Guru Parmabuk

Guru Parmabuk

Adonia Sihotang

Marsiribur-ribu ma hita angke. Hira-hira taon 1980-an ma on, tingki singkola SMA di Barus. Adong do sahalak guru nami marga LG. Gogo situtu minum tuak. Di laponta on didok : SEPULUH GELAS TUAK, MASUK NERAKA, molo ibana SEPULUH GELAS TUAK, MATA MENYALA dope. Jala muse so pola dianturehon ibana natarsurat i. “Tu narokko pe taho, ai disi do godang kode tuak,” ninna ibana do molo dipasingot donganna. Boi ma dohonan amanta on tungkot ni lapo. Molo di kungfu China, sarupa tu “suhu” ma ra level ni ibana.

Sude do diboto amanta on lapo tuak di luat Barus. “Tuak ni Ama ni Jonggi Tarihoran na di Sihorbo an songon na ngali-ngali. Mual i do haroa ditahui disampur tu raru i,” olo do ninna amanta on tingki pas minum di lapo ni Ama ni Hendry Lumban Gaol di Pasar Baru on, di topi ni Aek Sirahar i. Jonok tu Pasar Tarandan an do i. Molo ro tuak sian paragat, sude do parlapo i manabunihon apala dua botol laho di ibana. Alana ris do ganup ari lapo on diedangi mulai haruar singkola di hos ni ari sahat tu tonga borngin. Sai marsepeda do amanta on mangadangi lapo i. Olo do sepedana on holan ditogu-togu, molo mirdong dihilala . Manang songon i di tinggalhon di topi dalan i, baru hami ma disuru mangalap. Adong do meja dohot karosi spesial di ibana di ganup lapo. Molo ro tu lapo i, ingkon disi do ibana hundul. Molo istilah saonari, tamu VIP ni ganup lapo ma amanta on.

Molo mangajari di parsingkolaan pe, jot-jot do mardongan mabuk. Marpilitan ma olo dipandok, kapur tulis do na soada, alai didok do pangapus. Sude do angka parsiajaran na nilehonna sai dikaithon tu lapo tuak. Molo tugas, manang PR saonari on, sai mambahen pembukuan ni lapo tuak do disuru (alana pelajaran tata buku do ditiop). Susa ma iba, ai so adong parkode tuak i mambaen pembukuan. Olo ma ala ni PR na so sidung i, gabe tarrimas ibana. Balobas na ganjang i ma olo dipangalotakhon tu ulu nami be.

Adong ma daba donganhu tingki i, goar na si Kalapas, marga Manalu, hutana di Janji Maria, jonok ni Huta Pananggahan on do i. Jot-jot do ahu dohot lae on tu lapo marnonang huhut marende-ende, alana sai rade do gitar disi. Sahalak naburju do ianggo lae on mardongan, jala malo muse nang marende. Sai parekkelon do dibahen. Alai adong saotik na hurang (antar maju saotik simanggugut i tujolo-santabi).

Di sada bodari, marende ma hami di Kode Tuak ni Ama ni Gomos Pasaribu di Sigambo-gambo on. Huendehon hami ma ende “Marudur do sude”. Molo so sala au Nainggolan Sister do mempopulerkan lagu on di tingki i. Hape naso panagaman, ro ma da amanta on tu lapo i. Habis minum tuak sian lapo ni Ama ni Juande Panjaitan di Kampung Mudik, martambul dengke aso-aso. Pintor sip ma hami marende on. Ai biar do roha mangida guru ni iba najalo, pajumpang di sada kode tuak muse. Soara pe namarende on gabe mellop-mellop saotik ma, jala bohi pe ni padao-dao ma manaili tu na asing, asa unang tarberengsa, ima dirohanami. Hape dibereng do daba.

“Boasa gabe sip hamu, torushon hamu marende i asa adong begeon”, ninna amanta on

“Daong bapak, naeng mulak nama hami, alana marsogot sikkola”, ninna hami mangalusi.

Sip-sip ibana, huhut laos gabe dipajonok tu hundulan nami i. Hape nasopanagaman daba, pintor di pastap amanta on ma hurum ni laenta si Kalapas on. Gogo hian, huhut didok, “boasa sai parengkelan mu au sian nangkin, ai dirimpu ho do na mabuk au?”. ninna ibana. Hape so adong mengkel laenta on, na songoni do nungnga keadaanna. Marpitor ma laenta on, marrara ma nang hurum i. Pola do hira-hira tolu ari marbosar.

