JAMITA MINGGU TRINITATIS, 31 Mei 2015 Jesaya 6 : 1 – 8

 

 

JAMITA MINGGU TRINITATIS, 31 Mei  2015 Jesaya 6 : 1 – 8

  Oleh :Pdt SRP Aritonang S.Si

Patujolo :

Masa do angka halumlamon di tongatonga ni bangso Israel tarlumobi ma di ngolu haporseaon uju di ngolu ni Panurirang Jesaya hatiha i. Di situasi na masa songoni, disuriranghon si Jesaya do taringot tu HABADIAON NI DEBATA, tu angka bangso Israel nang panggomgomina pe.  Adong tolu rumang ni na disoroti ni Panurirang Jesaya di parngoluon ni bangso i, :

Na parjolo ; taringot tu ngolu parugamaon na ingkon satia holan tu Debata Jahowa sambing. Na paduahon ; taringot tu ngolu sekuler na marhadomuan tu ngolu sosial dohot ekonomi naeng ma ingkon marojahan tu dalan hatigoran ni Debata. Na patoluhon ; taringot tu ngolu politik naeng ma nian manghajongjonghon paboa Debata Jahowa do Raja ni sude angka raja na di portibi on. Na tolu bidang parngoluon na ginoaran di ginjang nunga dilanggar jala dilecehkan angka panggomgomi hatiha i. Asa ido umbahen disoarahon si Jesaya asa ganup ma mangaradoti habadiaon ni JAHOWA.

Hatorangan :

Turpuk on ima panjouon ni Debata tu si Jesaya gabe sada Panurirang. Nalnal do dipapatar Debata HabadiaonNa dibagasan panjouonNa i.

Ayat 1 :

Di tingki taon panjouon ni Jesaya gabe panurirang, marujung ngolu do raja Usia. Pandohan di ayat 1 on na mandok ; “Hundul Tuhan i diatas ni habangsa na marmulia”, naeng mangondolhon ia sude huaso ni jolma di portibi on ingkon marhaunduhon do i diadopan ni Debata. Debata do na mangatasi angka panguaso na di portibi on.

Ayat 2 :

Sada gombaran taringot tu hajongjongan ni angka surusuruan seraphim dison naeng papatarhon habadiaon ni Debata do, jala naeng pabotohon na so adong talup jala Manahan jongjong di adopan ni Debata, holan sada do na boi tarpatupa ima marsomba dohot mamuji habadiaon ni Debata.

Ayat 3 :

Ayat on ima sada panindangion dohot pujian ni angka seraphim siala habadiaonNa, hamuliaonNa nang hausoNa pe. Tama do Ibana sipujion, ala ndada holan tu bangso Israel marsinondang habadiaon dohot hamuliaonNa i, alai tung saluhut liat ni portibi on do.

Ayat 4 – 5 :

Didok dison “ Humuntal ma angka ojahan “ , na marlapatan do i songon sada boaboa taringot tu haroro ni Debata di panjouon ni si Jesaya asa gabe sada panurirang. Angka hitir do dihilala si Jesaya anggo dimulana taringot tu panjouonNa i. Ai dirajumi ibana do paboa jolma na gale jala parbibir na ramun do anggo ibana. Boi dohonon mian do roha biar di si Jesaya laho manurirangi di tonga tonga ni bangso i siala nunga tung mansai lumlam dihilala ibana parngoluon ni bangso i hatiha i.

Ayat 6 – 7 :

Na binahen ni angka surusuruan di ayat 6 – 7, na mambuat gara jala na manjama pamangan ni si Jesaya, laho patubuhon keberanian do i di si Jesaya, asa tung tarjalo ibana hapanurirangon i. Asa tangkas diboto si Jesaya paboa Jahowa do na marsuru ibana. Alani, na so pasombuon ni Jahowa ibana di na manurirangi bangso i, jala na ingkon Debata do na mangalehon hagoon tu ibana laho manghatahon jala manghatindanghon habadiaon ni Jahowa.

