Soripada Na Manghabiari JAHOWA

SORIPADA NA MANGHABIARI JAHOWA

1.  Tardok masuk na mora do hata Batak manggoari INA ala dihilala sangap do ina i songon siporsan na dokdok di keluarga i mamungka sian hasosorang ni jolma di bagasbortian sahat tu hatutubuna dohot ro di na magodang.

Ragam do panggoarina i:

a.   Ina. Sian hata i naeng patuduhononna do na ina i do bona ni jolma disagihon Debata.

b.  Pansondukbolon. Dihaporseai halak Batak do, ia ina i ima na maniop administrasi ni  keluarga i, mamungka sian parbodarian, sipatupaon dohot sipamasaon.

c.   Soripada. Tangkas do dipasangap halak Batak angka ina songon tuanlaen na buas jala na marpanarihon tu ari pangapudian.

2.  la soripada na manghabiari Jahowa do judul ni sihataanta on, porlu arbisonta lapatan ni hata soripada i.

*. Soripada, i ma samansam gulokgulok na sai rap dohot sariborbor. Taruan mangan taruan minum do dibahen sarimborbor

*.  Soripada, ima inanta boru tuanlaen bolon partintin na rumiriris, parjarungjung na lumobi. Rumar do tadatada, ndang marholit inantasoripada.

    Poda ni halak Batak, “Ndang tuk siulaon ia so tuk ninna inanta soripada, Raja do Ama ia diparaja Ina”.

3.  Soripada sian panatapan sejarah.

     Didok Tuan V.Borton, ima panurat ni sada buku na margoar “What happened in History” pemegang role na kreatif do angka ina lumobi mamungka sian partingkian transisi ni zaman Barbarisme dohot zaman Neolithic lumobi di angka luat di habisaran ni portibi on. Tarida creativitas-nasida i di pangharosonsothononna sumarihon ngolu ni keluargana. Ndang tiala roha ni angka ina soripada hatiha i mambahen abara dohot simajujungna gabe transportasi manghunti angka na ringkot di keluargana.

        Sian zaman transisi na songon i,taripar ma muse tu zaman ni Padan Na Robi sahat tu zaman ni Padan Na Imbaru. Godang do angka inasoripada di P.Na Robi na tarbarita di kepemimpinan isara ni si Debora di zaman ni angka panguhum si Isreal maralahon halak Kanaan. Tarbarita do nang si Miriam siala ni parmusihon dohot panortoronna ro di Ende taripar songon na pinataradahon ni buku Musa. Alai, ndang ringkot tabunihonon, simbalikkon ni angka na denggan i tarida do di soripada di P.Robi sai mura disonggopi sahit cemburu-iri-songon na ginombarhon ni soripada Sara maradophon si Hagar na tumubuhon si Ismael i ( I Musa 21 ).

        Tarsumansuman tusi do nang na masa di Padannaimbaru, alai lam tandi ma pangabahanna dung dipatorang Jesus peranan ni ina i.

1. Di jabu ni inasoripada natumubuhon si Johannes na margoar Markus do inganan partangiangan parjolo ni halak Krsiten songon na pinatorang ni Ul 1. 13-ff dohot bnd 12.12.
2. Ndang mardiaimbar baoa manang boruboru di poda ni Ap.Paulus songon na tarida di Gal 3.28
3. Dipatudos Ap.Paulus do parsaripeon na disi pangolin dohot oroan tu pardomuan ni Kristus dohot huria i ( Efs 5.22-33; I Tim 2.9-15 ).

4.  Sampulu (10) siingoton asa gabe Soripada na manghabiari Jahowa.

        Molo nidok dison sampulu (10), ndada bilangan na tartutup i, alai pinomat na sampulu i patut adong di angka ina soripada. Jala, ia tagoari i sada na ingkon masirainan do na sada tu nasadanari huhut boi sorminononta tu ngolunta sinuaeng on na mangadopi godang angka pangalambungi ni hamajuon na mutahkir on gabe mamboan mara tu keluarganta. Isara ni roha na so marnamahap di angka napinatudutuduhon ni globalisasi sinuaeng on dohot panghorhononna na boi mambahen konflik antara ni natoras dohot angka ianakhon.

Taadopi do nuaeng on marragam problema hidup ni keluarga, na muramura marbadai jala sahat tu na sirang (broken homes dohot divorses). Taadopi do ianakhon na so tarpinsang siala panggintali ni ganja-mariuana-morvine dohot ekstase sinuaeng on. Malo do ende gasgas manggondanggondangi roha ni angka ianakhonta i asa lupa manghaporseai Debata alai asa sai ro ijurna paidaida hinatabo ni melayang-fly sinuaeng on.

Ala ni i tauji ma jolo manggoari sadasada, na taenet sian Poda ni Raja Salomo bnd 31.10-31.

4.1.POS ROHA NI HARAJAANNA MIDA IBANA

    Digoari Raja Salomo do sada ina gabe soripada na marhuaso ia pos roha ni hamulianna mida ibana. Pos do roha ni si Abraham di si Sara ala diida si Abraham ina na turut do ibana na tangkas songon pangurupi di ibana. Ala ni marhuaso do hata ni si Sara di pasaut si Abraham, ( I Musa 16.2-3; 21.9 ). Pos do roha ni si Josep di si Maria agan pe sasintongna nunga sihailahononhon nian na masa tu si Maria oroanna i sian panatap hajolmaon, alai dung dipanghuling Surusuruan ni Debata si Josep tangkas ma diboto na bonar do si Maria i, gabe marhuaso do si Maria sahat ro na di pardalanan tu hasosorang dohot panabunihonna di posoposo nabaru sorang i (Mat 1.18-ff). Asa, ia adong habonaron/hatigoran di roha ni sada soripada, disi ibana marhuaso gabe ina soripada na gabe tuanlaeng na sumurung tangihonon ni keluargana di tonga ni bagasna.

    Molo tasorminhon huhut tasungkun i tu tingkinta nuaeng on, ra ndang apala otik be na so songon i inasoripada na sai manihai roha ni harajaanna di langkalangkana dohot di pambahenanna umbahen sai tubu parsalisihan di rumah tangga, jala ima dibereng angka ianakhon umbahen gabe masa ianakhon na so tarpaingot. Ai nda dohononna ma: Mama dohot Bapa pe songon i. Molo marhabiaran tu Jahowa do sada ina, tubu ma disi haporseaon jala mardalan dibagasan hatigoran ma ngoluna songon parbue ni haporseaonna i, ai “na mate haporseaon na so marpangulaon” (Jak 2.17). Jala ala ni parbue ni haporseaon i do na gabe paposhon roha ni harajaan  umbahenna.

4.2. PAMBAHENANNA PARAJAHON HARAJAANNA

    Didok Raja Salomo, denggan do uhum ni soripada na manghabiari Jahowa tu harajaanna ndang dung anggo na jat dipamasa tu sinondukna. Gariada gabe tarbarita do harajaanna di angka partungkoan, molo hundul harajaanna rap dohot sintua ni luat i (bnd 31.12,23). Ala adong biar mida Jahowa di sada soripada, sai dipingkiri rohana do boha asa marsangap sinondukna. Alai ia adong sada ina na so tumanda Jahowa, leas do rohana di tungganidolina. Sai mian do dibagasan rohana patimbo dirina jala ingkon ditoru ni angkalna amanta i. I do umbahen sai adong “ripe dibawah bendere”manang sipata didok DKI manang “keluarga bebek”. Panghorhononna na pasti parbadabada di tonga jabu na songon i. Jabu hasosogo do na songon i nang tu tetangga gabe so tampil tu parsahutaon. Sipata jala jumotjotjot tahe hira na holan diundukhon do di tingki pamasumasuon i molo disungkunsungkun Pandita i: “Olo do ho manghaholongi ibana sian nasa roham dohot marpangalaho na ture paboa halak Krsiten ho….? Dialusi do nian mandok na olo do ahu. Alai ala so marhabiaran tu Jahowa ibana, lupa do din a jinanjina i, ai marguru tu rohana do ibana. Ai sai dijolojoloani ina hata ni ama, pintor songon ditait do semangatna dihilala jala ndang raja be sada ama na songon i idaon ni donganna. Tama do ingotonta songon na pinodahon ni Ap.Paulus tu halak Efesus na mandok : Dioloi paromupuan ma baoana be songon pangoloina di Tuhan i,ai baoa i do ulu ni pardihutana, songon Kristus ulu ni huria i. “ Ala ni i masioloan ma sian biar ni roha mida Kristus. Efs 2.21-23. Tauji manorminhon i tu lompitlompit ni parsariponta asa tutu hita na soripada sihabiari Jahowa, jala panghorhononna dohot ma nang angka ianakhonta pe gabe sihabiari Debata.

