Jamita : Markus 8 : 34 – 38 PADENGGAN HAMU MA DALANMUNA DOHOT PAMBAHENANMUNA

                                    

                                         MINGGU, 07 SEPTEMBER 2025

XII DUNG TRINITATIS

 

 

1. Marende     : BE No. 11 : 1 + 4  “Aha Ma Endehononku”

2. Votum         : A.XIV.C – D.XII.35

3. Epistel         : Jeremia 18 : 1 – 11 

4. Marende     : BE No. 28 : 1 + 4      “Hata Ni Jahowa”

5. Jamita         : Markus 8 : 34 – 38  

 

PADENGGAN HAMU MA DALANMUNA DOHOT PAMBAHENANMUNA

Huria ni Tuhanta..

Molo adong na naeng mangihuthon Ahu, disoadahon ma dirina, diporsan ma silangna jala diihuthon ma Ahu. (Markus 8:34). Ganup haputusan na tabahen adong do resikona. Adong do na metmet resikona, adong do na balga resikona. Adong do resiko na parsatongkinan, adong do resiko na jangka panjang, bahkan na manongtong. Molo naeng mangihuthon Tuhan Jesus, ingkon rade do hita manjalo resiko. Ro Tuhan Jesus tu portibi on laho mandalani dalan haporsuhon, sahat tu na mate di hau pinarsilang, asa malua jolma i. Naeng mangihuthon Jesus marlapatan do i mangarade laho mandalani pardalanan sitaonon, ima mamorsan silang. Didok Tuhan Jesus do “Nasa na naeng mangihuthon Ahu, disoadahon ma dirina, diporsan ma silang na tu ibana, jala diihuthon ma Ahu” (Markus 8:34). Bebas do hita mamillit mamorsan silang i manang ndang. Ndang adong na mamaksa. Alai molo naeng tutu mangihuthon Jesus, ingkon adopan do resiko ni na mamorsan silang i.

            Naeng do si Petrus mangihuthon Jesus, alai ndang rade ibana manuhuk silangna. Ditarik si Petrus ma Jesus tu samping jala dipinsang ma Ibana dung dibege Tuhan Jesus mangajarhon na ingkon manaon godang sitaonon jala ingkon tulakhonon ni angka sintua, sintua ni malim dohot siboto surat, jala ingkon bunuon jala hehe di ari patoluhon. Didok Tuhan Jesus, porsanonna do silangna i. Alai ndang rade si Petrus manjalo kenyataan dohot panghorhon na ingkon taononna. Ido umbahen dipinsang Ibana Jesus. Ndada holan na so rade si Petrus mamorsan silangna sandiri, gariada dipangido rohana asa unang Tuhan Jesus mamorsan silangNa i.

            Muruk do Tuhan Jesus tu si Petrus jala koras ma dipinsang ibana, “Laho ma ho bolis sian lambungkon, ndada pingkiran ni Debata dipingkiri ho, pingkiran ni jolma do” (Markus 8:33). Dung i dijou Tuhan Jesus ma natorop i dohot angka siseanNa jala didok ma tu nasida: “Nasa na naeng mangihuthon Ahu, disoadahon ma dirina, diporsan ma silang na tu ibana, jala diihuthon ma Ahu” (Markus 8:34). Mamorsan silang i dipungka sian na mansoadahon dirinta, lapatanna mate do hita tu egonta jala mamungka mangolu di Kristus. Gok sitaonon do dalan hasisisean, on do na pinatolhas ni Jesus di pandohan “mansoadahon dirim, porsan ma silangmi.” Mansoadahon diri marlapatan do i manulak hagiot ni diri, menghapus kepentingan pribadi laho mangoloi lomo ni roha ni Debata. Mamorsan silang marlapatan do i rap dohot Jesus manjalo panginsahion, hailaon, panginsahion, bura, hagigian, tijur, hasusaan, sahat tu hamatean. Joujou on laho mangihuthon Jesus di pamerengan ni portibi on, tontu ndang rasional.

