ACARA PANANGKOKHON PALAS PALAS GAREJA

 

ACARA IBADAH PANANGKOKHON  PALAS-PALAS GEREJA HKBP KISARAN KOTA SABTU, 28 SEPTEMBER 2024

1. JOUJOU MARSOMBA HUHUT MAMUJI DEBATA

U  : Hamu angka na hinaholongan, Horas ma di hita saluhutna. Pinuji ma Debata na umpasupasuhon tingkion tu hita. Diloas do hita marpungu di inganan on, manghalashon denggan basa ni Debata naung itajalo di bagasan ngolunta, lumobi ma di na laho panangkok palas-palas ni garenja hita dibagasan tingki on, asa sae tongtong di dongani Debata hita boe sahat tu na simpul ulaon pembangunan ni bagas joro ni Tuhan on. Alani rap marlas ni roha ma hita mamuji pasangaphon Debata. Marende ma hita sian BE. 581:1-2 "Sangap Di Jahowa"

2. MARENDE BE. NO. 581: 1-2 “SANGAP DI JAHOWA”

♫  Sangap di jahowa na sun timbul i, Balga ni holongNa ndang tarasam i Dilehon  AnakNa  na  sasada  i,  Manobus  hita  jolma  pardosa  i Puji ma Debata ale manisia, Las roham las roham somba ma Debata Dapothon Jahowa na sun timbul i, Marhite AnakNa Tuhan Jesus i

 

♫ Tung so hasuhatan do basaNa i, Marhite AnakNa nilehonNa i. MudarNa durus  do  di  hau  silangi  i,  Rara  pe  dosanta  ias  dibaen  i Puji ma Debata ale manisia, Las roham las roham somba ma Debata Dapothon Jahowa na sun timbul i, Marhite AnakNa Tuhan Jesus i.

3. VOTUM – INTROITUS – TANGIANG

U  : Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na manompa langit dohot tano on. Amen.

Marolopolop tu Debata ma ho ale sandok tano on. Endehon hamu pujipujianNa. Dok hamu mandok Debata: Tung na songkal do angka pambahenanMu! O Debata Jahowa Amanami, Ho do partanobatoan dohot mual ni saluhut hagogoon. Lomo ma rohaM di hami, jala pasu-pasu ma inganan on, asa palas- palas na hupanangkok hami dibagasan tingki on, gabe manggora dohot patoguhon roha ni saluhut ni ruasMon asa lam hot marsihohot tu bagasan pandonganionMu.

R: Ale Tuhan Tangihon ma pangidoan name on.

U: Debata Jahowa Amanami, na sun marhabadiaon, ditanganMu do haluaon dohot hangoluon ni huria on. Ho do parmahan na denggan roha na patongon hami tu jampalan angka na lomak, jala na manogunogu hami tu aek hasonangan. Holan

tu ho do hami marhaporusan jala manghirim. Usehon ma pasu-pasuM tu saluhut ruas ni huriaM naung pasahathon silehonlehonna tu ulaon pembangunan on. Parbue ni haporseaonma I, asa dibagasan haserepon saluhut ruasMu marsiadu mangulahon angka na denggan.

R: Ale Tuhan, tangihon ma tangiang pangidoannami on.

L: Anggiat ma bangunan palas-palas ni bagas joro na pinajongjong di atas ni batu ojahan na pineakhon diarinaung salpu, hot dihansinghansing na, togu dirancang- rancangna. Ia ro pe udan potir, mangalantap pe tangkuju, jala pur pe habahaba manontong bagas on, ndang na marumpak. Amen.

4.   MARENDE BE NO. 720 : 1, 2 “NAENG MARSINONDANG”

♫ Naeng marsinondang ngolungku diigil Jesus i, Manang didia pe ahu tongtong huingot   i.   Tiur   marsinondang   i   do   niigil   ni   Jesus, Tongtong marsinondang panondang do au tutu.

♫ Ingkon hobas mangurupi, angka na gale i, Jala burju manghobasi songon Tuhanta i. Tiur marsinondang i do niigil ni Jesus, Tongtong marsinondang panondang do au tutu.

5. Manjaha Hata ni Debata

U   : Hata ni Debata di hita dibagasan tingki on, i ma na ni enet sian Pilippi 4 : 4 –

7. Songon on ma didok disi

R  : Marlas ni roha ma hamu tongtong di bagasan Tuhan i! Huulahi ma mandok: Marlas ni roha ma hamu!

U   :  Pabotohon hamu ma habasaronmuna tu saluhut halak! Donok do Tuhan i!

R : Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate!

U  : Jala dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus! I do sahatna, martua do angka na tumangihon hata ni Debata, jala na umpeopsa, Amen.

6. MARENDE BE. NO 116:1 "DITOMPA HO DO AHU"

♫ Ditompa Ho do au, sondangi rohangkon: Tung basabasami sude na di au on. Gomgomi pamatangku, naeng Ho do oloanku, sai lehon ma gogongku, lomom naeng ulaonku. Urupi, tatap ma au tutu, Panompa na burju.

