MAR ARIPESTA DIHUTA (Ponggol 4) dohot (Ponggol 5 )

 MAR ARIPESTA DIHUTA  (Ponggol 4) dohot  (Ponggol 5 )

Mulak ma si Gortap sian parmeaman....nungga mulai golap ari.

Dang jadi ibana tu balian mandongani hahana si Gerson, anggo hatana rope ibana....gariada bajuna nasian sikkolai dope di pakke ibana mulak tu jabu.

Hohom ma ama Gerson dohot inantana....anggo si Gerson pittor hatop do ibana masisi, mabiar ibana so hona mara.

Tuson joho Gortap ninna Bapakna....pahundul jo di lageon. Olo Bapa, satokkin huganti jo bajukku ninna huhut hu marojor mangganti. Tukki si manjujung nisi Gortap, nanget nanget mandapothon Bapak naon.

Anggo nai Gerson sai di tataring ido ibana mangaloppa....huhut dipaida ida aha ma numaeng nanaeng masa.

Husukkun joho Gortap jala alusi denggan....unang margabus ninna Bapa nai huhut di sartik loting nai manggalahi timbahona.

Olo Bapa....ninna si Gortap otik mardeper soarana.

Ro nangkining bapak nisi Mopeo tu jabuon.... mandok manuk jambe ni ibana nga habis di tutungi hamu. Tikkos doi??? huhut agak gogo soarana laos di pangido tu inantai asa di bahen kopi sagalas.

Hohom do si Gortap leleng....agoiiii amang....habotoan, ise ma numaeng paboahonon, anggo on marlapu lapu namaon, habis ma au di lotaki sai ima di bagasan rohana....huhut di pulos pulos ibana tanganna.

Alusi Gortap ninna bapa na huhut hera di songgak.....

Dang adongi bapa....hatana doi, marmeam meam do au nangkining dohot dongan, ninna ibana huhut makkadotdot mandok laos unduk bohina.

Nga mulai mostop dirohani bapak na....sahali nai husukkun, nadi tangkup hamudo manuk nisi Mopeo??? Huhut di tutungi hamu??? ngarobe rimasna laos di tiop hau hau laho mangalotak.

Daong bapa ninna ibana muse.....sai di porso do huhut nga mabiar situtu, makkitiri patna.

Holan naeng di libas bapak naon...ittor hatop di tolai inantai....

Bohado sai libasanmu dakdanak ninna inantai....huhut di dapot hon ianakkon naon.

Au tusi manukkun....dang songon ho pittor naeng mangalibasi ninna nai Gerson huhut gogo soarana.

Nion kopimon.....ninna inantai, laos di tarik si Gortap tu suhi suhi ni jabui.

Boasa sai appinammu naung salah??? Sai hodo mambahen ibana gabe susah iba, sai mangalo torus, gabe manja ma ibana annon ninna amattai tu nai Gerson....sai hera na martokkar halaki. Lomokku ninna inantai....dang di boto ho mangajari, torus doho sai holan na mangalotaki molo salah dakdanak. Laos di pahohom amattai ma dari pada sai ribut hape nga borngin, maila iba tu hombar jabu sai ima di pikkir amattai.

Laos di husippon nai Gerson ma tu anaknai asa unang sai di bege bapakna pakkataion nasida.....ai toho do di allangi hamu manuk nisi Mopeo i??? Dang pola muruk au amang molo di paboa ho na tikkos.

Boha do tutu ninna roha nisi Gortap....dang toho beaon....sai nitahi torus margabus sai na habotoan do annon.

Daripada di lotaki iba tumagon ma pinaboa....

Alusi jo Gortap ninna inongnai.....hape gabe mekkel suping ma si Gortap daripada sai totong huhut di serbeng ibana bapakna na tongon minum kopi.

Berarti toho do hamu na manutungi manuk nai....sian dia di boto inong ninna ibana.

Dang boi au amang gabusanmu ninna inong nai huhut di anju si appudan naon.

Ipe mekkel do ho....laos huida adong solot lasiak di iponmu, ninna inongnai. Dang tarjua ibanabe huhut di paboama.

Alai unang muruk inong da....olo ninna inongnai.

Tikkos do nakkining dung mulak sikkola hutakko hami manuk nisi Mopeo...ido menna dang jadi dohot au tu balian.

