SERMON JAMITA MINGGU 23 OKTOBER 2022 2 TIMOTEUS 2:1-13

 

Bahan Sermon Parhalado HKBP Resort Kisaran

Minggu XIX Dung Trinitatis, 23 Oktober 2022

“MANAON NA PORSUK SONGON SIIHUTHON KRISTUS”

(2 Timoteus 2: 1-13)

 

Patujolo

Molo dihatai taringot tu sitaonon, tottu sude do naeng dao sian i, jala unang ma nian sahat i lumobi tu halak na porsea, boi dohonon sai hira sude do hita naeng pasidinghon sitaonon i, ala dang adong jolma na lomo rohana mangolu dihaliangi sitaonon, udut tusi na gabe sungkunsungkun di roha, na ingkon marsitaonon do ulaning naposo ni Debata? Songoni do panjouon na ro tu angka parbarita nauli? Ima naeng idaonta marhite surat ni si Paulus tu si Timoteus di turpukta on. Di bindu on dipasahat Apostel Paulus do angka poda nang pangajarion tu si Timoteus na marimpola nang tu angka na porsea. Dibuhai Apostel Paulus do poda nang pangajarionna marhite motivasi manang dorongan tu si Timoteus, asa di na marbarita nauli si Timoteus, nda holan asi ni roha ni Kristus Jesus do i. Diuduti mai dohot na diparade ibana penerusna laho marbarita nauli, asa unang mate di ibana ulaon i jala asa adong ma manguduti/manorushon.

 

Hatorangan

Paulus mendorong Timotius supaya teguh dan tekun dalam pekerjaannya, didok di ayat 1 “Margogo ma ho marhitehite asi ni roha ni Kristus Jesus”. Sian ayat on boi idaonta angka halak na marnampuna tohonan/ulaon tu Debata, ingkon motivasionna do dirina manang ingkon gogohononna do dirina laho mangulahon ulaon i. margogo marhitehite asi ni roha ni Kristus Jesus boi do dilapati nang kerja keras, dimana ada kebenaran kasih karunia, di situ harus ada kerja keras dengan kekuatan karena kasih karunia. Molo sai ro angka sitaonon manang molo lam martambatamba angka hamaolon, ringkot do hita gabe halak na tahan uji (tidak mudah goyah), marhite haporseaon na lam tang, tekad yang semakin kuat, holong marTuhan na lam balga. Jadi molo didok margogo marhite asi ni roha, lapatanna ndang mangasahon haboionniba sandiri, ndang mangasahon gogoniba sandiri, manang pingkiranniba sandiri, alai mangasahon asi ni roha ni Kristus Jesus i do.

Songon panosoion ni Apostel Paulus tu si Timoteus, songoni ma nang si Timoteus mamodahon tu angka na porsea i, asa gabe dongan manaon haporsuhon ma songon parangan na denggan di Kristus Jesus (ayat 3). Lapatanna Timoteus harus melatih orang lain untuk menjadi penerusnya dalam pelayanan injil, jala sadalan mai ingkon ajarhononna do tu nasida ganup na binegena sian Apostel i, ndang adong sipasahaton ni si Timoteus dungkon angka na binegena sian si Paulus dohot angka na jinalona sian Tuhan i. Jala angka na manjalo hatana i ima angka halak na tau haposan (setia), yang dapat dipercaya dan yang cakap mengajar orang lain (ayat 2).

Sude do halak Kristen lumobi angka naposo ni Debata gabe prajurit-prajurit (parporang) ni Jesus, na nilinggomanNa, ala Ibana do na mamboan hita tu haluaon i. Songon prajurit ni Jesus hita, ingkon pataridahononta do dirinta gabe prajurit na burju, tau haposan tu na manggomgomi ibana, hot di ulaonna molo pe ro hamaolon jala ndang mansadi berjuang laho patulushon ulaonna i. lapatanna diajari do hita marhite turpuk on asa manang ise pe na naeng gabe prajurit ni Jesus (naposo ni Debata), ingkon adopanna do hamaolon/sitaonon i, nunga ingkon taperkirahon manang taetong i hal na pasti di portibi on, jadi sahalak prajurit ni Jesus molo mangadopi hamaolon/sitaonon i, tung so jadi doi gabe pamagohon hatulusonta tu Debata manang gabe dang haposan be ibana di ulaonna.