7. TANGIANG PANGONDIANON

8. MARENDE BE. NO. 826 : 1 – 2 “GOHI AHU TUHAN”

♫ Gohi au Tuhan marhite HataMi; Gohi au Tuhan marhite HataMi, Songon hudon na rumar do au Tuhan di sumurMi; Gohi au Tuhan marhite HataMi.

♫ Gohi au Tuhan marhite HataMi; Gohi au Tuhan marhite HataMi Na mauas do tondingku O Tuhan di HataMi; Gohi au Tuhan marhite HataMi.

9. JAMITA

10.(Marende BE no. 121 :1-2 “Jesus Raja Ni Huria”)

Jesus, Raja ni huria Na porsea, na badia Pasupasu ma au on Sai sungguli ma rohangku Mangihuthon Ho Rajangku

Pargogoi ma au tongtong Pargogoi ma au tongtong Lehon Tondi Parbadia Saor tu roha ni huria Di sandok portibi on Asa tong sada rohana Nang marserak pe ruasna

Pasangaphon Ho tongtong Pasangaphon Ho tongtong

11.  PANANGKOKHON PALAS PALAS

Uluan Huria :          Dibagasan Haporseaon di Tuhan Jesus Kristus hu Pananagkok ma Palas palas ni Huriaon, Dibagasan Goar ni Debata Ama, Anak dohot Tondi Parbadia , Anggiat ma mian tongtong dison haporseaon na sintong, biar mida Jahowa dohot holong ni roha. Tau inganan laho manjou tu parmingguon dohot partangiangan nang angka ulaon ni Huria ma on , laho manjaou dohot mamuji goar ni Tuhanta Jesus Kristus, namangolu jala mangarajai rap dohot Ama i dohot Tondi porbadia saleleng ni leleng na  Amen .

( Uluan , Parhalado, Panitia, Ruas, Tukang  ) Panangkokhon ..............

Uluan Ni Huria “       Martangiang ma hita, Ale Debata Amanami na sumurung , na marhabangsa di banua ginjang nunga hupanangkok hami  Palas palas ni Gareja on, Alani sai pahot ma haporseoannami ganup tingki, ho tongtong hutiop hami, sai HataMi ma sulu sulu ni pat nami, jala hatiuron di dalan nami. Antong sai Nangkok ma ojahan ni haporseaon nami be di tingkion nang tu angka ari na ro

12. MARENDE BE. 754:1-3 "GOK LAS NI ROHA"        P.Pelean

♫ Gok las ni roha do au di ngolungkon. Di ngolungkon, di ngolungkon Gok las ni roha do au di ngolungkon. Tongtong di rohangkon

Mauliate gok las ni roha. Maringan holongMi Tuhan di au Mauliate gok las ni roha. Maringan holongMi Tuhan di au

♫ Mardame jala sonang do ngolungkon. Di rohangkon, di rohangkon Mardame jala sonang do ngolungkon. Tongtong di rohangkon Mauliate gok las ni roha. Maringan holongMi Tuhan di au

Mauliate gok las ni roha. Maringan holongMi Tuhan di au

♫ Gok do holong ni Jesus di ngolungkon. Di ngolungkon, di ngolungkon Gok do holong ni Jesus di ngolungkon. Tongtong di rohangkon

Mauliate gok las ni roha. Maringan holongMi Tuhan di au Mauliate gok las ni roha. Maringan holongMi Tuhan di au

13. TANGIANG PANUTUP

EV : 2 TIMOTEUS 4:1-5 TONGTONG RADE MAMARITAIION HATA NI DEBATA

 TOPIK : TONGTONG RADE MAMARITAIION HATA NI DEBATA

MINGGU, 06 OKTOBER 2024

EV : 2 TIMOTEUS 4:1-5

EP: 2 MUSA 4: 10-17

1. PATUJOLO

Buku 2 Timoteus 4:1-5 itna bagian na sinurat ni Apostel Paulus tu Timoteus, na jotjot dirajumi songon poda parpudi ni Paulus andorang so mate ibana. Surat on ima bagian ni surat parmahanion, sian surat on Paulus mangalehon petunjuk, poda , dohot sosososo tu Timoteus songon uluan ni huria. Surat on disurathon Paulus tingki dibagasan hurungan ibana di Rom paduahalihon, kemungkinan besar di taon 64-67 M . disadari Paulus do na so Jeleng be ibana mangolu ala nunga paimahon eksekusi sian harajaon Rom. Di tingki i, ragam do hamaolon na diadopi Timoteus, tarmasuk ma i angka poda haliluon. Alani do Timoteus ingkon mangadopi tantangan laho manjaga hapolinon ni poda hakristenon dohot manogunogu huria i dohot denggan di tongatonga ni hamaolon i. Alani do, diondolhon Paulus ringkot ni hahohoton mangadopi zaman na manulak hasintongan, songon i nang ringkot ni mamaritahon Hata i dibagasan habengeton, hasatiaon, dohot holong ni roha.