 4.3. SIGOP MARHOBAS.

Anggo hata na pinangke ni Raja Salomo songon on do :”ringkot rohana manjalahi imput ni birubiru dohot hori jala girgir tanganna marhobas”.

    Ia dihatai pe disi imput manang imbulu ni birubiru dohot hori nanidokna ulaon na paradehon pahean do i. Asa soripada na manghabiari Jahowa sai radot do pasingkophon pahean ni keluargana jala mardongan ringkot ni roha do i diulahon ndada asal dipatupa. I do nanaeng ondolhononna muse molo didok “girgir do tanganna marhobas” na radot na hobas na ringgas do soripada na manghabiari Jahowa, ala ni i do umbahen tangkas pamodaion ni Ap.Paulus tu angka parompuan na nihobasan ni si Timoteus, ai “marlanggelangge do nasida, diringkoti na merbasembas tu bagas ni halak, alai tamba ni parlanggelanggeon i, na gabe sihapodea do nasida, angka na juit, sihatahon na so marguna “ I Tim 5.13”. Asa sipareahanta hasigopon marhobas, hapadoton mulaulaon, sihalaputanta mangalo nasa halosohon, ai dihorhon halosonhon i do boi tubu godang: gabus, gossip na so marnosan, latelate, panangkoon dohot hapogoson. Ala ni i do umbahen na mansai tangkas pamodaion ni Raja Salomo molo didok : “Laho ma ho ale sigurbakulu marsiajar tu porhis parateatehon ma angka dalanna asa marbisuk ho. Sai dipadiri do bohalna di partaonan logo ni ari, dipapungupungu do sipanganonna dihamamasa ni gotilon” Poda 6.6-9. dipatudosdo sigurbak ulu na so hobas, na so sigop marhobas i suman tu halak na mondokondok gabe didok : “sadia leleng on modommodom ho ale sigurbak ulu, sadihari pe ho hehe sian podomanmu? Otihanari modom, otihannari mondokondok, otihanari manginsimput tangan, laos peak modom, nimmu. Jadi ro ma hapogoson songon halak panamun, jala haraparonmu songon halak parlombulombu” ayat 9-11.

        Godang do sinjata ni halosohon i mambahen gabe sigurbak ulu hita asa gabe holan na merbaserbas hita. Tar ido ra tondi na hehe apala di zaman na canggih on. Naeng aloanta patik ni Tuhanta na mandok ingkon hir hodokta laho mangalului sipanganonta. Na masa nueng ima, asa unang hodohan, dipangke ma nasa hapistaran asa holan na goyang lutut, santai-santai saja. Di adong ni pangomoanna olo ma mangalului pembantu 5-7 halak, sipata dua pembantu mangurupi sahalak, ndang adong be siulaon ni inantasoripada, holan namanghoishois sisilonna ma ipe holan na patarehon tanganna do, ianggo na manghoishois tong do pembantu manang salon i. Lalap di senam nama deba, na deba pahortanghortang diri di topi pantai, lao tu CFC huhut patangitangi karaoke. Adong do na paidaida film na so marmusmus i di internet dohot angka naasing i. Na sala do angka i ? Ndang apala dohonon sala sude/mutlak, alai na mutlak ima: ndang songon i ngolu ni na manghabiari Jahowa, alai ingkon ngolu na sigop do marhobas, rade mulaulaon, diharonsothon ,mangalo halosohon. Ia naeng idaonta angka ianakhonta gabe ianakhon na ringgas, tapatuduhon tiruan tu nasida di haringason nang mulaulaon.   

4.4. MALO MANGATUR ULAON DI TONGA NI BAGASNA

Pandohan ni Raja Salomo tusi songon on do : “Borngin pe nunga hehe soripada i asa marsangihon sidabuan ni isi ni bagasna dohot tumurpukkon ulaon tu angka naposona boruboru. Dimatamatahon do harentaon ni isi ni jabuna, jala indahan halangguson ndang dipangan” ayat 15-27.

    Sada soripada na manghabiari Jahowa tangkas do i mambagi dohot mamangke tingkina. Ndang denggan holan marnida di lapik, ala tangkas diradoti jala di tatap tu nanaeng ro. Ala ni i gabe boi ma diatur  ulaon ditonga ni jabuna jala ndang masialoan rencana nasada tu nasadanari. Ndang sila parpeak ni nasada tu nasadanari. Olo do sipata ina manuhor situhoron na arga, alai dung dipeangkkon di tonga ni jabuna gabe so arga ala ndang tingkos parpeakna, ai so manta rohana mangatur, asal ma disi. Hape harentaon do ina ni haulion dohot mula ni hasasaut ni ulaon. Molo gurgar do ulaon dohot arta di sada jabu, nang roha pe sai gurgar ma horhonon ni i. Ndang apala na mandok dia iba, alai nidok ma: Apala di hita na ro sian hitaan, sai numalmal ma hurang ni harentaon on. Tupa do keramik nauli lante ni jabuna, alai margulu paneteknetehan ni manang aha ma i. Karosi na bagak i do nian disi, alai sipata nunga sitampiongung, angka ba arga i do angka perabot dapurna, alai gabe so suman ala tasiktasihon. Soripada na manghabiari Jahowa, naeng malo mangatur jala radot di harentaon.

    Ia naeng na renta muse angka ianakhonta di parsiajaran dohot di siulaonna, taajarhon ma harentaon tu nasida marhite tiruan na so pola marhata. Ia naeng malo muse angka ianakhonta i mangatur dohot mamangke tingkina, songon ni dok Ap.Paulus: “Parhaseang hamu ma tingki” Efs 5.16. Molo diboto angka ianakhonta i muse mamangke tingkina tung godang situtu do panghorhonna. Molo taatur tingkinta, ndang sai marjom karet be parmasuk ni  parminggunta manang partangianganta. Molo taratur hita, nang jabuntai pe atur ma idaon sian alaman dohot dibagasanna. Santabi, ndang sai songon nataida nuaeng di angka huria/garejanta, bolonbolon do alai ndang apala pintor sordit tu mata ia masuk hita tubagasan.

4.5. TAJOM DO PERENCANAANNA.

Ianggo ayat na hinonahon Raja Salomo tusi ima na mandok : “Disangkapi rohana hauma santurpuk, laos dapotsa do sian naniomo ni tanganna, dipungka muse porlak anggur sada”. Ayat 16.

    Mansai na ringkot do perencanaan. Ai Debata pe, jolo martahi do laho manompa jolma na parjolo i, ai didok:”Tole itatompa ma jolma, tumuri rupanta, tudos pangalahonta…( I Musa 1.26 ). Tangkas do panghataion ni Debata dohot Debata(Ibana), jala hombar tu perencanaan na tangkas dibahen i ma laho manompa jolma;

Tumuri rupana= bentukna

Tumuri pangalahona= sifatna

Asa dirajai = ulaonna

Laos songon ido perencanaan ni Debata na pinatorang ni Tuhan Jesus molo didok “ Ai songon on holong ni roha ni Debata di portibi on, pola do anakna na sadasada i dilehon… (Joh 3.16).

Rencana= Asa hangoluan na salelengna di ibana

Dalan pasauthon= dilehon Anakna na sasada i.

Kesimpulan= ima holong ni roha ni Debata di portibi on.

