Golgata: Acara Punguan Na Hohom di Parningotan Ari Hamamate ni Tuhanta Jesus
Keterangan: Tata Ibadah yang dilengkapi dengan khotbah yang sedang
Anda baca ini adalah sebuah Tata Ibadah yang disusun secara khusus oleh
Ds. P.M. Sihombing pada tahun 1965. Acara ibadah berbahasa Batak ini
digunakan untuk tata ibadah peringatan Kematian Tuhan Yesus Kristus yang
diselenggarakan di Gereja HKBP pada pukul dua siang pada saat Jumat
Agung. Terimakasih untuk Amang Charles Siahaan yang memposting ini
terlebih dahulu di http://sipahadua.blogspot.com/2012/04/punguan-na-hohom-di-parningotan-ari.html
Hata Huhuasi
“Alai Kristus na tarsilang i do hujamitahon tu hamu ninna Apostel
Paulus, jala laoni do naeng jamitahononhon marhite buku na metmet on.
Nungga adong nian di hita sada buku na metmet na morgoar “Aturan ni
parpunguan di tingki Parningotan di panaonon ni Tuhan Yesus” – naung
somal tapangke di hurianta HKBP. Alai, ndada na marnalobi, gariada tahe
sai na hurang dope angka buku na songon i di hita laho padamoshon
pangkilalaanta dionjar ni haporseaon laho maniop manang mangauhon na
tinaon ni Tuhanta humophop hita. Binahen do goar ni buku na metmet on
“Golgata” anggiat targorga tu rohanta bohi ni Tuhan Jesus na manatap
hita di bagasan holong-Na na badia sian silangNa na dipartanghurahan i
laho patupahon hasesaan di dosanta.
Na pinangke do buku na metmet on di parningotan di hamamate ni
Tuhanta tu punguan na hohom di passion 1965 di Hurianta Ressort Tomuan
Pematang Siantar. Longang do roha mamereng na pola na nia angka dongan
na sosombopon di tingki punguan i. Ndang binoto manang aha na mangonjar
rohanasida di na tangis i. Molo ala na targorga do tu rohana hinabernit
ni na tinaon ni tuhanta ALA NI DOSANTA, ra marlaba do na songon i. Alai
anggo ala ni pangkilalaan sambing do i, manang gabe tartogu roha tu
sitaonon portibi, ndada tu na tinaon ni Tuhanta i, ndang apala i
sintuhuna atik pe laos tong do adong gurasa na boi siparhaseangon nang
sian i. Dung sidung punguan i, miduk do angka dongan pangula na ro
mangido liturgi na jinahahon laho parongkomhonsa, ai niantan na hurang
singkop dope isi ni buku on paandaron tu antaran ni huria na bidang. Di
tagam roha na miduk dope angka dongan na lobi tumangkas sian iba di
pangalaho on. Alai songon dalan laho manghirpasi rohanta tu angka ulaon
na umuli dope sian on, taparhaseang ma buku na metmet on.
Ala digari dongan na umbege jamita on do gabe jamita andung buku na
metmet on, gabe laos niuji do paihuthon di pudi ni buku on angka lapatan
ni hata andung na pinangke di jamita on. Anggiat ma mantat pasupasu di
hita na manjaha buku na metmet on hinorhon ni silang dohot panghophopon
ni Tuhanta Yesus.
Panurat.
Hata sipatudu
Ala marrumanghon andung do jamita on, jala adong do saotik imbarna
sian na somal tapangke, niuji do patupahon manang na pigapiga pandohan
sipatudu laho pagaburhon dalan sidalananta to hasasaut ni punguan na
hohom sihobasanta:
1. Ia buku na metmet on, di punguan na hohom pukul 2 botarina do pangkeonta.
2. Sada halak sambing do na manguluhon punguan on nidonganan ni sipalu poti marende dohot na mamalu giringgiring.
3. Na manjahahon ende laos na manjahahon jamita on do dung jolo
mangkuling poti marende mambuat toonna, laos dijahahon ma sasabintas
songon na somal.
4. Naeng ma tangkas taparrohahon angka na patut ondolhononhon.
Tangkas ma taatur parlogu, pargogo dohot parnanget ni soara, parhatop
dohot parlambatna.
5. Andorang so taadopi punguan na hohom i, patut ma hita mangarade panjahaon on jumolo di bilutta sahalak hita dohot soara.
6. Angka nornor ni ayat dohot nomor ni ende, ndang pola sijahahononhon.
7. lngkon jumolo songon na tapangkilalahon sitaonon i asa taboto parpangondol ni angka pandohan disi.
8. Ganup dung sidung ende, sai humosa jolo manang na pigapiga second, disi pe asa niudutan
9. Naeng ma di bagasan partangiangon hita manghobasi sude siulaon na hohom jala marhadohoan on.
1. Ende No. 88:1,2,4 (BL 106)
1. Jesusku naung manobus ahu, sai naeng haholonganhu Ho; Tu dolok
Golgata Ho laho, nionjar ru holongMu do, Hupuji nasa asiMi alai gumodang
holongMi.
2. Tarsolsolbagi do rohangku paidaida dangolMi; Marningot sasude
dosangku ai i do na tinaoMi, Hupuji nasa asiMi alai gumodang holongMi
4 Bagas uhirhon to rohangku panghophopMi humophop au; Tu si ma togu
pingkiranhu guru di Ho sambing ma au, Hupuji nasa asiMi alai gumodang
holongMi.
Jongjong ma hita saluhutna di bagasan hahohomon.
Marhitehite goar ni Debata Ama dohot goar ni Anakna Tuhan Jesus
Kristus dohot goar ni Tondi Parbadia na tumompa langit dohot tano on.
Amen.
Na gabe pangoloi do Kristus paima mate pola tung mate tarsilang. Di
dia angka soropmi ale hamatean? Di dia pangagoonmu ale banuatoru? —
taendehon ma Haleluya
Martangiang ma hita.
0 Jesus birubiru ni Debata na mamorsan dosanami. Na jongjong do hami
di joloM marningot Ho na targaritung i. Tangkas do huantusi hami
hinabernit ni na tinaonMu di dolok Golgata. Tungki do hami marningot
dosanami na mangkorhon hamamateMi. Asi ma rohaM. urupi ma hami asa gabe
upa ni halojaonMu hami. A m e n.
Hundul ma hita saluhutna.