Timotius tidak boleh memusingkan dirinya dengan urusan-urusan dunia ini (ayat 4), songoni ma nang hita molo nunga gabe prajurit ni Jesus, ingkon paluaonta do na di portibi on, asa molo las rohani komandan mida prajuritna, songoni ma nang las roha ni na marsuru hita molo taulahon ulaonta, ima Kristus Jesus i. dipodahon Apostel Paulus do tu si Timoteus nang tu hita asa taparrohahon angka aturan-aturan parporangan, didok di ayat 5 “Nang na marsiadu pe ndang dipartumpali, ia so tigor paraloonna i”. Lapatanna berjuang do hita asa monang maralohon hisaphisap ni dagingta dohot angka hajahaton i, alai ndang boi arophononta hadiah molo so taihuthon angka aturan i (seperti bertanding dalam olahraga tertentu, harus ada aturan mainnya). Jadi manungguli hita doi asa manat molo pe taulahon angka ulaonta, asa unang lipe ulaonta i manang gabe batu partuktuhan di angka dongan jolma.

Poda gambaran na parpudi dipodahon Apostel Paulus tu si Timoteus nang tu hita ima perlunya kesabaran menunggu imbalan, “Ingkon siula hauma i jumolo taruli di parbuena (ayat 6)”, lapatanna, jika kita mau menikmati buah, kita harus bekerja keras dengan rajin dan sabar, dengan kata lain, kita harus melakukan kehendak Allah sebelum menerima hal-hal yang dijanjikan itu (yang menjadi alasan kita perlu bersabar), ai lehonon ni Tuhan i do tu ho roha mangarti saluhutna i, ima angka panimbangion di angka poda na jinalo dohot manimbangi (mencerna) angka na ro sian Debata.

 

Panimpuli

Alani songon halak na porsea hita jala nampuna tohonan/ulaon tu Debata, margogo ma hita ala ni asi ni roha ni Kristus Jesus i molo pe ro hamaolon manang sitaonon di ngolunta, di panghobasionta, naeng ma taadopi i dibagasan gogo na sian Tuhan i, tuk do asi ni roha ni Debata tu ganup halak na mangasahon Ibana. Baliksa molo tarimpu boi gogonta laho mangadopi hamaolon/sitaonon i, ido na mambahen angka na porsea i gabe mandele, ido mambahen angka parbarita nauli i, gabe gale jala maheu, karena itu jadilah kuat karena kasih karunia dalam Kristus Yesus.

MARSIHOHOT DI BAGASAN PODA NI JESUS KRISTUS, JAMITA MINGGU 06 NOPEMBER 2022

 

Bahan Sermon HKBP Resort Kisaran

Minggu XXI Dung Trinitatis, 06 Nopember 2022 Evangelium: 2 Tesalonika 2:13-17

 

MARSIHOHOT DI BAGASAN PODA NI JESUS KRISTUS

 

Dongan na hinaholongan ni Tuhan Jesus!

            Najolo molo adong na so diantusi ruas tarigot tu Hata ni Debata manang taringot tu hakristenon, marpanungkun tu pangula ni huria do nasida, ima pandita, guru huria, bibelvrouw, diakones manang sintua. Alai molo saonari, nunga marhusor be; jumotjotan nama nasida manungkun tu "google." Ai molo browsing tu internet, pintor hatop jala godang do alus taringot tu na niluluan. Mansai denggan do nian godang informasi na boi dapoton ni ruas taringot tu Hata ni Debata nang hakristenon, alai ingkon manat ai godang doi na maralo tu poda na sintong. Ido na pinaingot ni Debata tu huria Tesalonik marhite apostel Paulus. Ndada holan di partingkianta na maju on godang poda haliluon; di huria bona pe nunga godang poda haliluon. Antong, tauhal ma turpuk Evangeliumta on asa dapot hita mutiha na arga sihangoluhononta di partingkian saonari.