Tar songon i do sangkap ni parpoda i, ise soripada na manghabiari Jahowa i, naeng ma tajom perencanaanna. Parjolo ma dituhor hauma santurpuk, diula denggan, hasilna i ma muse dituhorhon gabe porlak anggur. Ndang pintor sitimbun dibahen laho mambuat sibuatona alai manjejer do songon tangga ni balatuk/step by step. Ina na bisuk di ranap do tu jolo jala dipingkiri do tangga ni pangulaonna, ndang asal dipatupa, alai jolo digombar do sahat tu parbue ni siulaonna. Laho patupahon rencana, porlu do kesabaran, ndada sihudus, ai molo humarojor mabola do hudonna. Ia zaman sinuaeng on, tardok do zaman na panghuduson. Mardalan pe jolma manang marmotor sai dihudus. Pangkat pe sai sihudus, dna. Marhuria pe nunga gabe songon i, dihudus na marminggui, dipajempek jamita, ende i pe dipakancang ma, tangiang ale amanami i pe dikaretaapihon ma. Ndang holan i, nang parhuriaon i pe naeng do dihudus, molo so sonang di huria A pintor hatop pinda tu huria B, jala molo sonang disi laho muse tu huria C. Nunga manongsa hasabaron ala dibondut sihudus.

Ala ni i, tama do patuaton ni inasoripada na manghabiari Jahowa bangko na songon i nang tu angka ianakhon asa lam denggan. Ndada pola sai ajarhonon teori ni i tu nasida, alai diparrohahon nasida do i, ai mata do guru roha do sisean.

4.6.PARASI ROHA MIDA JALMO NA DANGOL DOHOT NA POGOS

Tabo hian do hata ni ayat na patoranghon on dibahen Raja Salomo ai didok : “ Disurdukkon do tanganna tu halak na dangol, dibuha do tanganna mardennganbasa tu halak na pogos”

Halak na manurdukkon tangan pasti do adong gerakan, ndang manguselleng, alai mardalan do mangalului angka na dangol i. Adong do sikap mangalului ndang dipaimaima asa dapot na dangol i, ai Debata sandiri pe songon i do. Ndada sai hundul Debata di habangsaNa, alai dirumari do diriNa jala tuat Ibana tu portibi on laho mangalului hita jolma na dangol on. Toropna i angka na dangol humliang hita, boi do alani parsalisihan, boi do alani haotoon, dna. Inasoripada na manghabiari Jahowa ndang passif i, alai aktif do i mangulahon asi ni roha. Tanganna pe ndada sai dipuhung manghomolholom na adong di ibana, alai dibuha do tangan na i mangalehon tu angka na pogos. Hapogoson pe ndada sai ala ni hepeng manang arta, alai hapogoson do roha na girgir mandele, ateate muramura targitik, dna. Tung porlu ungkap tangan ni ina laho mangurupisa. Molo songon i gabe tabo ma parsaoran dohot dongan. Posi do hata ni Ap.Paulus tu halak na so olo manurdukkon tangan jala ia so olo mamuhasa, ai didok: “Alai na so sumarihon donganna, haputusan donganna sabagas, naung mansoadahon haporseaon do i; jumahat do i sian na so porsea” I Tim 5.8.

Ina soripada, sai las roha ni i mangurupi donganna, ala di hilala nang ibana pe na diurupi Debata do. Diharingkothon do partamueon ai sai rade Tuhanta manamue hita marhite dangingNa dohot mudarNa marhite parpadanan na badia dohot hataNa. Nang pe so apala dos, alai adong do pardomuan ni i dohot Kepedulian Sosial na tongon ditumbuh kembangkan nuaeng di tongatongan ni bangsonta. Kepedulian Sosial naung dirintis angka Missionari na jolo taumeumei sahat tu sadarion, patut ma tarida nian partisipasi ni angka inasoripada di HKBP, anggiat nang angka na dangol dohot na pogos lam mangurupi. Unang tapaula so taida angka gerakan gerakan na denggan na marsangkap mamorangi hapogoson i dohot mangurupi angka na dangol i.

Taingot ma na ni dok ni Ap. Paulus na mandok:“ Sipeop na godang ndang marlobilobi; jala sipeop na otik ndang hurangan “ 2 Kort 8.15, ingot ma ninna muse: “ Na manaburhon na otik, otik do gotilonna, jala na manaburhn managam pasupasu, mangalap pasupasu di na manggotil” 2 Kort 9.6.

4.7. PANTUN MARPAHEAN, TANGKAS MARPANGHIRIMON

Tullom do didok Raja Salomo songon on: Inasoripa na manghabiari Jahowa, togu jala togam do parulosonna jala marlas ni roha nasida di ari sogot (ayat 25).

Tangkas do diparrohahon raja i pargerbaserbas ni angka ina ujui na sipata malobihu, hurang tangkas marulos. Pinsangpinsang do ayat on tu angka ina na songon i, umbahen didok raja i, ianggo angka inasoripa na manghabiari Jahowa, ndang songon i, alai ingkon “TOGU JALA TONGAM DO I MARULOS”. Halak na leas marabit jotjot ala ni panaitnait ni hagiot ni sibuk do i ala so adong panatapann tu tingki na ro. Dietong olot ni i do na di hasiangan on, hape ndang diboto na maimaima do ari sogot i. Ala ni i didok Raja salomo, ina na manghabiari Jahowa, ina na togu jala tongam marabit, i do na tangkas marpanghirimon.

    Nian ruhutruhut parduru do angka parabiton on, alai ndang tartabunihon parbangasanna i, ai sai dipataridahon parduruna i do parbagasan. Ia i na dibagasan roha, matua i do hatahonon ni pamangan. Molo sai mangguiti do roha dibagasan roha dibagasan ala so adong panghirimon, matua gait jala juit do pataridahonon ni i nang di parduruna. Ala ni i do umbahen tangkas pamodaion ni Ap.Paulus na mandok : “Angka parompuan pe, songon i do: pantun marabit, marpahean hahormaton dohot toruk ni roha, unang ma marhitehite obuk na mardandan dohot sanggul mas dohot mutiha manang abit na arga “ I Tim 2.9.

    Ia taparrohahon tingkinta sinuaeng on, dipargumalusang ni pabrik textile ro di angka pakeanpakean luar negeri, sipata gabe marpanungkun roha, disi dope tagamon hatongamon marpahean i. Parrarat ni angka beauty saloon, sipata so hasiatan uju adong pesta, sipata so binoto be lomona manggorga angka ina i. Sala do i ? Ndatung  pintor dohonon sala, alai ndatung pintor hatop alusan nauli ma i. Aha do manggitik rohana patupa i? Ala na patangitangi panggitik ni portibi do i?  Molo i do antong, ba alusan ma nunga sala i. “ Naeng ma songon na tama di parompuan angka na marhatopothon hadaulaton marhitehite angka ulaon na denggan” ido didok Ap.Paulus I Tim 2.10.

4.8. RADOTI MAMODAI IANAKHONNA,GABE SIPUJION IANAKHON I.

Soripada na manghabiari Jahowa, diungkap do pamanganna umpodahon hapistaran, jala poda halambohon di atas dilana, naek sorga do angka anakna Poda 31.26,28. Adong do sada Professor na margaor E.de Greeff manurat di bukuna songon on : “ Naluri orangtua yang juga terdapat dalam alam binantang. Ia menyatakan adanya perobahan-perobahan mendadak dan mendalam pada tingkah laku induk kucing-kucing setelah anak-anak mereka dilahirkan di dunia : Yang lahir bukan hanya rasa kasih yang khusus dan kuat yang mengikat antara induk dan anak tetapi refleks menyerang induk terhadap anak-anaknya juga ditekan. Kucing akan tetap menyerang dan menangkap tikus, tetapi sikap demikian tak bisa dilakukan terhadap anaknya juga ditekan. Kucing akan tetap menyerang dan menangkap tikus, tetapi sikap demikian tak bisa dilakukan terhadap anaknya sendiri, bahkan lebih jauh lagi, untuk waktu yang lama, kucing tersebut membiarkan anaknya bermain-main menyerangnya dengan sungguh tanpa mendapat reaksi apa-apa dari induknya. Beberapa bulan kemudian, apabila anak kucing itu telah bisa berdiri sendiri, baru refleks-refleks menyerang dan mempertahankan diri mulai bekerja lagi, juga terhadap anak-anaknya”.

