Parturena Pasahathon Tohonan Hapanditaon

Parturena Pasahathon Tohonan Hapanditaon

XVI. Pasahathon tohonan hapanditaon

Marende         :

         Ale Tuhan Debata ! Amanami, Parasiroha na sumurung, Didokhon AnakMu do hami mangido panabi angka na burju tu Ho, sisuruonMu tu sisabion I, mamaritahon HataM tu jolma. Ala ni I umbahen na ro hami nuaeng tu joloM mangasahon Tuhan Jesus Kristus Tuhannami mangido tu Ho : Sai topot ma hami  na pungu dison laho pasahathon ulaon hapanditaon tu angka dongannami on. Lehon ma Tondi Parbadia tu nasida angka naung pinabangkitMu asa malo nasida manjamitahon HataM, asa marhiras ni roha nasida mamboan Barita na Uli bahen hamuliaon di Anak haholongan ni rohaM. Ungkap jala patiur ma rohanasida tongtong maniop HataM dohot mangharingkothon ulaon na pinasahatMu tu nasida. Sai tumpahi ma ulaonnasida, asa maruli upa nasida rap dohot angka a pinarmahanna di hangoluan sogot marhitehite Tuhan Jesus Kristus Tuhannami. Amen.

         Hamu ale dongan ! Disuru Amanta na di banua ginjang I do AnakNa Tuhan Jesus Kristus tu tano on gab jolma, asa tarbahen jolama manisia mananda holong ni roha ni Debata di nasida, asa marpos ni roha nasida di Ibana jala sumuang nasida ti harajaonNa, gabe masuk nasida tumean hangoluan na saleleng ni lelengna. Jadi dung sun ulaon ni Anak ni Debata di tano on, dipasahat ma tohonan tu angka anak siseran I, asa nasida paboahon  dohot pashathon naung hinamonangkonNa I tu donganna jolma. Angkup ni I didok  Apostel Paulus do : Dipabangkit Tuhanta do deba gabe Apostel, deba gabe panurirang deba gabe parbarita, deba gabe parmahan, deba gabe pangajari, asa sun denggan angka na badia I tu ulaon i. Sian I ma tangkas taboto : Tuhan Jesus do mamajokhon tohonan hapanditaon.

         Mangihuthon hata ondeng, sai dipabangkit Debata di tongatonga ni HuriaNa angka Pandita, mulai intap ni dung ojak Huria I di tano on ro di tingki nuaeng.

         Dung I jahaon ni Ephorus dohot donganna : Bege hamu nuaeng pandok ni Debata taringot tun tohonan ni hapanditaon. Mat 28 : 18 – 20, Joh 21 : 15 – 17, Ulaon ni Apostel 20 : 17 – 35, 1 Tim 3 : 1 – 7, 2 Tim 1 : 5b.

Marende         :

         Antong ale dongan ! Tohonan na badia do sijaloonmuna nueng, ai sian Tuhan Jesus do tohonan na songon i. Ala ni I hupasingothon jala hupaboa ma tu hamu parture ni pangaradotion di tohonan hapanditaon, asa tangkas diboto hamu dokdok ni tohonan i.

  

