Jamita Minggu Advent II, 8 Desember 2013, Sakkaria 9:9-10

JAMITA

MINGGU ADVENT II

Minggu, 08 Desember 2013

Ev.: Sakarias 9: 9 – 10

 Ginurithon ni ; Budianto Sianturi

DIA DATANG DENGAN JAYA

Patujolo

            Adong pandohan ni Halak Batak namandok “ Bagot namadungdungma tu pilopilo na marajar, salpu ma nalungun binaen ni porangi sai ro ma angka na jagar”  pandohanon marlapatan tung so dihalomohon halak do angka parporangon ai mambahen haparirondoi jala mamboan hapogoson, parungkilon dohot arsakniroha. Sai di halomohon angka jolma do dame, hasonangan dohot haluaon. Ganup panggomgomi naeng ma gabe siboan hatiuron tu angka na ginomgomanna, alai sipata godang do angka panggomgom na so mangulahon ulaonna songon sahalak pangomgomi,  Gogo ni porang do dipangasahon dohot habisuhonna, Disituasi nasongoni ma di pabangkit Debata si Sakkaria laho mangapuli dohot paturehon bangsoNa. Manurirangi ma Si Sakkaria dohot mambagabagahon tu bagsoi na ro ma Raja sipardame naeng paluahon nasida, alani ingkon tomutomuon nasida ma Rajai dibagasan panghirimon na tangkas, Managam  Haluoan na singkop ima Haluaon na dibagasan Jesus ima turpuk ta dibagasan sadarion : “Sakarias”  marlapatan do i “diingot Jahowa”, “Jahowa marningot” di angka gogo, asi dohot holong  ni rohaNa dohot bangso na pinillit-Na.

Hatorangan ni Turpuk

Tagam di HaroroNa

            Ingkon unduk jala serep do hita manomunomu HaroroNa , Tagam marlapatandoi ingkon pos rohanta jala torus manghirim, songon sada ina na tagam diharoroni haroan. Ndang olo mandele manang boha pe dokdok ni ni sitaononon ( pembebeon) ni pamatangna sahat tu na hipas pamatangna, sahat rodi hasosorang ni parbue ni siubeonna. Ingkon Songoni do halak Kristeni managam haroroNa, ido Lapatanni Advent, manghangoluhon panomunomuoni dibagasan hatoguon ni haporseaon, dang sumurut alani angka parungkilon na ro, Laos ido napinatudu ni Jesus marhite turpukhon, Roha nasai tongtong serep, Unang masa be ginjangni roha dohot angka keangkuhan, do ido na nidokna di ayat 9 i adong joujou tu boru Sion dohot boru Jerusalem. Boru Sion dohot Boru Jersalem marlapatan:  ima pangisi ni huta Sion dohot Jerusalem na sai marhaposan tu Jahowa. (Sion : Angka na marhaposan jala namarolopolop tu Jahowa, Sion ima sada tanda parmianan ni Jahowa Debata, sada dolok na mansai badia di halak Israel ala di dolok Sion do inganan ni bilut na mansai badia   Jerusalem :  (Huta Dame, Kota Roti), laos ido na umbahen adong pangantusion Dolok Sion ima inganan hadameon sian Jahowa, Debatanasida. Halode Patuduhon Haserepon ni Roha , Dibagasan Haserepon do ro Jesus i. Ndada songon Raja na di portibion Ibana , nanaeng patuduhon huaso, alai patuduhon haserepon , dame dohot hatigoran.

   Parungkion manang Habuangan na masa tu bangso Israel (Efraim dohot Juda) ndada na patuduhon na mansohot huaso ma asi ni roha ni Jahowa tu nasida. Nang pe masa habuangani, alai anggo asini rohaNa manontong do tu nasida, dipauliuli do jala dipalua. Marhite raja Koresy (Cyrus) di taon 539 – 538 sM (andorang so Kristus) mulak do halak Israel sian habuangan tu hutanasida, di Yerusalem dijou si Sakarias gabe panurirang ima patuduhon na solupa Debata tu Bagsoi.

           

            Ia Raja nanang roi,  ima  na mambahen sonang tondi nang pamatang ni na gonomgomanna. Ndang adong be disi hatahuton hinorhon ni ancaman sian bangso na asing. Raja namamboan  hadameon tu sude bangso di portibion, . dang masa be porang, anggukangguk, alai holong dohot dame ma nasai tongtong mian jala maringan di roha ni angka bangso . Ido nandikna di ayat 10 i,  “ Jala Ahu maniaphon angka hureta sian Efraim dohot angka parmusumusuon sian Jerusalem, siap dohot sior tu hamusuon, dungi baritahononna ma hadameon tu angka bangso parbegu, jala masuk tu gomgomanna sian laut tu laut, jala sian batang aek Eufrat sahat ro di angka ujung ni tano on” Debata Sandiri patupahon Pardameani marhite Jesus Kristus.

Sipahusoron

            Ingkon parroha Holong ma hita, jala tongtong mangolu dibagasan hatigoran, Paimahon harorona paduahalihon dibagasanhaporseaon na togu, Dao sian roha bada dohot angka parmusumusuon, porang nang angka pargutugutuon alai tongtong dame, malua sian haginjangon ni roha jala marroha haserepon, siboan dame tu saluhut bangso.  mariaria jala marolopolop hita  manomunomu di na ro Raja hadameon, ima Mesias Sipalua).Tongtong dungo manang sadihari pe ro HaroroNa paduahalihon  .