             Ndang sae holan mansoadahon diri, ingkon dohot do hita mamorsan silangta. Didok Tuhan Jesus ingkon rade do hita agoan hosa ala ni Ibana dohot ala ni Barita na Uli i (Markus 8:35). On ma sada ujian tu haporseaonta na sintong. Ndang holan mansoadahon dirinta jala manuhuk silang, alai ingkon dohot do hita paboahon dirinta songon siihuthon Jesus so pola maila jala boi manghatindanghon taringot tu Ibana nang pe maol situasi i (Markus 8:36-38). Naeng mangihuthon Tuhan Jesus ndang na mura. Adong do pardalanan ni sitaonon sidalanan. Nang pe songon i, pardalanan ni sitaonon i, pardalanan do i manuju las ni roha na sasintongna. Mansoadahon diri, manuhuk silang jala mangihuthon Ibana mamboan hita tu ngolu na marhamonangan. Dalan silang i do dalan tu hangoluan na manongtong jala na marmulia. Halak na naeng mangihuthon Jesus ingkon rade do laho mandalani pardalanan sitaonon. Taparade ma dirinta laho mangadopi i .

 

Diskusi:

         a.         Mangihuthon Jesus lapatanna pasahathon sandok ngolu tu Ibana, ndada holan sabagian manang satongkin. Nungga pos rohanta disi? Tabahen ma jolo pandapotta!

         b.         Jesus sandiri mandok, molo mangihuthon Ibana, ingkon rade manuhuk silangna. Lapatanna, olo manaon angka tantangan dohot hamaolon na boi masa ala ni haporseaon dohot hasatiaon tu Ibana. Olo do ho?

 

6.  Marende   : BE No. 826 : 1 + 3 “Gohi Au Tuhan”

7.  Tangiang  : Sian ruas na ro

8.  Marende   : BE No. 441 : 1 + 2 “Di Au Tuhan Jesus”

9.  Tangiang  : Sian na manjabui

10. Pasahat Pelean huhut Marende : BE No.669:1…“Ringgas au Paboahon”     

11. Tangiang Ale Amanami – Pasupasu.

 

 

 

Pdt. Pancasona Simbolon, M.Div., M.PdK.

(Pendeta HKBP Resort Mutiara)

Jamita : Poda 25 : 2 – 6 JESUS KRISTUS MANGULUHON HITA RO DI SALELENGLENGNA

 MINGGU, 31 AGUSTUS 2025

XI DUNG TRINITATIS

 

1.    Marende : BE No. 9 : 1 + 3  “HUPUJI HOLONG NI ROHAMU”

2.    Votum          : A.XV.A.11 – D.XIII.46

3.    Epistel          : Heber 13 : 7 – 17

4.    Marende       : BE No. 178 : 1 + 4   “RO MA TU JESUS”

5.    Jamita            : Poda 25 : 2 – 6

 

         JESUS KRISTUS MANGULUHON HITA RO DI SALELENGLENGNA

 

Hita angka na hinaholongan ni Tuhanta Jesus Kristus !

Tarbarita do Raja Salomo, ima na manggurithon buku Poda on, raja na bisuk jala na pantas marroha. Debata do na, ndada hamoraon, ganjang ni umur dohot hosa ni angka musuna. Gabe mansai lomo  situtu do roha ni Debata ala songon i pangidoan ni raja Salomo. Dibasabasahon Debata ma tu ibana roha na bisuk jala na pantas, asa ndang adong tudoshon ibana sian angka na robi naung salpu i nang angka na tubu muse. Mansai godang do ibana manggurithon angka poda na ditujuhon ndang holan tu angka sundut na umposo, alai dohot tu angka natuatua nang angka uluan dohot sude kalangan masyarakat. Jala tangkas do didok di bona ni buku poda on (1:2-4) tujuan ni angka poda on digurithon raja Salomo ima: 1. Asa botoon hapistaran dohot pangajaran 2. Asa dapot antusan undangundang ni hapantason 3. Asa manjalo pangajaran ni panuturion 4. Laho mangalehon habistohon tu halak na tobok marroha.

Turpuk on ima angka poda na diputihi sian parngoluon ni hajolmaon, dohot sian angka parsaoran di tonga-tonga ni hajolmaon, ima na dipapungu-pungu di tingki ni raja Hiskia, jala dibahen ma on gabe poda sian raja Salomo (bindu 25-31).