I.    Ramotanmuna ma arta sian Tuhan Jesus, songon na bin ahen ni  parmahan mangaramoti na di ibana, asa unang mago. Ai peakhononmuna do sogot rujiruji taringot tu angka pinarmahanmuna di jolo ni Tuhan i. Na gabe sitiruon do hamu di jolo nia angka na pinasahat tu hamu. Dibahen I tangkas ma hatahon hamu tu nasida Hata ni Debata, na tarsurat di angka surat na di Padan na Robi dohot di angka surat na di padan na Imbaru. Buat hamu ma sian Hata I poda, apoapo, sipaingot, apulapul dohot hata paminsangon, hombar tu angka na masa. Songon I do dibahen angka Apostel, songon na nidok ni Apostel Petrus: Molo adong na marjamita, dihatahon ma hatana songon Hata ni Debata; molo adong manang ise na marhobas hombar ma I tu gogo na nilehon ni Debata, asa dapotan hasangapon Debata marhitehite Tuhan Jesus Kristus di na saluhutna. Sialoonmuna jala sitaluhononmuna ma nasa hatahata, na marsalisi tu Hata ni Debata. Marlambok ni roha ma hamu maminsangi angka na mangalo, anggiat dilehon Debata ni roha, asa diboto nasida hasintongan. Antong diramoti hamu ma dirimuna dohot na sapunguan I, manang tu dia hamu dipaojak Tondi Parbadia asa diparmahani hamu Huria ni Debata, na hinophopNa I marhitehite Tuhan Jesus Kristus. Ingkon baritahononmuna do hata sihaporseaan I, I ma na nilehon ni Debata padengganhon jolma tu Ibana, ai I do dalan tu hangoluan, dalan tu hamubaon ni roha dohot dalan pardamean tu angka na pinasahat tu hamu. Antong singkat ni Kristus I do hamu mangelekelek jala dohononmuna ma tu jolma I : Sai olo ma hamu padengganhon tu Debata.

II.     Songon tangkas ni pamodaionmuna di angka na olo tu hadaulaton tu Debata, ingkon songon I ma tangkas paminsagonmuna di angka na so olo tu hangoluan, asa unang adong na mago, ala so ada sipaingot, jala unang marsapata nasida tu hamu. Ingot hamu ma na tarsurat i. Ia ho ale anak ni jolma ! Nunga hupabangkit ho gabe siparmahan ni halak Israel, ingkon tangihononmu Hata na ruar sian pamanganHu. SingkatHu ma ho, palumbahon nasida. Molo hudok tu angka pardosa na tu hamatean nama ho, gabe so dipalumba ho ibana, ndang diapuli ho ibana, asa dipauba rohana, asa mangolu, na mate do tutu pardosa I ala ni dosana, alai sian tanganmu do tunguonHu mudarna. Alai molo dipalumba ho pardosa I, hape ndang dipauba rohana dohot pambahenanna, mate ma ibana tutu di bagasan dosana, alai malua do ianggo tondim.

III.   Alai ndada holan ulaon ondeng na pinasahat tu Pandita. Ai di na laho manadingkon tano on Tuhan Jesus, jumolo do dipadiri ulaon na badia na dua ragam i. Na mangan parpadanan na badia do na saragam. Na saragam  nari, I ma pandidion na badia, na tinonahonNa I di na laho manaek           Ibana tu banua ginjang. Asa radotanmuna ma ulaon na badia na dua ragam I; songon parhobas di bagas ni Debata ma hamu mangulahonsa. Tangkas ma pamanat hamu angka dongan I, asa holan angka na tau, angka na tumanada dosana, angka na mangarsakhon pambahenanna jala na olo paubahon rohana manjonohi panganon na badia i. Ambatonmuna do angka na jungkat, anka na lomo roha di dosa, asa unang dijonohi na badia i. Ingot hamu ma : Dipasahat Tuhan Jesus do anakhinsu ni banua  ni banua ginjang tu HuriaNa I, asa dipabali angka na so olo paubahon rohana, ai ninna do : Hulehon pe tu anakhinsu ni harajaon na di angka banua ginjang i. Nasa na niihotanmi di tano on, harhar do I nang  di angka banua ginjang. Didok Tuhan Jesus dope : Jalo hamu ma Tondi Parbadia ! Molo disesa hamu dosa ni manang ise, naung sesa ma I, molo dipahot hamu dosa ni manang ise naung hot do i.

IV.  Angkup ni radot ma hamu patureturehon angka dakdanak, maniru pambahen ni Tuhan Jesus. Ai didok Tuhan Jesus sahali : Loas hamu ma angka dakdanak I ro tu Ahu, unang orai hamu nasida, ai di angka sisongon I do harajaon ni Debata. Dibahen I ajarhon hamu ma pamusatan ni Hata ni Debata (Katechismus) dohot jamita tu angka dakdanak. Podai hamu ma nasida, asa diboto hadaulaton tu Debata dohot hapantunon tu jolma. Ambat hamu ma nasa na tau mangago dakdanak, ai parmahan do hamu, songon naung nidok ni Tuhan Jesus : Parmahani ma angka anak ni birubirungku.

