Marsiajar ma tu Porhis

Guru na METMET do tutu ia porhis, alai na TIMBO do Parbinotoanna
Oleh : Siman Hutahaean
Haringgason, i do tutu siguruhononhon sian porhis. Ai nasida ma tutu na tardok na ruminggas sian angka ragam ni binatang.
Adong do asar ni porhis i, i do songon tano hagodangan nasida manang ‘negarana.’ Tipak do dipauli asarna sian duhutduhut, sian hauhau dohot sian bulungbulung. “Arsitek” na malo do nasida paulihon asarna, marbilutbilut do dibahen, adong do dalan humaliang dalan haruar dohot dalan masuk, adong bilut inganan ni bohal, adong inganan ni rapanrapan.
Na “marorganisasi do nasida, ai adong do di nasida pambagian ni ulaon na tangkas. Ai deba nasida martugas mangalului sipanganon, deba martugas manjaga asarna i, deba manjaga musu sian ruar, laho mampartahanhon punguannasida. Molo maradian donganna, ndang ditugan manang dibadai. Ganup hali pajumpang dohot donganna, sai masitabean manang “masijalangan” do. Ganup do nasida masipangke gogona be mangula, ndang pola ringkot mandur manang pandasdas nasida mula ulaon. Sandok ndang dihirim pangurupion sian na asing, tung diparhanalom do gogona sandiri. Apala angka bangko si songon i ma siparateatehononta manang siguruhononta sian porhis. Songon sada bangso na marhahamaranggi do nasida di asarna i, na dipataridahon sian ulaonna. Ndang adong nanggo sada sian nasida, isara songon ampodi rupani, holan ruangna sandiri do dipauli, jala holan dirina sandiri do disarihon. Sai diparatehon do dia ma bahenonna tu donganna (dao sian tahitahi: dia ma sibuatonna).
Hira so adong do dohonon siusungon na sundat dihindat porhis nang pe umbalga i sian dagingna. Nang pe borat sihindaton i, saroha do angka porhis rap manuhukonsa. Ia molo so tartahuk, maradu disaratsarat. Ndang masipasombuan porhis i. Jala musengani sai dipadiri do bohalna jala dipapungupungu do sipanganonna (antisipasinya kuat, gigih kerja keras) di partaonan logo ni ari. Jala ndang holan i, ndang “senin kamis, sinari manogot suda botari, ia ngolu na hinalojahon ni porhis. Dipapungupungu do sipanganonna di hamamasa ni gotilon. Malo do nasida marpangontik bahen bohalna. I ma angka porhis, sada bangso na so margogo nian, alai diparade do bohalna di partaonan logo ni ari.