2. HATORANGAN NI TURPUK

1. Debata manguhum angka na mangolu dohot na mate.

Dipatuduhon ayat on do tu hita taringot tu panghirimon di ari parpudi, ari haroro ni Tuhan Jesus laho manguhumi angka na mangolu dohot na mate. Sai tahatindanghon do on ganup ari minggu di parmingguon i ma di Hata Haporseaon ponggol paduahon. Ingkon pertanggungjawabhonon ni jolma do na niulana di ari paruhuman. Jamitahon Hata i: di tingki na une dohot na so une. Songon dia do na nidokna manjamitahon Hatai di tingki na une dohot na so une? Molo tajaha do konteks ni turpuk on, ima mangajari Timoteus asa margogo ibana mangadopi ruas ni huria. Songon dia ma ibana marjamita tu angka ahli filsafat? Songon dia ma ibana manjamitahon Hata i tu angka na mora.manang tu na pogos? Songon dia ma ibana manjamitahon hata i tu angka na malas ni roha'dohot mangadopi hamaolon di ngoluna, tu angka na mabalu dohot angka na tarsosak di ngoluna? Sandok sitopoton jala sijamitahonon do hata i tu ruas ni huria, di ganup parhusoran ni tingki; nang pe di angka las ni roha, nang pe dibagasan habot ni roha. Ndang holan di tingki dapotan las ni roha tarjou marjamita. Ai hata ni Debata na jinamitahon ni angka parjamita marhagogoon situtu do i di ngolu ni angka na porsea (Pat. Ul. 20:32).

Marhite poda parjamitaon na pinasahat ni Apostel Paulus tu si Timoteus on, ditonahon asa impola ni jamita ndada kepuasan pendengar manang laho pageokgeok sipareon (tabo ni roha ni halak na umbegesa), alai songon dia ma asa diantusi, diboto jala diulahon halak Hata ni Debata. Asa unang adong na lilu dibahen poda na pageokgeok sipareon, Timoteus harus berpacu dengan waktu, i do umbahen disurathon “di tingki na une dohot na so une” (ay.2). Ajaran yang benar sedang berpacu dengan ajaran sesat, inilah yang sangat mendesak sehingga Timoteus harus gesit dan cekatan mencari kesempatan untuk memberitakan Injil.

2. Benget manaon haporsuhon.

Dipodahon turpuk on, tu hita ingkon benget manaon haporsuhon, ai dihorhon haporsuhoni do habengeton, hinorhon ni habengeton i do hatauon jala hinorhon ni hatauon i do panghirimon jala ndang murak hita binahen ni panghirimon 1 (Jaha Rom 5:3-5S). Habengeton mansai porlu di ngolu ni parjamita ala marragam do angka tantangan siadopan ni angka parjamita, mulat sian na direhei, diinsahi, dipahatahata sahat tu na ditulak tahe. Sandok di sude i, unang pola mandele hita disi, mauliate ma molo diloas Debata do pe hita marjamita jala gabe parhalado ni -huna. Mauliate ma molotung torop dope ruas ni huria na trade tumangthon hataNa; ro tu parsaoran ni huria, tu partangiangan dohot tu angka ulaon huria. Alai molo tung adong pe na manulak di angka jamita na tapasahat, hombar tu tona Jesus di Mateus 10:14 mandok: “Jadi anggo so dijangkon nasida hamu manang so olo tumangihon hatamuna, tadingkon hamu ma bagas dohot hutanasida, laos pirpirhon hamu ma dompak nasida nang orbuk na lohot di patmuna!”. Benget manaon haporsuhon, ala Kristsus do pamonang hita manaon na jat i. Tung godang pe hasusaan na masa, ndang gabe pangambati mangulahon ulaon tohonan na pnasahat ni Debata tu hita. Taingot ma ndang mulak boti hata ni Debata,alai porsea do hita mangula do hata ni Debata (Firman Bekerja) didiri ni angka na umbegesa jala patupaonna lomo ni roha ni Debata. (Jes 55:11).

3. PANIMPULI

Pangoloion di panjouon ni Debata ingkon tarida marhite hasatiaon mamaritahon HataNa (2 Tim 4-2-4). Taingot ma, hata ni Debata do na dibaritahon, ndang sian lomo ni roham sandiri. Marhuaso do Hata ni Debata papatarhon angka na sala dohot manuturi jolma asa mangolu dibagasan hasintongan (2 Tim. 4:2b). Tutu, saluhut na tarsurat di Bibel 1 sian panogu-noguon ni Debata do i jala marguna laho mangajarhon na sintong, maminsang dohot paturehon na sala, dohot mangajari jolma asa mangolu hombar tu lomo ni roha ni Debata. (2 Tim. 3:16). Tugas mamaritahon Barita na Uli i ndang na mura, ai di tingki parpudi godangan do jolma ndang olo manjalo poda na denggan, jala dihalomohon do Barita na papuashon hagiot ni pinggolna (2 Tim. 4:3). Dipaholang nasida do pinggolnasida sian hasintongan, jala dibungka do i tu angka turiturian (2 Tim. 4:4). Jala molo tung lam maol dijangkon hata i, ingkon tongtong do saluhut angka na porsea i marsihohot mamaritahon hata ni Debata dibagasan hasatiaon dohot benget ni roha. Amen.

