Guru Parmabuk

Guru Parmabuk

Adonia Sihotang

Marsiribur-ribu ma hita angke. Hira-hira taon 1980-an ma on, tingki singkola SMA di Barus. Adong do sahalak guru nami marga LG. Gogo situtu minum tuak. Di laponta on didok : SEPULUH GELAS TUAK, MASUK NERAKA, molo ibana SEPULUH GELAS TUAK, MATA MENYALA dope. Jala muse so pola dianturehon ibana natarsurat i. “Tu narokko pe taho, ai disi do godang kode tuak,” ninna ibana do molo dipasingot donganna. Boi ma dohonan amanta on tungkot ni lapo. Molo di kungfu China, sarupa tu “suhu” ma ra level ni ibana.

Sude do diboto amanta on lapo tuak di luat Barus. “Tuak ni Ama ni Jonggi Tarihoran na di Sihorbo an songon na ngali-ngali. Mual i do haroa ditahui disampur tu raru i,” olo do ninna amanta on tingki pas minum di lapo ni Ama ni Hendry Lumban Gaol di Pasar Baru on, di topi ni Aek Sirahar i. Jonok tu Pasar Tarandan an do i. Molo ro tuak sian paragat, sude do parlapo i manabunihon apala dua botol laho di ibana. Alana ris do ganup ari lapo on diedangi mulai haruar singkola di hos ni ari sahat tu tonga borngin. Sai marsepeda do amanta on mangadangi lapo i. Olo do sepedana on holan ditogu-togu, molo mirdong dihilala . Manang songon i di tinggalhon di topi dalan i, baru hami ma disuru mangalap. Adong do meja dohot karosi spesial di ibana di ganup lapo. Molo ro tu lapo i, ingkon disi do ibana hundul. Molo istilah saonari, tamu VIP ni ganup lapo ma amanta on.

Molo mangajari di parsingkolaan pe, jot-jot do mardongan mabuk. Marpilitan ma olo dipandok, kapur tulis do na soada, alai didok do pangapus. Sude do angka parsiajaran na nilehonna sai dikaithon tu lapo tuak. Molo tugas, manang PR saonari on, sai mambahen pembukuan ni lapo tuak do disuru (alana pelajaran tata buku do ditiop). Susa ma iba, ai so adong parkode tuak i mambaen pembukuan. Olo ma ala ni PR na so sidung i, gabe tarrimas ibana. Balobas na ganjang i ma olo dipangalotakhon tu ulu nami be.

Adong ma daba donganhu tingki i, goar na si Kalapas, marga Manalu, hutana di Janji Maria, jonok ni Huta Pananggahan on do i. Jot-jot do ahu dohot lae on tu lapo marnonang huhut marende-ende, alana sai rade do gitar disi. Sahalak naburju do ianggo lae on mardongan, jala malo muse nang marende. Sai parekkelon do dibahen. Alai adong saotik na hurang (antar maju saotik simanggugut i tujolo-santabi).

Di sada bodari, marende ma hami di Kode Tuak ni Ama ni Gomos Pasaribu di Sigambo-gambo on. Huendehon hami ma ende “Marudur do sude”. Molo so sala au Nainggolan Sister do mempopulerkan lagu on di tingki i. Hape naso panagaman, ro ma da amanta on tu lapo i. Habis minum tuak sian lapo ni Ama ni Juande Panjaitan di Kampung Mudik, martambul dengke aso-aso. Pintor sip ma hami marende on. Ai biar do roha mangida guru ni iba najalo, pajumpang di sada kode tuak muse. Soara pe namarende on gabe mellop-mellop saotik ma, jala bohi pe ni padao-dao ma manaili tu na asing, asa unang tarberengsa, ima dirohanami. Hape dibereng do daba.

“Boasa gabe sip hamu, torushon hamu marende i asa adong begeon”, ninna amanta on

“Daong bapak, naeng mulak nama hami, alana marsogot sikkola”, ninna hami mangalusi.

Sip-sip ibana, huhut laos gabe dipajonok tu hundulan nami i. Hape nasopanagaman daba, pintor di pastap amanta on ma hurum ni laenta si Kalapas on. Gogo hian, huhut didok, “boasa sai parengkelan mu au sian nangkin, ai dirimpu ho do na mabuk au?”. ninna ibana. Hape so adong mengkel laenta on, na songoni do nungnga keadaanna. Marpitor ma laenta on, marrara ma nang hurum i. Pola do hira-hira tolu ari marbosar.