Tatangihon ma sian Hata ni Debata na tarsurat di: Rom 6 : 3-5.
Na so diboto hamu do on? Sude hita nasa naung tardidi tu bagasan
Kristus Jesus, tu bagasan hamateanNa do hita tardidi. Antong, naung
tartanom do hita rap dohot Ibana marhitehite pandidion i tu bagasan
hamatean asa marparange hita di bagasan ngolu na imbaru, songon Knstus
naung hehe sian angka na mate hinorhon ni hasangapon ni Amana. Ai anggo
nunga sangkambona hita dohot Ibana di na rap mate i hita rap dohot Ibana
i, suang songon i ma hita nang taringot tu haheheon. A m e n.
2. Ende No 84:1 (BL. 195)
Aut na ginorga tu rohangku bohiM di na laho mate Ho. Aut na haingot o
Tuhanhu, tongtong panghophopMi di au. Ai Ho do paluahon ahu dosangku do
pinorsanMi, Didaoni Ho parsahitonhu, martua au binahen ni i.
Gorga ma tu roham ale angka ama parsinuantunas[1]. Uhirhon ma tu tondim ale angka ina parsinuanbeu[2], pangkilalahon ma ale siadosan[3] parpangarudok[4] na togos[5]. Ida ma Tuhanta i sirajaibot[6], nunga gantung Ibana di silang i. Bege ma simarirnbun[7], nunga dipangiar Jesus soarana. Tangihon ma sibijaon[8], nunga marsoara na gogo Ibana mandok, Eloi, Lama Sabachtanei — Ale Debatangku-Debatangku, boasa tung tadingkononmu Ahu?
Debata ditadingkon Debata? Ditadinghon? Nunga ditadinghon jolma
Ibana, nunga ditadinghon angka siseanna, gari mata ni ari i nunga naeng
manilu manadinghon Ibana.
Ida hamu ma jolma i, ninna si Latus na sangap i. Beha ia ho
tadinghononmu do i? Dohononta ma, patut ma antong parmudarhononhu na
tinaon ni Tuhanki asa marpanghorhon i di ngolungki. Ala ni i, hupaunduk
nama simanjujunghu, hupatungki ma panailingku, hupahusorhusor ma na
tinaon ni Yesus i anggiat jumpangan tua ahu anggiat dapotan ngolu ahu
sian siaginon[9] ni Tuhanki. Asa hisar tondingku siala parlungunonna i. Ndang tarbahen so masinunuton[10] ahu ganup ari di siulubalangari[11] on molo hupahebaheba ngolungku dohot sileapon[12] ni Tuhanki.
Amang, bege ma tardok hira na tolu hata do na manghamham partinaonan
ni Tuhanta ro di hamamatena i, songon batu mardalihan na so tarsirang.
Patut ma tapeop i. Mangkuling ma Ho Tuhan sian silangMi, mananginangi do
hami na dangol on, na hundul pualpualon[13] na tindang pangalelaon[14] on ala ni dosa i. la sitolu hata na ginoaran ondeng, angka on ma na gabe hata mutiha ni sitaonon ni Tuhanta i.
1. Gabbata
Hata Heber do i na mandok, pantarbatu na nilapis dohot marmer,
habangsa paruhuman na jinuguhan ni si Latus laho mandabu uhum tu Jesus i
ninna si Johannes. Pasada ma roham mangihutihut Tuhanta saleleng di
paruhuman i. I ma na naeng soarahonon ni Gabbata on. Paihutihut ma sude
hata, linsinglinsing dohot reherehe nang tijur pe na masa di Gabbata on.
2. Via Dolorosa
Tutu hata Latin do on na mandok, dalan sitaonon, lapang haberniton,
manang di hata andung didok ma on padang-harorobur, i ma dalan na
binolus ni Tuhanta marnungka dung ampe tu tangkuhuk manang tu situmalha[15] ni Tuhanta i hau pinarsilang na dokdok i tu sitangkingon[16] ni rajanta i sahat tu hapapajalna. Paihutihut ma na masa disi asa lam paltak holong ni roha ni Tuhanta i.
3. Golgota
Na ro do hata i sian Golgoleth di hata Heber manang didok Gulgutha di
hata Aram mandok partangkurahan, inganan hapapajal ni Tuhanta i. Di si
ma Tuhanta paujungkon ulaon panghophoponna i. Paihutihut ma na masa di
si anggiat lam paltak tu roham hasesaan ni dosa pinatupana i.
3. Ende no 76:2 (BL. 199)
Ingkon sai Ibana ingotonku, uju na tarpajal i.
Tu hau pinarsilang ginantungkon, sai mabaor mudarNa i. Ai humophop au ditaon uasNa, asa dohot au muse upaNa. Ai ditatap do au on, di pandokNa: “Nunga sun !”
Tu hau pinarsilang ginantungkon, sai mabaor mudarNa i. Ai humophop au ditaon uasNa, asa dohot au muse upaNa. Ai ditatap do au on, di pandokNa: “Nunga sun !”
Ida ma nunga diboan be Tuhanta i sian porlak Getsemani jala dipasahat
tu tangan ni angka panguhum. Nunga sahat Ibana tu Gabbata. Gabbata i ma
pantarbatu paruhuman ni si Latus i. Pulutna i rohana manjangkon Tuhanta
i, naung tinali jala tinogu ni sintua ni malim rap dohot sintua ni
bangso i marhite torop halak angka na marpodang jala marlombutlombut.
Aha ma so dohonon ni Tuhanta i: Hira na dompak panamun do hamu hehe
marpodang jala marlombutlombut manangkup Ahu.
Nunga dipareso si Hannas, si Kayapas pe ndang olo hatinggalan,
dipatolon do Jesus tu Debata Siparngolu i, pola diribakkon ibana
paheanna ala ni rimasna tu Jesus i. Ditijuri nasida ma bohiNa, na deba
manompuk jala na debanari mangalinsingi. Sibotosurat dohot natorop i pe
pauru-uru Jesus i.
Aha upam di roham ale Panguhum, molo degeon ni Tuhanki pantarbatum na
marlapis-lapis i. Songon na martatasuping ho paida-ida Tuhanki, na
tinogu tu jolom ale Latus? Si Latus na holongan di pangkat, na mabiar
mida Kesar jala na tagi mambuat roha ni natorop i?