    Na tangkas tarida sian barita ni si Greeff i, pengabdian ni natoras tu angka ianakhonna. Gari huting (santabi) masa perobahan mendadak di bangkona molo maradophon anakna na baru tubu, sian na kejam gabe lambok, sian si penyerang gabe mampu diserang. Lam beha ma jolma? Inasoripada na manghabiari Jahowa, ima ina terjadi perobahan mendadak sian bangko haposoon, gabe marhatuaon gok dohot poda habisuhon pasahathon tu ianakhonna. Di soripada na songon i tontu songon i tontu mian ma habengeton tu ianakhonna, ai molo sabar ina ni huting i diserang-serang anakna i, songon i ma lambok ni inasoripada i manogunogu anakhonna jala anakkon i pe sai mangharingkothon pangurupion sian inanngna. Sijamothonon do naluri on jala porlu ditumbuh kembangkan asa sian kasih dan simpati gabe meningkat gabe panggilan dohot tanggungjawab.

    Ndang saotik nuaeng na gabe darah tingki on natoras ala pangalaho dohot parulaon ni ianakhonna. Lam tu bagasna do konflik antara orangtua dan anak di zaman na modern on. Sian angka ubat na mangubati i, sada do na mujarrab, ima tibu jala sopot dibonana hobas inasoripada i patuduhon naluri kasih dohot simpatik i tu ianakonna jala ditumbuh kembangkan i dohot poda habisuhon marhite cara halambohon. Alai ingkon manat do hita, ai kasih dohot simpatik na songon i do sai dilului sibolis i tangkoonna sian hita. Molo sanga mago i sian hita,holan leas nama na tinggal. Leas ma roha diianakonna i, di pasombu ma songon asal ma dilehon kebutuhan pardangingonna, lengkap jajanna dohot parabitonna. Molo sanga dibuat sibolis i naluri simpatik i sian sada ina, na tinggal “rohanama disi”. Manang na gabe beha dakdanakna i, ba rohana ma disi. Rumingkot sian i dope, ia so adong di sada ina habengeton, buaton ni sibolis i ma “halambohon” sian ina i. Holan muruk nama na tinggal, songaksongak, ujungna gabe anak na keras ma nang dakdanak i di parsaoran.

Beha do sibolis i manangko ugasan na arga natagoari i? Ragam do dalanna, jala ndang tahilala borat parrona i. Ai boi do marhite sihalashonon didok roha, hape na gabe siarsakkonon. Umpamana: Ala naung rap maju nuaeng baoa dohot boruboru, karejo amanta tu kantorna, karejo muse inanta tu kantorna. Tinggal ma ianakonna di jabu rap dohot pembantu manang tondong. Ala na rap karejo i, rap dapot hepeng ma. Inantai pe neang ma manghatai “ba dia rap mansari do hita”. Muramura ma tubu parsalisihan jala sai ditonton anakkonna. Marguru sian i ma anakonna i gabe dakdanak sipajujuon marbada di parsingkolaan, jala ia dung malo ibana disi marbada, dipungka ma muse marbada tu natorasna. Ndang tarbahen so muruk natoras, jala masisaritaan ma amanta dohot inanta mandok: holan ho do mambaheni, ujungna masa ma broken home. Asa, ingkon manat inasoripada asa unang gabe mago talenta na nilehon ni Tuhan i na mandok ina i do ina ni poda tu anakhonna unang ma tapaloas manang pangintali dia pe di caranta tu angka ianakkonta. Didok Ap.Paulus:…unang gintali hamu angka anakkonmuna; pagodanggodang hamu ma nasida dibagasan ajar na sian Tuhan i “ Efs 6.4”.

Sungkunsungkun na patut sialusonta do on:

1. Tangkas do pagodanggodang anakkonta i marhite ajar na sian hata ni Tuhanta ?
2. Mardongan halambohon do tabahen pagodanggodang nasida ?

Molo positif do alusta tu na dua sungkunsungkun i, pasti do gabe angka anakkon sipujion ma ianakkonta i di hagogodangna, jala ndang adong be las ni roha ni natuatua sian molo dibege dipuji halak pangalaho dohot pambahenan ni anakkonna.

4.9. JAMOT TU SIPAOTOOTO.

Marsurat na hapal do dibahen di Bibelta i mandok :

“Sipaotooto do anggo rupa hasoloan ni roha” ai sala do molo uli rupa ni sahalak? Ra, ndang adong na mandok ido. Sude do manghalomohon haulion ni rupana i mambahen gabe uli rohana. Nang pe uli rupa ni sada halak, alai roa jala marbarutu rohana, gabe roa do berengon rupana uli i. Umpamana : Uli do rupa ni sada ina, alai sai murhing bohina molo ro simatuana, gabe songon …do berengon rupa ni inanta nauli i. Sabalikna, ia tung hurang pe rupa ni sada ina, alai sai minar manjalo jala manghatai tu tondongna, dohonon ni na ro i do, ah tung naulirupa ma inanta i, ai sai minar do huida bohinasida i. Asa, dibagasan roha i do martabuni haulion ni rupa.

    Na masa nuaeng, ia adong hepengna, dipangido ma tu amantai asa laho operasi plastik, suda hepeng, gabe siberengon ni jolma, hape tong do roa anggo roa do rohana. Suda hepeng ni parhepeng laho penatarias beauty saloon, sai digorgai asa uli nian rupana hape gabe songo… do idaon ni halak saleleng so uli rohana. Antong, tutu do nanidok ni Raja Salomo i, sipaotooto do tutu rupa i. Unang ma olo hita dipaotooto rupanta.

4.10. MANGHABIARI JAHOWA.

Biar mida Jahowa do parmulaan ni parbinotoan…(poda 1.7), habiari ma Jahowa, jala paholang dirim sian hajahaton ayat 3. soripada na manghabiari Jahowa i do sipujion, ninna raja Salomo 31.30.

Boasa sipujion molo dihabiari sada ina Jahowa? Ai halak na manghabiari Jahowa na gabe dipaholang, dipadao sian Jahowa, alai dipaholang sian hajahaton do. Dung i dipajonok ma tu Debata, gabe dipadonok Debata ma tu ngoluna. “Pajonok hamu ma tu Debata, dung i pajonohonna ma tu hamu”, ninna Jak 4.8. Antong, na manghabiari Jahowa i ma na pajonok dirina tu Debata jala rade mangalo sibolis i sahat tu na maporus sibolis sian ibana, ido didok di Jak 4.7.

Na maotaot do sibolis nuaeng on songon babiat na marauang mangalului sibondutonna. Ragam do sorangan ni sibolis babiat na marauang i isara ni holsohon manangihon Hata ni Debata, pangalalapion ni roha, ginjang ni roha, roha na sai holsoan, roha na mandele, dna. Rade hita mangalo i, ido dalanna manghabiari Jahowa jala ido dalanna gabe digoari ina i soripada sipujion.-

Ds.PM.Sihombing ( Mantan Sekjend HKBP )

SORIPADA NA MANGHABIARI JAHOWA

1.  Tardok masuk na mora do hata Batak manggoari INA ala dihilala sangap do ina i songon siporsan na dokdok di keluarga i mamungka sian hasosorang ni jolma di bagasbortian sahat tu hatutubuna dohot ro di na magodang.

Ragam do panggoarina i:

a.   Ina. Sian hata i naeng patuduhononna do na ina i do bona ni jolma disagihon Debata.

b.  Pansondukbolon. Dihaporseai halak Batak do, ia ina i ima na maniop administrasi ni  keluarga i, mamungka sian parbodarian, sipatupaon dohot sipamasaon.

c.   Soripada. Tangkas do dipasangap halak Batak angka ina songon tuanlaen na buas jala na marpanarihon tu ari pangapudian.

2.  la soripada na manghabiari Jahowa do judul ni sihataanta on, porlu arbisonta lapatan ni hata soripada i.

*. Soripada, i ma samansam gulokgulok na sai rap dohot sariborbor. Taruan mangan taruan minum do dibahen sarimborbor

*.  Soripada, ima inanta boru tuanlaen bolon partintin na rumiriris, parjarungjung na lumobi. Rumar do tadatada, ndang marholit inantasoripada.

    Poda ni halak Batak, “Ndang tuk siulaon ia so tuk ninna inanta soripada, Raja do Ama ia diparaja Ina”.

3.  Soripada sian panatapan sejarah.

     Didok Tuan V.Borton, ima panurat ni sada buku na margoar “What happened in History” pemegang role na kreatif do angka ina lumobi mamungka sian partingkian transisi ni zaman Barbarisme dohot zaman Neolithic lumobi di angka luat di habisaran ni portibi on. Tarida creativitas-nasida i di pangharosonsothononna sumarihon ngolu ni keluargana. Ndang tiala roha ni angka ina soripada hatiha i mambahen abara dohot simajujungna gabe transportasi manghunti angka na ringkot di keluargana.