Di sada tingki muse, dilaon-laon ni ari, pas hami di lapo ni Ama ni Juande Panjaitan, ro ma amanta on. Nungnga marrara bohi i, mangkatai pe so tangkas be batu ni hatana. Angka bahasa Inggris nama deba dipandongkoni. Angka jamita deba. Dung dibereng hami di lapo i, pintor dijonoki. Mabiar ma hami da, tarlumobi laetta si Kalapas. “Sotung dipaduahali muse mamastap ahu,” hira-hira songon i ma dibagasan rohana. Sai sip-sip ma ibana di suhi-suhi ni lapo i, mamurgut huhut ma ditutup pamanganna dohot tanganna. “Betak annon salah pengertian bapak on,” ninna rohana.

“Ho”, ninna amanta on manudu si Kalapas ondeng.

“Tuson jolo ho alias come here”, ninna amanta on muse.

Hira hungkam ma da bohi ni laenta on ala ni biarna. Manggirgir ma dohot ulutot na. Hosana pe nanget-nanget ma diombushon, mabiar taranggo uap tuak ni si sagalas naung didorguk na i. Alai dipatogar-togar ma badanna, Dipajonok tu amanta on.

“Tenju au, sagogom baen”, ninna amanta on.

Dang olo antong laenta on manenju da. Ba ise do halak olo manenju guruna. Sotung dipecat sian parsingkolaan. Sai sip ma laenta on jala unduk.

Alai sai dipaksa amanta on ma asa ingkon tenjuonna ninna ibana. Dang tarjuasa, gabe ditenju laenta on ma butuha ni amanta on sagogona. Marsogot na pittor dilehon do punten 9 di di ibana daba. Alasanna diboto hamu do? “Keributan adalah salah satu parameter yang harus dimasukkan pada kolom keterangan dalam Buku Harian dan Rekening Koran Kode Tuak”.

Molo hea hamuna tu Barus, gareja HKBP pas ma di topi ni parbalan i. Jonok tu benteng ni Bolanda najolo. Parsingkolaan SMA Negeri Barus pe jonok do tu si. Balga do antong gareja on. Jabu ni amanta pandita hira-hira 100 meter ma sian gareja i dompak Pasar Batu Gerigis on. Jabu nia manta padinta on balga, timbo tombarana, jala lambas emperna. Model ni jabu na jolo ma.

Disada bodari hira-hira pungkul 9 borngin, pas mabuk amanta guru on, laho ma ibana tu jabu ni pandita on. Ai jotjot do songoni, molo nungnga mabuk jabu ni halak pe gabe dianggap do jabuna.

Dipasingot amanta pandita on ma haroa asa unang holan na mabuk ulaonna ganup ari. Sai dialo do antong hata sipasingot i. Gabe umbalga do soarana sian soara ni amanta pandita on. Ujung na gabe burbar ma sude.

“Ai so adong do diargai ho au amang pandita, ro au tu jabum las sagalas tuak pe so adong dilehon ho. Alai sai dimuruk-muruki ho au. Hepengku do manuhor i,” ninna amanta guru on ma muse.

“Tu balianan ma ho lao, begu laut i pe so olo mandongani ho. So maila do ho”, ninna amanta pandita on mangalusi, ala ni rimas na.

“Timbo singkolam panditanami, au pe timbo do singkolangku. Nang pe untimbo ho marsingkola, holan marmahan do diula ho (lapatanna : penggembala umat), hape ia ahu holan sarjana muda do alai boi do gabe guru ni SMA. Ahu do napatut mangajari ho”, ninna gurua on muse. Boha ma hata ni na mabuk, rarat ma songon api di ri, ai so diboto be manang ise angkup na mangkatai.

Muruk situtu ma antong amata pandita on. Balga-balga ma tong nang soarana. Dipabali ma guru on sian jabu i. “Kaluar ho begu,” ninna. Alai dang olo amanta guru on mijur. Gabe dipahundul do teang di balatuk ni jabu i, huhut sai didatdati marbete-bete. Ujung na didok amanta pandita on ma songonon:

“Ai ho, sai dilaosi ho do angka hata ni Tuhan nahujamitahon i. Unang mabuk ningku, sai mabuk do ho. So diboto ho, ai targantung tu au do molo naeng masuk tu surgo i ho. Au do maniop karcismu tu surgo i,” ninna amanta pandita on. “Ala so tardok be poda dohot hata nadenggan tu ho, saonari huribak ma karcis mon, dang na degeionmu be surgoi”, ninna amanta pandita on manguduti muse. Dibuat ma harotas sian sangku ni bajuna, laos di ribak-ribak, digete-gete hian, jala diambolonghon. Marserakan ma di alaman ni jabu i.

