PARTORDING NI ACARA PESTA ULANG TAHUN PA 90 HON OP RUGUN BR HUTAGAOL

PARTORDING NI ACARA

PESTA ULANG TAHUN

PA 90 HON

OP RUGUN BR HUTAGAOL

DI TANGAN SIAMUNNA DO GANJANG NI UMUR, JALA DI HAMBIRANG NA DO HAMORAON DOHOT HAMULIAON,

PODA 3:16

SABTU ,17 Desember 2016

PAMUHAI

     U   : Di hamu saluhutna na marlas ni roha di bagasan tingki on, tama do hita mandok mauliate siala saluhut pambahenanNa na tu hita tarlumobi tu hamuna keluarga dison. Ibana do na mangiringiring langkamuna, diramoti do hosamuna, dipahisar pamatangmuna, diurupi hamu uju ro hagogotan. Ibana do na manumpak saluhut ulaonmuna, laos Ibana do na mangalehon ganjang ni umur dohot sude ragam ni pasupasu na mauliutus. Tongon sadarion dina boho Umur ni Inang Op Rugun Br Hutagaol 90 Taon, Dibaheni marlas ni roha ma hita, taolophon ma nasa pambahenanNa. Marende ma hita.

01.        Marende B.E No. 6 : 2-4  Puji Jahowa Na Sangap

v  Puji Jahowa Sigomgom sude parluhutan. Na manogihon ho songon niiring ni tangan. Dohot hosam, songon hombar tu roham sai diramoti Ibana.

v  Puji Jahowa naung tipak manompa dagingmu. Jala na tongtong manumpak hisar pamatangmu. Jotjot do ro pangurupiNa tu ho, uju ro hagogotan.

v  Puji Jahowa Situmpak sude ulaonmu. Ai ditumpakhon tu ho tongtong hangoluanmu. Ingot ma i, denggan ni basaNa do i, tomutomuNa sambing do.

02.        VOTUM

  U   : Marhite-hite goar ni Debata Ama dohot goar ni AnakNa Tuhan Jesus Kristus dohot goar ni Tondi Porbadia, na manompa langit dohot tano on.   

H   : Amen

U   : Puji ma Jahowa ale tondingku, baritahon hamu ma goarNa i, pabotohon hamu ma di tonga-tonga ni angka bangso pambahenanNa i.

H   : Puji ma Jahowa ale tondingku, jala nasa rohangku di bagasan mamuji goarNa na badia i.

U   : Puji ma Jahowa ale tondingku jala unang tung halupahon denggan ni basaNa sudena. Ibana do manesa dosam sudena, Ibana pamalum angka sahitmu sudena.

H   : Ibana paluahon ngolum sian hamagoan, Ibana martumpalhon tu ho denggan basa dohot asi ni roha.

U   : Ibana pamahap roham marhitehite denggan basa asa mulak poso ho songon pidong rajawali.

H   : Jahowa do patupahon angka pambahenan hatigoran jala dipatingkos uhum tu saluhut angka hajolmaon.

U   : Martangiang ma hita: Ale Tuhan Debata Amanami partigor jala parasi roha di hami. Tatap ma hami na pungu dison na ro tu adopanMu na badia i. Mauliate dipasahat hami tu Ho ala nunga dipasaut Ho sangkap ni keluarga di bagasan sadarion. Na marningot do hami di patikMu asa anggiat huparhaseang hami ngolu dohot nasa na adong di hami laho mamuji dohot pasangaphon ho. Dipataridahon keluarga on do hinarga ni na marnatuatua, dipasangap nasida natorasna on uju di ngoluna. Antong tatap ma ulaon on ale Tuhannami asa hombar tu lomo ni rohaM saluhutna ulaon on. Nunga dipaloas Ho hami tu sadarion, dongani ma hami nang di ulaon on asa mamungka dohot marujung di bagasan las ni roha, jala tarpuji Ho di tonga tonga nami. Mangasahon goar ni AnakMu Tuhan Jesus Kristus, martangiang hami tu Ho. Amen.