Psalmen 124: 1-8 Pangurupion di hita di bagasan Goar ni Jahowa

 Minggu XVIII Dung Trinitatis, 29 Sept’ 24

Psalmen 124: 1-8

Pangurupion di hita di bagasan Goar ni Jahowa

1. Patujolo

Di ngolu ni angka na porsea tu Tuhan Jesus, ndang sai mura dalan siboluson na nidalanan di portibion. Sipata boluson do dalan na rahis na marnangkok tuat, sipata diloas do jongjong dipardalanan ngolu na mansai maol boluson, manaon sitaonon na dokdok situtu, marganti sorin do arsak dohot las ni roha. Di na so tagamon, boi do adopan hamaolon ni ngolu na so tolap adopan marhite hagogoon sandiri. I do umbahen mansai ringkot do ngolu na mar Tuhan. Songoni do pengalaman ngolu ni Parpsalmen di bagasan Psalmen 124 na manghilalahon jala manghatindanghon pangurupion pandonganion dohot pangaramotion ni Jahowa di ngoluna. Aut unang Jahowa mandongani bangso Israel di parsorion dohot di sitanonon na masa tu nasida, tontu na so jadi masa haluaon dohot parolopolopon tu bangso i songon turpuk jamita on.

2. Hatorangan ni Turpuk

Ende Hanangkok

Ende hananangkok (Psalmen 120-134) i ma ende ni bangso Israel na di pardalanan, mulak mandapothon Jerusalem manang nangkok tu huta Jerusalem. Bot berupa rombongan, boi berupa rombongan na metmet manang marsasahalak. Alai ende i, ende taringot tu hinabalga pambahenan ni Debata tu nasida di ariari naung salpu, . huhut panindangion, huhut pamujian di na mardalan nasida manopot huta i, sahat ro di huta i dihilala nasida sada panghilaan na imbaru tongtong, jala diingot nasida, disegarkan kembali pandonganion ni Debata di ngolu ni nasida. Sada sian i ma ende na sinurat ni parpesalmen on, i ma si David laho manaringoti, paingothon muse denggan basa ni Jahowa tu nasida di ariari naung salpu, jala huhut manghirim muse di ariari na naeng ro tongtong asi ni roha dohot pandonganion ni Debata mian di nasida. Dipangke bangso Israel do pengalaman ni si David on laho patuduhon jala pabotohon tu sandok bangso humaliang huaso dohot halongangan angka pambahenan ni Jahowa tu angka na sai paimaimahon pangurupion dohot haluaon na sian Jahowa Debata. Marolopolop do bangso i mulak sian tano habuangan nasida manopot huta bonapasogitna di Jerusalem. (Kemungkinan besar Mazmur 124 ini berasal dari periode sesudah pembuangan. Bahasanya memperlihatkan pengarhuh Bahasa Aram, secara khusus ayat 1, 3-6).

“Aut unang Jahowa mandongani hita”

“Aut unang Jahowa mandongani hita” sada pembukaan kalimat na mansai bagak laho patuduhon hAasil akhir, terlihat bahwa Tuhan itu berbuat sungguh baik dan hasilnya luar biasa, Mansai uli do rupani ala malua sian godang ni parungkilon. Alai molo so Debata hian dongannasida kemungkinan besar dang dapot nasida angka sisongoni. Jala dibagasan psalmen on dipastihon ibana do holan alani Jahowa do mandongani nasida boi gabe malua nasida sian godang ni angka hamaolon di pardalanan ngolu nasida. Aha do na niadopan ni Parpsalmen on? ndang apala tangkas nian dipaboa, alai na pasti adong musu, kemungkinan sian bangso na manaban nasida. Digombarhon do musu i marhite opat metafora:

• Ayat 2b-3, jolma na naeng mambondut: musuh sedang dalam keadaan marah yang menyala-nyala hendak menelan tanpa mengenal belas kasihan.

• Ayat 4 - 5, songon aek na mangauphon (bencana banjir): kehadiran musuh yang menimbulkan kesengsaraan (hanyut), berujung pada kematian.

• Ayat 6, songon panoro na marngingt: musuh yang siap mengunyah, mencabik- cabik dan menelan pemazmur dalam keadaan hidup-hidup.

• Ayat 7, songon sambil (jerat burung), di mana musuh selalu memasang perangkap atau jebakan.