Torushon ma hubegepe....ninna inong nai.

Dung huseat hami manukon....hututungi hami ma muse....adong ma napapungu soban...adong na manutu lasiak....dohot paiashon ibbulu ni manukon....

 MAR ARIPESTA DIHUTA

          (Ponggol 5)

Nga masak be manukon inong.....asa di boto inong da, ittor roma bapak nisi Mopeo humarojor mandapothon hami. Ise namanutungi manuki????? mansai gogo soarana. Habotoan ma na hu takkup hami manuk jabbe nai.

Lari ma hami sude mallojong....daripada hadapotan, mabiar ma iba annon molo di boan tu happung

Bahhh....bahhh...jadi dang sempat hape di allangi hamu manuki, hape nian nga masak. 

Laos dialusi si Gortap, daong dope inong. Attong didia jagal manuki, ise mangallang ninna inong nai muse.....

Dang huboto inong...asa di boto inong muse da, ia lasiak nadi ipon hon ala pas muse au manutu, hona ma jari jarikkon tu pa manganhon napas mallojongi i hami, alana mansai tarsonggot do hami sude, so binoto boa boi habotoan, humalaput be do hami na mallojongi ninna si Gortap.

Laos di pasingot inongnai ma ibana....dang boi amang songoni da.

Bereng ma bapakmi nga mansai muruk hian....anggo dang adong au ipe nga habis beho di lotaki bapakmu....huhut ma sai unduk si Gortap ala nga salah.

Huroha nanggo mandai jagal naipe so jadi malah gabe habotoan do tu natorasna....paetnai....ima diroha nisi Gortap

Toema nga husukkun ipe ibana...unang pola sai ganggu ibana ninna nai Gerson tu amattana.

Huhut ma di paboa inantai aha pakkataion nasida.

Bahh tutu....toema molo songoni, ninna amatta na huhut didok ibana....toho do marsalah nasida na manakkup manuki laos diseat, alai unang dah di suru iba mambayar hippal manuk nai. Ai so halaki mangallang ninna ama Gerson.

Denggan ma hatai hamu dohot dongan mu....jumpangi hamu ma amani Mopeo i...molo tung ikkon di garar, suru hamu ma attong asa di hurangi argana....alana so jadi akka dakdanak mangallang.

Inamai ninna ama Gerson huhut di uduti Ibana manambung sigaret GP nai.

Hurippu do halaki pasudahon sude manuki....alai boasa ma holan na mambahen marsak bayon tu iba....dakdanak dope nga holan na manusai natua tua ulaon na.

Boha muse ma annon dung naposo...dung doli doli....dang hatolapan bei, olo ma na annon di hapitton iba.

Honian ninna inantai.....goar nama dakdanak.

Hope tikki najolo binege sian eda songoni nama jugulmu.

So tammat ho sian SMP....hodo nadi tiruni...ninna parsonduk nai huhut di serbeng otik amattana...

Hehehehe...huhut mekkel ama Gerson mambege....adong do nian tikkosna. 

Gelleleng gelleng dope nian anak taon ninna ama Gerson huhut di inum kopinai...

Molo si Gerson on songonima burjuna....las roha mangida sai tulus ma ateh ninna tu inantai.

Las do roha marnida anakkon ninna inantai muse mandapothon hata nai.

Malo muse tung so olo do mambahen iba muruk, sikap sikap molo si nuru dang pola olo mangalo.

Anggiat ma dapot rengking ibana annon asa boi masuk SMP.....huhut songon na di tolopi amattai hatai.

Alai boha muse ma anggina on ateh ninna amattana...

Toema goarna ma dakdanak.....unang sai pittor sibolison ho molo salah ibana.

Dang sai biasahononmu ma mukkul ibana....apalagi molo sai di bereng si Gerson di pukkuli ho anggina...boama rohana. Dang sai patandahu na mardikkan bahenonmu....asa di boto hoda....tung so hea do di pukkul ho si Gerson mulai dakdanak ibana...alai molo si Gortap on so habilangan be. Dang boi songoni.....sai songon na hona hatani parsonduk nai di rohana, lungun pakkilala anna...boasa....boasa....ima di roha na huhut sai di alsik sigaret naon.