Boasa paloasonmu sintua ni malim dohot natorop i pangiar soarana be martuhashon na so tuhas[17]
tu Jesus na so marpipot i? Na deba mandok sian nasida; sipabalik bangso
do Tuhan i. Na debanari muse mandok na diorai Jesus do mangalehon
guguan tu Kesar. Adong muse mandok na didok Jesus do Ibana Raja jala
sipanggunturi do Ibana marhite pangajarionna. Ndang boi be pahohomomu
sude pamangan ni angka panuhasi na sumalin on?
Ale Tuhan! Boasa ma pola paloasonmu be si Latus nabisuk marsuru
Tuhanki asa diboan tu na hinosoman ni rohana i ma si Herodes parjahat i?
Holan ala dibege ho do Latus na sian Galilea Jesuski mangajari hape
gabe pintor tarsingot roham tu si Herodes na hinosomanmi na topet ro
mardalani tu Jerusalem na ribur i. Nda marsalisi do hamu na sailaonna
on? Tuani ma adong Jesus ate Latus, asa adong pasurusuruonmu mambuat
-roha ni si Herodes i. Boasa?
Ida ma, nunga diparengkelengkeli si Herodes Tuhan i. Ai las situtu do
rohana, ai nunga nania lelengna naeng idaonna Jesus jala idaonna nian
tanda sipatupaonna songon na binegena na sailaonna i. Godang-godang
disungkunhon si Herodes i, hape na pasombu tagasna do, ala ni i do
umbahen na so dialusi Jesus ibana nanggo sangkababa. Las roham ale
Herodes manjalo haroro ni Jesus na tinali i, ala ni aha do? Ala ni ribur
ni Jerusalem i do? Ala ni aha? paboa ma. Oh, ala na naeng berengomnu do
tanda sipatupaonna ala naung dibege ho baritana. Ida ma i. Arnang
dangolna i, ingkon paluaonmu ma hape Herodes Tuhanki puaspais
pahaepahulu, paulaulaonmu Ibana songon na dipasangap ho, hape na
mangaleai, na mangarehei do ho. Dipaula-ula ho mangalehon abit na uli,
hape na pauru-uruhon do ho.
Amang, dangolna i, ponjot so na bolon, sungkot so na ginjang, Tuhanki
dibahen ho Herodes. Tu aha pe so tampil tu dia pe so langku. Aha ma
pola alithononmu abit na arga i, na bontar i tu Tuhanki? Ndang na
mangaleai ho disi? lnang ida ma, nunga dipajantar si Herodes Tuhanki rap
dohot soridaluna i, songon raja bolon mulak tu si Latus parsipitulili
i. Songon i ma hape dibahen ho ale Herodes asa longkang hosom naung
leleng i tu si Latus.
O Latus, Latus, Ua bahen ma uhum na sintong tu Tuhanki! Pola ma
pabengkuhonmu na tigor i? Sian ise ho marsiajar ale Latus? Pasombuomnu
sala na so marpipot i? Tung barani pulut ma roham manogu Jesuski huhut
mangalinsingisa? Ndang digerekhon[18]
ho ale Latus pambahen ni soldadu i — ida ma nunga didandani nasida
sungsang duri jala dipaula dipartumpalhon tu Jesuski. Baju dapdap i pe
dialithon do tu dagingna, nda hinagok ni pangaleaion do i? O Latus,
Latus, tailihon ma, nda nunga ro ompuapi[19] parsinonduk bolonmi, nunga donok pardihutam i, ida ma nunga sahat tu pantar[20] paruhumanni tungganeborum si Claudia Procula, na sai busisaon[21] jala bubuason[22]
di lambungmi. Nda dihusiphon do tu ho, didok, "sotung dihahua ho halak
partigor i, ai mansai susa situtu do ahu na borngin ala Ibana" ninna do.
Boasa paula so begeonmu i Latus? Tarhona dope dipaluhut ho angka sintua
ni malim ro di natorop i. Tarhona dope ho marsijuguhon? Nunga didok ho
nian na sintong, ai diparhatopot ho do pola ro di tolu hali mandok:
"Ndang adong dapot ahu sala ni halak on". Diulakhon ho muse mandok:
"Ndang adong parulaanna mambahen Ibana marutang hosa". Salpu i, ndang
sombu dope roham gabe didok ho ma muse: "Ai aha do na jat dibahen halak
on, ndang jumpang ahu di Ibana na tau gabe marutang hosa". O Latus,
ndang barani ho manghajongjonghon na sintong? Matanggak[23] mida rupa ho tahutan mida bohi?
Pir ni roham i, paloashon angka soara na marsurak-surak i. Ida ma
nunga ro manosak-nosak angka natorop i, natua-tua dohot angka naposo pe.
Bege soara i, orukna[24] i, gari soara ni sitengardibanua[25]
ndang pola songon i. Ronggur nama na marniala. Hape, hape, soara ni
angka jolma do i. Tangihon ma, nda didok do: Parsilangkon, parsilangkon
ma; Padao, padao ma; Pusa, pusa ma!
Sombu ma antong roham ale Latus mambuat aek mamuri tanganmu ala na so
tarbege ho be suraksurak ni natorop i, ai lam ganda do gaorna. Anggo
hurang dope di ho ale Latus aek laho mamuri tanganmi, bidang dope laut
dohot tao ingananna. Dirimpu ho ias ho sian na masa i binahen ni aek i?
Ah,dangolnai i, porsukna i. Agan pe diuji ho ale Latus mandok “Ias do
ahu sian mudar ni On, hamu do na sari di si”. Anggo di natorop i mura do
alusanna i. Nda didok do: “Marsapata tu hami dohot tu ianakhonnami ma
mudarna i”. Nunga humitir iba managam aha ma puas ulaning sian
pamanganmi ale Latus? Amang, on do hape: “Boan hamu ma Ibana,
parsilanghon hamu ma ai ndang jumpang ahu salana”. Pulut ma roham ale
Latus paborhathon Tuhanki tu silang i. Nunga dilinsingi ho Ibana hape
linsing-linsing mangonjar jala pataruhon tu silang i do dibahen ho i
nang pe so jumpang ho salana?
Boasa ma so dianturehon roham so nanggo diambereshon[26]
ho mamereng soldadu na ro manahopi Tuhanki? Porsuk na i. Ida ma nunga
dilinsingi Tuhanku, na so olo mangalo i. Pamanat ma tangurung
simandorpina i, nunga tung marlilit-lilit bogas ni samboksambona i?