        Sian zaman transisi na songon i,taripar ma muse tu zaman ni Padan Na Robi sahat tu zaman ni Padan Na Imbaru. Godang do angka inasoripada di P.Na Robi na tarbarita di kepemimpinan isara ni si Debora di zaman ni angka panguhum si Isreal maralahon halak Kanaan. Tarbarita do nang si Miriam siala ni parmusihon dohot panortoronna ro di Ende taripar songon na pinataradahon ni buku Musa. Alai, ndang ringkot tabunihonon, simbalikkon ni angka na denggan i tarida do di soripada di P.Robi sai mura disonggopi sahit cemburu-iri-songon na ginombarhon ni soripada Sara maradophon si Hagar na tumubuhon si Ismael i ( I Musa 21 ).

        Tarsumansuman tusi do nang na masa di Padannaimbaru, alai lam tandi ma pangabahanna dung dipatorang Jesus peranan ni ina i.

1. Di jabu ni inasoripada natumubuhon si Johannes na margoar Markus do inganan partangiangan parjolo ni halak Krsiten songon na pinatorang ni Ul 1. 13-ff dohot bnd 12.12.
2. Ndang mardiaimbar baoa manang boruboru di poda ni Ap.Paulus songon na tarida di Gal 3.28
3. Dipatudos Ap.Paulus do parsaripeon na disi pangolin dohot oroan tu pardomuan ni Kristus dohot huria i ( Efs 5.22-33; I Tim 2.9-15 ).

4.  Sampulu (10) siingoton asa gabe Soripada na manghabiari Jahowa.

        Molo nidok dison sampulu (10), ndada bilangan na tartutup i, alai pinomat na sampulu i patut adong di angka ina soripada. Jala, ia tagoari i sada na ingkon masirainan do na sada tu nasadanari huhut boi sorminononta tu ngolunta sinuaeng on na mangadopi godang angka pangalambungi ni hamajuon na mutahkir on gabe mamboan mara tu keluarganta. Isara ni roha na so marnamahap di angka napinatudutuduhon ni globalisasi sinuaeng on dohot panghorhononna na boi mambahen konflik antara ni natoras dohot angka ianakhon.

Taadopi do nuaeng on marragam problema hidup ni keluarga, na muramura marbadai jala sahat tu na sirang (broken homes dohot divorses). Taadopi do ianakhon na so tarpinsang siala panggintali ni ganja-mariuana-morvine dohot ekstase sinuaeng on. Malo do ende gasgas manggondanggondangi roha ni angka ianakhonta i asa lupa manghaporseai Debata alai asa sai ro ijurna paidaida hinatabo ni melayang-fly sinuaeng on.

Ala ni i tauji ma jolo manggoari sadasada, na taenet sian Poda ni Raja Salomo bnd 31.10-31.

4.1.POS ROHA NI HARAJAANNA MIDA IBANA

    Digoari Raja Salomo do sada ina gabe soripada na marhuaso ia pos roha ni hamulianna mida ibana. Pos do roha ni si Abraham di si Sara ala diida si Abraham ina na turut do ibana na tangkas songon pangurupi di ibana. Ala ni marhuaso do hata ni si Sara di pasaut si Abraham, ( I Musa 16.2-3; 21.9 ). Pos do roha ni si Josep di si Maria agan pe sasintongna nunga sihailahononhon nian na masa tu si Maria oroanna i sian panatap hajolmaon, alai dung dipanghuling Surusuruan ni Debata si Josep tangkas ma diboto na bonar do si Maria i, gabe marhuaso do si Maria sahat ro na di pardalanan tu hasosorang dohot panabunihonna di posoposo nabaru sorang i (Mat 1.18-ff). Asa, ia adong habonaron/hatigoran di roha ni sada soripada, disi ibana marhuaso gabe ina soripada na gabe tuanlaeng na sumurung tangihonon ni keluargana di tonga ni bagasna.

    Molo tasorminhon huhut tasungkun i tu tingkinta nuaeng on, ra ndang apala otik be na so songon i inasoripada na sai manihai roha ni harajaanna di langkalangkana dohot di pambahenanna umbahen sai tubu parsalisihan di rumah tangga, jala ima dibereng angka ianakhon umbahen gabe masa ianakhon na so tarpaingot. Ai nda dohononna ma: Mama dohot Bapa pe songon i. Molo marhabiaran tu Jahowa do sada ina, tubu ma disi haporseaon jala mardalan dibagasan hatigoran ma ngoluna songon parbue ni haporseaonna i, ai “na mate haporseaon na so marpangulaon” (Jak 2.17). Jala ala ni parbue ni haporseaon i do na gabe paposhon roha ni harajaan  umbahenna.

4.2. PAMBAHENANNA PARAJAHON HARAJAANNA

    Didok Raja Salomo, denggan do uhum ni soripada na manghabiari Jahowa tu harajaanna ndang dung anggo na jat dipamasa tu sinondukna. Gariada gabe tarbarita do harajaanna di angka partungkoan, molo hundul harajaanna rap dohot sintua ni luat i (bnd 31.12,23). Ala adong biar mida Jahowa di sada soripada, sai dipingkiri rohana do boha asa marsangap sinondukna. Alai ia adong sada ina na so tumanda Jahowa, leas do rohana di tungganidolina. Sai mian do dibagasan rohana patimbo dirina jala ingkon ditoru ni angkalna amanta i. I do umbahen sai adong “ripe dibawah bendere”manang sipata didok DKI manang “keluarga bebek”. Panghorhononna na pasti parbadabada di tonga jabu na songon i. Jabu hasosogo do na songon i nang tu tetangga gabe so tampil tu parsahutaon. Sipata jala jumotjotjot tahe hira na holan diundukhon do di tingki pamasumasuon i molo disungkunsungkun Pandita i: “Olo do ho manghaholongi ibana sian nasa roham dohot marpangalaho na ture paboa halak Krsiten ho….? Dialusi do nian mandok na olo do ahu. Alai ala so marhabiaran tu Jahowa ibana, lupa do din a jinanjina i, ai marguru tu rohana do ibana. Ai sai dijolojoloani ina hata ni ama, pintor songon ditait do semangatna dihilala jala ndang raja be sada ama na songon i idaon ni donganna. Tama do ingotonta songon na pinodahon ni Ap.Paulus tu halak Efesus na mandok : Dioloi paromupuan ma baoana be songon pangoloina di Tuhan i,ai baoa i do ulu ni pardihutana, songon Kristus ulu ni huria i. “ Ala ni i masioloan ma sian biar ni roha mida Kristus. Efs 2.21-23. Tauji manorminhon i tu lompitlompit ni parsariponta asa tutu hita na soripada sihabiari Jahowa, jala panghorhononna dohot ma nang angka ianakhonta pe gabe sihabiari Debata.

 4.3. SIGOP MARHOBAS.

Anggo hata na pinangke ni Raja Salomo songon on do :”ringkot rohana manjalahi imput ni birubiru dohot hori jala girgir tanganna marhobas”.

    Ia dihatai pe disi imput manang imbulu ni birubiru dohot hori nanidokna ulaon na paradehon pahean do i. Asa soripada na manghabiari Jahowa sai radot do pasingkophon pahean ni keluargana jala mardongan ringkot ni roha do i diulahon ndada asal dipatupa. I do nanaeng ondolhononna muse molo didok “girgir do tanganna marhobas” na radot na hobas na ringgas do soripada na manghabiari Jahowa, ala ni i do umbahen tangkas pamodaion ni Ap.Paulus tu angka parompuan na nihobasan ni si Timoteus, ai “marlanggelangge do nasida, diringkoti na merbasembas tu bagas ni halak, alai tamba ni parlanggelanggeon i, na gabe sihapodea do nasida, angka na juit, sihatahon na so marguna “ I Tim 5.13”. Asa sipareahanta hasigopon marhobas, hapadoton mulaulaon, sihalaputanta mangalo nasa halosohon, ai dihorhon halosonhon i do boi tubu godang: gabus, gossip na so marnosan, latelate, panangkoon dohot hapogoson. Ala ni i do umbahen na mansai tangkas pamodaion ni Raja Salomo molo didok : “Laho ma ho ale sigurbakulu marsiajar tu porhis parateatehon ma angka dalanna asa marbisuk ho. Sai dipadiri do bohalna di partaonan logo ni ari, dipapungupungu do sipanganonna dihamamasa ni gotilon” Poda 6.6-9. dipatudosdo sigurbak ulu na so hobas, na so sigop marhobas i suman tu halak na mondokondok gabe didok : “sadia leleng on modommodom ho ale sigurbak ulu, sadihari pe ho hehe sian podomanmu? Otihanari modom, otihannari mondokondok, otihanari manginsimput tangan, laos peak modom, nimmu. Jadi ro ma hapogoson songon halak panamun, jala haraparonmu songon halak parlombulombu” ayat 9-11.

