JAMITA MAMASUHI BAGAS SIBAGANDING TUA (PANGOMPOION NI JABU)
Luk 19:1-9
JABU: MUAL JALA PANGOJAHAN NI PASUPASU
Patujolo
“Rumahku adalah istanaku”. On ma sada pandohan naung popular di
zamanta on. ‘Jabungku do habangsaku’. Jabu/bagas ima inganan, didia
jolma boi manghilalahon hasonangan, merasa nyaman, merasa
tarlinggomi sian hos ni ari dohot por ni udan, jala dibagasanna
nampunasa merasa marhuaso. Nampuna jabu ima jolma nampuna huaso di
jabuna sandiri.
Pangajarion
Hamu angka dongan na hinaholongan. Di hita halak
Batak, jala mungkin di piga-piga suku bangsa na asing, lapatan ni jabu
ndang holan inganan manang tempat tinggal sambing manang inganan
hamianan. Alai umbagas sian i, jabu di halak Batak dihaporseai do gabe
gombaran ni haporseaon, sangkap ni roha, cita-cita, panghirimon jala
falsafah hidup. Jempek dohonon, ia lapatan ni hata jabu tung mansai
bagas do di hita. Tarida do i tutu sian pandohan na somal tapangke na
mardomu tu jabu: rupani jotjot do jabu i tadok: Ruma, Bagas,
Sibagandingtua. Sian angka hata on do gabe tubu angka pandohan
pardiruma, pardijabu, dipajabu dohot marjabu. Sian hata Ruma do hata
pardiruma manang pardijabu, ima pandohan manang jou-jou na sumangap tu
inanta (istri). Pardiruma ima halak nampuna urusan di ruma/jabu.
Pandohan na sarupa tarida ma di hata ‘jabu’. Dipajabu lapatanna
dikawinkan, marbagas lapatanna marhasohotan. Molo didok ‘si Poltak nunga
marbagas’ lapatanna nunga mangoli nang pe kenyataan ndang adong dope
jabuna. Lapatan ni Ruma, Jabu dohot Bagas gabe lam bagas do ala langsung
mangonai tu hadirion ni pardongansaripeon dohot parrumatanggaon.
Di halak Batak pe Jabu, Bagas, Ruma dihilalahon do gabe mual ni
pasupasu na gok jala inganan laho mangampu pasupasu. Ido asa adong hata
ni na bisuk mandok: Raut sinalenggam mangarambas gadu-gadu. Hata nauli na denggan, sai sahat ma i ampuonmu martonga ni jabu. Lapatanna
hata poda dohot pasupasu naung dijangkon pamatang ndang sungkup holan
dijalo pamatang alai dipeop jala diboan/diampu dibagasan jabu. Antong
molo songon i, gabe tahilala do muse jabu i songon inganan na
marhabadiaon dohot na marhasaktian, na marisi sahala hadebataon dohot
sahala harajaon.
Ndang holan hita naung gabe Kristen manghaporseai i. Gari angka
ompunta na porjolo (na so mananda Kristus pe) nunga dirajumi nasida na
ulaon sangap, ulaon na marhabadiaon do manumpan sada bagas. Ndada
tagamon angka ompunta manumpan sada bagas ia so jolo martangiang mangido
pasupasu sian na marhuaso. Ndang taboto apala tu ise nasida pasahathon
somba dohot pangidoanna, alai dihaporseai do adong na marhuaso di tano
on, ala saluhut do na tinompa i martondi.
Tabereng ma rupani, molo naeng patipakhon partapahan ni bagas pe sai
jumolo do nasida manghormati BORAS PATI NI TANO, na dianggap nasida
songon panguaso (dewa kesuburan tanah). Tingki manaba sada hau naeng
gabe parhauan ni bagasna pe sai dipasahat do dalan ni somba dohot
pangidoanna tu BORAS PATI NI RUMA marhite napuran na hombang na tolu suhuna tolu harajaon, sanggul sijagaron dohot sitompion (hinopingan) na bolon.
Tujuan ni pelean i ima:
asa tangkas hau i marobo jala ro siarum martunas
Asa dao andor na ambat dao panggaran goli-goli, dao pangguluti.
Alai asa manumpak Debata Mulajadi Nabolon
Na manjadihon anak Tubu, na manjadihon Boru Tubu.
Na jumadihon parhorasan, na jumadihon pandinginan.
On ma pangidoan sangap, pangidoan badia, pangidoan horas-horas,
pangidoan dingin-dingin. Sude on patuduhon balga ni haporseaon do i tu
na marhuaso (agia pe i songon haporseaon na animistis, alai tarida ma na
mansai hormat do angka ompunta di angka na tinompa i). On ma sada tanda
haserepon ni roha ia manumpan sada bagas ingkon jumolo mangelek do tu
na marhuaso anggiat diradoti sude nasa sangkap dohot ulaonna. Di turpuk
ni ulaon di zaman saonari on, lam tarida do on rupani dohot model lebih
modern ima: marhite partangiangan Paojakhon Batu Parsuhi ni Bagas.
Dison ma tarida ia hita jolma tung na gale do na ingkon targantung
marsihohot tu Panompa, jala na so boi manghagijangkon agia aha pe naung
tajalo di ngolunta on. Ndang adong nanggo sada pe na adong di hita alani
gogonta sandiri, holan alani basa-basa ni Debata do i. Ido nangkin asa
tung gomos dipodahon si Musa tu halak Israel di panjahaon parjolo sian
Pahantusson (5 Musa): “Unang ma gabe tubu ginjang ni roha di ho molo
tung boi pe ho pature bagasmu, jala molo tung gok pe dorbiam di bara,
angka hambing dohot lombu na sai mangarerak di adaran bidang, ingkon
pasereponmu do roham. Ingot ma sian Debata do sudena i.” Tung
mansai gomos do dipodahon si Musa tu halak Israel asa tongtong marserep
ni roha nang pe naung gok arta nasida. Ai nanggo sada pe i ndada tung
alani hagogoon dohot hamaloon nasida i, tung basabasa ni Tuhan do.