Ayat 8 :

Dung tangkas dipatupa angka surusuruan i tu si Jesaya songon patubu keberanian di ibana songon na tarsurat di ayat 6 – 7 na diginjang, tarbege ibana ma soara ni Tuhan i na manjouhon asa ise do suruonNa gabe sada panurirang di tonga tonga ni bangso i, manigor hatop do dialusi si Jesaya marhite hata : “ dison do ahu, suru ma ahu “. Boi taida dison, nunga tubu be habaranion i di si Jesaya laho dipabangkit gabe sada panurirangNa. Ala pos ni rohana tu Debata, olo ibana tarjou manghatindanghon habadiaon ni Debata di tonga tonga ni bangso Israel.

Panimpuli :

-          Na mangolu do hita nuaeng ditonga tonga ni partingkian dohot situasi na so pola dao marasing sian situasi na masa di bangso Israel hatiha di turpuk on di ngolu ni panurirang Jesaya. Halumlamon na masa nuaeng ndada holan masa di ngolu ni haportibion alai ngolu di parhuriaon pe nunga be mulai disosopi.

-          Ndada holan si Jesaya dison na tarjou mamaritahon habadiaon ni JAHOWA, alai tarjou do nang hita songon halak na porsea dohot HuriaNa laho marnida jala manghatindanghon hamuliaon dohot habadiaon ni Tuhanta.

-          Minggu Trinitatis na mansoarahon hasitolusadaon ni Debata Ama, Anak dohot Tondi Parbadia, manjou ganup hita asa jumpang pangokuon, panolsolion, dohot hamubaon ni roha laho papatarhon habadiaon ni Debata Ama dibagasan pangoloion di Tuhan Jesus Kristus  marhite pamintorion dohot gogo na ro sian Tondi Parbadia.

-          Taradoti ma panjouon di ngolu habadiaon i, di angka parsaoranta, keluarga, huta, dohot angka ulaonta na marragam i. Amen.

Sermon Jamita tu Ari Parningotan Hananaek ni Tuhan Jesus 14 Mei 2015

Mateus 28:16-20. Hananaek

Oleh : Pdt Rudi Simaremare

Sermon Evanggelium tu Hananaek, Kamis 14-05-2015

Topik: DongananHu do rasirasa ro ajal ni hasiangan on.

     Evanggelium : Mateus 28:16-20

Patujolo

Somalna diportibion, molo naeng borhat sada uluan, natoras, manang dongan sandiri pe i; sai martona do tu na tinadinghonna i, tung pe parborhatna i parsatongkinan. Lumobi ma molo parborhat na i mangharingkothon partingkian na lumeleng, tontu ondol situtu do nasa tona tadinghononna siulahononni angka na tading i. Alani, di angka na manjalo tona i ringkot situtu umboto rumang ni tona i jala mangulahonsa. Dos tu si ma situasi na niadopanni angka sisean, manaek Tuhan Jesus tu Banua Ginjang dilehon tona sibotoon jala siulahonna. Alai, marhite Debata na immanuel, na maha hadir, ingkon tangkas do botoonta, ndada na hea ditadinghon Debata angka sisean, nang portibion, lumobi angka na porsea sahat ro ditingkion; holan rumang ni kehadiranNi Debata mangebati, manise angka na porsea na diportibion nunga marhite ragam cara. Dibagasan Tondi do ibana jotjotan ro manise angka na porsea i.

Domu tu tona nang hata partadingan, ganup na porsea ingkon tangkas do umboto, ia ulaon na mardila sisean manang na gabe sisean, ndada holan tu si sampulusada halak sisean i. Tusude naporsea do dilehon turgas i (kewajiban), pinomat parnampuna di dila sisean, pangalahon sisean; ai sude do na porsea marhatopothon Tuhan Jesus i guru dingoluna, alani tangihon jala ulahon na pinangidona, boha ma carana, on ma ingkon tangkas tarida diturpuk on.