        Godang do sinjata ni halosohon i mambahen gabe sigurbak ulu hita asa gabe holan na merbaserbas hita. Tar ido ra tondi na hehe apala di zaman na canggih on. Naeng aloanta patik ni Tuhanta na mandok ingkon hir hodokta laho mangalului sipanganonta. Na masa nueng ima, asa unang hodohan, dipangke ma nasa hapistaran asa holan na goyang lutut, santai-santai saja. Di adong ni pangomoanna olo ma mangalului pembantu 5-7 halak, sipata dua pembantu mangurupi sahalak, ndang adong be siulaon ni inantasoripada, holan namanghoishois sisilonna ma ipe holan na patarehon tanganna do, ianggo na manghoishois tong do pembantu manang salon i. Lalap di senam nama deba, na deba pahortanghortang diri di topi pantai, lao tu CFC huhut patangitangi karaoke. Adong do na paidaida film na so marmusmus i di internet dohot angka naasing i. Na sala do angka i ? Ndang apala dohonon sala sude/mutlak, alai na mutlak ima: ndang songon i ngolu ni na manghabiari Jahowa, alai ingkon ngolu na sigop do marhobas, rade mulaulaon, diharonsothon ,mangalo halosohon. Ia naeng idaonta angka ianakhonta gabe ianakhon na ringgas, tapatuduhon tiruan tu nasida di haringason nang mulaulaon.   

4.4. MALO MANGATUR ULAON DI TONGA NI BAGASNA

Pandohan ni Raja Salomo tusi songon on do : “Borngin pe nunga hehe soripada i asa marsangihon sidabuan ni isi ni bagasna dohot tumurpukkon ulaon tu angka naposona boruboru. Dimatamatahon do harentaon ni isi ni jabuna, jala indahan halangguson ndang dipangan” ayat 15-27.

    Sada soripada na manghabiari Jahowa tangkas do i mambagi dohot mamangke tingkina. Ndang denggan holan marnida di lapik, ala tangkas diradoti jala di tatap tu nanaeng ro. Ala ni i gabe boi ma diatur  ulaon ditonga ni jabuna jala ndang masialoan rencana nasada tu nasadanari. Ndang sila parpeak ni nasada tu nasadanari. Olo do sipata ina manuhor situhoron na arga, alai dung dipeangkkon di tonga ni jabuna gabe so arga ala ndang tingkos parpeakna, ai so manta rohana mangatur, asal ma disi. Hape harentaon do ina ni haulion dohot mula ni hasasaut ni ulaon. Molo gurgar do ulaon dohot arta di sada jabu, nang roha pe sai gurgar ma horhonon ni i. Ndang apala na mandok dia iba, alai nidok ma: Apala di hita na ro sian hitaan, sai numalmal ma hurang ni harentaon on. Tupa do keramik nauli lante ni jabuna, alai margulu paneteknetehan ni manang aha ma i. Karosi na bagak i do nian disi, alai sipata nunga sitampiongung, angka ba arga i do angka perabot dapurna, alai gabe so suman ala tasiktasihon. Soripada na manghabiari Jahowa, naeng malo mangatur jala radot di harentaon.

    Ia naeng na renta muse angka ianakhonta di parsiajaran dohot di siulaonna, taajarhon ma harentaon tu nasida marhite tiruan na so pola marhata. Ia naeng malo muse angka ianakhonta i mangatur dohot mamangke tingkina, songon ni dok Ap.Paulus: “Parhaseang hamu ma tingki” Efs 5.16. Molo diboto angka ianakhonta i muse mamangke tingkina tung godang situtu do panghorhonna. Molo taatur tingkinta, ndang sai marjom karet be parmasuk ni  parminggunta manang partangianganta. Molo taratur hita, nang jabuntai pe atur ma idaon sian alaman dohot dibagasanna. Santabi, ndang sai songon nataida nuaeng di angka huria/garejanta, bolonbolon do alai ndang apala pintor sordit tu mata ia masuk hita tubagasan.

4.5. TAJOM DO PERENCANAANNA.

Ianggo ayat na hinonahon Raja Salomo tusi ima na mandok : “Disangkapi rohana hauma santurpuk, laos dapotsa do sian naniomo ni tanganna, dipungka muse porlak anggur sada”. Ayat 16.

    Mansai na ringkot do perencanaan. Ai Debata pe, jolo martahi do laho manompa jolma na parjolo i, ai didok:”Tole itatompa ma jolma, tumuri rupanta, tudos pangalahonta…( I Musa 1.26 ). Tangkas do panghataion ni Debata dohot Debata(Ibana), jala hombar tu perencanaan na tangkas dibahen i ma laho manompa jolma;

Tumuri rupana= bentukna

Tumuri pangalahona= sifatna

Asa dirajai = ulaonna

Laos songon ido perencanaan ni Debata na pinatorang ni Tuhan Jesus molo didok “ Ai songon on holong ni roha ni Debata di portibi on, pola do anakna na sadasada i dilehon… (Joh 3.16).

Rencana= Asa hangoluan na salelengna di ibana

Dalan pasauthon= dilehon Anakna na sasada i.

Kesimpulan= ima holong ni roha ni Debata di portibi on.

Tar songon i do sangkap ni parpoda i, ise soripada na manghabiari Jahowa i, naeng ma tajom perencanaanna. Parjolo ma dituhor hauma santurpuk, diula denggan, hasilna i ma muse dituhorhon gabe porlak anggur. Ndang pintor sitimbun dibahen laho mambuat sibuatona alai manjejer do songon tangga ni balatuk/step by step. Ina na bisuk di ranap do tu jolo jala dipingkiri do tangga ni pangulaonna, ndang asal dipatupa, alai jolo digombar do sahat tu parbue ni siulaonna. Laho patupahon rencana, porlu do kesabaran, ndada sihudus, ai molo humarojor mabola do hudonna. Ia zaman sinuaeng on, tardok do zaman na panghuduson. Mardalan pe jolma manang marmotor sai dihudus. Pangkat pe sai sihudus, dna. Marhuria pe nunga gabe songon i, dihudus na marminggui, dipajempek jamita, ende i pe dipakancang ma, tangiang ale amanami i pe dikaretaapihon ma. Ndang holan i, nang parhuriaon i pe naeng do dihudus, molo so sonang di huria A pintor hatop pinda tu huria B, jala molo sonang disi laho muse tu huria C. Nunga manongsa hasabaron ala dibondut sihudus.

Ala ni i, tama do patuaton ni inasoripada na manghabiari Jahowa bangko na songon i nang tu angka ianakhon asa lam denggan. Ndada pola sai ajarhonon teori ni i tu nasida, alai diparrohahon nasida do i, ai mata do guru roha do sisean.