Toema modom ma hita nga naeng tonga borngin.....pamate sigaret mi ninna inantai. Huhut ma nasida hehe sian hundulanna. Anggo si Gortap nga marnipi ibana....songon na tabodo inongna na makkatai i....lambok manganju....sipata di ampini ibana. Huhut ma di ittopi nai Gerson akka api na di tataring....unang ala ni sangiris hurang sabalanga...gabe masurbu jabu ninna rohana....nungga be mansai lungun hutai....mangalap gogo sude pangisi ni luati marhite na peak be di lage podomanna...huhut manatap di parbinsar ni mataniari na manondangi luati dohot na humaliang na......

Marsambung.........

MAR ARIPESTA DI HUTA (Ponggol 3)

 MAR ARIPESTA DI HUTA

            (Ponggol 3)

Makkuling ma lotceng ni sikkola paboahon naung boi mulak be tu jabuna.

Ittor di dapothon si Gerson ma angginai asa boi rap mulak nasida.

Alai didok ibana ma tu hahanai.....parjolo ma ho mulak tujabu,  hatop pe au mulak ninna. Hape naung marjanji do ibana dohot dongan na nanaeng manokko manuk ni halak.

Hatop mulak da, unang palelenghu ima didok si Gerson.

Ueee tahe....muruk ma annon bapa dohot inong ninna si Gerson, nga male an halaki di hauma. Molo leleng do tataruhon tugo nasida oloma annon muruk nasida. Parjolo ma ho...rope au sai ninna si Gortap huhut di tinggalhon si Gerson laos di dapothon ibana angka donganna naung paittehon.

Dung di ganti si Gerson paheanna....lao ma ibana tu balian huhut dang lupa namamboan tugo laho tu Bapakna dohot inongna.

Songon na humalaput do simanjojakna na mardalanon, mabiar ibana abbeha naung male natorasna.

Nga sahat be ibana di balian, jala dang pola leleng dope di paette natorasnai.....bahhh naung sahat doho amang Gerson ninna inongna, huhut di alusi ibana nungga be inong laos di pasahat tugo on. Toppu ma marpanukkun Bapakna tu ibana.....ai tudia anggim???...boasa dang dohot ibana tu balian????  boasa dang rap hamu???? Nga sega be ima di bagas rohani si Gerson....molo hupaboa na lao dohot donganna olo ma annon di badai ibana.

Boama dohonon ateh ima sai manginongi di rohana.

Butido Bapa ninna si Gerson.....rap mulak dohami sian sikkola....alai parjolo ma au ro manaruhon tugo munaon, mabiar au abbeha naung male Bapa dohot inong.....anggo si Gortap parpudi maro ala jolo mangan dope ibana di jabu.

Oooo ninna Amanai....huhut pos rohana di alus nai. Laos di sendoki inantai ma sipanganonon tu piring...huroha nungga margorrohi siubeon nasida ala nungga male. 

Nungga be martaranggop mataniari paboahon naung botari.....

Humalaput ama Gerson on paiashon simanjojakna....tung so tartaon do ngali ni aekon.....pola do makkahitir simanjojak alani ngalina.....mangkadotdot molo paleleng hu gonop tu aeki, holan di paias ibana do tangan na dohot simanjojakna...isarbuthon oma manang rabba rabba nadi pinggir gadu gadui huhut di ososhon tu sabun teleponon....asa songon na sillak otik unang hirtaon, huhut muse marsuap.

Di tahi rohana do molo nga mulak ittor naeng lao majo tu lapo....pinomat holan sa plat namar caturon....dang napola si taru taru nian ibana dohot dongan nai alai ise natalu ma mambayar kopi nasida padua.

Di hudohon nai Gerson ma aek las asa adong inumon nasida huhut muse laos di loppa indahan borngin.

Dang dope ama Gerson mangalakka sian jabunai....adong na manggora ibana mansai gogo. Oooo ama Gerson di jabu do hamu???? Laos di dapothon ibana ma....hape dongan hobbar jabu. Apala aha bo....ninna ibana. 

Buti bah....sotung dia dia roham.....jala unang sogo roham tu au ateh...olo ninna ama Gerson, songon na so biasa ninna rohana di bagas.