V.     Ramoti hamu ma saluhut pangisi ni Huria I, angka na mabalu, angka ama, ina dolidoli dohot  anakboru, maniru pambahen ni Apostel Paulus. Ai ninna do tu halak Epesus : Dibahen I jaga ma hamu, ingot hamu ma nasa na so mansohot ahu saleleng ni tolu taon arian dohot borngin, paingothon ganup hamu huhut mariluilu. Tangiangkon hamu ma saluhut na pinasahat tu hamu, asa diramoti Tuhan Jesus nasida jala dipasupasu marhitehite Tondi Parbadia.

VI.  Angkup ni I sai ture ma parangemuna, asa tau tiruan hamu di angka na pinarmahanmuna I, tiruan di hata, di pangalaho, di haporseaon dohot di holong ni roha. Ingot hamu ma na nidok ni Hata ni Debata : Ingkon unang marhaurahon Sintua I, harajaan ni sada boruboru, unang parmabuk, na marroha na ture marparange, na las roha di tamue, pangajari, unang sisobur tuak, unang panglinsingi, unang parpangomoan na so tama, alai ingkon partalup ni roha do, na so parbada, na so impolan di perak,  na denggan mangarajai donganna sabagas, parianakhon sioloi ajar di bagasan nasa hatomanon. Ai molo adong manang ise, na so malo manggomgomi isi ni bagasna tung beha ma tarpatursa Huria ni Debata.

VII. Ingkon ture bahenonmuna saluhut aturan ni ulaonmuna I mangihuthon patik ni indukmuna. Sahata ma hamu dohot angka dongan Pandita : Di  pangalaho ni pangoloion tu Debata, unang pulikpulik marpingkiran, unang marsalisi hata dohot roha, unang masigasipan, asa saut di hamu na pinagido ni Tuhan Jesus sian AmaNa di na nidokNa I : Sai tongtong ma di GoarMu nasida na nilehonMi tu Ahu, asa sada nasida songon Hita.

Marende         :

         Antong nunga dibege hamu hatorangan taringot tu tohonan hapanditaon songon na pinatorang ni Hata ni Debata.

Na manungkun ma ahu nuaeng di hamu :

1.      Diaprhatutu roham do : Angka surat na di Padan na Robi dohot angka surat na di Padan na Imbaru, I do Hata ni Debata na patuduhon dalan tu hangoluan na so ra suda, jala na olo do ho mambolongkon saluhut poda na asing jala mangalo na marsalisi tu Hata na tarsurat disi ?

      Alus :……

2.      Na olo do ho mangulahon tohonan I hombar tu na hujaha nangkin, I ma taringot tu poda  dohot pangalaho, jala na olo do ho marateatehon hata paminsangon na sian indukmu di tingkina ?

      Alus :……

         Antong na jongjong do hamu di jolo ni Debata dohot di jolo ni Huria on. Molo naung sada situtu rohamuna manjalo tohonan hapanditaon jala molo na olo do hamu mangulahonsa sian nasa rohamuna, dok hamu ma :

      “Na olo do ahu; Sai didongani asi ni roha ni Debata ma ahu patupahon saluhutna I !”

Marende               :

Ephorus mandok : Hupabangkit jala huurasi ho gabe Pandita di Huria Kristen Batak Protestant marhitehite Goar ni Debata Ama, Anak dohot Tondi Parbadia. Dipatiur, dipargogoi jala ditogutogu Tuhanta I ma ho marhitehite Tondi Parbadia.  Mangulahon tohonan hapanditaon, asa gabe pangula na burju ho, na marpabuehon parbue na denggan ro di saleleng ni lelengna. Dipatau Debata ma ho tu angka ulaon I, mangulahon na hombar tu HataNa marhitehite Tuhan Jesus Kristus, sipasangapon I ro di saleleng ni lelengna ! Amen.