Ala jorbut ni musu na niadopan na i, pola dua hali didok raja David: “aut unang Jahowa mandongani hita. (ayat 1, 2)”, ima paboa naung talpe do ngolu nasida tu hamagoan, jala ndang adong be jumpang nasida pangurupion dohot panghirimon asing sian Jahowa. Ndang margogo ibana maralohon musu i. Tuani do naung tangkas hian ditanda ibana Debata na mangondihon ngoluna nasailaon. Ido mangonjar ibana marpos ni roha na urupan ni Debata ibana tongtong. (pat. Rom 8, Apostel Paulus: molo Debata donganta ise ma alonta?). Asa molo didok: aut unang Jahowa mandongani, ima patuduhon parsitutuon’ manghaporseai (marsigantung) tu Debata, ai nunga hea dijalo ibana haluaon uju masa parungkilon. Jadi, Debata na paluahon ibana najolo, ido na paluahon ibana mangadopi musuna nuaeng dohot tu ari nanaeng ro dope.

Pangurupion di hita di bagasan goar ni Jahowa

Sahat do par Psalmen tu pamujion tu Tuhan i (ay.6) siala nunga tangkas dijalo ibana haluaon na binahen ni Jahowa. Puncak hamauliateon dohot pujipujian ni parPsalmen on lam tangkas ma didok di ayat 8 "ianggo pangurupion di hita di bagasan " goar ni Jahowa, sitompa langit dohot tano on." Hata on i ma panindangion, pangokuhonon ni ParPsalmen: dipatupa Jahowa do haluaon tu bangso Israel marhite pangaramotion dohot pandonganionNa mardongan gogo dohot huaso na so hatusdoan. Na so jadi be bangso i marhaposan jala mangido gogo sian harajaon na asing, songon na masa di tingki andorang so habuangan. Ndang boi hape gabe haposan angka jolma dohot harajaon di portibi on ala martingki jala marsuhatsuhat do gogo dohot huaso na ’ adong di portibi on,, holan Jahowa Debata do, Debata na so hasuhatan jala so hatudosan, saluhut sangkap dohot haluaon na pinatupaNa hombar tu lomo ni rohaNa.

3. Hahonaan ni Turpuk

Ndang adong hita na malua sian angka parsorion ngolu on na marragam angka parungkilon, angka boban, baik sian tonga-tonga mi keluarga, dohot parsoalan ekonomi dohot angka na asing. Alai ganup halak pasti marasing be cara mangadopi parungkilon, mangadopi boban di ngoluna. Adong do na mangalului dalan hagogoon ni portibi on sahat tu na mamake hagogoon haholomon, alai laos adong do halak na pasahaton parsorion ni ngoluna tu Debata. Ido na membedahon angka na porsea dohot na so porsea di Tuhan i. Marhite Psalmen bindu 124 on diajarhon do tu hita asa sude halak na porsea tu Jahowa mananda asi dohot holong ni rohaNa tu angka bangsoNa. Diajari do hita marhite Psalmen on manghatindanghon jala mangido pangurupion di hita di bagasan goar ni Jahowa sitompa langit dohot tano on. Holan alani pandonganion dohot pangaramotion ni Jahowa do umbahen na bo hita marhahipaso, boi hita mulaulaon, margogo jala sonang mandala ngolu on, jala dipapos rohanta ia Debatanta i berpihak do tu angka tangiang manang joujou ganup na manghaposi Ibana. Pengakuan Mazmur 124 ini diperkuat dengan kedatangan Yesus Kristus yang memihak kepada orang-orang yang terancam dan yang rendah. Sai dapotan gogo na imbaru ma ganup na manghaposi Jahowa Debata. Amen.

Ev: Psalmen 104: 1-3 + 13-24 Ep: Johannes 3:13-18

 

MINGGU XVII DUNG TRINITATIS, 22 September 2024

TOPIK: HABALGAON NI JAHOWA DIBAGASAN SUDE NA TINOMPANA

Ev: Psalmen 104: 1-3 + 13-24 Ep: Johannes 3:13-18

 

1.     Patujolo

Psalm 104 on hira turpuk na pinahembang sian naboi taida di 1 Musa 1:1-31 ima Panompaon ni portibion. Sude na digurithon di barita panompaon di 1 Musa i, mansai tangkas dipahembang marhite narasi naginurithonna mamungka sian: mula ni natiur i, tano, laut, suansuanan, mata ni ari, bulan, bintang, dengke, pidong, dorbia dohot hadirion ni jolma i na tinompa ni Debata na mangarajai sude na tinompaNa i. mansai uli jala denggan sude hatorangan i marhite panurathonon ni par Psalmen on, tau manungguli rohanta dohot tondinta asa sai tongtong mamuji muji huhut manghamauliatehon na tinompa ni Debata na gabe hangoluanta. Joujou parjolo sian turpuk jamita on pasahathon pujipujian tu Jahowa ai marpahean hasangapon dohot hamuliaon Ibana. Marmulia situtu do Jahowa ai hatiuron dialithon bana hira ulos jala pahembangkon angka langit songon rimberimbe. Tarida do habalgaonNa sian na binaheNa di portibi on jala tunduk do luhutna tu Ibana. jadijadianNa i do dipangke Jahowa patuduhon huasoNa.