 

Parjolo, marsitiopan ma hamu tu angka poda na huajarhon hami tu hamu (ayat 15)

            Adong na mangajarhon poda haliluon tu huria Tesalonik songon na tarsurat di ayat 2, ima: "nunga dapot ari ni Tuhan i." Panghorhon ni poda haliluon on, dang di haringkothon nasida be mangula ulaon si ganup ari, jala gabe diula nasida ma nasa lomo ni rohana. Boi tangkas tajaha di 3:11, "Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama." Mangalo poda haliluon on ma gabe diondolhon Apostel Paulus di 3:10, "Na so ra mangula, unang ma ibana mangan." Ima poda haliluon na masa di huria Tesalonika. Asa unang lam rarat haliluon on, ditongos Apostel Paulus ma suratna tu huria Tesalonik na mandok: marsitiopan ma hamu tu angka poda na huajarhon hami tu hamu (ayat 15). Molo tung pe sanga adong ruas ni huria Tesalonik na mangihuthon poda nang ngolu haliluon i, anggiat mulak nasida tu poda nang ngolu na sintong. Apostel Paulus mangajarhon asa unang mura nasida dilindak-lindak pangajarion na mamboan nasida dao sian hasintongan.

            Boha hita di partingkianta sisaonari? Songon na hudok di patujolo ni jamita on, tahalashon do godang ni pangajarion na boi dapot hita di internet alai ingkon manat do hita; ai adong do disi poda haliluon, isarana "Teologi Sukses" na mangajarhon: molo mangihuthon Tuhan Jesus, pasti sukses dalam arti mamora di arta, marpangkat timbo, dohot lan na asing. Sintong doi? Daong. Teologi na sintong, na niajarhon jala na hinangoluhon ni Tuhan Jesus ima Teologi Salib. Lapatanna, rade mangihuthon dalan ni Kristus mangulahon hasintongan. Ingkon tongtong satia mangihuthon Jesus manang aha pe na masa, las ni roha manang arsak. "Teologi Salib," dang marlapatan gabe so adong kesuksesan, dang marlapatan gabe so boi mamora dohot marpangkat; boi do sukses jala denggan do molo mamora, alai ndang kesuksesan gabe ukuran mutlak ni pasupasu; ndang boi kesuksesan di portibi gabe tujuan ni ngolu ni na porsea. Tontu, tumabo do umbege Teologi Sukses sian Teologi Salib. Di huria Tesalonik pe hatihai tumabo do umbege poda haliluon: "nunga ro Tuhani alani dang pola mangula ulaon, jala lomo niba ma niula." On do na tinulak ni Apostel Paulus di turpuktaon. Dang ala tabona begeon, dang ala hombar tu pingkiranta gabe ima poda na sintong. Tutu, ndada holan Teolog Sukses na gabe poda haliluon di partingkianta saonari; ragam nari isarana na ro ma Tuhanta tanggal, bulan, dohot taon tertentu, mambakar ulos ala hasipelebeguon do ulos, ingkon tardidi paduahalihon marhite pandidion selam asa malua, dohot lan na asing. Ragam pangajarion taringot haluaon, alai ingkon mulak do hita tu Hata ni Debata songon na tarsurat di Bibelta. Dia ma haluaon na binaritahon di Bibelta?

 

Paduahon, ala dipillit Debata hamu sian mulana, asa saut hamu malua (ayat 13)

            Di ayat 13 tarsurat do paboa nunga dipillit Debata hita sian mulana asa malua. Lapatanna, dang hita na mambahen dalan haluaon, dang adong jolma na boi palua dirina sandiri; Debata sandiri do na paluahon hita di bagasan Tuhan Jesus, alani nasa na porsea di Tuhan Jesus nunga dapotan haluaon sian dosa dohot hamatean. Haluaon na nidokna ndada holan ngolu di portibi on alai dohot do ngolu sogot songon na tarsurat di ayat 14b: "partohap hamu di hasangapon ni Tuhanta Jesus Kristus." Di ari parpudi, di haroro ni Tuhan Jesus, boanonNa ma angka na porsea tu hangoluan salelengnilelengna, tu hasangapon na di lambung ni Debata Ama raphon Tuhan Jesus Kristus. Ima jambar sihirimonta 'saleleng mangolu di portibí on! Unang adong sian hita na merasa na so dohot dapotan haluaon ai silehon-lehon ni Debata doi tu hita asal ma tajangkon di bagasan haporseaon, so marimbar na mora manang na pogos, na marpangkat manang na so marpangkat, na marjabu balga manang na manewa. Dang adong na boi mangunsati. Alani, so tung olo hita dilindak-lindak poda haliluon na mungkin tumabo begeon jala hira na ussuman tu pingkiranta. Di bagasan Teologi Salib," dapot hita jaminan ngolu di portibi on nang sogot. Ndada boban Teologi Salib/ Teologi Silang alai Barita na Uli do i.