Linsing-linsing na marpalait i nunga hona samboksambok namarmata
holi-holimartanggurung huling-huling i, nunga marsasak dilibashon tu
tanggurung ni Tuhanki. Ida ma nunga mabugang be. O manusia na di
siulubalangari nda patut endehononmu
4. Ende No 81:3 (BL. 185)
Bugang sada tanggurungMu Di na hona linsing i Hamamalum ni bugangku na di rohangki do i
Ho do gabe binuraan au dapotan hangoluan. Ala ni hupuji Ho tung marribu hali do
Ho do gabe binuraan au dapotan hangoluan. Ala ni hupuji Ho tung marribu hali do
Dipaula so diida ho do Tuhanki , nunga dilasahi! Tajom, tajom ni suga ni sungsang duri i.
Amang, ima hape gabe tumpalMu ale Tuhanku? Amang, dangolna i. Tung
tolong, sanggar na marbarutu i ma gabe tungkotMu? Nunga disoro tolong i,
nunga dilasakhon tu sungsang duri na di simanjujungna i. Ah dangolna i,
nunga manirisi jala manetehi songon aek nasian jenggar[27] mudar sian simanjujung ni Tuhanki. Pareso ma, nunga marhimpal-himpal be simanarup[28]
na i. Ai marbirsahan do tusi mudarNa i. Patut ma hape diendehon angka
na porsea i: “Sungsang duri ditumpalhon panginsahi i tu Ho. Jala tolong
dilibashon tu ulum pasiak Ho. I ditaonton Ho Tuhanku ala ni
hajungkatonhu. Ala ni hupuji Ho tung marribu hali do”.
O Latus. O Sintua ni malim, tumagon ma di ho si Barabas si partodos i, sibunu jolma panggunturi i?
Anggo tu si songon na didok ho do, muli ma damang, topot ma jabum di na nidokmu “Tagonan si Barabbas dipalua”.
Pardosa na sumalin di hasiholoi ho? Hape anggo Jesus na so marpipot i
ingkon soroonmu jala tijuranmu? Ingkon lasahanmu? Ingkon leaanmu?
Ingkon pasiaksiakhonmu? Aha tagamon rugim ale, dibahen Jesuski? Nda
holan laba dohot pasupasu do na ro sian Tuhanki? Giahan ho di na tama
ale sintua ni malim?
O Jesus tu dia tagamon mabaor sude mudarMi? Anggo tung sunge do, nda magopo ma i?
Nunga sap mudar simanjujungni Tuhanki, aha ma bahenonhu mangapusi i?
Tung pinapungu pe sandok saputangan ni manisia, ndang tuk be anggo
mangapusi i. Rohangku, roham nama na boi mangapusi i. Nunga marsapu-sapu
mudar simanarup ni Tuhanki. Ala ni i patut do ingkon endehononhu
5. Ende No 78:1 (BL. 158)
O ulu na sap mudar binaen ni bugangMi. Na sian jangarjangar
sisungsang duri i. O ulu hatongamon hian do tumpalMi. Ditaon Ho haleaon
Ho naeng sombaonki?
Ida ma, tung pasombuonmu dope soldadu i? Nunga loja, jala maheu
Tuhanki, alai pulut do roham ale soldadu palaluhon tangamu na gintal i
tu salop[29] ni Tuhanki. Aha manggitik roham umbahen ingkon pastapanmu dope simangarudop[30] ni Tuhanki? Na so adong do habidingan[31]
ni tanganmi? Pasombu tagas ho tu Tuhanki na so ra mangalo i, na songon
biru-biru na sai hohom maradophon sigustingi ibana? O Jesus biru-biru ni
Debata, laho ma Ho? O Jesus diparsipal pe Ho, sai manaon-naon do Ho,
ndang manang mangkuling pamanganMu. Songon biru-biru na hohom maradophon
jolma sigustingi ibana. Tung na so dibuha Ho do pamanganMu. Ndada na
sotarbahen Ho nian tutu padirihon lobi sian sampuludua loksa surusuruan
laho mandopang angka panggunturi i, alai manaon do Ho! O Jesus birubiru
ni Debata, borhat ma Ho? O Jesus na mamorsan dosa ni hajolmaon i laho ma
Ho? Patut ma tutu didok angka na porsea i. Na lao do birubiru i
mamorsan angka dosa, ni nasa hajolmaon i di benget ni rohaNa. Diporsan
do sahitta i, dilehon do diriNa i tu tangan ni pamunu, ditaoni do na
bernit i, ro di na tos hosaNa i, didok naeng porsanonHu.
O ale tondingku, patangkas ma na niae ni Tuhanki, pareso ma luhutna sap mudar do dagingNa, sai hir hodokNa i, modar rude dagingNa.
1. Gabbata
Gabbata, na so olo do ho hona tijur umbahen na pabalionmu tijur ni
ratorop i tu bohi ni Tuhanki? Pamanat ma pamangan ni soldadu i so
diboto be manang tu dia bahenonna tijur na nialap ni dosana sian
sitalbeonna[32]
i. Ida ma, nunga dipahure sialap ingkauna i songon na mambebeati
Dipabursikkon ma ijurna to bohi ni Tuhanki. Bohi na lambok malilung,
bohi na basar i. So hea i marhalingking[33] i ala ni na muruk. Sai ellem[34] do i. Hape ida ma, nuaeng nunga sap tijur be i. Bohi na minar i, so jumpang harungkut[35]
ni late dohot hosom di si. Gari tu siseanna so hea pola salpu hata ni
I. Gariada tahe sai lamot do bohina ro di na laho mamuri pat nasida pe
uju i. Anggo nuaeng nunga marlangan i, jala sap tijur do. Paputusma
roham mangendehon:
6. Ende No 78:2 (BL. 158)
O bohi parsinondang Na sangap situtu
Beasa tung marlangan sap ijur hurumMu?
Tung aha ma alana Umbaen homur mataM?
Na mintop do sondangna Di na lao tos hosaM.