Hape diboto hamu do. Ai karcis ni motor tu Sibolga do na digete-gete nai, laho pangkeonna hian marsogot nai……….. (Ai sama-sama mabuk do hape nasida).Disadur dari : Tano Batak

Ibadah Partumpolon @ Mangongkal Holi

ACARA IBADAH PARTUMPOLON

Jimmi Pangaloan Manurung

Dohot

Elina br. Silalahi

I. Pangaradeon :

        ( Ro ma Pangoli & Oroan & Hasuhuton  tu ruang Konsistoris)

II. Acara Ibadah :

01. Marende No. 15: 1 + 4       “Aut Nasaribu haliganda”     BL.103

1.     Aut nasaribu hali ganda, saringar ni soarangki. Naeng nasa

gogo bahenonku, mamuji Debatanta i. Paboa las ni rohangki,

hinorhon ni  pambaenNai. ~~~Jongjong~~~~

4.   Mauliate ma rohangku di Ho, o Debata tongtong. Dibaen sude denggan basaMu, naung nilehonMu di au on. Ai dipatongon Ho tongtong, sude na ringkot di ahu on.

02. Votum – Introitus – Tangiang:

(Hatorangan: L: Liturgis; A= Ama; I= Ina; S= Sude)

L    :  Marhitehite goar ni Debata Ama, AnakNa Tuhan Jesus Kristus dohot Tondi Parbadia, na manompa langit dohot tano on. Amen. Ale Jahowa sai Ho do haporusan nami marsundut-sundut. Sai mangaranapi do matangku dompak Ho, ale na marhabangsa di banua ginjang.

A   : Marhaposan tu Jahowa ma hita sian nasa rohanta jala unang marpangunsandean hita tu pingkiranta sandiri, sai Ibana ma tanda di nasa dalanta, asa Ibana  patigor angka dalanta. Ai pasupasu ni Jahowa do mambahen mamora jala ndang mardongan hangoluton dibahen.

L    : Martua ma baoa na marhaposan tu Jahowa, jala Jahowa haporusanna dibahen. Sai diajari Jahowa ma hita mangula-hon lomo ni rohaNa, ai Ibana do Debatanta, tondiNa na denggan i ma manogihon jala mangaramoti hita di tano na homop.

I     : Godang ma tongon nabinahen ni Jahowa tu hita, jadi marhiras ni roha ma hita disi. Sai jumolo ma talului Harajaon ni Debata dohot hatigoranNa dungi tambahonon-a ma sude angka ondeng tu hita.

L    :  Idama, pangarimpunan ni na denggan naung huida i: Lehet do mangan minum jolma i jala dipasonang rohana mangihutihut sandok ulaonna hian na niulana di hasiangan on saleleng di ngoluna, na nilehon ni Debata tu ibana; ai i do jambarna.

S    :  Angkup ni i, molo dilehon Debata tu manang ise jolma hamoraon dohot sinamot, diloas ibana mangan dohot mambuat jambarna sian i, huhut marlas ni roha diulaonna, silehon-lehon ni Debata do i.

L    :  Ai ndang sadia dipaingot-ingot rohana angka ari ni ngoluna, ala naung nialusan ni Debata ibana marhite sian las ni rohana.

  PANGOLI DOHOT OROAN: Ianggo ahu dohot donganku sajabu, ingkon Jahowa do oloan nami tujoloanon.

L    : Hasangapon ma di Debata Ama, AnakNa Tuhan Jesus Kristus, dohot Tondi Parbadia.

S    : Amen. ~~~~ hundul ma hita ~~~~

03. Koor. Betania 

     

04. Manjaha Surat Parpadanan:

L    :  Hamuna angka dongan sahaporseaon! Nuaeng tabege ma hujahahon hami isi ni surat parpadanan ni ianakhon ni Hurianta Jimmi Pangaloan Manurung dohot Elina br. Silalahi isi ni Parpadanan siundukhononnasida sadari on di adopanta. Tapaihut-ihut ma.