4.6.PARASI ROHA MIDA JALMO NA DANGOL DOHOT NA POGOS

Tabo hian do hata ni ayat na patoranghon on dibahen Raja Salomo ai didok : “ Disurdukkon do tanganna tu halak na dangol, dibuha do tanganna mardennganbasa tu halak na pogos”

Halak na manurdukkon tangan pasti do adong gerakan, ndang manguselleng, alai mardalan do mangalului angka na dangol i. Adong do sikap mangalului ndang dipaimaima asa dapot na dangol i, ai Debata sandiri pe songon i do. Ndada sai hundul Debata di habangsaNa, alai dirumari do diriNa jala tuat Ibana tu portibi on laho mangalului hita jolma na dangol on. Toropna i angka na dangol humliang hita, boi do alani parsalisihan, boi do alani haotoon, dna. Inasoripada na manghabiari Jahowa ndang passif i, alai aktif do i mangulahon asi ni roha. Tanganna pe ndada sai dipuhung manghomolholom na adong di ibana, alai dibuha do tangan na i mangalehon tu angka na pogos. Hapogoson pe ndada sai ala ni hepeng manang arta, alai hapogoson do roha na girgir mandele, ateate muramura targitik, dna. Tung porlu ungkap tangan ni ina laho mangurupisa. Molo songon i gabe tabo ma parsaoran dohot dongan. Posi do hata ni Ap.Paulus tu halak na so olo manurdukkon tangan jala ia so olo mamuhasa, ai didok: “Alai na so sumarihon donganna, haputusan donganna sabagas, naung mansoadahon haporseaon do i; jumahat do i sian na so porsea” I Tim 5.8.

Ina soripada, sai las roha ni i mangurupi donganna, ala di hilala nang ibana pe na diurupi Debata do. Diharingkothon do partamueon ai sai rade Tuhanta manamue hita marhite dangingNa dohot mudarNa marhite parpadanan na badia dohot hataNa. Nang pe so apala dos, alai adong do pardomuan ni i dohot Kepedulian Sosial na tongon ditumbuh kembangkan nuaeng di tongatongan ni bangsonta. Kepedulian Sosial naung dirintis angka Missionari na jolo taumeumei sahat tu sadarion, patut ma tarida nian partisipasi ni angka inasoripada di HKBP, anggiat nang angka na dangol dohot na pogos lam mangurupi. Unang tapaula so taida angka gerakan gerakan na denggan na marsangkap mamorangi hapogoson i dohot mangurupi angka na dangol i.

Taingot ma na ni dok ni Ap. Paulus na mandok:“ Sipeop na godang ndang marlobilobi; jala sipeop na otik ndang hurangan “ 2 Kort 8.15, ingot ma ninna muse: “ Na manaburhon na otik, otik do gotilonna, jala na manaburhn managam pasupasu, mangalap pasupasu di na manggotil” 2 Kort 9.6.

4.7. PANTUN MARPAHEAN, TANGKAS MARPANGHIRIMON

Tullom do didok Raja Salomo songon on: Inasoripa na manghabiari Jahowa, togu jala togam do parulosonna jala marlas ni roha nasida di ari sogot (ayat 25).

Tangkas do diparrohahon raja i pargerbaserbas ni angka ina ujui na sipata malobihu, hurang tangkas marulos. Pinsangpinsang do ayat on tu angka ina na songon i, umbahen didok raja i, ianggo angka inasoripa na manghabiari Jahowa, ndang songon i, alai ingkon “TOGU JALA TONGAM DO I MARULOS”. Halak na leas marabit jotjot ala ni panaitnait ni hagiot ni sibuk do i ala so adong panatapann tu tingki na ro. Dietong olot ni i do na di hasiangan on, hape ndang diboto na maimaima do ari sogot i. Ala ni i didok Raja salomo, ina na manghabiari Jahowa, ina na togu jala tongam marabit, i do na tangkas marpanghirimon.

    Nian ruhutruhut parduru do angka parabiton on, alai ndang tartabunihon parbangasanna i, ai sai dipataridahon parduruna i do parbagasan. Ia i na dibagasan roha, matua i do hatahonon ni pamangan. Molo sai mangguiti do roha dibagasan roha dibagasan ala so adong panghirimon, matua gait jala juit do pataridahonon ni i nang di parduruna. Ala ni i do umbahen tangkas pamodaion ni Ap.Paulus na mandok : “Angka parompuan pe, songon i do: pantun marabit, marpahean hahormaton dohot toruk ni roha, unang ma marhitehite obuk na mardandan dohot sanggul mas dohot mutiha manang abit na arga “ I Tim 2.9.

    Ia taparrohahon tingkinta sinuaeng on, dipargumalusang ni pabrik textile ro di angka pakeanpakean luar negeri, sipata gabe marpanungkun roha, disi dope tagamon hatongamon marpahean i. Parrarat ni angka beauty saloon, sipata so hasiatan uju adong pesta, sipata so binoto be lomona manggorga angka ina i. Sala do i ? Ndatung  pintor dohonon sala, alai ndatung pintor hatop alusan nauli ma i. Aha do manggitik rohana patupa i? Ala na patangitangi panggitik ni portibi do i?  Molo i do antong, ba alusan ma nunga sala i. “ Naeng ma songon na tama di parompuan angka na marhatopothon hadaulaton marhitehite angka ulaon na denggan” ido didok Ap.Paulus I Tim 2.10.

4.8. RADOTI MAMODAI IANAKHONNA,GABE SIPUJION IANAKHON I.

Soripada na manghabiari Jahowa, diungkap do pamanganna umpodahon hapistaran, jala poda halambohon di atas dilana, naek sorga do angka anakna Poda 31.26,28. Adong do sada Professor na margaor E.de Greeff manurat di bukuna songon on : “ Naluri orangtua yang juga terdapat dalam alam binantang. Ia menyatakan adanya perobahan-perobahan mendadak dan mendalam pada tingkah laku induk kucing-kucing setelah anak-anak mereka dilahirkan di dunia : Yang lahir bukan hanya rasa kasih yang khusus dan kuat yang mengikat antara induk dan anak tetapi refleks menyerang induk terhadap anak-anaknya juga ditekan. Kucing akan tetap menyerang dan menangkap tikus, tetapi sikap demikian tak bisa dilakukan terhadap anaknya juga ditekan. Kucing akan tetap menyerang dan menangkap tikus, tetapi sikap demikian tak bisa dilakukan terhadap anaknya sendiri, bahkan lebih jauh lagi, untuk waktu yang lama, kucing tersebut membiarkan anaknya bermain-main menyerangnya dengan sungguh tanpa mendapat reaksi apa-apa dari induknya. Beberapa bulan kemudian, apabila anak kucing itu telah bisa berdiri sendiri, baru refleks-refleks menyerang dan mempertahankan diri mulai bekerja lagi, juga terhadap anak-anaknya”.

    Na tangkas tarida sian barita ni si Greeff i, pengabdian ni natoras tu angka ianakhonna. Gari huting (santabi) masa perobahan mendadak di bangkona molo maradophon anakna na baru tubu, sian na kejam gabe lambok, sian si penyerang gabe mampu diserang. Lam beha ma jolma? Inasoripada na manghabiari Jahowa, ima ina terjadi perobahan mendadak sian bangko haposoon, gabe marhatuaon gok dohot poda habisuhon pasahathon tu ianakhonna. Di soripada na songon i tontu songon i tontu mian ma habengeton tu ianakhonna, ai molo sabar ina ni huting i diserang-serang anakna i, songon i ma lambok ni inasoripada i manogunogu anakhonna jala anakkon i pe sai mangharingkothon pangurupion sian inanngna. Sijamothonon do naluri on jala porlu ditumbuh kembangkan asa sian kasih dan simpati gabe meningkat gabe panggilan dohot tanggungjawab.

    Ndang saotik nuaeng na gabe darah tingki on natoras ala pangalaho dohot parulaon ni ianakhonna. Lam tu bagasna do konflik antara orangtua dan anak di zaman na modern on. Sian angka ubat na mangubati i, sada do na mujarrab, ima tibu jala sopot dibonana hobas inasoripada i patuduhon naluri kasih dohot simpatik i tu ianakonna jala ditumbuh kembangkan i dohot poda habisuhon marhite cara halambohon. Alai ingkon manat do hita, ai kasih dohot simpatik na songon i do sai dilului sibolis i tangkoonna sian hita. Molo sanga mago i sian hita,holan leas nama na tinggal. Leas ma roha diianakonna i, di pasombu ma songon asal ma dilehon kebutuhan pardangingonna, lengkap jajanna dohot parabitonna. Molo sanga dibuat sibolis i naluri simpatik i sian sada ina, na tinggal “rohanama disi”. Manang na gabe beha dakdanakna i, ba rohana ma disi. Rumingkot sian i dope, ia so adong di sada ina habengeton, buaton ni sibolis i ma “halambohon” sian ina i. Holan muruk nama na tinggal, songaksongak, ujungna gabe anak na keras ma nang dakdanak i di parsaoran.