Di sada tingki muse, dilaon-laon ni ari, pas hami di lapo ni Ama ni Juande Panjaitan, ro ma amanta on. Nungnga marrara bohi i, mangkatai pe so tangkas be batu ni hatana. Angka bahasa Inggris nama deba dipandongkoni. Angka jamita deba. Dung dibereng hami di lapo i, pintor dijonoki. Mabiar ma hami da, tarlumobi laetta si Kalapas. “Sotung dipaduahali muse mamastap ahu,” hira-hira songon i ma dibagasan rohana. Sai sip-sip ma ibana di suhi-suhi ni lapo i, mamurgut huhut ma ditutup pamanganna dohot tanganna. “Betak annon salah pengertian bapak on,” ninna rohana.

“Ho”, ninna amanta on manudu si Kalapas ondeng.

“Tuson jolo ho alias come here”, ninna amanta on muse.

Hira hungkam ma da bohi ni laenta on ala ni biarna. Manggirgir ma dohot ulutot na. Hosana pe nanget-nanget ma diombushon, mabiar taranggo uap tuak ni si sagalas naung didorguk na i. Alai dipatogar-togar ma badanna, Dipajonok tu amanta on.

“Tenju au, sagogom baen”, ninna amanta on.

Dang olo antong laenta on manenju da. Ba ise do halak olo manenju guruna. Sotung dipecat sian parsingkolaan. Sai sip ma laenta on jala unduk.

Alai sai dipaksa amanta on ma asa ingkon tenjuonna ninna ibana. Dang tarjuasa, gabe ditenju laenta on ma butuha ni amanta on sagogona. Marsogot na pittor dilehon do punten 9 di di ibana daba. Alasanna diboto hamu do? “Keributan adalah salah satu parameter yang harus dimasukkan pada kolom keterangan dalam Buku Harian dan Rekening Koran Kode Tuak”.

Molo hea hamuna tu Barus, gareja HKBP pas ma di topi ni parbalan i. Jonok tu benteng ni Bolanda najolo. Parsingkolaan SMA Negeri Barus pe jonok do tu si. Balga do antong gareja on. Jabu ni amanta pandita hira-hira 100 meter ma sian gareja i dompak Pasar Batu Gerigis on. Jabu nia manta padinta on balga, timbo tombarana, jala lambas emperna. Model ni jabu na jolo ma.

Disada bodari hira-hira pungkul 9 borngin, pas mabuk amanta guru on, laho ma ibana tu jabu ni pandita on. Ai jotjot do songoni, molo nungnga mabuk jabu ni halak pe gabe dianggap do jabuna.

Dipasingot amanta pandita on ma haroa asa unang holan na mabuk ulaonna ganup ari. Sai dialo do antong hata sipasingot i. Gabe umbalga do soarana sian soara ni amanta pandita on. Ujung na gabe burbar ma sude.

“Ai so adong do diargai ho au amang pandita, ro au tu jabum las sagalas tuak pe so adong dilehon ho. Alai sai dimuruk-muruki ho au. Hepengku do manuhor i,” ninna amanta guru on ma muse.

“Tu balianan ma ho lao, begu laut i pe so olo mandongani ho. So maila do ho”, ninna amanta pandita on mangalusi, ala ni rimas na.

“Timbo singkolam panditanami, au pe timbo do singkolangku. Nang pe untimbo ho marsingkola, holan marmahan do diula ho (lapatanna : penggembala umat), hape ia ahu holan sarjana muda do alai boi do gabe guru ni SMA. Ahu do napatut mangajari ho”, ninna gurua on muse. Boha ma hata ni na mabuk, rarat ma songon api di ri, ai so diboto be manang ise angkup na mangkatai.

Muruk situtu ma antong amata pandita on. Balga-balga ma tong nang soarana. Dipabali ma guru on sian jabu i. “Kaluar ho begu,” ninna. Alai dang olo amanta guru on mijur. Gabe dipahundul do teang di balatuk ni jabu i, huhut sai didatdati marbete-bete. Ujung na didok amanta pandita on ma songonon:

“Ai ho, sai dilaosi ho do angka hata ni Tuhan nahujamitahon i. Unang mabuk ningku, sai mabuk do ho. So diboto ho, ai targantung tu au do molo naeng masuk tu surgo i ho. Au do maniop karcismu tu surgo i,” ninna amanta pandita on. “Ala so tardok be poda dohot hata nadenggan tu ho, saonari huribak ma karcis mon, dang na degeionmu be surgoi”, ninna amanta pandita on manguduti muse. Dibuat ma harotas sian sangku ni bajuna, laos di ribak-ribak, digete-gete hian, jala diambolonghon. Marserakan ma di alaman ni jabu i.

Hape diboto hamu do. Ai karcis ni motor tu Sibolga do na digete-gete nai, laho pangkeonna hian marsogot nai……….. (Ai sama-sama mabuk do hape nasida).Disadur dari : Tano Batak