Mansai bagas do pandohan on tu hita saluhutna tarlumobi na pungu
nuaeng di jabu sibaganding tua on. Asa gabe halak parserep roha hita
manjalo basa-basa ni Debata, barani manghamauliatehon jala pasahathon i
gabe pelean na mangolu tu Debata.
Angka dongan na hinaholongan dibagasan goar ni Tuhanta Jesus Kristus.
Haserepon ni roha tarida do i di ganup jolma naolo patuduhon arga ni
pasupasu ni Debata di parniulaan siganup ari. Halak na marserep ni roha
ima halak na tongtong olo patutoru dirina jala olo mangelek Debata
marhite tangiang na marsihohot. Dipangido ma asa gabe bagas hamianan ni
angka na mangolu jabu i, dao angka sahit, dao nasa lungun jala
torhis-torhis angka pangisina. Marhite i, tanda ma tutu jabu i, jabu na
MARAMPANG NA MARJUAL, ima jabu na marhasaktian, nampuna aturan dohot
ruhut-ruhut, marisi uhum naso boi masa hageduhon dohot harorangan di
jabu i. Sai dao ma sian jabunta i haramunon dohot parsalisian.
Sabalikna, alai sopan santun do dohot tata krama, etiket ma nian
manggohi bagas i. Marhite i targoar ma jabunta gabe jabu Sibagandingtua,
naso adong pilit suhat-suhatna, jala naung hot di parbatuna, jala hot
di hansing-hansingna.
Tapangido ma asa mian Jesus di jabunta on, songon si Zakeus na mora
i, dung songon i leleng ibana manghilalahon tabo ni na mararta alai tong
do hahurangan ibana. Sampe olo ibana manjangkit hau holan laho mamereng
Jesus (sada hailaon do i, molo sahalak amanta na marpangkat natimbo
sampe rela manjangkit hau holan mamereng sasahalak na lewat). Usaha ni
si Zakeus ima gombaran ni jolma na masihol mamereng Jesus. Alai dialusi
Jesus do sihol ni rohana i gabe olo ro Ibana tu jabu i.
Panutup
Angka dongan na hinaholongan dibagasan goar ni
Tuhanta Jesus Kristus, tarlumobi ma keluarga hasuhuton namangompoi bagas
sibagandingtua on. Tontu gok las ni roha do hamu sonari. Nunga tangkas
tu hita aha do sasintongna lapatan ni jabu di hita, ima gombaran ni
hadirion ni rumatangga. Tutu ma baen hamuna jabu on songon umpama
sinangkin i “Rumahku adalah istanaku” (bagashu do habangsaku).
Gabe raja ma hamu di jabumuna, jala sonang hamu mangingani jabu on. Ai
adong do jolma naso sonang tinggal di jabuna sandiri, ujungna dilului
inganan manang jabu na tumabo di luar. Godang do jolma sai merasa tumabo
kopi ni parlapo an sian apala kopi napinatupa ni pardijabuna, ujungna
sai ganup tongkin ma ibana mangalului kopi tu lapo.
Gombaran ni hadirionmuna do jabu i, gombaran ni identitasmuna. Disi do diri angka ugasanmuna, dison ma mian homitan ni na saripe. Jala
ingkon di jabu manang di rumatangga do buni rahasia ni keluarga. Ido
hagogoon ni rumatangga. Ima istanana. Ai di istanamuna on do hamu merasa
bebas, ndang mangindangi sara, ndang pola mambuat-buat roha. Di jabu
muna on ma hamu manghilalahon hadameon. Ala istana do gombaran dohot
identitas ni harajaon, alani i, molo diserang musu istana, tontu merasa
diinjak-injak do harga diri. Sai unang ma margogo musu na laho
mangalohai istanamuna on, bagasmuna on. Sai talu ma hamu maralo dongan
jala monang maralohon musu.
Antong asa saut songon i sai sihol ma nian rohamu mamio Jesus tu jabu
on songon si Zakeus na marusaha mangeahi Jesus agiape ibana sampe
manjangkit hau. Ima tanda ni na sihol roha mamereng Jesus. Unang ma
sampe hea diambati hamu angka jolma na ro mamboan tangiang tu jabunta on
ai marhite ido Jesus ro mangebati hamu jala manggohi pasupasuNa di
hamu. Unang ma hatop hamu merasa puas dung tupa songon on, BALEBALE MUNA
ON. Anggo di hajolmaon, inganan parsatongkinan do on. Saluhut muba do
molo dung ro partingkian i. Dok ma dibagasan rohamu: Na mangaluaei do
hami Tuhan di pasupasuMi, alai sai mian ma Ho di bagasnami on. Sai jabu pangantaran ni anak ma on pangantaran ni boru. Hatubuan ni anak parmas ma on jala hatubuan ni boru parsere.Tutu ma nunga ojak be bagas sibaganding tuanta on jala tapasupasu marhite pelean misa nabadia. Sai ojak ma i songon nagari, jala togu ma songon pulo. Manumpak ma Debata Mulajadi, sai dibaloshon ma nang tu hamuna surgo. Horas ma di hamu na mangingani bagas on, jala sai peoponmuna angka pasu-pasu marlompit ganda. Amen.
Dienet sian Jomita P. Liberius Sihombing, OFMCap
Foto Bersama Guru Guru TK SD Se Kecamatan Medan Tembung —
Anak boruni bapakna foto di depan kantor Distrik