03.  Marende B.E. No. 211 : 1 “Tuhan Jesus Siparmahan”

v  Tuhan Jesus siparmahan, au birubiruNa do. Jesus gok di Ho rohangku, sai ihuthononhu Ho. Sai ihuthononhu Ho, sai ihuthononhu Ho. Jesus gok di Ho rohangku, sai ihuthononku Ho.

04. Martangiang sian hasuhuton

05.        Marende B.E. No. 3 : 3    Puji Jahowa Ale Tondingku

v  Martua halak na niondingan ni Debatanta Jahowa i. Angka na hot marhaporseaon, di Jesus Kristus Tuhanta i. Molo Debata donganmu, ndang adong hurang tuamu. Haleluya, Haleluya.

06.        MANJAHA HATA NI DEBATA PSALM 23:1-6

     U   : Ayat sijahaon , di las ni rohanta sadarion ima na tarsurat di Pslm. 23 : 1-6, songonon ma hatana. Jahowa do siparmahan ahu, ndang tagamon hurangan ahu.

H   : Dipatongon do ahu tu jampalan angka na lomak, ditogutogu do ahu di lambung aek hasonangan.

U   : Dipasabam do rohangku, ditogu do ahu di dalan hatigoran,  ala ni goarNa i.

H   : Ai nang pe mardalan ahu di rura linggoman ni hamaatean, ndang huhabiari parmaraan, ai Ho do mandongani ahu tungkotmu dohot batahiM mangapuli ahu.

U   : Ho do manutup meja di jolongku maradophon angka musungku, dimiahi Ho do ulungku, suksuk do panginumanhu.

H   : Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu masuhanhu ma bagas ni Jahowa salelenglelengna.

U   : Ido sahatna, Martua ma angka na umbege hata ni Debata jala na umpeopsa, Amen.

07.        Marende B.E. No. 190 : 3  Las rohangku situtu

v  Las rohangku situtu ai parjambar au tutu. Di na denggan sasudena, pinarbaga ni Debata. Di sude na burju i mangihuthon Jesus i.

08.        Martangiang pangondianon sian hula-hula

09.        Marende B.E. No. 467 : 1 Asi ni rohaM Hupuji 

v  Asi ni rohaM hupuji ala Ho manobus au. Dipaias Ho rohangku gabe soranganMu au. ingananMu rohanami tondiMi manggohi i. pangke dohot ngolunami gabe ulaulaMi.

10.        JAMITA

11.        Marende B.E. No. 188 : 1+2 (Papungu pelean)

v  Jahowa siparmahan au ndang hurang manang aha. Ai nasa jea dipadao do sian dorbiaNa. Tongon dibaen na lomak I, lao pangoluhon tondingki dibaen asi rohaNa.

v  Ditogu au tu na tio aek mata hangoluan. Dibaen do tondingki sio di dalan hasonangan. Sabam rohangku do tongtong, saleleng au di tano on baen sangap di goarNa.

12.         PANGAUHONONHON

  U   : Dongan sahaporseaon, nunga itahalashon pambahenan ni Debata naung sahat tu hita. Ipe tadai ma pambahenan ni Debata huhut marpanghirimon tu adopanNa.

Kel : Marlas ni roha  do hami dibahen  Ho  ale Debata,  Sai  pasupasu ma tongtong keluarganami.

     U   : Na marsalpuan do angka partingkian ima angka ari, bulan dohot taon.  Alai ianggo asi ni roha ni Debata na hot do ro di salelenglengna di angka na manghaholongi Ibana.

     Kel   : Sai parrohai ma hami mamilangi angka ariarinami, asa dapotan roha na bisuk hami.

U   : Antong borhat ma hita tu halasan ni rohanta, sai saut ma angka na tasangkapi saluhutna, di ulaon Las ni roha sadarion dohot di angka ulaonta siganup ari, siala Debatanta nunga saor di tonga-tonganta. (Tangiang Pelean/ AGENDA).

U+H   : Ale Amanami…….+  Pasupasu

H   : AMEN….AMEN….AMEN

Pdt. Budianto Sianturi