2. Via Dolorosa
Nunga nirimpu montok ma na masa i. O Jesus, ndang tinagam ingkon
marudut be anggo marnida hinadangol ni na niaeMi. Hape, hape, bereng ma o
manisia, nunga disoro jala ditogu Jesus i songon birubiru na tinogu tu
pamotongan huhut manetehi mudarNa i. Via Dolorosa, lapang haberniton,
padang harorobur. Nunga modar daging ni Tuhanki. hape pamanat ma, boasa
tung pasombuonmu dope Tuhanki mamorsan silangNa i? Tiang na balga, naung
pinsamban i. Hape nuaeng ingkon ampe ma i tu tangkuhuk ni Tuhanki na so
marnangon i be. Nunga maheu dipasipal-sipal, so malo mangguit be idaon.
alai tung unduk do manuhuk silang i. Bereng ma, nunga borhat induk ni
soldadu ni halak Rom. Nunga dienjak hodana na tuit i, ihut do tusi angka
soldadu marlotom-lotom patna i sian las ni rohanasida be rap dohot
angka sinjatana pe. Hape adong ma deba muse di pudi ni i na maniop papan
tulis panuratan ni sala ni na hona uhum i. Pajenek ma, jaha ma. Didok
di si Jesus Nazarenus Rex Judaiorum manang dipapandek INRI. Lapatanna,
Jesus na sian Nazaret Raja ni Jahudi. Ihut ma muse tu si Jesus na
mamorsan silang i niundurhon ni angka natorop rap dohot sarongkanan nari
soridadu.
Ah, ndang hapalang be surak-surak in sintua ni malim i rap dohot
sintua ni natorop i, dohot angka siboto surat pe, ai nunga disuhung[36]
be Jesuski, ndang adong be alo-alonasida di rohana. Hape, hape nunga
mulai angka hitir simangarudop ni Tuhanki. nunga daoldaol simangidona na
maniop silang i, nunga marjogal simanarup i, nunga telluk-telluk be
simanjojakNa[37] i. I da ma nunga naeng tungkap Ibana, nunga sonsam[38]
Tuhanki tu jolo dionjar silangna na borat i. Hape marpalait dope muse
samboksambok na marsuga-suga tu dagingna mandok asa hinsat. Alai ndang
tarbahen be. Ndang marnangon be.
Ndang tarpaidaida angka ina-ina, boruboru parbaria[39]
na mangihuthon Jesus i be na masa i. Gabe marsaburan ma ilu nasida be
tumatangis mangandungi i Tuhanki. Hape, ruar dope panurirangion sian
simangkudap ni Tuhanki mandok unang ma Ahu tatangisi hamu ale boru
Jerusalem, dirimuna dohot anakhonmuna ma. Ndada diriNa disarihon jumolo,
alai natorop i do na rumingkot. Anggo Ibana dipatutoru do jala gabe
pangoloi paima mate, pola tung mate tarsilang.
Dia ma dalan, ninna roha ni soridalu i, anggo silang ingkon do sahat
tu Golgata. Tuani ma disi si Simon halak dagang pangaranto na sian
Kirene i. Dohot paksa, gabe ibana ma digogoi nasida mamboan silang i.
Idaon songon na asi roham di Jesuski ale soridalu. Hape, ndada na marasi
ni roha ho hape, alai asa tung ingkon sahat do Jesuski tu
partangkurahan i didok roham asa tung haru diparsilangkon.
Nanget-nanget, tuat ma nasida sian dolok Zion i. Nangkok ma muse tu robean ni partangkurahan i.
Nunga mandok sahat nuaeng . . . ida ma . . . nunga sirungum sude angka natorop i asa haru diida nasida be dipajathon Tuhanki.
3. Golgota
Nunga dipajongjong silang ni Tuhan i.
Golgata – Gulgoleth – Gulgutha lapatanna partangkurahan. Agan pe
adong dua nari na tarsilang i, i ma angka parjahat di Golgata on, ndang
adong laho roha ni halak painondur tusi, ai pangalaho naung soma do
sisongon i. Alai anggo tu silang ni Tuhanta i, silang na so hea masa
dope i, halongangan bo!on do i. Anak ni Debata tarsilang, Tarsilang? O
Golgata, Golgata, boasa ma gabe partangkurahan ho? – ia tung sian rupam
pe tarida do nian ai madabu tulpang tu gambo, mardomu do rupa tu
pangalaho. Ia rupam nda mardomu do tu pangalahom. Gariada tahe tardok do
madabu gorga tu gambo, mardomu do goar tu pangalaho. Goarmu pe Golgata,
lapatannapartangkurahan. Aha ma tagamon umbahen songon i goarmi? Adong
namandok, ho do ninna manabunihon tangkurak ni si Adam na parjolo i.
Hape laos ho muse naeng manabunihon nang tangkurak ni si Adam na
paduahon i? Pulut roham naeng manabunihon tangkurak ni Tuhanki? Boasa ma
pasombuonmu soldadu i marhobas mambuat tongkokna dohot labangna na
ganjang i? Amang, ida ma, ditinggalhon dope i, tarhona dope tahe na deba
mambuat tuak anggur na marsaor pogu. Amang, nda gabe songon ubat
sipamate pangkilalaan ma i asa unang diae Tuhanki di rohana na bernit i?
Alai, dirimpu ho ma ale, jaloon ni Tuhanki anggur sipalensemmi. Nda
dibereng ho ditulak do silelionlehonmi ? Ai dung didai, ndang dijalo
Ibana jala ndang olo lbana manginum.
O, ale manisia ni siulubalang ari, tung tuak anggur na marsaor pogu
ma hape silehonlehonmu tu Jesus na mamorsan dosam i? Ianggo ahu, ingkon
hulului ma aek sorbajati[40] laho pasombu uas ni Tuhanki.
Nuaeng, palaluonmu ma tanganmu na girgir manongkok i ale soldadu? Ai
sadia huroha dijalo ho upam manongkokhon labangmi? Boasa ma pasombuonmu
simanjojakNa na ringgas mangalangka laho marjamita i nuaeng ditambat?
Amang, ida ma, nunga dibuat labang na ganjang i. Tung so hitir do
tanganmi ale soldadu maniop labang na songon i ganjang? Nunga dipadonok
ho tu tangan ni Tuhanki, ida ma nunga diantuk dohot tongkokna tu silang
i. O Jesus. simangidom[41] na sai mamasumasu i, ingkon labangon ma i?
Amang, nunga marlajak mudar i sian simangidoNa maniris dohot sian
simanjojakNa i. Dangolna i, bernitna i. porsukna i, ndang na holan
hansit be i, alai nunga tung mangarontan[42] i nuaeng. Tama ma taongkuhon i di bagasan rohanta di na taendehon ende on:
7. Ende No 81:5 (BL. 185)
Tung tanganMu dohot patMu ditorusi labang i
Jadi tiris ma mudarMu sian hau parsilang i,
I do mual paridian di au jolma na hansitan.