Mago jabbekku hape nungga martaji poang....dung ni luluan tu sadaan....tu sadaon....dapot ibama, nungga be mate jala di tutungi...olo boado huroha ninna ama Gerson songon na serius hian ibana mambege.

Ai tartakkup au do sahalak na manutungi manukon....ima anak nisi aha....laos husukkuni do ibana angka ise dongan mu

Na mangallangi manuki....lam busesaon ama Gerson huhut hodokan ibana mambege, laos di pagalak ibana timbaho GP nai.

Hape dohot do ninna si Gortap manutungi manukki bahhh......

Pittor mallobok lobok taroktok ni ama Gerson huhut ma ibana busesaon sai di alsiki sigaret naon pola sappe matutung bibirna alani mostop ni rohana.

Jadi buti ninna rohakku....nga leleng hupahan manuki...jago muse molo martubi, sai godang do pangomoanku di bahen manukkon....hape saonari nungga be mate jala di tutungi halak si Gortap.

Imadah ninna ama Gerson....nga tonu bajuna alani hodoknai, ngaro rimasna, dang jadi be ibana tu lapo namarcaturi. Martanggung jawab ma au disi.....alai tutu jolo husukkun majo anakku si Gortap...toho do dohot ibana na manutungi manuki????

Toema molo songoni ninna par manuki....asalma naung hupaboa, molo ganti rugina martahi ma hamu dohot na asing....margugu be hamu sadia petaho. Huhut di olohon ama Gerson.... 

Marsambung......

MAR ARIPESTA DI HUTA (Ponggol 2)

 MAR ARIPESTA DI HUTA

            (Ponggol 2)

Alai anggo anggina si Gortap on tung mansai andul do....sai songon na marasing do sian hahana si Gerson.

Sai di pasingot guru ni si Gortap do natorasna molo pas pajumpang di lapo minum kopi manang tikki marcatur. Huroha sai olo manggotili dongan na, mambahen tangis sabangkuna.

Sai holan na barlang do karejona dang sahat tu sikkola.....di ihuthon angka dongan donganna lao manakko honas di pollak ni halak. Manambili manuk ni halak di ula do, manakko pirani manuk ni jolma nga biasa i. Hupasingot pe iba amang Guru.....ninna ama Gerson huhut maila marnida angka donganna ala pas di bege nasida pakkataioni.....marra ra muse bohina nungga talu sa plat na marcatur tu alona. Molo di lean inongna durung durung tu sikkola minggu....dang olo pasahathon, gariada habis doi bahenonna lao manuhor karupuk jange dohot pocal. Dua taon do beda ni umur nasida padua.....jala molo sai naik do ibana, pasma kalas opat. Alai ala holan na marmeam meam do di ula, dang olo marsiajar, sai holan na barlang do karejona ujungna kalas dua dope ibana. Dua hali ma si Gortap on tinggal kalas.

Maheu do amangna di bahen si Gortap on, nangpe sai di muruki, di pasingot, di ajari holan satongkin do lokkot di utok utok na.....annon pittor mangalo doi muse.

Lao ma amang na mandapothon par nampuna haumai.....daripada di ula annon sappe marpolisi. Jadi do mardame nasida songon pakkataion, molo dung sae manabi ikkon paulakon nasida do nasa gogo ni hauma naung di jappali horboi. Jala pasahatonna ma annon 10 kaleng eme. Toema ni olohon namai dari pada marganjang ganjang annon ima di rohani ama Gerson.

Dapot do horbo nai di adaran....hape naung maledo, ido menna mangarutta sian tambatan nai.

Toema tahe dang tudia tudia lao horbo on ninna ama Gerson las rohana, atsugari olo ma muruk nampuna horboi molo sempat mago....dua hali ma tarutang nasida annon.

Di marsogot nai, di parbinsar ni mataniari....nungga be heppot nai Gerson mangaloppa.

Songon na denggan do suan suanan nasida di hauma, eme nasida pe denggan do partubuna, jala nungga be boltok eme nai, dang si horpukon manang marpekpeng emei. Denggan do di babo nasida, di bahen urea nasian pamaretta asa denggan annon hasil ni eme nasida. Attar so adong do di harati mocci, bolas rata do idaon molo tinatap sian gadu gadu.