                       (Angka na manandatangani surat parpadanan)

1. Pangoli dohot oroan.

2. Natoras ni pangoli dohot oroan.

3. Saksi sian pihak paranak dohot parboru.

4. Mewakili Sintua lingkungan sian paranak dohot parboru.

5. Napatumpolhon.

L    : Hamu angka dongan sahaporseaon, lumobi ma hamu na dua: Jimmi Pangaloan Manurung dohot Elina br. Silalahi nunga marpadan hamu di adopan ni Tuhanta na pasadahon hamu na dua marhite Parhalado ni HuriaNa, diadopan ni natorasmuna nang dongan sahapor-seaonmuna pe naeng pajongjonghon pardongan saripeon-muna. Mansai arga do parpadanan on; ndang holan di hita jolma i arga, alai dohot do di jolo ni Debata. “Hori do ihot ni doton hata do siingoton; Togu urat ni bulu toguan urat ni padang; Togu niihot ni uhum toguan do niihot ni padan”.

NATORAS DOHOT UNDANGAN:   

         Dibahen i, ramoti jala ulahon hamu ma padan naung niundukhonmuna; tung unang adong sian hamu silaosi padan, asa dipasupasu Tuhanta parsaripeonmuna di ariari ni ngolumuna.

PANGOLI DOHOT OROAN:

         Sai dipargogoi Tuhan Debata ma hami maniop padan naung hupadanhon hami sadari on, sai unang ma tutu adong sian hami na manimbil jala siose padan, asa mardalan parsari-peonnami sahat ro di ujungna dibagasan hadameon.

L    : I ma tutu ale Tuhan, patulus ma pardongansaripeon nasida tu joloan on.

05. Marende BE. 125.3            “Marlas ni roha”                          BL.82

3.         O Jesus tatap hami on, sai pargogoi sude

         Marhitehite TondiMi pasauthon angka patikMi

         Mambahen rarat baritaMi, di nasa jolma pe, di nasa jolma pe

06. Jamita :

07. Koor : PT.Atas

08. Marende No. 691: 1- ”Hupasahat ma tu Jesus”                                BL. 691

                                (Laos pasahathon pelean tu Huria)

1.       Hupasahat ma tu Jesus saluhutna ngolungki,

Roha nang pambahenanku, saluhutna tingkingki.

Reff. Hupasahat ma tu Jesus, saluhutna diringki.

        Hupasahat ma tu Jesus saluhutna ngolungki.

2.       Pangkeonku ma tanganku, mangula lomoNa i,

Langka nang simanjojakhu mangihuthon Tuhanki.  

Reff. Hupasahat ma tu Jesus.....!

3.       Mauliate ma rohangku, ala au hinophopMi.

Pujionku ma goarMu, salelenglelengna i.

Reff. Hupasahat ma tu Jesus....!

09.Tangiang Pelean & Pasupasu & Amen ( 3x diendehon).

III. Hata Huhuasi

1. Sian Parboru
2. Sian Paranak

Acara panangkhon Sari2

PARTANGIANGAN

PANANGKOKHON SARINGSARING TU TAMBAK NA PIR

Kel Besar Bisker Rumapea ( Op. Dita)

Soripadana R.br. Silalahi

Sabtu, 29 Juni 2013

==================================================

 (Hatorangan : P=Parangenda ; R=Ruas)

1. Marende 361:1-2                Na denggan situtu

Na denggan situtu do mamuji Debata

Jahowa na tumimbo Na sai tongtong basa

Denggan do paboahon Manogot asiMi

Bodari mangendehon BurjuM nang sintongMi

                        Mardongan sipiltihon Na denggan situtu

                        Naeng ma tongtong pujion Ni nasa na burju

                        Ho Tuhan Debatangku Ai las ni rohangki

                        Do na tongtong binaenMu Di pambahenanMi.

2. Votum-Introitus

P    :       Marhitehite Goar ni Debata Ama, dohot Goar ni AnakNa, Tuhan Jesus Kristus dohot Goar ni Tondi Parbadia na manompa langit dohot tano on, dipasaor ma dameNa tu tondinta. Amen.

R     :      Ale Jesus Tuhannami, bereng hami na dison. PinarmahanMi do hami saluhutna na dison, sai asi rohaM di hami, sai pangolu hami on.

P   :        Unang ho mabiar, Ai ahu do Parjolo jala parpudi ! Au do siparngolu; naung mate do au na jolo, gabe mangolu antong rodi salelenglelengna; Di Ahu do anak hinsu ni hamatean dohot banua toru.