Ala ni hupuji Ho tung marribu hali do.
Nunga lam tu nangkokna mata ni ari. Ida ma nunga pukul sia manogotna.
Nunga jongjong be silang ni Tuhanki, nunga gantung Jesus Anak ni Debata
di hau parsilang. Sungkot tu langit, so dais be tu tano, nunga di
tongatonga Ibana. Saut ma Ibana nuaeng gabe sipadomu jolma na di rura
partangisan on dohot Debata Amanta parholong na di surgo hasonangan i.
Hape ihut dope muse duanari parjahat tarsilang mangkaliangisa. Ida ma
riburna i angka painondur i. Angka sintua ni malim dohot siboto surat,
sintua ni natorop i rap mangupir-upirhon uluna be huhut mandok angka
hatana be laho pauru-uruhon Jesus mandok: Pe Ho, na mangalohai bagasjoro
i jala na pajongjonghonsa di bagasan tolu ari. "Palua dirim jala mijur
ma Ho sian hau na pinarsilang i".’
Nang dung gaung Tuhanki ale sintua ni malim, ndang sombu dope roham?
Boasa sai babaanmu dope? Sai pambebeatanmu dope huhut mandok: "Palua
dirim, molo na tutu Ho Anak ni Debata, mijur ma Ho sian hau pinarsilang
i?"
Angka soldadu i pe dohot do pauru-uruhon Ibana. Dibuat do abit ni
Tuhan i, dibagi-bagima, didabu dope tondungna tu sampe-sampena i. Opat
do soldadu i, ba, diparopat ma abitna. Alai tading ma sampesampeNa.
Kituna do goarna. Tondung, ma dibahen laho marbagi-bagi. Ndada ala ni
malom martondung i ale soldadu, ndada ala ni parenta ni induk i, alai
tung na pasauthon lomo ni roha ni Debata do i, ai na tarurat do "dibagi
do abitna. Tondung do dibahen taringot tu sampe-sampena”.
Gari donganna na targantung i tahe, parjahat na sumalin dohot do
mangaleai Ibana. Asa nunga tung sange sude horong manimpalhon insakinsak
tu Ibana.
Alai sangkababa hata pe ndang dibuha pamanganNa. Dipaula so dibege do
soara ni natorop i. Tongtong do hata holong haruar sian pamanganNa.
Tuani maa disi ho ale parjahat na sadanari, ai muba do roham siala ni
silang ni Tuhanki, tuani ma di si ho maminsang donganmu parjahat i. Tabo
do hatam i mandok: "Ndang dihabiari ho Debata, atik pe rap hona uhum
hita, O Jesus, ingot ahu dung sahat Ho to harajaonmi".
Nian anggo roha mandok, nda mangontahi ma bugangna i. Hape anggo
Tuhan i tenang do marsoara sian silang i. Silangmi, silangmi i do
haluaonki.
8. Ende No 86:5 (BL. 67)
Silang na badia i Ho do lombulombungki
Molo puas hodokki Di na suda bohalhi
Di sude sitaonon i Ho ma lombulombungki.
Molo puas hodokki Di na suda bohalhi
Di sude sitaonon i Ho ma lombulombungki.
Bege ma nunga mangkuling Jesus, on do hataNa sian silang i:
"Ale Amang, marpamuati ma rohaM mida nasida, ai ndang diboto nasida na binahennasida i".
Ndang dao Debata sian Ibana. Songon pangkataion ni na paadop-adop
bohi do soara ni Jesus, didok ma: "Ale Amang, marpamuati ma rohaM …"
Nda na haruar sian mata mual holong ni roha do i? Ise ma na tuk
mandok songon i? Halak na mangalasahi Ibana, na manilangkon i, diondihon
dope jala diparamothon. Aut ahu songon i Tuhan dohononku: “Ale Amang
sai luluhon ma pambahenan nasida i tu ahu"[43]. Dohononku ma, "ale Debata, parbadahon ma badangku"[44]. Hape anggo tung Ho, gok holong do. Haholongan na badia sian Tuhan Jesus i, sai songgopi sai bongoti roha dohot tondingki.
Ai ndang diboto nasida nabihennasida i. Aha be nian na so diboto
sintua ni malim i, alai dipaula so diboto be do. Hape agan pe songon i
ndang na marnamontok holong ni roha ni Tuhan Jesus. Ai bidang pe tao,
umbidang do holongNa i, bagas pe laut, umbagas do holongNa i, timbo pe
langit, turnimbo do holongNa i.
Situtu do hatangkon tu ho, sadario on do ho rap dohot Ahu di Parideiso.
Tu parjahat nu di siamunNa do nian hata on. Alai tu ho dohot tu au do deba pangonaina.
Nda hata sipanglambohi tondi do i? Aut datu ahu, dohononhu ma,
sideang pangadeanan ma i, lapatanna pangalapan hosa loja. Sian dia ma
tagamon boi puas hata si songon i? Holan sian mata mual haluaon i do i.
Ndang olo mansohot mual haluaon i mamaorhon pasupasu tu na paubahon
rohana. Agan pe di tano on tarbege soaraNa, alai anggo isina nunga
diparadeido. Ido umbahen na didok: “Sadarion do ho rap dohot Ahu
diparadeiso”. Agan pe di hau i dope gaung-gaung ale parjahat, alai ala
dipauba ho roham, ala ni i nunga tubu haum di paradeiso ni Debata.
Sonangna i ho, nda patut ma endehononmu nian: Sonang di lambung Jesus,
sonang na ro tusi. Unang be ho mabiar lao mandapothon i. Tongtong
dijouhon Jesus, sai ro ma ho tu Au. Tadingkon haholomon jala haposi Au.
Ndi ma inang anakmi, ndi ma inangmi.
Ndang dipalingkang[45] inana si Maria i antong tampuk ni pusupusuna naung gantung di silang i. Dipamanat Jesus do i, didok ma: "ndi ma inang anakmi".