Sada Pandita mandok hata          :

Mandok hata Parhalado Pusat    :

Marende               :

Martangiang        :

         Ale Tuhan Debata, Amanami na di banua ginjang ! Sasada Ho do na patauhon angka naposoM, an sinuruM tu angka Huria i. Ho do mangalehon huaso dohot hamaloon, asa tarida jala lam timbul ulaonMu. Ala ni I umbahen na ro hami marhitehite Tuhan Jesus Kristus Tuhannami, mangido tu Ho : Patiur ma roha ni roha ni angka naposoM on. Iringiring ma nasida marhitehite tanganMu na badia i. sai pamalo nasida mangulahon tohonanna na pinasahatMu tu asida sadari on, asa ture ualaonnasida dibagasan HuriaM, jala lam rarat harajaonMu tu liat portibi on. Sai lehon TondiM na badia I mangajari dohot manogunogu nasida, asa tartogihon nasida angka donganna jolma na hinophop ni AnakMu marhitehite mudarNa na badia I, gabe mulak tu Ho asa rap hami di hasonangan pasangaphon Ho di bagasan Tuhan Jesus Kristus Tuhannami. Amen.

         Ale Amanami na di banua ginjang ! Sai pinarbadia ma GoarMu ! Sai ro ma harajaonMu ! Sai saut ma lomo ni rohaM di banua tonga on songon na di banua ginjang ! Lehon ma tu hami sadari on hangoluan siapari ! Sesa ma dosanami songon panesanami di dosa ni dongan na mardosa tu hami ! Unang hami togihon tu pangunjunan ! palua ma hami sian pangago ! Ai Ho do nampuna harajaon dohot hagogoon ro di hasangapon saleleng ni lelengna ! Amen.

Pasupasu              :

Marende               :          

( Sumber Agenda HKBP/Adven Leonar Nababan )

Manjalo Tohonan Hapanditaon HKBP Cinere 22 Desember 2013

Tohonan Pendeta di HKBP

TOHONAN HAPANDITAON DI HKBP

I.  PANGANTUSION TARINGOT TU TOHONAN HAPANDITAON                                                                                                 

Tung ampit jala dasip do hata Tohonan di hata Batak, pataridahon na silehonlehon ni Debata do i tu marsasahalak jala tung so tarpaorot do i sian na ingkon manjalosa.  Boi do i antusan sian hata “Toho” dohot pandohan “sitohotoho” mandok na so binahenbahen, na so pinasumansuman, alai na tung i do tohona dohot sintongna sian pangalehon ni Debata.  Na dipasahat do Tohonan i tu sahalak ala ni hadirionna na dihilala boi dipatujolo ala ragam ni hatauonna: diparbinotoan, dipartondion, diketerampilan mambahen sasahalak gabe pemimpin manang tokoh gabe  parnampunaon na toho dipartohonan i di tongatonga ni masyarakat dohot di parugamaon

Hata “PANDITA”: Sian Bahasa Sansekerta.

Mansai bidang do pangantusion taringot tu hata “Pandita”, boi do i bersifat akademis, partondion dohot ketrampilan (na bisuk, na marsiajar, na terampil), jala boi do marlapatan na patuduhon sasahalak sada tokoh utama di tongatonga ni masyarakat.

Pandita ima sahalak namanguluhon Huria, na ulaonna MARHOBAS, tarlumobi manghobasi ulaon partondion.Ala Parhobas do Pandita, ingkon adong do “Parasingan” ni parngoluon dohot pangulaonna sian angka na so partohonan pandita (ngolu di bagasan Kristus). Parngoluon dohot Pangajarion ni Tuhan Jesus, na patuduhon diriNa songon parhobas na denggan, naeng ma nian songon i na boi dapot idaon di ngolu ni sahalak Partohonan Pandita.                                                                                                                  

Tohonan Hapanditaon ima  silehonlehon ni Debata na dipasahat jala dijalo marhite roha na tulus jala bulus, marhite nalom dohot serep ni roha mangulahonsa.