Poda na mansai arga do na digurithon di turpuk jamita partangiangan on. Hombar tu si adong ma 3 poda na jumpang hita di bagasan turpuk on:

1.  Ndang tardodo hita roha ni angka raja (ay 2-3). Hamuliaon ni Debata do manghomihon hata nang pambahenanNa, alai hamuliaon ni angka raja do manulingkit angka na masa. Marmulia do Debata ala sangkapNa na buni sian adopan ni jolma alai sebalikna angka raja di portibi on marmulia molo boi disulingkit ibana hahomion ni Debata. Asa ndang tardodo ni manang ise roha ni angka raja jala ndang mura mangantusi angka pamingkirionna, songon timbo ni langit dohot hapal ni tano on, ima gombaran na dibuat laho mangondolhon molo ndang mura mangantusi angka na di roha do ni raja.  Ndang tarungkur jala ndang hasuhatan ni manang ise timbo ni langit dohot hapal ni tano on. Alani unang pintor hatop hita mandok: “Huboto jala huantusi do aha na adong di bagasan roha ni raja i.” Manang songon dia pe jonok ni hubunganta tu raja i, unang pajagojagohon manang pamalomalohon hita mangantusi angka sangkap ni raja i, ai so tardodo ni manang ise pe roha ni angka raja. Holan Debata do na boi mandodo angka na di bagasan roha ni ganup jolma, jala holan Debata do na umboto angka na sinangkapan ni sahalak raja.

2.  Ingkon dipabali do angka parjahat sian jolo ni angka raja (ay 4-5). Dipatudos songon na manirang taktak sian perak asa tarida ulaula na arga na binahen ni panopa, songon i ma gombaran laho pataridahon habangsa na hot marhitehite habonaron. Ingkon pabalion jala pasision ma sian harajaon i angka pengaruh-pengaruh ni angka parjahat na sai marusaha mambuat posisi na strategis di habangsa ni raja i, jala boi ma taantusi jala taida haulion manang habonaron na jumpang hita sian habangsa ni raja i.  Unang patongamtongam diri di jolo ni angka raja (ay 6). Poda on manosoi asa mangolu hita di bagasan hapantunon jala patuduhon serep ni roha di jolo ni angka natorop. Hapantunon do mangalap sangap, haserepon mangalap tua. Patongamtongam diri ima pasumansuman diri songon sahalak raja marhite na marpahean, manghatai dohot bersikap songon sahalak raja, mangalobi i sian hadirionna na sasintongna. Hira ibana do raja, marhite sian paheanna nang panghataionna na sai mangatur jala mamarenta angka natorop. Unang jongjong di inganan ni angka na balga, asa unang marlea bahenon ni halak. Ingkon botoon do didia iba jongjong jala didia iba hundul, asa sangap hita di jolo ni angka donganta jolma. Haserepon ni roha i do mambahen hita sangap di jolo ni angka natorop. Amen

 

Diskusi:

1. Boha do pandapotmu molo adong halak na patongamtongam dirina mangalobi i sian hadirionna?
2. Boha do sikapmu maradophon angka raja na so mangolu di bagasan habonaron?

 

6.   Marende           : BE No. 691 : 1 + 6 “HUPASAHAT MA TU JESUS”

7.   Tangiang             : Sian ruas na ro

8.   Marende              : BE No. 720 : 1 + 4 “NAENG MARSINONDANG”

9.   Tangiang             : Sian na manjabui

10. Marende              : BE No. 248 : 1- “SALELENG HO DI TANO ON” P.Pel

11. Tangiang Ale Amanami – Pasupasu.

 

Pdt. Natalina Nababan, S.Si.

(Pendeta HKBP Resort Kisaran II)

Jamita : 1 Tessalonik 5: 12 – 24 ASI NI ROHA NI JAHOWA HOT RO DI SALELENGLELENGNA

 MINGGU, 24 AGUSTUS 2025

     (X DUNG TRINITATIS)

                                     

1.    Marende  : BE No. 14: 1 – 2    “PUJI HAMU JAHOWA TUTU”

2.    Votum     : A.XV.A.10 – D. XIII.45

3.    Epistel     : Psalmen 103: 15 – 18

4.    Marende  : BE No. 802: 1 – 2  “PANGKE TINGKIM SAONARI”

5.    Jamita      : 1 Tessalonik 5: 12 – 24

 