Nda jamita parsaoran na rongking[46]
do i? Asa marpartalian hasadaon ganup na porsea di Ibana, nirahut ni
silang i. Nunga mandao-dao jongjong angka na mananda Jesus i, songon i
muse nang angka parompuan na mangihuthon Ibana sian Galilea. Beha ma
tahe, ndada tiala[47]
roha, ai gari si Petrus pe pola do dipambuburahon dirina, paboa na so
ditanda Jesus i. Masihaishon api sian gurung-gurungna do ninna rohana
be. Alai, ianggo si Maria inaNa i, rap dohot paribanna dohot si Maria ni
si Kleopas dohot si Maria Magdalena, jongjong do di lambung Jesus na di
silang i. Ndang tarpabereng-bereng Jesus be ina pangintubuna i, songon i
muse nang inana si Maria, ndang tarpaida-idasa be anak sinuanbeuna i.
Disi dilibashon soldadu i lasakla-sakna i tu Jesus, disi do songon na
ditutuphon ulosna i tu simajujungna unang dipaida-ida i. Holan disi
dipadonok soldadu i tu Jesus anakna i, nunga marlobok taroktokna mandok
"Aha ma tagamon na naeng bahenonna?" Ua dompon ma roham inang aut adong
anakmu na songon sagak[48] ni panabian laho ne tu toru ni situmandok,[49]
nda ingkon maheu ho ‘paidaidahonsa? Ndang tarurupi si Maria be. Holan
iluna i nama diporo, pola hira na mahiang parilu-iluanna. Mamereng i ma
Jesus, gabe marsoara mandok: “Ndi ma inang anakmi, pos ma roham, pir ma
tondim”
Mauas Ahu.
Di jolo ni on dilehon do nian siinumon, alai ndang dijalo, hape
nuaeng nunga dipangido. Nda saut do songon na tarsurat di Padan na Robi
hian taringot tu Ibana di na nidok ni par-Psalm i "Merus do gogongku
songon ngar-ngar, jala lohot do dilangku di langit-langit ni pamanganhu
jala tu orbuk ni hamatean dipapodom Ho ahu"[50].
Jesus mual hangoluan ni boru Samaria i, nuaeng gabe mauas. Songon na
dipurun dihilala, mamiltak mataniari, mangontahi ma bugang i, lam sidung
mudarNa mardurusan sian bugang i. Modar ma dihilala. Songon na sungkot
nama dihilala sialapingkauna[51].
Ala ni mohopna gabe dijouhon Jesus ma "mauas Ahu". Asa saut do sombu
uashu ia mauas pe Jesus i. Ndang pola be dohot ahu muse manjouhon di
ujung ni langkangku "mauas Ahu". Tutu godang do na huhauashon di portibi
na mangilas on, alai nuaeng gabe sombu ma sudena i, ala naung diporsan
Jesus di silangNa huhut mandok "mauas .Ahu".
Eloi Eloi Lama Sabachtanei
Ale Debatangku, Debatangku, boasa tung tadingkononmu Ahu? Nunga songon halak-halak na tarpunjung, songon tandiang[52] na hapuloan[53],
Jesus di silang i. Dibereng humaliang, holan Ibana nama na punjung di
hau i. Tu dia ho ale angka sisean na sai rap dohot Ibana nasailaonna i?
Nunga tu dia ho ale Petrus? Nda didok ho do na so tupa tadinghononmu
lbana? Nunga tu dia ho ale Lazarus? Nunga tu dia ho ale angka na bosur
siala roti sisaotik na sian Jesuski? Tu dia ho ale manisia?
Diida ma tu ginjang, songon na dipatait Debata BohiNa. Dung i mangangguk badar ma Ibana. Anggukbadar[54]
na badia do on mandok: Eloi, Eloi Lama Sabachtanei. Ale Debatangku,
Debatangku, boasa tung tadingkononmu ahu? Ndada na mamurai, ndada na
mandele manang mamulasi Jesus di anggukNa on. Asa tung paltak do
tahilala bagas ni pangkaholongi ni Debata di panghophopNa i di hita, ai
songon i ma bernit ni sitaonon i ala ni dosanta. Ala ni i angka otdot ma
ho ale tondingku, angka hitir ma ho umbege anggukbadar na badia i, ai
ho hian do tama manganggukhon i ala ni hajahatonmu. Hape nunga dijoloani
Anak ni jolma i manganggukhonsa.
Ale Amang, tu tanganMu ma hupasahat tondingKu.
Jesus na burju mar-Ama i, Jesus Anak Sipangoloi i, ndang dung
mangkalupahon AmaNa na di surgo i. Sian mula ni ulaonNa sahat ro di
ujung ni ngoluNa, sai tong do ngolu na marpandapotan tu Amana i. Nuaeng
pe ndang tu hamatean i diodothon TondiNa. Ndang lupa Ibana pasahathon
arta na umarga i tu AmaNa. Dipagomgomhon do tu AmaNa na di surgo i
tondiNa i, didok ma "Ale Amang, tu bagasan tanganmu ma hupasahat
tondingKu". O hamu huria ni halak Kristen na badia, nunga dijoloani Anak
ni Debata soaram manjouhon asa diingot ho pagomgomhon ngolum dohot
tondim tu tangari ni Amanta na di surgo i. Sintong do molo taparhatopot
marhite ende ni angka na porsea i:
9. Ende No 383: 1 (BL. 383)
Adong do Ama na di surgo i,
Tuhan Jahowa Debatan ta i.
Di jou do au, nalao ma au Tu Ama na di surgo i.
Lao ma au, Lao ma au tu na di surgo i
Lao ma au, Lao ma au tu na di surgo i
Di jou do au na lao ma au tu Ama na di surgoi
Nunga marujung
Aha do na marujung? Nunga marujung angka ulaon dohot paraloanNa i.
Nunga marujung nang silangNa i. Nunga marujung sitaononNa i. Andorang so
dipaunduk dope simanjujungNa i, nunga mulai mandele mata ni ari i
marsinondang gabe mangholom ma sandok tano on.
Ndang taipaida-ida mataniari i be Tuhanki na sai gantung i. Songon na
maila mataniari i marnida bohi ni na sai marsinondang nasailaon.
Disonggak sinondang ni asi ni roha ni Jesus i do sinondang ni mata ni
ari i, ujungna gabe dipaholom mata ni ari i ma dirina. Molo adong sian
hamu ale jolma manisia parhapistaran portibi mandok: "gerhana ni
mataniari do i" – uji ma paresohon tu tingkina manang na cocok do i?