Beha do sibolis i manangko ugasan na arga natagoari i? Ragam do dalanna, jala ndang tahilala borat parrona i. Ai boi do marhite sihalashonon didok roha, hape na gabe siarsakkonon. Umpamana: Ala naung rap maju nuaeng baoa dohot boruboru, karejo amanta tu kantorna, karejo muse inanta tu kantorna. Tinggal ma ianakonna di jabu rap dohot pembantu manang tondong. Ala na rap karejo i, rap dapot hepeng ma. Inantai pe neang ma manghatai “ba dia rap mansari do hita”. Muramura ma tubu parsalisihan jala sai ditonton anakkonna. Marguru sian i ma anakonna i gabe dakdanak sipajujuon marbada di parsingkolaan, jala ia dung malo ibana disi marbada, dipungka ma muse marbada tu natorasna. Ndang tarbahen so muruk natoras, jala masisaritaan ma amanta dohot inanta mandok: holan ho do mambaheni, ujungna masa ma broken home. Asa, ingkon manat inasoripada asa unang gabe mago talenta na nilehon ni Tuhan i na mandok ina i do ina ni poda tu anakhonna unang ma tapaloas manang pangintali dia pe di caranta tu angka ianakkonta. Didok Ap.Paulus:…unang gintali hamu angka anakkonmuna; pagodanggodang hamu ma nasida dibagasan ajar na sian Tuhan i “ Efs 6.4”.

Sungkunsungkun na patut sialusonta do on:

1. Tangkas do pagodanggodang anakkonta i marhite ajar na sian hata ni Tuhanta ?
2. Mardongan halambohon do tabahen pagodanggodang nasida ?

Molo positif do alusta tu na dua sungkunsungkun i, pasti do gabe angka anakkon sipujion ma ianakkonta i di hagogodangna, jala ndang adong be las ni roha ni natuatua sian molo dibege dipuji halak pangalaho dohot pambahenan ni anakkonna.

4.9. JAMOT TU SIPAOTOOTO.

Marsurat na hapal do dibahen di Bibelta i mandok :

“Sipaotooto do anggo rupa hasoloan ni roha” ai sala do molo uli rupa ni sahalak? Ra, ndang adong na mandok ido. Sude do manghalomohon haulion ni rupana i mambahen gabe uli rohana. Nang pe uli rupa ni sada halak, alai roa jala marbarutu rohana, gabe roa do berengon rupana uli i. Umpamana : Uli do rupa ni sada ina, alai sai murhing bohina molo ro simatuana, gabe songon …do berengon rupa ni inanta nauli i. Sabalikna, ia tung hurang pe rupa ni sada ina, alai sai minar manjalo jala manghatai tu tondongna, dohonon ni na ro i do, ah tung naulirupa ma inanta i, ai sai minar do huida bohinasida i. Asa, dibagasan roha i do martabuni haulion ni rupa.

    Na masa nuaeng, ia adong hepengna, dipangido ma tu amantai asa laho operasi plastik, suda hepeng, gabe siberengon ni jolma, hape tong do roa anggo roa do rohana. Suda hepeng ni parhepeng laho penatarias beauty saloon, sai digorgai asa uli nian rupana hape gabe songo… do idaon ni halak saleleng so uli rohana. Antong, tutu do nanidok ni Raja Salomo i, sipaotooto do tutu rupa i. Unang ma olo hita dipaotooto rupanta.

4.10. MANGHABIARI JAHOWA.

Biar mida Jahowa do parmulaan ni parbinotoan…(poda 1.7), habiari ma Jahowa, jala paholang dirim sian hajahaton ayat 3. soripada na manghabiari Jahowa i do sipujion, ninna raja Salomo 31.30.

Boasa sipujion molo dihabiari sada ina Jahowa? Ai halak na manghabiari Jahowa na gabe dipaholang, dipadao sian Jahowa, alai dipaholang sian hajahaton do. Dung i dipajonok ma tu Debata, gabe dipadonok Debata ma tu ngoluna. “Pajonok hamu ma tu Debata, dung i pajonohonna ma tu hamu”, ninna Jak 4.8. Antong, na manghabiari Jahowa i ma na pajonok dirina tu Debata jala rade mangalo sibolis i sahat tu na maporus sibolis sian ibana, ido didok di Jak 4.7.

Na maotaot do sibolis nuaeng on songon babiat na marauang mangalului sibondutonna. Ragam do sorangan ni sibolis babiat na marauang i isara ni holsohon manangihon Hata ni Debata, pangalalapion ni roha, ginjang ni roha, roha na sai holsoan, roha na mandele, dna. Rade hita mangalo i, ido dalanna manghabiari Jahowa jala ido dalanna gabe digoari ina i soripada sipujion.-

Ds.PM.Sihombing ( Mantan Sekjend HKBP )

Ina dohot Ama di tonga ni bagas

Ina di sada Ruma Tangga

Ingkon Sipangarahutma nian angka inai disada Ruma Tangga namalo Marpangontik malo marhanalomhon na adong unang martangan pudi. Ingkon Hormat tu Harajaanna. Unang be sai di ingot di tingki haposoonna godang do angka ina ( Pardihuta ) ni halak Batak na sai mangingot uju di haposoonna  uju di bagas ni natuatuana  sipata gabe olo doi tarboan boan nang tu rumah tanggana. Molo nunga didok Marhamulian  ingkon toho ma muli ibana tu bagasan marga ni sinondukna. Keluarga ni sinonduk na nama ihuthononon na dang na mandok gabe lupa ibana tu natorasna. Torop tahe angka parompuan ni hita Batak na so mangantusi aha do lapatnni molo dung marhamulian . Jotjot do idaon angka ina ( Parumaen ) na so masiantusam dohot simatuana masiallangan rupani . Dang adong gunana di haholongi  parsonduk bolonna alai keluarga ni parsonduk bolonnai dang di argahon. Molo sian Keluarga ni parumaen na ro tung mansai las rohana  alai molo sian pihak ni suamina  pis rohana paula so di pardulihon. Ingkon anggapon ni sada ina ma simatuana songon natorasna  anggi ibotona. Torop nai dope sian parompuan ni halak hita na so mamparrohahoni gabe olo ma tubu angka parsalisian di rumah tangga. Isarana molo antar paradongan hian natorasna hape muli ibana tu halak napogos sai ima di pangasahon, ditingki dijabuni natorashu au mewah do au dang songonon ninna. Menurut pamerengan sapala unang muli ibana asa torus mewah di jolo ni na torasnai alai tahe molo balga anak pangolihononton  balga boru pahutaon nda ido? Ido falsafah ni hita Batak . Di era Komunikasi si saonnarion ndada na maol be hubungan komunikasi dohot natua tua nda patut ma nian antar teleponon ni sada parumaen simatuana? edana nang anggina. Molo songoni antong tabo ma na mar ruma tanggai masipalehonan . Nda Patut do nian ikkon humolo rohani sada parumaen tu keluarga ni hamulianna? jala sebalikna sada ama/ hela manghalongi keluarga ni pardijabuna? molo mardalan  sandiri sandiri do jumpa ma disi hamaolon.Disi do tabona angka na marrumatanggai dang masibuat dalanna be ndang ma si ingot keluargana be. alai saling masipaleonan . Molo masa pe angka hamaolon di rumah tangga sitongka do sahat sahat tu natoras . Manang pihak pihak na tertentu misalna mandok, tor boha haroa keluargam? angka itom songon dia nga hutanda ninna. Angka panghataion na posi mai namambahen ansit rohani kedua belah pihak manang bohape didok molo dihata keluarga niba hansit do roha. Olo ma ro hata ni suamina mandok " ianggo isteri boi sampulu bahenon alai anggo inongniba dang targanti i i? nda nga robe bada? hansit ma rohani pardihutana masa ma angka parsalisian . olo ma gabe sahat tu hata sirang nda hamamago nama i. Alani ingkon sarupa do bahenon hubungan timbal balik ni keluargai keluarga ni horong ama keluarga niba mai keluarga ni horong ina keluarga niba mai . Asa unang songon ni dok ni deba na mandok Parroha ina doi nang tu angka ama di tonga ni keluarga dipasangap ma angka hulahulana . Marhite ima boi denggan mardalan solu ni rumah tangga i