas!”
U: Dungi didok si Latus ma tu
nasida: Antong aha ma bahenonku tu Jesus, na targoar Kristus? Gabe saluhut
nasida mandok:
H: Parsilangkon ma!, Parsilangkon
ma!, Parsilangkon ma!
U Alai ninna panguhum i ma:
Ai aha ma na jahat dibahen? Jadi lam gogo ma dipajoujouhon:
H: Parsilangkon ma!, Parsilangkon
ma!, Parsilangkon ma!
U: Dungi saut ma dipalua si
Barrabas. Alai anggo Jesus dilinsingi, dungi dipasahat ma asa
diparsilangkon. Jadi dung diida si Judas
parjehe i, na naeng hona uhum nama Jesus, disolsoli ma rohana, dipaulak ma na
tolupulu rupia tu angka sintua ni malim dohot tu sintua ni bangso i, ninna:
H: “Sala
do ahu, hujehehon do hape na so marpipot!”
U: Alai didok nasida ma: “Ndang ro di hami! Ho do na sari disi!”
Jadi ditimpalhon ma perak i tu bagasan joro i, laos sumurut sian i laho
maningkot. Alai dibuat sintua ni malim ma hepeng i, ninna ma:
H:
“Ndang jadi padomuon i tu arta ni joro, ai tuhor ni mudar do i!”
Jadi mardos ni roha nasida manuhorhonsa tu
ladang ni pande hudon, bahen parbandaan ni halak dagang. Ala ni i umbahen
margoar i ladang mudar ro di sadari on.
20. Marende,
No. 171 : 1-2 “Tandai ma ahu”
V Tandai ma ahu, sungkapi
ma dohot rohangku. Uji ma au, pamanat huhut ma langkangku. Ala AnakMu ma i
Debata.
V Asi ma rohaM
taringot tu pangalahongku. Olo tutu, jotjot
do na lilu dalanku. Sesa dosangku sude, Debata.
21.
Tangiang Pangondianon:
22.
Marende,
No. 412: 1 “Ndi dolok adu
i”
V Ndi di dolok adui silang ni Tuhan i, sap
mudar, sap tijur do i. Jesus mate disi, asa malum dibaen sude angka gondok roha
i. Dibaen i tung holong rohangki, mida silang di Golgata i. Hupasolhot diringku
tusi, dompak surgo pardalananki.
23.
Jamita :
24. Marende, No. 86: 1- “Silang na badia i” (Pelean)
V Silang na badia i, Ho ma lombulombungki.
Maralohon dosa i dohot pandelean i. Di sude sitaonon i, Ho ma lombulombungki.
V Nasa na huula i, ndang tau hasonanganki.
Nang ringkot pe rohangki, pola ro nang ilungki. Holan asi si rohaM, pangurupi o
Tuhan.
V Ro do au nuaeng tu Ho, sai palambas ma
rohaM. Nunga pola mate Ho, ala asi ni rohaM. Jangkon au na dangol on, sai ulosi
tondingkon.
25. Panutup: Tangiang & Pasupasu. (Amen,
Amen, Amen)