ASI NI ROHA NI JAHOWA HOT RO DI SALELENGLELENGNA

 

            Hamu angka dongan sahaporseaon dibagasan Jesus Kristus, asi ni roha ni Debata hot ro di salelenglelengna (Kasih setia Tuhan tetap selama-lamanya). On ma topik ni partangiangan dihita. Tontu songon halak na porsea hita, mananda Debata na holong dohot na asi roha ndang boi holang sian ngolu ni angka na porsea. Tung ingkon parhatopotonta do ro di salelelenglelengna do asi ni roha ni Jahowa dihita. Nian alani dosa i patut do hona uhum jolma i alai ala ni holongNa, Ibana do na gabe singkat ni angka pelean hasesaan ni dosa. Laos dihirim Debata do jolma i asa marhamubaon,  manadinghon dosa i binsan dilehon Debata dope di jolmai partingkian. Di Buku Ende 392 :  1 didok “Sai pasiat Tuhan Jesus tu bagasan rohami. Sai maima ima Jesus, bege panuktukNa i. Sai pasiat Tuhan Jesus, jangkon i tu rohami. Nunga tingki parasian sotung jolo salpu i”. 

            Domu tusi ma na naeng pasahaton ni turpuk on, boha do sikap ni halak Kristen na manggoari dirina siihuthon Jesus patuduhon sikap saleleng mangolu diportibi on. Dijolo ni turpuk on nunga ditaringoti Apostel Paulus asa dungo managam haroro  ni Kristus. Di tingki na so taboto manang andigan masa haroro ni Kristus na paduahalihon i (Parousia), dilehon Apostel Paulus ma angka sipaingot tu huria na adong di Tessalonik dohot tu hita dipartingkian nuaeng.

Huria ni Tuhanta…Marhite turpuk on, pinomat adong ma tolu bagian angka sipaingot na parpudi (nasehat-nasehat) sian Apostel Paulus na ingkon dihangoluhon jala diulahon siihuthon Tuhan i, angka dia ma i?:

1. Sikap tu angka na manguluhon nasida. Ayat 12 - 13 didok : supaya kamu menghormati mereka yang bekerja keras di antara kamu, yang memimpin kamu dalam Tuhan dan menegur kamu; dan supaya kamu sungguh-sungguh menjunjung mereka dalam kasih karena pekerjaan mereka. Lapatanna ingkon sai ingot nasida di angka poda dohot hata ni Tuhan na pinasahat ni angka parbarita nauli naung sahat tu nasida, marhite na manghangoluhon dohot mangulahon hata ni Tuhan i.
2. Parsaoran rap dohot dongan sahaporseaon (hubungan dengan saudara seiman) . Di ayat 13 b – 15 mansai tangkas diapoi Apostel Paulus: Sai mardame ma hamu sama hamu, olo paingothon angka na so maradat (yang tidak mau bekerja), mangapuli angka siotik roha (menghibur yang tawar hati), manganju angka na gale (membela orang yang lemah), marlambas ni roha, unang dibaloshon na roa balos ni na roa, mampareahi angka na denggan tu saluhut halak.
3. Parsaoran dohot diri sandiri (hubungan dengan diri sendiri). Ngolu ni halak siihuthon Tuhan i didok Apostel Paulus: tongtong marlas ni roha (hidup penuh dengan suka cita), sipartangiang, sidok mauliate (Mengucap syukur dalam segala hal), unang diintopi tondi i (jangan padamkan roh), unang lea dipanurirangon, maniop angka na denggan dung jolo ditangkasi saluhut, pasidinghon ragam ni angka na roa (menjauhkan diri dari segala jenis kejahatan).

Huria ni Tuhanta…Asa margogo jala pos roha ni angka halak Kristen di huria Tessalonik nang hita di tingki on, dipangidohon Apostel Paulus do ditangiangna tu Debata marhite pandohan: Diparbadiai Debata pardame ima hamu gabe sun denggan jala diramoti ma tondimuna, nang roha, nang daging, so hasurahan di haroro ni Tuhanta Jesus Kristus (ayat 23). Manang songon dia pe gogo ni portibion mangelaela nasida dohot angka siihuthon Tuhan i, diangka tantangan, rintangan na ingkon taadopi, ingkon pos do rohanta dipangaramotion ni Debata. Mateus 28 : 20 b didok: Ai idama, sai na dongananHu do hamu ganup ari, rasi rasa ro ajal ni hasiangan on.