Rasrasan na jompok diturpuk:

Ayat 16-17. Siean na tingkos, tangkas mamboto inganan dohot sumber ni parsiajaran na tama. Jala ingkon marulakulak manjalo pola sahat tu mandiori bona ni parsiajaran i asa lam tu torasna. Di Tuhan Jesus do dapot inganan parsiajaran sisongon i, ala immanuel do ibada, jala Tondi i do Ibana na boi mangajari jala pajumpang dohot hita diganup situasi ni ngolunta. Na ringkot sian angka sisean haradeon na olo marsiajar, benget diparbinotoan na sai marroan i, jala dipadao diri na sian roha biar dohot hagangguon, lumobi ma halosokon. I do sisean na dihalomohon Tuhan i.

Ayat 18-20. kehadiranNi Jesus do mambaen taantusi nasa na sian hasintongan, nasa na sian HarajaonNa na adong di portibion lumobi ma na sian Banua Ginjang. Ringkot tangkas botoonta, dipangke Debata do portibion gabe inganan keberlangsungan hasasautni harajaon Banua Ginjang, tung pe godang haramunon, hagaleon na jumpang do pe diportibion. Alai, diangka na olo gabe siseanNa, mardila sisean tarbaen saut do harajaon Banua Ginjang i tung pe diportibion dope hita boi do daion jala hilalaonta i. Naringkot sijaloonNi Tuhan i sian hita, haoloonta marguru tu Ibana, haoloonta diparsuruonNa, jala hatangkasonta/kemampuan marningot na pinodahonNa. Hibul ni rohanta dipangoloion laos saurdot do dipandonganionNa pola sahat tu na ro ajal ni hasiangan on.

Impola ni turpuk:

1.    Namarhatutuhon dirina siseanNi Debata, na pinangke Ni Debata, ingkon las ma rohana, ala parnampuna ibana di guru na marasing sian angka guru na diportibion. Jesus i ma guru na singkop, na so hea sala, na so mardosa, pola olo Ibana gabe jolma. Molo tangkas do dirimangi angka na porsea keunggulan/hasurungan ni Guru on, nda patut ma nian dibagasan biar jala las roha marnampuna di guru sisongon i?

2.    DipasahatGuru i do tu angka na porsea i, tu hita TonaNa, jala marhapatean tu Haluaon/keselamatan do tona on. Na sa barita napaluahon, na tingkos, na sintong, na pahisarhon; i do sintuhu ni Tona i naingkon tolhas pola di dok tu ujung ni portibion, dimulai ma sian bagas ta be las mangararati ma i tu humaliang (pat.2 Tim2:2).

3.    Dilehon Guru i do tu hita sinjata mardila sisean, mangajarhon haluaon, hasintongan i, ima HataNa. Hata i do hangoluan, dimulana i nunga adong Hata i, i ma Debata, jala Jesus i sandiri do i. Haporseaonta marsigantung tu Ibana dibagasan Hata i, i do parhitean jala na manontuhon hita manjalo jala manguba portibion.

4.    Adong do Jaminan na so hea marujung, na so hea tarleanni portibion jaminan sisongonon pola masa berlaku ni jaminan i sahat ro diujung ni hasiangan on, mansai ganjang do partingkianna, pola dang tarsuhat ni portibion tanggal kadaluarsani padonganionNa, penjaminanna.

Disaluhut na parbinotoanta jala hatauonta mangula songon siseanNi Tuhan Jesus taruli ma hita disilehonlehon ni Tondi i (Gal 5:22-23) nang pe so marrumang materi marhite parbue ni Tondi i tarjalahi hita do, jumpang hita do materi i songon parbue ni haporseaon i. Alai umbalga sian i nunga tolhas tu hita muse i ma hangoluan na manontong i (Mateus 16:26, pat Markus 10:29-30).

Sipahsorhusoron

Bohado rumang ni pemuridan naung dipatupa hurianta marsadasada jala aha do angka parhitean na boi patolhashon pemuridan i? Ringkot pahusorhusoronta on, asa unang holan balga, sangap, holong di BIBEL sajo Guru na Badia i digoar.