2.     Hatorangan

Ditompa Debata nasa na adong di tano on jala tongtong diparmudu asa sai hombar tu sangkap hatuaonNa. Diparade Ibana do sude na ringkot di ngolu ni jolma alai ndada marhite na mangahut holan tu dirina hita disi. Dibahen Debata do pardalanan ni tikki dung sun aek na sumar siala dosa na lam rarat, nunga diuarihon Jahowa paboa na so mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin (1 Musa 8:22). Hot do padan i, alai ndang olo muba hahisapon ni jolma. Ndang mansadi jolma manegai hau dohot batang aek marhite na mangarasuni angka dengke. Mago hasabamon sian diri_ ni jolma gabe so diboto jolma tingki na lehet sadihari mandai na pinarade ni Jahowa. Nunga dilehon Jahowa ngka duhutduhut sipanganon ni pinahan nang ingkau rata bahen parulian ni jolma alai ndang marnasombu jolma i di angka naung pinarade ni Jahowa. Ndang adong na ringkot di ngolu ni jolma na so diparade Ibana. Ditubuhon tano do anggur asa adong palas roha ni jolma na gale i, asa marmiak bohina lobi sian na hona miak dohot roti na manungkol roha ni jolma na gale i. ndang adong be na hurang diparade Jahowa. Alai, ala mamungkushu do deba jolma i jala hapogan pasuksuk sinamot asa sumurung sian donganna gabe hurang ma na tau hangoluonta nuaeng. Ari panompaon, nunga diaturhon Jahowa dia siinganan ni jolma jala dia inganan ni angka pidong dohot ragam dorbia. Ndang diganggu jolmai mangalului hangoluanna di ladang. Masiingani tano hombar tun a niaturhonNa do luhut na tinompa i. alai, ala ndang singkop di roha ni jolma angka arta naung adong i, sai dilului huhut ditambai do nab oi pabalgahon dirina. Nunga lam godang naung mago angka na tinompa ni Debata siala soada inganan hangoluanna. Nda Jahowa do naung mangaturhon i sude? Uju borngin i do martubuan angka suansuanan i tingki ro ombun mamornohi tano unang mate siala ari na mamilgas di arianna. Songon i do nang angka Binatang, mandiori sipanganonna tingki borngin asa unang tubu biar di jolma i molo jumpang dohot angka Binatang na bolon di tonga ni hauma. Asa tung mansai uli situtu do diaturhon Jahowa partingkian sude na manggulmit di tano on. Hita pe sonang so hariboriboan ma mangula jala dapotan pandaraman sian tano na pinasahat ni Debata Jahowa. Dosa dohot pambahenan na mangalo patik ni Debata, na so sumarihon na tinompa ni Jahowa lam tu dangolna do parngoluan di tano on. Sian mulana pe ndada jolma na gabe pamusatan ni panompaon. Ndada holan tu jolma nasa na tinompa i diparade Jahowa. Alai godang do jolma na lupa di hadirionna. Diatur Debata do nang portibi on di siklus (parhusoran) ni angka partingkian, mambahen bulan panjujuran ni tingki (menjadikan bulan sebagai penentu musim) jala diboto mata ni ari do hasusundutna (matahari tahu saat terbenamnya). Diaturhon Debata nang partingkian bodari dohot manogot jala di parhusoran ni partingkian i ma nang angka binatang tumopot dalanna laho manjampal mangalului sipanganonna. Dipartingkian tiur dohot na 102 golap i (siang dan malam) laos disi do jolma tumopot dalanna laho mangalului na ringkot di ngoluna. Taida ma hinasingkop ni panarihonon ni Debata di angka na tinompaNa i ai tung tangkas do disarihon Debata nasida sudena. Nuaeng sahat ma par Psalmen i tu sada pengakuan/pernyataan na mandok: “Tung na lan situtu do angka jadijadianMu ale Jahowa! Saluhutna i dipauli Ho marhitehite hapistaran, tung gok jadijadianMu di tano on.” Songon i ma Debata di tongatonga ni angka na tinompaNa, gok hamuliaon jala mansai denggan saluhutna i ditompa Ibana na gabe las ni roha ni jolma di portibi on.

3.     Panimpuli

Godang jolma mambahen dirina balga, mangasahon gogona patimbul hamuliaonna hira umbalga ibana sian sitompa dirina. Nunga dilehon AnakNa na sasada i singkat ni hamateanta laho manobus nasa na tinompa. Panghophopon ni Jesus tu saluhut na tinompa dohot portibi on naeng paubahon dirinta marnida dirinta be. Siala i, ingkon tahangoluhon do panghophopon i marhite parange na pauliulihon na tinompa ni jahowa. Tapaulak ma haulion ni tano on songon naung niaturhon ni Jahowa mangihuthon harentaon ni partingkian jala pos ma rohanta, disarihon Ibana do ngolunta, Beha ma hita manoarahon tu portibi on di Minggu Ekologi asa boi lam terkendali kelangsungan ni alam/portibi na tinompa ni Tuhanta i? Molo tahaporseai Debata do sitompa nasa na adong, guru di Ibana do saluhutna portibi on dohot pangisina alai songon dia ma jolma na tinompaNa i tutu marsigantung tu asi ni roha ni Debata di pardalanan ni ngoluna so pola ingkon manegai lingkungan Alani “hamongkuson” ni jolma di ngolu parsatongkinan on? Didok hata ni Debata di Yohanes 10:10b “Alai anggo Ahu, asa adong hangoluan di nasida, pola marlobilobi dinasida umbahen na ro”, Amen.