Roha mu padua annon dung mulak sian sikkola da.....ninna ama Gerson tu anaknai. Huhut marsipanganon anaknai andorang lao tu sikkola.

Unang lupa mamboan tugo tu balian, tuhope Gortap unang sai marmeami di tahi ho, holan di bukka ho bajum sikkola dongani abang mon tu balian. Huhut di undukkon nasida hata ni bapak naon di na paiashon piring dohot makkuk.

Di pakke si Gerson dohot si Gortap on ma sipatunai, nga dua taon dang marganti. Hallom idaon karet nai, nga masibak otik di tabbihul nai...jala garigi ni sipatu naipe nga lemes be.

Di pakke kaus kakina nga matobbuk, pola do haruar jari jari ni pat nai tolu biji....toema dang pola di ida halaki ninna rohana.

Sian nabottar hian do warnani kaus kaki on....alai ala ni umur nama nga marhunik sabbola, sabbola nai otik birong, holan attar di ginjang nama haidaan na bottar.

Ia si Gortap di solothon ibanama bukkuna tu sakku pudi, alana holan sabiji do bukku na. Ima di pakke si Gortap sataon bolon,..... parhabisna hera hera naik kalas ma annon..... tung so boi doi disibak sibak harotasnai, pittor muruk do inongna molo habotoan. Ianggo si Gerson di hopitton ibana do di gedek gedek nai bukkunai....adong dua biji si 32 lembar dohot bukku PMP, MATEMATIKA di tuhor inongna nga naeng sataon sian onan....nungga be attar godang PR ni ibana di lehon gurunai....tokkin nai nama attong EBTANAS.

Dang pola dao sian bagas nasida ianggo par sikkolaan SD, nampuna ni pamaretta do sikkolai....mardalan pat ma nasida....sipata olodo gabe rap udur dohot angka donganna, na jumpang di tongan dalan laos ribur ma di manogot nai.

Lao jo bapa, lao jo inong ninna halaki padua huhut mallojong mandapothon angka donganna naung paittehon di suhi suhi ni hutai.

Laos di dok inong nama...unang lupa da amang, tona ni Bapakmu asa ro tu balian manaruhon tugo dung mulak sikkola....laos di undukkon nasida padua do hata ni inongnai.

Marsambung.........

MAR ARIPESTA DI HUTA (Ponggol 1)

 MAR ARIPESTA DI HUTA

              (Ponggol 1)

Ai didia di borothon ho horbottai ninna tusi Gortap....biasa ma Bapa, di bona ni hau tambissu jonok tu tangga-tangga hauma ni dongankon...huhut sai margala tikko ibana dohot donganna dang pola di anturehon Bapakna naung ro.

Toema molo songoni...asalma naung togu di tali ho, asa lao jo au satokkin tu lapo lao marcatur. Nungga botari tutu jala angka donganna nungga paittehon di lapo, huroha nantoari talu ibana tolu plat tu donganna na marcaturi, sai songon naso terima dirohana natalui...gariada lao mambahen remis pe dang tolapna.

Ido menna di tahi rohana ianggo sahalion ikkon monang do...

Sappe martonga borngin halaki namarcaturi, nappuna lapo pe nga mondok ondok paimahon halakon mulak. Naeng mandok asa mulak hurang une diroha ni par lapo....toema sahat tudia pe annon hodanai manggagat pinaitte ma...ima dirohani parlapo.

Mulak ma ibana marjam sada borngin tu jabu...nga manggolap di dalan...nga di ittopi halak lappu listrik na adong di pamispisan ni jabunabe.

Palan-palan ma ibana huhut hera namandadap dalani....so tarrobung annon, jala mallutak annon di bahen lupak-lupak.

Tung mansai makkahitir pamatangna di borngini alani ngalina. Sai huhut ma di alsiki sigaretnaon....anggo bornginon tung pe mulak tonga borngin songon na las do rohana....alana boi remis nasida namarcaturi. Martahan do ibana dalan ni hodai nangpe sempat dang olo be mardalan ala nungga di hapit pioni...laos disi do par remisna...

Dung manogot ni ari di tahi bapaknaon ma naeng mamboan horbona tu adaran, asa manggagat jala boi hatop maranak muse. 

