Jamita Roma 1 :14-17

Jamita  Roma 1 : 14-17

Ginurithon ni : Budianto Sianturi

Namangoludo Partigori Hinorhonni Haporseaonna

1.      Adong sada pandohan ni halak Batak didok songonon “Utang sigararon, singir sipaimaon” namarlapatan molo marutang iba ingkon do gararon, molo adong parsingiranniba hirim do roha paimahon na ingkon gararonna doi, Laos adong do hadomuan ni parhataan ondeng tu namasa dibagasan turpuk on. Sihol ni roha ni Apostel Paulus mandapothon angka nahinaholongan di huta Rom, namarningot do ibana jala marsihohot di tangiangna mangidohon anggiat tung bo mangebati huria i. Diparhatopot apostel Paulus do na dapotan hiras ni roha ibana sian huria i hinorhon ni haporseaon. Alai dang boi pangidoanna i dope tulus, tarsabat ala ni angka ulaon namansai rosu di angka pamaritaon tu angka halak na so mananda Kristus dope. Laos surat tongosan ni si Paulus na tu huta Rom on ma manoarahon asa sai tongtong marparbue jal hot haporseaon ni Huria i. Dirajumi ibana do sada utang na mansai balga ala na so boi dope ibana mangebati huria na di Rom. Utang na nidokna dison ndada utang alani hepeng manang materi, alai Barita nauli do. Marutang Apostel Paulus ala dang tarbahen ibana dope tingkina laho marsaor rap dohot Huria Rom.

2.      Huta Rom ima sada huta naung maju, angka ruasnape nunga majemuk, lapatanna ndang holan halak Romawibe alai nunga dohot Junani dohot angka bangsobangso na asing pe. Nunga godang angka parboniaga, parhapistaran, namora nang napogos, laos adong muse dope angka na tinggal di haotoon. Godang nai halak Kristen nuaengon na maila manang ndang barani manghatindanghon haporseaonna, Kristen KTP, holan di KTP na ibana Karisten alai diparulaan siganup ari ndang ngolu na Kristen. Najumorbot dope tahe ditiggalhon ibana hakritenonna holan laho mangalului pangkat manang jabatan na timbo, na deba gabe masuk ugamo  silom asalma boi naik pangkat. Apostel Paulus mandok “Ai ndang huhailahon barita nauli, ai hagogoon ni Debata doi paluahon nasa naporsea, halak Jahudi jumolo, dungi dohot halak Junani, laos sahat mai nuaeng tu halak Batak”.

3.      Adong sada barita namasa di ari 12 April 1961, sahalak na pistar Astronot sian Unisoviet namargoar Yuri Gagarin sahalak atheis na so manghaporseai Debata, ginjang do rohana jala dang olo mangokuhon na adong Debata. Didok ibana ma sahali di hatana; nunga mardalani ahu sahat tu bintang dohot ruang angkasa marhite Vostok I dibagasan 108 minut , puas pais do ahu di luar angkasai mangalului Debata, alai dang adong jumpanghu Debata , ndang adong Debata nanidokmunai, jala dang huboto manang na didia ibana martabuni, ninna ibana mangalusi angka wartawan na mewawancarai ibana. Mambege hata ni si Gagarin nagok ginjang ni roha I didok sahalak Pandita na sian Eropa ma “ ndang pola longang roha molo dang pajumpag si Gagarin dohot Debata, ndang na Debata namartabuni, alai si Gagarin do  namartabuni dibagasan pesawati. Di uji ma jo jolo haruar jala manimbung sian pesawati pasti do pajumpang ibana dohot Debata ninna pandita ni Eropai muse mangalusi . Dungi pitu taonnai toho mai di ari 27 Mare 1968, pajumpang do si Gagarin dohot Debata. Uju latihan ibana naeng mengelilingi luar angkasa matutung do ibana rap dohot pesawat naimbaru na binoannai laos marujung ma ibana ( mate) dihatihai. Pajumpang do ibana dohot Debata alai tutu ndang jolo dipauba ibana rohana, sai tong mangolu dibagasan haginjangon ni roha, laos haginjangon ni rohai ma mamboan ibana tu ajal ni ngoluna. Sian baritai boi idaonta ndang marlaba hape haginjangon ni roha, molo tung adong pe di jolmai, hamaloon, hapistaran unang ma dihaginjanghon, alai baliksa tahe lam manambai haserepon ni roha dohot haporseaonta mai tu Debata. Ai Biar mida Jahowado parmulaan ni parbinotoan ( Poda 1:7a). Mangolu ma angka partigori hinorhon ni haporseaonna tu Debata.

4.      Apostel Paulus manoarahon asa sai tongtong hita mangolu dibagasan hatigoran, haporseaon na manongtong, margogo mamaritahon barita nauli, unang maila manghatindanghon Tuhani. Ai hagogoon do barita nauli I di hita angka naporsea di Debata. “Hagogoon do hata ni Debata jalahaluaon di angka naporsea” Pslmen 19:46. Halak na porsea ingkon do mangolu dibagasan hatigoran na sian Debata. Hatigoran na sian Debata do na boi pangoluhon hita dibagasan haporseaonta. Alani haporseaon do gabe malua hita ndang alani pambahenanta. Hatigoran nanidokna dison ima hatigoran na sian Debata. Ndang mangolu halak na porseai holan alani gogona sandiri, alai holan marhite asiniroha ni Debata ( Sola Gratia ) sambaing do. Antong mangolu ma hita dibagasan haporseaon, holong, hasintongan nang hatigoran, Tabaritahon ma baritanauli tu nahumaliangta Amen .