 

Patoluhon, Tuhanta Jesus Kristus dohot Debata Amantama mangapuli jala pahothon rohamuna di bagasan nasa ulaon nang hata na denggan! (ayat 16-17)

            Ndada mura mangihuthon Teologi Salib, jala ndada mura manirang poda na sintong sian poda haliluon ala ni bahat, hatop, jala mura ni informasi di partingkianta saonari. Alai, ndang pola mabiar hita disi. Dilehon do jaminan tu hita di ayat 16-17: Debata sandiri na pahothon rohanta. Apala AnakNa Tuhan Jesus dilehon asa malua hita, gabe pasombuonna ma hita lilu? Loaşonna ma hita dilindak-lindak poritibi on? Tontu daong. Unang tapangasahon dirinta, unang tapatujolo pingkiranta, baliksa tapasahat sude ngolunta, rohanta, pingkiranta hibul holan tu Debata; Ibana sandiri na pahothon hita di poda na sintong, asa gabe tubu ma ulaon dohot hata na denggan. Na ringkot ima martangiang tu Tuhan i asa dilehon tu hita Tondi Parbadia laho mananda dia poda na sintong jala dia poda haliluon.

            Antong, marsihohot ma hita di bagasan poda ni Jesus Kristus songon na tarsurat di Bibelta jala marpanungkun ma hita tu pangula ni hurianta ai nunga dipalua hita sian mulanai. Amen.

 

ACARA ADVENT NATAL PANGULA NA GOK TINGKI DOHOT KELUARGA DISTRIK XIII ASAHAN LABUHAN BATU

 

ACARA ADVENT NATAL

PANGULA NA GOK TINGKI DOHOT KELUARGA

DISTRIK XIII ASAHAN LABUHAN BATU

 

 

 

 

 

 

 

 

 

 

 

 

Thema :

“Pos ma rohamuna, Ahu do. Unang hamu mabiar (Mateus 14 : 27)”

 

Kisaran, Selasa 07 Desember 2021

A.  Pangaradeon Di Bilut Parhobasan

1.         Sude angka na marhobas mangarade diri ma di Bilut Parhobasan.

2.        Dung Martangiang, mardalan ma Barisan Prosesi mamongoti Bagas Joro

B.  Joujou Tu Parsaoran

L   : Huria na hinaholongan ni Tuhanta Jesus Kristus, selamat ADVENT ma di hita saluhutna! Na mamolus do hita di partingkian na so manontu di taon 2021 on, alai laos disi do tapanghilalahon balga ni pangurupion ni Tuhan Debata dibagasan ngolunta, na sai satia mangaramoti ngolunta sahat tu partingkianon.

R  : Laos ido na hupanghilalahon hami, holan alani asi ni roha ni Tuhan Debata do na patolhasson hita tu Taon Baru Parhuriaon ditingkion.

L   : Na marpungu do hita nuaeng di Bagas Joro ni Tuhanta, di Advent Natal Pangula na gok tingki dohot Keluarga mangahamauliatehon denggan basa ni Tuhan Debata na sai satia mangurupi hita di nasa panghobasion na marragami. Alani tapahibul ma rohanta paihutihut acara na pinatupa dison, gabe pamujion dohot hasangapon ma i di Tuhan Debata Jahowa.   

C.  Ibadah dohot Liturgi

01.         Marende No. 48: 1 + 5 “Ria ma hita sasude”

^♫♪♫ Ria ma hita sasude mamuji Debata, girgir ma parendenta be,

     ai i do na tama, ai ido na tama.