Bahan Sermon Pangula N

Evangelium Minggu XVI Dung Trinitatis, 15 September 2024 Psalmen 116: 1 – 9 Topik: Ai Denggan Do Uhum Ni lahowa Tu Ho (Tuhan Telah Berbuat Baik Kepadamu)

Evangelium Minggu XVI Dung Trinit

atis, 15 September 2024

Psalmen 116: 1 – 9

Topik: Ai Denggan Do Uhum Ni lahowa Tu Ho

 (Tuhan Telah Berbuat Baik Kepadamu)

 

1. Patujolo

Psalmen bindu 116 marisihon angka panindangion hamauliateon ni parpsalmen tu lahowa sipalua Ibana. Nionjar ni roha mauliate do parsalmen mamolus denggan basa ni Jahowa di parngoluonna. Dipuji Parpsalmen do Jahowa, ala naung tangkas diparhatopot jala dihaporseai haluaon na sian Iahowa. Songon hataridaan ni hamauliateon ni rohana, parjolo do dipatuduhon sian holongna tu Jahowa (ay. 1), dung i hasatiaon saleleng mangolu (ay.2), marparange  diadopan ni Iahowa (9). Memang ndang apala tangkas dipatuduhon  rumang manang latarbelakang ni na masa niadopan ni parpsalmen di turpuk on, alai naung dipalua Jahowa do ibana sian hagogotan, pardangolan, to di rante ni hamatean. Godang ma tongon angka na masa naung mambahen ibana targogot (terancam). Alai na naeng dohononna, ia mara na niadopanna nunga tung manghalomohon hosana (ancaman nyawa). Alai disaluhutna i tangkas do pangurupion ni Jahowa napaluahon ibana, laos diparhatopot ma i na dipandohan "denggan do uhum ni Iahowa tu ho". Laos on do na gabe topik ni  minggunta mangondolhon panatapan tu uhum ni Debata naung  patongon angka na denggan, paluahon sian nasa pardangolan ro di rante ni hamatean.

2. Hatorangan

Ay 1-2: "Holong do rohangku di Iahowa, ala naung ditangihon joujoungki, parhurajaionku." Ayat on manaringoti sada parsitutuon komitmen na so mubauba maradophon lahowa. Tung diparhatopot parpsalmen do na tung dihalomohon ibana denggan basa ni Jahowa. lbana do Debata na sai rade manangihon marhite na paeleng pinggolNa tu tangiangna. Hata "paeleng pinggolNa" patuduhon haradeon, parsitutuon na bulus. Sian hata i digombarhon do, ia Debata padonokhon sipareonNa tu pamangan ni angka na joujou manang tu na martangiang. Boi do lam ampit antusan na paeleng pinggol mardongan na dipaunduk dagingna (gerekan tubuh yang akan membungkuk atau menunduk). On ma na dipatuduhon parpsalmen mangantusi songon dia Tuhan begitu peduli padanya. Jala di na mamolus partingkian na maol di nasa pardangolanna didok ma ”Holong do rohangku di Jahowa, jouonhu ma Ibana saleleng au mangolu." Saleleng mangolu na marlapatan saleleng dilehon Iahowa parngoluon ingkon holan tu Debata do ibana sai joujou. Di sude partingkian dohot dibagasan songon dia pe na masa holan tu Debata do Joujou.

Marhite naung diparhatopot do sude pambahenan ni Debata, tubu ma di roha ni parpsalmen mambahen komitmen bagabaga holong ni roha dohot hasatiaonna maradophon Debata. 1 do songon tanda las ni rohana naung dipalua Debata ibana jala naung dialusi Debata tangiangna. Di ayat 3 "Nunga dihaliangi rante ni hamatean... nunga mangonai di hagogotan ni banua toru ibana". Marhite i ma manaringoti hadirionna dohot suasana roha na targogot situtu ala pardangolan na mansai dokdok. Dipatuduhon do hadirionna songon halak na tarihot (terlilit) pola hapusohan so margogo. Roha na tahutan nunga mangaliliti ibana. Di kondisi i ma dirajumi na so boi di alo ibana manang paluahon dirina sandiri, jala musu pe sai menyerang sian segala arah. Di situasi na songon i ndang adong be dalan na asing so holan menyerah. Alai parpsalmen ndang menyerah tu keadaan alai menyerah tu Debata do na tuk mangurupi jala paluahonsa.