Songon topik ni partangiangan on: Asi ni roha  ni Jahowa hot ro di salelenglelengna. Satia do Debata tu hita asal ma olo hita pasauthon lomo ni roha ni Debata sahat tu haroro ni Kristus paduahalihon. Ayat 24 didok: Haposan do Ibana na manjou hamu; sai pasautonNa doi. Amen.

 

Diskusi:

1. Di ayat 18 didok : mandok mauliate ma hamu siala saluhutna. Mampu do hita hita patupahon i?
2. Boasa sai olo dope na deba mambaloshon na roa balos ni na roa? 

6. Marende     : BE No. 248: 4 + 7 “SALELENG HO DI TANO ON”

7.Tangiang      : Sian ruas na ro

8. Marende     : BE No. 10: 4 – 5 “HUPUJI HUPASANGAP HO”

9. Tangiang     : Sian na manjabui

10. Marende   : BE No. 467: 1 … “ASI NI ROHAM HUPUJI”   (Pelean)

11.  Tangiang Ale Amanami – Pasupasu.

 

 

 

Pdt. Frizon Saragi, S.Th

(Pendeta HKBP Resort Air Batu)

MANGOLU SONGON NGOLU NI ANGKA NAUNG MALUA, Jamita : Jeremia 34 : 12 – 16

MINGGU, 17 AGUSTUS 2025

IX DUNG TRINITATIS

 

1.    Marende            : BE No. 648 : 1 – 2  “SANGAP DI DEBATA AMA”

2.    Votum    : A.XV.9 – D.XIII.44

3.    Epistel    : 1 Petrus 2 : 11 – 17

4.    Marende            : BE No. 766 : 2 – 3  “PADAN NA ULI”

5.    Jamita            : Jeremia 34 : 12 – 16

 

MANGOLU SONGON NGOLU NI ANGKA NAUNG MALUA

 

          “Atas berkat rahmat Allah Yang Maha Kuasa …, maka rakyat Indonesia menyatakan dengan ini kemerdekaannya". Ungkapan ini ada dalam alinea ketiga Pembukaan UUD 1945, ini mengingatkan, sekaligus menyadarkar bahwa bangsa Indonesia memperoleh kemerdekaannya bukan karena perjuangan dan usaha mereka sendiri, tetapi juga berkat dan rahmat Tuhan. Holan ala asi ni Roha ni Jahowa do (atas Rahmat Allah- M. Luther) Indonesia mencapai Kemerdekaannya. Merdeka.. sekali Merdeka tetap Merdeka.. Botima Ende i di endehon tingki ari Kemerdekaan RI.

          Hata Merdeka marharoroan doi sian “Maharddhika” (hata Sansekerta) na marlapatan: memiliki Kekuasaan sendiri; manang: Bebas dari Penjajahan/ Penindasan; Bebas menentukan nasib sendiri; Mandiri dan Berdaulat sebagai Individu dan Bangsa. Molo di Hata ni Jahowa: “Supaya kita sungguh-sungguh merdeka, Kristus telah memerdekakan kita. Karena itu berdirilah teguh dan jangan mau lagi dikenakan kuk perhambaan” (Galatia5:1); “Jadi apabila Anak itu memerdekakan kamu, kamu pun benar-benar merdeka” (Joh8:36), berarti Kemerdekaan dibagasan Kristus manogu “hidup baru yang dipimpin dalam Kristus dan tidak hidup dalam Dosa melainkan sebagai anak Allah yang merdeka dan memerdekakan= Paluahon”.