(Jongjong ma hita saluhutna.)

^♫♪♫ Dibahen i las situtu do rohangkon nuaeng. Hujangkon Jesus i tutu,

     ai sonang au dibaen, ai sonang au dibaen.

02.         Votum - Introitus - Tangiang:

(L=Liturgis, H=Huria, S=Sude; SL= Song Leader)

L     :  Marhitehite goar ni Debata Ama, AnakNa Tuhan Jesus Kristus, dohot Tondi Parbadia na manompa langit dohot tano on. Amen. Ho do ale Jahowa, dihalungunhon rohangku. Ale Debatangku, marhaposan tu Ho do ahu, sai unang paila ahu, asa unang marsuraksurak angka musungku mida ahu.

H    :  Ndang tahe tagamon tarurak manang ise sian angka na manghaposi Ho, ale Jahowa. Sai pabotohon ma tu ahu angka dalanMu, jala ajarhon tu ahu angka bogasMu. Sai togutogu ma ahu tu bagasan hasintonganMu, jala ajari ahu, ai Ho do Debata ni hatuaongku, Ho do na huhaposi ganup ari.

L     :  Magira ma Ahu ro. Tiop ma na di ho nuaeng, asa unang adong na mambuat tumpalmi.

H    :  Gabe Daging ma Hata i jala maringanan di tonga-tonga ni hita on, jadi huida hami ma hasangaponNa, i ma hasangapon ni Anak sasada na sian Ama i, gok asi ni roha dohot hasintongan.

L     :  Martangiang ma hita: Ale Amanami na banuaginjang! Na so marmula jala na so marpansohotan, Debata na manongtong ro di saleleng ni lelengna! Asi ni rohaM sambing do napasadahon hami saluhutna Pangula na gok tingki dohot Keluarga marlas ni roha di tingki on marhite Advent Natal manghalashon pambahenanMu marhite AnakMu Jesus Kristus Tuhannami. Marhite perayaan Advent Natal on, sai lam pahinsa ma roha dohot tondinami patulushon lomo ni rohaM di tonga-tonga ni Punguannami on tarlumobi ma di HuriaM. Urupi jala pargogoi ma hami manjangkon hatutubu ni AnakMu Tuhan Jesus Kristus Sipalua i. Amen! (Hundul)

03.         Marende BE No.598  “Bege Ende ni Suruan”

^♫♪♫  Kristus Raja sian surgo tuat tu portibi on, Tubu sian si Maria lao manobus hita on, Debata na so tarida gabe daging songon hita, Nunga raphon hita be Jesus i, Immanuel, Ende ni suruan i, sangap ma di Tuhan i.

^♫♪♫  Jesus Raja Hadameon sondang hatigoran i, Panondang ni hangoluan di saluhut jolma i Dirumari do diriNa lao manobus manisia, Asa unang mate be ala ni dosana be, Ende ni suruan i, sangap ma di Tuhan i.

04.         Manjaha Epistel

L   :  Turpuk epistel di ADVENT NATAL Fulltimer dohot Keluarga Distrik XIII Asahan Labuhanbatu, tarsurat do di Sepania 3 : 14 – 20 , songon on ma didok disi, tajaha ma marsingkatsorin : Mariaia ma ho, ale boru Sion! Marolopolop ma ho ale Israel! Marlas ni roha ma ho jala marolopolop sian nasa roham, ale boru Jerusalem!

H  : Nunga diunsat Jahowa uhumNa tu ho, nunga disiaphon musum: Ai Jahowa raja ni Israel do di tongatongami, ndang be idaonmu hinamago.

L   : Di ari na sasada i, dohonon ni halak ma tu Jerusalem: Unang ho mabiar, ale Sion! Unang palenduk tanganmu.

H  : Ai Jahowa Debatam do di tongatongami, ulubalang silehon tua do ibana. Marlas ni roha situtu ibana mida ho, hohom ibana di bagasan haholongon ni rohana; marolopolop ibana mardongan pujipujian mida ho.

L   : Halak na gondok roha, angka na holang sian luhutan i, papunguonku do; marharoroan sian ho do nasida, angka na nidondonan ni haurahon nasailaon.