R    :       Tangihon ma hami ale Jahowa sian asi ni roham.

P    :       Ale Jahowa Tuhan nami na di banua ginjang pujipujianma hu pasahat hami mardongan mauliate tu Ho, ala tontong dilehon Ho hatam na gabe sitangihonon jala siihuthonon nami asa mangolu hami songon naung pinatikhonmu.

R   :        Ale Jahowa Ama nami, pungu do dison keluarga pomparan ni amanami Kel. Besar Bisker Rumapea & Soripadana R. br. Silalahi (Op. Dita) dohot angka dongan na marholong roha di hami nang dongan huta di bagasan sada ni roha laho pasangaphon Ho ale Jahowa marhite ulaon sadarion.

P    :       Jahowa, Debata nami marpungu do hami sadarion na manghalashon dihatutulus ni ulaon  panangkokhon saringsaring na hinaholonganna naung jumolo i.

R    :       Marsomba hami tu adopanMu na badia i ale Jahowa, asa ajari, pangkulingi hami, urupi hami asa unang gabe songon sipelebegu hami alai ingkon do gabe patimbulhon jala pasangaphon GoarMu na badia i asa marsangap jala marmulia Ho di tongatonga ni ulaon on.

P     :     Asi ma rohaM, sai pargogoi ma hami marhitehite TondiM, asa margogo hami mangoloi Ho di bagasan haporseaon na mangolu. Marhite Anakmu Jesus Kristus Tuhan Sioloan nami. Amen

4.  KOOR: INA KAMIS

5.  Marende BE. 15: 1+3                    Aut na saribu hali ganda

              Aut na saribu hali ganda saringar ni soarangki

              Naeng nasa gogo bahenonku mamuji Debatantai

              Paboa las ni rohangki hinorhon ni pambaenna i.

                        Hupuji dohot Ho o Jesus Marningot asi ni rohaM

Marningot mudarMi na durus Ro di sude dengganbasaM

                        Patupa haluaon i Di au pardosa godang i.

6. Manjaha Ayat

P    :       Ale Jahowa, Debata Amanami. Ho do pargogo na so hatudosan na manompa langit, tano dohot nasa isina. Na badia do Ho jala parasiroha na manontong ro di salelenglelengna.

R      :     Nang pe merus sibukku dohot rohangku, sai Debata do partanobatoan ni rohangku jala parjambaranku salelenglelengna. (Psalmen 73:26)

P     :      Jahowa, Debata Amanami. Jotjot do husungguli hami rimasMu, jala ndang hu ula hami lomo ni RahaM, atikpe naung dilehon jala dihatahon Ho Barita na Uli tu hami

R      :     Sai ajarhon ma tu ahu, ale Jahowa, dalanMu, asa marpangalaho ahu di bagsan hasintonganMi, sai pasada ma rohangku mangkabiari goarMu. (Psalmen 86:11)

P     :      Jahowa, Debata Amanami. Unang loas hami ganggu jala gale haporseaon nami marhitehite ulaon na so hinalomohonMu; i ma pos ni roha di angka ulpuhan ni hadatuon, manungkun jala manghaposi sumangot manang sahala ni ompu, martondung dohot maniti ari.

R     :      Sai unang paingotingot angka dosangku dohot pangalaosingku, sai ingot ma ahu, ale Jahowa, hombar tu asi ni rohaM, ala ni denggan ni basaM.

P     :     Molo tung adong na mardosa, adong do pangondiananta tu Ama i, ima Jesus Kristus, Partigor i. Ibana do pardengganan pasaehon angka dosata; alai ndada holan dosanta, tung dohot do dosa ni sandok portibio on. (1 Joh. 2:1^b-2). Hasangapon ma di Debata na di ginjang. Amen

7. KOOR: PT. ATAS

8. Marende 30:3-4                  Jesus lehon hatorangan

            Sai martua ma nasida Na mambahen Jesus haposanNa i

Aut tung sura olo hita Jesus i baen parsigantunganta i

Ale Jesus sai patogu Hami na di parporangan

Asa dapot di ujungna hamonangan

                        Sai tangihon ale Tuhan Molo martangiang hami be tu Ho

                        Pasupasu marlobian LehononMu tu na ro manopot Ho

                        Sai dongani nama hami Asa hot di parpadanan

                        Mian hami sahat ro tu hasonangan.

