Ev Ulaon ni Apostel 4:32-37 "PAJONGJONG PARSAORAN NA MASIHAHOLONGAN

 

Ev. : Ulaon ni Apostel 4:32-37

 “PAJONGJONG PARSAORAN NA MASIHAHOLONGAN”

Goar ni Minggu Quasimodogeniti (songon posoposo na imbaru tubu, na uasan di susu na tama, na so marlaok, lam magodang, bahen haluaon, 1 Petrus 2:2); I do na tau pajongjong parsaoran na masihaholongan, songon dakdanak, tubu rohana marsaor dohot donganna ,Sai ni ingot dope ujui uju marmeam angka ianakhon adong pandohan ,”ise na dohot roma tuson, ise na so dohot lao sianon” lapatanna molo dongan rap ma marsaor molo so dongan unang pola rap, tung pe sipata marsalisi sama nasida, alai satongkin do mulak be rohana gabe mardomu muse. Alani do umbahen didok Tuhan Jesus: “Molo so mulak rohamu, gabe songon dakdanak, tung na so bongot hamu tu harajaon banua ginjang i. Asa na paoru dirina songon dakdanak on, i do na umbalga di harajaon banua ginjang i. Jala na manjangkon dakdanak na songon on marhitehite GoarHu, Ahu do na jinangkonna disi” (Mat. 18:3-4). Didok Tuhan Jesus muse: “Loas hamu ma ro angka dakdanak i sahat tu Ahu; unang orai hamu nasida, ai di angka sisongon i do harajaon ni Debata” (Luk. 18:16; Mrk. 10:14; Mat. 19:14). Ojahan laho pajongjong parsaoran na masihaholongan; I ma haheheon ni Tuhan Jesus sian na mate, na paluahon dohot pangoluhon ganup na porsea. Tanda ni parsaoran i ingkon masihaholongan, manghaholongi Debata dohot manghaholongi dongan jolma dohot masiurupan laho mangaradoti patik Kristus (pat. Gal.6:2). I do na masa di Huria na parjolo i, dunghonsa marjamita si Petrus taringot tu Jesus na tarsilang i, na bangkit Tuhan jala Kristus dibahen Debata (Ul. 2:36). Hombar tusi didok nasida ma tu si Petrus dohot donganna apostel: “Aha nama sibahenonnami, ale angka dongan?” (Ul. 2:37). Gabe tardidi ma nasida arga toluribu toropna di na sadari i. Marsihohot ma nasida di poda ni angka apostel marparsaoran, marulaon na badia, jala martangiang (Ul. 2:42). Pajongjong parsaoran na masihaholongan, i ma naung manjalo haluaon sian Tuhan Jesus, gabe siihuthon Ibana, bahen panindangion tu na humaling.

Parjolo, Gabe Halomoan ni Torop Halak ma hita . Ojahan pajongjong parsaoran na masihaholongan i; i ma, angka na porsea, sapunguan, saroha (sehati), saoloan (sejiwa), parsaoran nasida niihot ni haheheon ni Tuhan Jesus i na gabe Tuhan dohot Sipalua ni hajolmaon. Jala angka paradongan  mandok, ndang hapunjunganna (milik sendiri) artana i, alai hatopan (bersama) do i dietong (Ul. 2:44-45) Sesungguhnya dalam setiap apa yang ada pada kita ( Harta ) kita ada milik orang lain di dalamnya  Tondi hatopan on do naung mago nuaeng, di tongatonga ni keluarga maradophon angka na marhahamaranggi, di tongatonga ni huria, dohot di tongatonga ni bangso ala naung mangasahon pingkiranna dohot gogona. Jadi marhagogoon situtu do angka apostel i, manghatindangkon haheheon ni Tuhan Jesus i, jala lomo situtu do roha ni halak mida sude nasida. Gabe tau tiruan apostel I di tongatonga ni ruas ni huria. Aha do mambahen mago tondi hatopan I di tingki on, nunga torop angka parjamita, pangula ni huria na holan manarihon dirina, ndang disarihon ulaon hatopan, nunga tading ulaon panindangion dohot ulaon parasinirohaon. 

Paduahon, Managihon tu angka na hurangan . Panghorhon ni haheheon ni Tuhan Jesus sian na mate gabe rade marsiurupan dohot marsitumpahan, tarlumobi laho mangurupi angka na hurangan. Angka parhauma dohot parjabu, di gadis do i, dungi diboan ma tuhor ni na ginadisna i. Angka parhauma dohot parjabu, naung mangarajumi na marharoroan sian Debata do nasa na adong di ibana i, jala ditopik ibana sian i, digadis ma i dipasahat tu na hurangan.  Hombar tu na tarsurat: "Sipeop na godang, ndang marlobilobi; jala sipeop na otik, ndang hurangan" (1 Kor. 8:15). Dipeakhon ma i tu jolo ni angka apostel, dung i disagihon (dibagi-bagikan) ma i tu angka na hurangan. ( Indahnya berbagi )

Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu iban Poda 19:17.  Marbagi di na otik, mardua di na godang” artinya : dibagi kalau sedikit, dipecah kalau banyak (= pembagian yang adil dan merata). I do dohot gombaran ni ulaon na badia i; ditopihi ma roti i, sian roti na sasada i, I ma daging ni Kristus. Na manggombarhon ulaon parasinirohaon tu angka na hurangan, marhite sian pelean ni ulaon na badia i sipasahaton tu ulaon diakoni sosial dohot ulaon zending. I do na pinatupa ni sahalak Lepi sian pulo Siprus, i ma si Josep, na ginoar ni angka apostel si Barnabas (mandok: Anak ni pangapulon). Digadis ma hauma golatna, diboan ma hepeng i, laos dipeakkon ma tujolo ni angka apostel i. Pajongjong parsaoran na masihaholongan, i ma molo tangkas manarihon angka na hurangan, lam hot ma parsaoran i jala lam tamba na porsea tu Debata.

Patoluhon, Pajongjong Parsaoran Na masihaholongan marhite Minggu Quasimodogeniti, dipaingot do huriaNa laho pajongjong parsaoran na masihaholongan; parsaoran i marhataridaan sian angka parmahan (uluan), parjamita dohot pangula ni huria, marhatauon manghobasi sitolu panjouon ni huria, ngolu parsaoran, panindangion dohot panghobason, di ngolu parhahamaranggion na sisada tohonan, tau tiruan di tongatonga ni huria, lomo roha ni ruas ni huria marnida parsaoran nasida. “Ida ma, dengganna i dohot sonangnai, molo tung pungu sahundulan angka na marhahamaranggi” (Psalm 133:1). Ende 122:1, 4  Ida hinadengganni angka na sarohai parpambaenan na burju nang hatana pe tutu, diparbaga Debata tu namarsarohada pasupasu na godang ima roha na sonang  Debata Manghobasi di bagasan ruhut-ruhut ni huria, haposan di na saluhutna. Mangolu di bagasan roha na dame, na masianjuan dohot holong panghophopon laho manghamonangkon barita nauli i. Tarlumobi ma mangulahon ulaon parasinirohaon, manarihon angka na hurangan. Amen.

Pdt Jonni DS Tambun STh