H  : Ida ma marlulu ma ahu di tingki na sasada i, dompak sude angka na mangarupa ho; pamalumonku ma halak na mengkat, jala papunguonku halak na pinabali, jala bahenonku nasida gabe pujipujian, jala marbarita di saluhut tano haurahon nasida nasailaon.

L   : Di tingki na sasada i togihononku ma hamu mulak tu tanomu laos papunguonku ma hamu disi. Ai bahenonku ma hamu marbarita jala gabe hamuliaon di tongatonga ni saluhut angka bangso ni tano on, ia dung hupaulak angka na tarbuang sian hamu tu jolo ni adopanmuna ninna Jahowa. Ido sahatna, Martua ma na tumangihon hata ni Debata jala na umpeopsa.

H  :  Amen.

05.         Marende BE. No. 608:1 “O Betlehem na metmet i”

(Ditingki marende ro ma liturgi na parjolo tu jolo)

^♫♪♫ O Betlehem na metmet i boasa modom ho,

     humirdophirdop bintang i hohom marnida ho.

     Alai ro sian ho do Panondang na tongtong

     na pinarsinta na sai laon sorang di borngin on.

06.         Liturgi 1 : Res. Kisaran, Res. Kisaran 2, Res. Air Joman

Prolog : Dimulana i, andorang so ojak dope tano on, nunga adong hata i. Jala marhite hata i do manjadi saluhutna. Tatangihon ma parjadi langit dohot tano on marhite hata i.

1. Yoh 1:1-3

2. Psalmen 33:6+9

3. Angka langit do mamaritahon hamuliaon ni Debata, jala jadijadian ni tanganna do pinaboa ni na rata-rata ni langit, masipaboaan do angka ari, jala masilehonan parbinotoan do angka  borgin,

4. Sian topi ni langit do habibinsarna jala tolhas ro di angka topina muse pangkusorna i, jala ndang adong na buni maradophon mohopna i.  Antong panggual panggorsi bahen hamu ma gondang mulamula i ai marmula do luhut na adong di portibion

5. Binsar mata ni ari, poltak matani bulan. Goar ni Debatama tapuji ai Ibana do manompa saluhut na. Sai dipuji langit jadijadianMu, saluhut pambahenamMu, parsinondang bolon Ho,Ho o Tuhan do di puji, bulan i, bintang pe Ho do pinujina dohot sinondangna.

6. Debata do manggomgomi, langit dohot tano on, haholomom digomgomi dohot hatiuron on, dirajai tanganna i nasa na tinompa i

7. Tung mansai bagak do angka hauma jala ida ma tung mansai rade jala uli do ditompa Debata angka duhut duhut dinalaho sipanganon ni angka binatang na manggulmit.

8.  Songon hau do Ibana, na sinuan di topi ni batang aek, na marparbuehon parbuena di hajujumpang ni tingkina bulungna pe ndang olo malos, jala sude na niulana manjadi do

9.  Molo hutailihon langitmi angka jadijadian ni jarijarim, bulan dohot bintang, angka pinaulim tung aha manian jolma i, umbahen pola ditaringoti roham ibana ?

10. Humurang apala otik do ibana sian Debata dibahen Ho, alai ditalitalihon Ho muse hamuliaon dohot hatongamon tu ibana, dipabangkit ho do ibana gumonggom angka jadijadian ni tanganmu sude do tahe dipatunduk Ho Ibana

11. Angka birubiru dohot lombu sudena ro di binatang angka na di harangan, pidong angka na di toru ni langit dohot angka dengke di laut, ro di sude na manginsir di laut. Ale Jahowa sigomgom hami mansai sangap do goarmu di liat ni portibion.

07.         Marende BE No. 591: 2  ” Boru Sion Las roham”  

^♫♪♫ Anak Daud ro ma Ho! Pasupasu bangsoMon,

     harajaonMu hot tongtong dame ma di tano on,

     hosianna ro ma Ho! Pasupasu bangsoMon.