          Dipalumba Jahowa do bangsoNa Israel uju di harajaon Zedekia, asa marningot Padan naung diundukhon nasida tu Jahowa laho paluahon= memerdekakan angka Hatoban- hatoban nasida (Ida 3Musa25:39-46; 5Musa15:12-15). Dimulana diulahon nasida do Padan na niundukhonon ni nasida i tu Jahowa (on do hata ni Jahowa, Debata ni Israel: Nunga ahu mambahen sada parpadanan tu ompumuna, uju ahu manogihon nasida ruar sian tano Misir, sian bagas pangadopan, songon on: Ganup papitutaonhon, ingkon ganup hamu paluahon donganna marga Heber, naung manggadishon dirina tu ho; ingkon onom taon lelengna pangulahononna ho, dung i paluaonmu boti ibana sian lambungmu (ay.13-14). Naeng gabe Parsidohot bangsoi gabe Paluahon diangka na tartaban/ hatoban; parsidohot mangalehon Haluaon i= Kemerdekaan tu halak na humaliang, songon Jahowa na marasiniroha Paluahon nasida. Alai dipapitung angka Kepentingan ma bangso i, ala manjalahi arta; manjalahi hinaringkon di ngolu na ditanoon gabe dihalupahon jala muba ma roha nasida di Padan naung diundukhon nasida tu Jahowa (nunga muba ianggo rohamuna sadarion  jala nunga dibahen hamu na sintong di rohangku, naung ditingtingkon hamu haluaon ganup tu donganna, jala naung dibahen hamu parpadanan di jolongku di bagasan bagas na targoar tu goarhu. Alai nunga hosing muse rohamuna, gabe diramuni hamu goarhu..” ay.15-16). Dihalupahon jala nunga ditinggalhon nasida Jahowa, ndang Komitmen nasida diangka Padan naung dipadanhon nasida.  Kecewa berat ma Jahowa marnida pangalaho ni BangsoNa i “Penghianatan terhadap Komitmen Suci di hadapan Allah”.  Dang bangso na Paluahon= memerdekahon be bangsoNa, alai bangso na menindas jala marsoadahon haluaon i, dihalupahon nasida Padan i, so dihalomohon Jahowa Pangalaho i.

          Napinalua ni Jahowa= Atas berkat Rahmat Allah, do hita bangsoNa Indonesia sian Penjajah (umbahen na boi taendehon: Indonesia Raya, Merdeka.. Merdeka) jala songon BangsoNa hita nunga dilehon Jahowa haluaon sian Dosa marhite haheheon ni AnakNa Tuhan Jesus Kristus (Pesta Paskah Hatuaon!, BE. No.93). Patauhon ngolunta, angka naung pinalua ni Jahowa: gabe mar-ngolu Haluaon, unang be mar-ngolu hatoban manang Marhatobanhon (“Tu haluaon i hamu dijou, angka dongan; asal unang haluaon i gabe parbonsiran di sibuk; sandok marhitehite haholongon i ma hamu masioloan”-Galatia5:13). Paingothon hita: untuk tidak berubah menjadi pelaku kebenaran yang sesaat tetapi menjadi Perilaku yang setia berkomitmen; menjadi Pelaku yang memerdekakan baik secara Rohani maupun secara Moral (“Ai angka naung malua do hamu; alai unang ma pinangke haluaon i mangondingi hajahaton; songon angka naposo ni Debata ma tahe”- 1  Pet 2:16). Ima na tama gabe halomoan ni Jahowa ma hita naung pinaluaNa; ima na tutu na Pinalua gabe manogu halak taruli di haluaon i, unang be diparhatoban ni Dosa i, gabe siboan haluaon ma ngolunta: “Asa saut malua hita, umbahen na dipalua Kristus i hita.” (Galatia 5:1).. Amin.

Diskusi:

a.       Haporseaon manang Pangalaho naung Pinalua= yang dimerdekakan, songon dia ma Rumang ni i..??

b.      Molo angka naung pinalua do hita, nunga dohot hita malua sian angka tanggung jawabta di Huria i manang tarihot dope hita disi….???

6.    Marende  : BE No. 391 : 1 “SO TUNG DITULAK”

7.    Tangiang : Sian ruas na ro

8.    Marende  : BE No. 464 : 2 “HUBOAN MA DIRINGKU”

9.    Tangiang : Sian na manjabui

10.  Marende  : BE No. 417 : 1 + 3 “RADE SITUTU HALUAON”    (Pelean)

11.  Tangiang Ale Amanami – Pasupasu.

Pdt. Ramli S. Sihombing, M.Pd.

 (Pendeta HKBP Resort Pulo Raja