Horbo ni halak do di pahan nasida nian,   sa ekkor indukna. 

Ianggo pakkaitaion nasida tu nappuna horboi...tiap maranak horboi, dapotan sakkae ma parbagianan nasida. Ikkon opat hali ma maranak horbo on barupe dapotan hippal halaki sa ekkor.

Nungga tolu hali maranak horbo on, burjudo nasida mamahan, di lean rumput, di lean minumna pakke sira otik,....sipata molo nga borngin digalaki rabba rabbai asa songon na las di hilala horboi jala angka tusa boi lao jadi dang olo be mangkarat horboi.

Bahhh...tudia do horboi...ninna ama Gerson...si Gerson do panggoaran ni ibana.

Nga sega be....amangoi amang ninna ibana. Huroha horbo on malua sian panambatanna, hurang togu di tali si Gortap.

Nga habis be eme nadi tangga tangga hauma ni halak di jappali horbo on...masae sude...habis di sursari horboon. Hape nungga boltok parbueni eme 

Pittor mallojong ma ama Gerson tu huta mulak...ooooo Gortapppp...ninna gogo manjou dung sahat di alaman ni jabui.

Nungga be di tiop ama Gersonon hau hau laho mangalibas,,, hatop ma si Gortap mandapothon ai so diboto manang aha namasa.....laos huhutma di libasi 

Si Gortap on. Anak naso tarparbaga doho....nga malua horboi, anggo hatam nungga di tali ho gomos, nga habis be eme ni halak di jappali...huhut sai di libasi.

Jora ma au bapa....Jora ma au bapa sai ninna si Gortap sai huhut tangis, huroha nga sai hassitan nasai di libasi i ibana.

Ittor mallojong ma parsonduk na sian bagas jabu....mandapothon nasida padua. Dang di bereng ho patnai nga marrara....so gabe mate bahenonmu ninna inantai gogo hatana. Huhut ma di takkup lotak lotak naon laos di ambolokkon.

Nga didia si Gerson ninna amattai muse, sai rodo pe rimasna....huroha naeng tongdo libasanna....sohea di dongani i anggina molo si nuru.

Nungga lao ipe sikkola ninna inantai...huhut ma di anju si ampudan na si Gortap laos di boan tu bagas jabu.

Manogot nogot dope nga sibolison ho....

Ho hian ma nian manambat horboi...

Ianggo di lapoan parsadarian tahan doho...so hea muse ho monang molo marcatur...

On gabe ianakkon do panobbisan di bahen ho. Ninna nai Gerson huhut marbete bete...songon na maila ama Gerson otik ala didok partalu talu marcatur....huroha adong paboahon tu inantai. Sai tangis dope di ida anakna si Gortap on....huroha inama gogona sai di libasi bapakna.

Dang jadi be si Gortap tu sikkola alana songon na marrara do betis nai nadi libasi bapakna. Sai di apusi inong nai ma iluni anaknai.....bohama rohana tusi appudanna.

Sai di anju do torus nangpe sai godang hasala anna. Dua songon patni manuk do anggo ianakkon nasida. 

Ia si angkaan ima si Gerson...nungga kalas onom SD....tokkin nai nama naeng tammat, asa masuk tu SMP. Napistar do si Gersonon...sian kalas sada SD sahat tu kalas onom sai dapot rengking do. Sipata juara sada, juara dua, juara tolu....ima sai marganti ganti, tung mansai las do rohani natorasna marnida.

Di angka dongan satorbangna adong maon na tinggal sataon naik muse...tinggal muse...adong muse na tung mansai oto, jadi sai las do rohani angka donganna tusi Gersonon alana olo mangurupi molo lagi mangapil tugas halaki.

Molo di lean durung durung pas di sikkola minggu dang pola olo ibana pahabishon. Dion durung durungmu dah ninna inong na, dion masi pocal. Durung durungi dipasahat doi denggan alai hepeng na namasi pocal on dang pola hea mabola...baliksa di pasahat hippal doi muse tu inongna...

Marsipajojoron pe tung namalo do ibana...sipata dua ayat manang tolu ayat di lean Porhangir do si pajojoronna.....boi doi sude di pajojor di luar kepala ni ibana dang sakkot-sakkot.

 Marsambung.....