08.         Liturgi 2 : Res. Labuhan Ruku, Res. Labuhan Ruku II, Res. Desa Gajah, Res. Exaudi

Prolog : Songoni ma ditompa Debata langit dohot tano jala ditompa jolma i tumiru rupana tudos tu pangalahona. Uli do parsaoran ni jolma dohot Debata di tingki i jala ndang hurangan nasida. Alai, dang diboto jolma i magona, sai dipatimbo do dirina naeng dos dohot Debata namanompa ibana. Gabe madabu ma nasida tu bagasan dosa.

1.  1 Musa 3:1             5. 1 Musa 3:8-9                   9. 1 Musa 3:24

2. 1 Musa 3:2-3          6. 1 Musa 3:11-12

3. 1 Musa 3:6             7. 1 Musa 3:13-14

4. 1 Musa 3:7             8. 1Musa 3:22-23

09.         Mangendehon BE 53: 3  “Di Betlehem”

^♫♪♫ Sai naeng haholonganku Ho ale Tuhanki.

Nang marsak las rohangku, ingkon lam ganda i.

Olo, olo ingkon lam ganda i.

 

 

10.         Liturgi 3 : Res. Serdang Dua, Res. Silau Maraja, Res. Buntu Pane

1. Ndang adong na tigor nanggo sada, ndang adong na marroha, na usouso di Debata. Saluhut jolma nugga manimbil, tung sange do nasida marroha mago ndang adong sibahen na denggan naggo sada.

2. Sai manumpak ma Ho ale Jahowa ai nungga lam moru angka na daulat marroha i, lamotik do manisia, angka na bueju marroha, na so hasea i do dihata i be dohot donganna, marbibir na llandit, jala mardua roha nasida mangkatai.

3. Saluhut do manisia sumurut, tung sange do nasida marroha mago, ndang adong sibahen na denggan, nanggo sahalak. Dibagasan jolma mangkuling pangalaosian tu parjahat i : ndang marhabiaran tu Debata be roha ni jolma jala jumojotan do manisia di elaela simalolong na dinalaho mangulahon angka na jat.

4. Getegete dohot pangansion do hatahata ni pamanganna, nungga mansadi ibana mamingkiri mangulahon na denggan, getegete nama dipingkiri di atas podomanna i, dalan na so ture i nama ditopot, ndang be dihabiashon na jat i.

5. Ninna na oto i do di bagasan rohana; ndang adong Debata; jahat jala sogir do nasida marpangalahohon hajahaton, ndang adong siulahon na denggan.Ndang tarbahen be turak, ai nungga sor gok taganNdang tarbahen be mulak, ai nungga sor sun mardalan

6. Nunga dibagasan dosa be hita ala naung tarlalap do hita diangka ulaon na jat, hinorhon ni i sega ma parrsaoran ni manisia tu Debata.

7. Parrimas do Debata, na mangaluluhon hajahaton ni amana tu angka anakna ro disundut patoluhon dohot paopathon angka na sogo roha di Ibana, da songon i nang di dok niuppasa”dangka ni tadatada,manjomba tu bonana, hasalaan ni amana mangonai tu anak na.

8. Landit porhot songoon gota ni hapea, hansit ngotngot naung sangap gabe marlea ; songoni do nang hita, nungga ditompa Debata hita tumiru rupaNa alai gabe marlea dohita ala sai di datdati hita mangulahon angka dosa jala sega ma rupa ni Debata naung adong hian di hita.

9. Tung mansai las do rohanta molo sangap  ni roha soggop tu hita alai jotjotan do hita marlosok ni roha do hita mamuji Debata marhitehite parmingguon dinalaho marsaor dohot dongan sahaporseaon.

10. Di pargoluan siapari sai tapangke do angka tingkitta mangulahon angka na jat  jala tahaporseai do angka gogo ni portibion  jala sai tarpodom do hita dihaportibion, molo sahit na renge gabe tatundalhon do Debata jala mangido hamamalum ni sahit sian angka ruparupa ni portibion

11. Hamoraan, hagabeon dohot hasangapon i do na pinarsinta ni halak Batak, Toho tutu namora do luhut halak batak ala tung mansai godang do angka HOTEL ni batak. Hotel ima; hosom, teal dohaot late, da hinorhon ni dosa saluhutna i?