Marhite ojahan i, Tuhan Jesus do na pajongjong Tohonan Hapanditaon mamungka adong Huria di Portibi on sahat tu tingki on (Mat. 28:18-20; Joh. 21:15-19; I Tim. 3:1-7; II Tim. 1:6). Tohonan Hapanditaon, na tubu jala na marurat do i sian Tohonan ni Tuhan Jesus na badia i.

NDANG TOHONAN ADMINISTRASI ORGANISASI HAPADITAON I,  ALAI TOHONAN PARTONDION DO. NDANG JABATAN, NDANG PROFESSI ALAI NGOLU DO

Tardok ojahan ni parhuriaon do tohonan. Molo denggan mardalan tohonan hapanditaon, manjadi do Huria i. Tarsongon jantung na mangatur pardalan ni mudar tu sandok pamatang i laho pangoluhon, ingkon songon i ma tohonan hapanditaon i padalanhon ngolu Barita Na Uli i

II. TOHONAN HAPANDITAON DI  HKBP

A. SEJARAH TOHONAN HAPANDITAON DI HKBP

Tohonan Hapanditaon di HKBP ima kelanjutan ni sejarah Tohonan Hapanditaon ni angka Parbarita Na Uli (Missionaris) na tinongos ni badan-badan Sending Luar Negeri secara khusus RMG (1861-1940)

Taon 1883  jongjong Sikola Pandita na parjolo di Pansurnapitu. Tanggal 19 Juli 1885 tarpasupasu ma Pandita na parjolo sian tongatonga ni halak Batak di Pearaja Tarutung, ima Johannes Siregar, Petrus Nasution, Markus Siregar

Pdt. K. Sirait: Pandita Batak naparjolo manguluhon HKBP Dung marumur 79 taon HKBP (1861-1940)

Tung tangkup do pangantusion ni na torop di hatiha i marnida/mangantusi ulaon ni Pandita na songon malim ni Debata. Tarida do i sian pangalaho na daulat jala na donda marpangalaho di panghataion, di parabitan, tobok jala burju. (patudos tu pandohan: “Tuan Pandita” manang “Songon Pandita do Tuan i”). Tarida do hasangapon ni pandita i, dang sian hapistaran, alai ala ni badia ni pangalahona

Alai dilaon ni ari gabe maturtur jala lam harhar do pangantusion i di deba halak, ala godang sisurahan parange ni pandita na so saurdot hatana tu pangalahona

B. PANGANTUSION TARINGOT TU TOHONAN   HAPANDITAON di HKBP

-               Tohonan Hamalimon do tohonan Hapanditaon, ala Debata do na mangampehon jala pasahathon ulaon laho marmahani huriaNa patureturehon Tondi ni jolma jala manogunogu tu Debata (I Musa 12:4;  2 Musa 3:6+10)

-               Marhite na manjalo tohonan, bangkit gabe Panurirang, Malim dohot Raja do partohonan di HuriaNa (I Kor. 12:28; Ef. 4:11; Ulaon.  6: Munus Triplex) jala Kristus do na gabe tiruon di partohonan (pat. Agenda pamasumasuon di Agenda HKBP)

-               Konfessi HKBP  bindu 9: “Parhobas ditongatonga ni Huria Kristus do na bangkit Raja marmahani ngolu ni partohonan, na manggohi tohonan ni jinalona, asa hobas jala rade di panjouon i”

Laho mangulahon tohonanna, ingkon siboanon ni pandita i do Barita na uli taringot tu Kristus. Dang jadi sian malomalo nang habisuhonna, ai Kristus do pusat ni nasa hata ni Debata (I Kor. 2:4+6-7). Ai molo Kristus i diboan, tarida ma pangalahona sian sandok panghobasionna.

Ingkon manghirim do pandita i di parbue ni Jamita na sinaburhonna jala huhut benget maimaimahon dibagasan tangiang. Suang songoni ingkon gabe partohonan na marpanindangion ma pandita, na tau tiruan, ai marhite sian i ditanda halak Jesus Sipalua i.