9.  Jamita/ Renungan :

10. Koor: BETANIA

11. Hata Sipaingot

Uluan       :    Hamu angka dongan sahaporseaon nunga dipanangkok hamu saringsaring ni angka hinaholongan ni rohamuna naung diongkal hamu na diari na salpu

Hasuhuton : Debata ma na patulushon ulaon on, ai huulahonhami on   ndada namarpangkirimon hami songon ulaon ni angka halak sipelebegu alai paboa na diramoti, diparmudumudu jala dipasada Debata do hami saluhutna angka pinompar ni ompu nami on.

Uluan      :    Didok Debata, Anggo halak naung mate, ndang diboto agia aha, ai nunga lupa nasida di parningotan nang holong ni rohana, hosom dohot iburu ni roha pe nunga mago sian nasida jala ndang be marjambar nasida di saluhut angka na masa di hasiangan on, nang tu hita ndang adong be pardomuan nasida.

Hula-hula :    Alani I ndang tama be hita manghatai dohot manghirim tua nang pasupasu sian angka na mate manang sumangotna pe. Haroronami, asa sada do hita mangido angka pinompar ni namborunami naung parjolo mandapothon Tuhanna. Parhiteanta namanghamauliatehon denggan basa ni Debata do ulaon on jala paboa na hot do padan ni Debata tu hamu sahat rodi saleleng ni lelengna.

Uluan      :     Ingkon badia do roha dohot pangalahonta mangulahon ulaon on, unang masa manortori holi, manulangi dohot mangalehon napuran, mangandungi songon na so marpanghirimon.

12.  Marende BE.211: 1-2      Tuhan Jesus Siparmahan (P.Pelean)    

              Tuhan Jesus Siparmahan Au birubiruNa do

              Jesus gok di Ho rohangku Sai ihuthononku Ho

              Sai ihuthononku Ho, Sai ihuthononku Ho

              Jesus gok di Ho rohangku Sai ihuthononku Ho

                         Jumpa masa sorimago Tung pangapul Ho gogo

                        Ia bogasMi huida Sai ihuthononku Ho          

                        Sai ihuthononku Ho, Sai ihuthononku Ho

                        Ia bogasMi huida Sai ihuthononku Ho

13.      Tangiang Pelean - Ale Amanami - Pasupasu

Diposkan oleh Gr.Abner Panjaitan

Barita Mardongan Poda 2

Adong Dope Ulaonku

Adong ma sahalak amanta. Siladenan mangan dohot minum do ibana, ala dirajumi rohana hinatimbo ni huasona songon kepala rumah tangga. Haru partambuan naung di jolona pe ingkon ro do inanta i laho mansendok tu piringna.

Adong do hondanasida, alai tung so hea do inanta i dibonceng. Hape angka mas ni inanta i do digadis laho manuhor i. Molo tung adong ulaon, na sasintongna ingkon rap borhat nasida, sai lalap ma, “adong dope ulaoku” ninna amanta i asa unang rap borhat nasida di rohana. Alai molo adong halak mangido tolong laho taruhononna, tarlumobi ma molo anak boru do na mangido tolong i, pintor hatop do dioloi amanta i.

Di sada tingki adong ma pesta ni keluarga na ingkon rap borhat nasida tu pesta i, jala nunga dipahatop inanta i marhobas ai arop do rohana ingkon rap borhat nasida. Hape tong do didok amanta i, “jumolo ma au borhat, adong dope ulaonku”. Nian didok inanta i do, “ia tung paima ma asa rap borhat hita”, alai gabe gogo do soarana mangalusi mandok, “adong dope ulaonku…!”.

Borhat ma jumolo amanta i, ai tumagon do di rohana halak na asing boncengonna sian apala inanta i. Toho ma tutu adong sahalak anak boru mangambat amanta i mangido tolong asa ditaruhon tu hutana. Burju hian do antong ibana mangoloi pangidoan ni anakboru i, ai sanga dope taruhononku asa laho au tu pesta i, ninna di bagasan rohana.

Burjunai amanta i tu halak na asing, alai ianggo tu ripena ndang dianturehon. Unang ma tatiru na songon i. Jumolo ma tahaholongi keluarganta ipe asa tu halak na asing. Didok hata ni Debata do: On do pinangido ni roha ni Debata: Naeng ma badia hamu; harorangon i naeng ma pasidingonmuna (1 Tessalonika 4: 3).