Jempek do alus tusi mandok, ndang. Molo adong dope sian ho ale portibi
na mangilas mandok, timus ni dolok marapi- na mapultak do i, tangihon ma
pandok ni parpandebisuk mandok, ndang. Antong aha do i? Mangholom
mataniari i, gabe mangholom ma sandok tano on. Gabe songon na alang so
tarida nama Tuhanta i di silang i. Ale mataniari, boasa so mangkidop be
ho? Tagamon naung ditatap ho do na so mangkidop be simalolong ni
Tuhanhi? Nunga mamirong humaliang. Disi ma dipagogo, dipangiar Jesus
soaraNa mandok: "Nunga marujung", jadi tos ma hosana.
Mangkuling giringgiring pitu hali, lambat-lambat, jongjong ma sude
di bagasan hahohomon martangiang. Di na huhut mangkuling giringgiring,
dipalu ma potimarende angonangon Ende no 335 BL. 50.
Dung sidung giringgiring mangkuli si pituhali i, laos mulai ma
dipagogo soara ni potimarende,huhut laos tingki jongjong dope sude rap
ma mangendehon:
10. Ende No 335 (BL. 50)
Jesuski Tuhanki, siapuli tondingki, O na bernit ma ditaon Ho Tuhanku
di silangMi, Di na laho tos hosaM Di na laho tos hosaM; Beta hita tu
Tuhanta na gantung di Golgata; Sai tajangkon ma hatana na mamboan
haluaon, Di tondim ale amang, di tondim ale inang.
(Dung sidung ende on hundul be ma satongkin)
Nunga tos hosa ni Jesus i. Nunga marujung be dibahen Ho ale Tuhan.
Alai ida ma, nunga laos godang naung jumolo borhat mangihuthon Ho sian
bagas ni halak Kristen di portibi on. Sian ruas ni Huria on pe nunga
torop na laho mandapothon Ho. Beha, nunga rap ho ale haholongan dohot
Jesusmi naung jumolo borhat sian ho? Aha do labangku sian hamamatem i
ale Jesusku? Aha ma upangku sian padangharoburanmi ale: Tulianku? Ingot
ari hamamatem ninna angka na porsea na parjolo i. Pasolhot ma hamamatem
amang, inang, tu hamamate ni Jesus i. Ia hamamatem ale Jesus, gabe
hamamate ni hamateanhu do i hape. Ia hamamatem ale Jesus, gabe pintu
hamasuhanku do i tu surgo hasonangan i. Ai marhite i do diparade ho
inganan na so nang i. Ianggo Letnan ni soldadu na manjaga pamajalan i,
gabe dipuji do Debata, ninna do, tutu do halak on na tigor roha, jadi
sude natorop i na marluhut mainondur, masitompuk andorana be do marnida
na masa i laos mulak ma.
Ale angka ama parsinuantunas, ale angka ina parsinuanbeu, ale angka
siadosan, tagan so mulak hita sian punguan na hohom on, jongjong ma hita
di toru ni silang ni Tuhanta i marruji-ruji. Di lambungMi o jesuski,
tung na mardame roha i, maporus holso-holsongki lam to tiurna rohangki.
Lam ganda las nang gogongki dung Ho hutanda Jesuski.
Tama manghorhon las ni roha do di hita hamamate ni Jesus on, ai
diungkap do di hita dalan to haheheon sian hamamatenta dohot sian
hinambor ni naung jumolo monding sian hita pe. Nuaeng pe, patut ma hita
manompuk andoranta be laos mangandehon, ala ni i jongjong ma hit
saluhutna.
11. Ende No 78:3 (BL. 158)
Au on tama o Tuhan, manaon na tinaonMi. Dosangku di diporsan Ho na
tarsilang i. Sai tatap ale Tuhan, au na dijoloMon. Huhut sai patuduhon,
basaM tu rohangkon.
Rap ma hita mandok tangiang: Ale Amanami:
Ale Amanami na di banua ginjang! Sai pinarbadia ma Goarmu! Sai ro
ma harajaonmu! Sai saut ma lomo ni roham di banua tonga on songon na di
banua ginjang! Lehon ma di hami sadari on hangoluan siap ari! Sesa ma
dosanami songon panesanami di dosa ni angka na mardosa tu hami! Unang
hami togihon tu pangunjunan! Palua ma hami sian na jahat! Ai Ho do
nampuna harajaon dohot hagogoon dohot hasangapon ro di saleleng ni
lelengna. Amen!
Pasupasu:
Didongani Asi ni roha, talup ni roha dohot dame sian Debata Amanta
dohot sian AnakNa Jesus Kristus Anak ni Ama i ma hamu marhite hite
hasintongan dohot haholongon.
[1] Ama ama
[2] Ina ina
[3] Haha anggi, tunggane
[4] Parpamatang
[5] Kuat kekar
[6] Iboto
[7] Hula hula
[8] bere
[9] Portibi
[10] Mangandunghon hinadangol
[11] Hasiangan
[12] Sitaonon
[13] Ndang na marhasoan
[14] Menjadi lupa
[15] Abara
[16] Dituhuk
[17] Tuduhan
[18] dihilala
[19] Tunggane boru
[20] Lantai
[21] Ndang sonang panghilalaan
[22] Mengeluh
[23] Mabiar
[24] Bising karena ribut
[25] Bodil
[26] Berpaling untuk melihat
[27] Atap rumah
[28] Obuk
[29] Rahang
[30] Pamatang
[31] Asal kata ‘biding’ artinya tepi
[32] Bibirna
[33] Bohi na berkerut
[34] Membujuk
[35] berkerut
[36] Dibungkukkan
[37] Pat na
[38] tinggang
[39] Berperasaan halus
[40]
Berasal dari legenda Batak yang menuturkan seorang perempuan yang
namanya Sorbajati melompat ke halaman dan terbenam ke dalam tanah. Lalu
ia menjelma menjadi pohon aren. Tuak dari pohon aren itu disebut aek
Sorbajati. Bisa juga air bersih dan murni. Atau aek tabar
[41] Tangan
[42] Mangontahi huhut mmohop
[43] Cf. Psalmen 43:1
[44] Cf. Psalmen 43:1
[45] Dipalua
[46] Teguh
[47] Keberatan
[48] Eme na tubu dung sidung manabi
[49] Hamatean
[50] Psalmen 22:16
[51] Lidah
[52] Pakis
[53] Terpencil
[54] Tangis na gogo situtu