Di ayat 4: "dung i hupajoujou ma goar ni Jahowa: ale Iahowa sai palua ma tondingku." Tangkas do nang panghaporseaionna tu Debata ala ditanda ibana do Debata "Parasi roha do )ahowa jala na bonar, siramoti angka si unjur roha (orang sederhana), naung tarjepol jadi lbana mangurupi ahu.

(ay.5-6) Marhite i dipatuduhon do pangalaho i panghirimon tu Jahowa dibagasan naung tarjepol (naung gale situtu). i Parpsalmen pasahat dirina tu Jahowa mandok" Ale Jahowa sai palua ma i tondingku." Diparhatopot do na mansai dokdok pardangolanna naung i mandonok tu hamatean. Alai dipangido ma asa dipalua Jahowa ibana i marhite tangiangna. Taida tangiang i gabe parhitean na padomuhon parpsalmen dohot Debata. Marhite tangiang do dipaboa ibana sude na masa di pardangolan ni ngoluna. i i Ala dihaporseai do na Debata nampuna ibana ro di ngoluna jala na i menjamin haluaonna. Marhite on dipaingot do nang tu angka na porsea dipartingkian on, asa sude ma rohanta mandompakhon tu Debata, holan Debata na ingkon sipangasahonon. Songon parpsalmen na so mangasahon jolma manang na adong di ibana, rodi hagogoon na diportibi, ala terbatas do saluhutna i. I do asa uju na mangadopi pardangolan bolon ibana, boi malua ala pangurupion ni Debata i sambing do. Porsea do ibana parasi roha jala na bonar do Jahowa.". Ndang di loas ibana halak na asing mangarajai parngoluonna. Manongtong do ibana jongjong d ihatigoran mangasahon Debata. Jala tangkas do pos ni rohana di Debata marparbuehon haluaon. Tangkas do ro pangurupion ni Debata naung paluahon ibana sian nasa pardangolan rodi sian rante ni hamatean. Songon i ma parpsalmen manghilalahon haluaon sian nasa pardangolanna. Ayat 7-9 manaringoti hasonangan ni tondi (ketenangan jiwa) ni parpsalmen nunga malua tondina sian hamatean, sian mata na tariluilu, palua patna sian partuktuhan. Ala ni didok ma "mulak ma ho ale tondingku, tu paradiananmi, ai denggan do uhum ni Jahowa tu ho." Nunga diparhatopot panghilalaan na marhasonangan tondina. Tondi bagian parbagasan sian hajolmaon na tardok benteng pertahanan ni pamatang. Molo marsahit tondi (jiwa) mangonai do tu sude pamatang. Molo marsahit tondi ndang boi dikendalihon dirina dohot denggan. Alai molo nunga hipas tondi (jiwa yang tenang) tontu sude do parngoluonna manghilalahon na sonang (terkendali dengan baik).

Pola dijouhon parpsalmen on mandok "mulak ma ho ale tondingku, tu paradiananmi ai denggan do uhum ni Jahowa tu ho (ay.7)" Tangkas do diparhatopot asi ni roha ni Debata naung pasuangkon ngoluna sian i naung dirante ni hamatean. Dilehon Debata do ganjang ni umur. Ala ni i ma dibagasan las ni roha ala uhum ni Debata na pangoluhon ibana. Diparhatopot parpsalmen do tondina na sai tongtong diramoti Debata, i do asa boi ibana tongtong mandalani ngoluna mandok_ “sai marparange di jolo ni Jahowa ma ahu di luat ni halak angka na mangolu (ay. 9). Saleleng ngoluna ingkon pangkeonna ma i marparange na denggan na patut di jolo ni Debata nang maradophon dongan jolma.

3. Sipahusorhusoron

1. Boi do masa diparngoluon on angka pardangolan na so nidodo ni roha. Asa manongtong ma manghirim mangasahon Debata ai na denggan do uhumNa di angka na sai joujou tu Ibana.

2. Pardangolan na songon dia pe na taadopi ingkon patuduhononta do hita naung pinalua ni Debata marhite Tuhan Jesus Kristus. Denggan do uhum ni Jahowa naung paluahon jolma pardosa. Ai naung mago hian do hita jala hamatean do jambarta, alai nunga dipalua hita marhite panobuson ni Kristus. Dipalua sian hamatean jala dipatau tu hangoluan na salelenglelengna. Mangasahon asi ni roha ni Tuhan i ingkon i ma pilihan na dumenggan di hita. Diramoti Debata parasi jala na bonar i do angka na unjur marroha na marsihohohot tu Ibana.

3. Ingkon parhatopotonta do naung pinalua ni Debata hita sian ragam ni pardangolan manang sian ragam ni mara marhite na diudut dope hangoluanta. Asa taida ma partingkianta laho mangula na denggan tu dongan jolma nang manghobasi Tuhan i. Lam tamba ma pos ni roha jala barani ma mandalani ngolu on na sipata ingkon mangadopi hamaolon, tadalani ma rap dohot Tuhan i. Manongtong ma hita marholong roha tu Debata dibagasan hasatiaon nang marroha mauliate ala denggan ni uhumNa na pangoluhon hita. Amen.