C. TOHONAN SIJAGA TONDI DOHOT NGOLU 

4 Sipahinsa manang Sipapir Tondinta di ulaon i:

1).   Sian Tuhanta do Tohonanta

Debata sambing do na paojakhon jala Saguru di ibana do Tohonan (pat.  2 Kor. 5:18,  2 Kor. 5:20: Ulaon. 20:28, Ef. 4:11:).  Alani i,  sumurung do Tohonan i, alai laos tohonan i do na dumokdok. Ai ndang adong tohonan di portibi on, na songoni borat ni tanggungjawabna

2).   Paingothon sian hata ni Debata

Hata ni Debata na hot jala manongtong pataridahon holong dohot pambahenan laho pangoluhon sian hamagoan/hamatean. Sipeopon jala sipahusorhusoron do hata i di roha dohot di ngolu. Margogo do hata i laho manindangi di roha dohot di sude ngolu

3).   Manghatondithon Tanggungjawab

Parsuruon ni Debata dibagasan hagogoon dohot huasoNa alani sangapNa. Hagogoon dohot huasoNa do na patauhon, asa barani mangalumbahon jea, dompak hajahaton marhitehite na mangasahon goar ni Tuhan i

4).   Papir Tondi

Manean Harajaon ni Debata marhite pangaradotion di tohonan sian nasa gogo dohot ringgas ni roha. Palumbahon tu ruas asa saleleng di ngoluna tongtong mangungkap roha, rade mangurupi, suang songoni margogo palumbahon, maminsang dohot paingothon angka parsala dihasalaanna

III. SAHAT ULA TOHONANMI  (2 TIM. 4:5)

Patulushon Poda Tohonan Naung Pinasahat Ni Kristus Naeng  Ma Partohonan Pandita,  Gabe:

1.    Naposo Parmahan

Dungo jala barani manghophop dorbiana, jala na tongtong manogunogu partondion ni ruasna, mamboan tu panghilalaan na sonang

2.    Naposo Uluan

Na bertanggungjawab tu Debata silehon parbue ni Tondi jala na pasolhot tu Debata. Naeng tongtong mangido pangurupion asa tongtong dipaimbaru. Debata ngoluna, gabe tiruan/teladan (pribadi, keluarga, pargaulan, hata dohot pambahenan) asa margogo mamboan ruas tu hamubaon dohot hasesaan ni dosa.

3.    Naposo Sijaga Tondi

Paulihon dohot manjagahon tondi ni ruas marhite na dungo laho paingothon (paboahon uhum dohot pasupasu sian Debata). Naeng lam tubu jala mangerbang ngolu parsaoran di hata ni Debata, songon tanda naung mian/maringan Hata i di ngolu ni ruas.

4.    Naposo Pangajari

Gabe pangajari na pabotohon barita haluaon,  gabe margogo ruas laho marsada, manindangi dohot manghobasi. Dipataridahon ma hamajuon ni ruas na tongtong gok panghirimon, di pangantusion,  jala lam solhot laho mananda hasintongan dohot hatigoranNa.

Ingkon tangkas do tarida di ngolu ni Pandita hatiuron dohot hasintongan di atas ni haholomon ni ngolu portibi on, Songon na ginombarhon ni baju Tohonan Hapanditaon i

Beft na bontar na dua i na ampe di atas parateatean di ginjang ni pahean na holom na manggombarhon hatiuron dohot hasintongan (2 Musa 28:30; ima URIM dohot TUMIM, na gabe uhum sipaboanboanon ni Partohonan Pandita di tongatonga ni bangso ni Debata dohot di na humalianga).        

Naeng ma tarida parbue ni  pangulahonon di tohonan di ngolu ni angka Partohonan Pandita,  na marsaor dohot ruas marhite Hata ni Debata, patuduhon parsaoran holong di bagasan Kristus i. Marhite i gabe dihilala ruas i ma na mangolu do tondina siala angka na sinuru ni Debata na gabe surat na mangolu (II Kor. 3:2-6)

Pinasahatni

Kepala Departemen Marturia HKBP

Pdt.M.H. Sihite, STh,    Seminarium  Sipoholon - Tarutung