11.         Mangendehon BE No 605: 1 “Las ma roham Tuhanta ro”

^♫♪♫ Las ma roham Tuhanta ro, gumomgom sasude,

     ungkap roham, jangkon Rajam. Marende ma sude,

     marende ma sude, marende, marende ma sude.

12.         Liturgi 4 : Res. Mutiara, Res. Tanjung Balai, Res. Persatuan, Res. Sei Loba.

Prolog : Patuginjang ma tohang muna, hamu ale angka harbangan, patuginjang ma hamu, ale angka pintu sian na robi asa bongoot Raja Hamulion! Ise ulaning Raja ni hamuliaon i? Ima jahowa, na gogo jala ulubalang, Jahowa Uluballang di hamusuon. Paruginjang ma tohangmuna, hamu ale angka harbangan, jala patuginjang ma hamu, ale angka pintu sian na robi, asa bongot raja ni hamuliaon i ! ise ulaning ibana, Raja ni hamuliaon ?i ma Jahowa Zebaot, Ibanna do raja  ni hamuliaon.

1.         Bangso na mardalani di bagasan haholoman marnida sada panondang na bolon. Binsar do sada panondang di angka na manondangi tano linggoman ni hamatean.

2.         Songonon do hatani Jahowa: Radoti hamu uhum, jala ulahon hamu hatigoran, ai jonok na ma asa ro hatuaonku, jala papataron hatigoranKu.

3.         Hehe ma ho! Marinondang ma ho! Ai na ro ma panondangmu, jala hamuliaon ni jahowa binsar di atasmu.Ai ida ma, haholomon do manghukkupi tano on, jala hagolapan angka bangso; alai na binsar na binsar ma Jahowa di atasnu, jalamarsinoondang hamulionna di atsamu.

4.         Mariaia situtu ma ho, ale boru Sion, marolopolp ma ho ale boru Jerusalem! Ida ma, na ro ma rajam tumoot ho, partigor ibsns jsls siparmonang; na serep do rohana jala marsihundul di halode dohot di anak ni halode inaina.

5.         Dungi mulak ma rohamuna, jadi idaonmuna ma hasurungan ni halak partigor martimbangkaon halak parjahat, hasurungan ni halak sioloi Debata, martimbangkon halak na so mangoloi ibana

6.         Ai ida ma, na ro ma ari na marsigorgor, songon pamurunan, jadi  doshon durame sude halak na jungkat dohot halak siulahon hajahaton, gabe marsijembur ma nasida bahenon ni ari na ro sogot, ninna Jahowa Zebaot, ndang adong tadingkononna di nasida nang urat, nang ranting.

7.         Songon pangkalungunhon ni ursa di angka guluan, songon i doo pangkalungunhon ni tondingku tu Ho, alle Debata. Mauas do tondingku di Debata, ni Debata na mangolu i, andigan pe tolhas ahu asa huida bohini Debata/

8.         Ndang male nasida, ndang be mauas, ndang be ditinggang las ni ari nasida, manang dia na mohop pe. Ai parmahanon ni birubiru na di parsintongan ni hababangsa i do nasida jadi  togihonna ma nasida tu angka mual aek hangoluan, jadi apusan ni Debata nasa iluilu sian matanasida.

9.         Jadi hubege ma soara na gogo sian hababangsa i, na mandok :on do joroni Debata di tongatonga ni angka jolma; na maringanan ma Ibana di tongatonganasida, jala nasida ma bangsona, jala Debata sandiri saor tu nasida.

10.      Jadi apusan ni Debata ma nasa iluilunasida sian matanasida: ndang adong be hamatean nang arsak ni roha: nang angguhangguk, nag na hansit, ndang disi be; ai nungga salpu na parjolo i. Asa songonhata ni uppasa na mandok :marasar sidaodao, dipunsu ni durian. Salpu ma angka parungkilan, sai roma angka nadenggan.

11. Teaon ni na monang i ma saluhutna; jala Ahu gabe Debatana, ibana gabe anakku. Didok ibanama mangkahatindangkon on : olo, na ro ma Ahu tibu! Amen :roma Ho, ale Tuhan Jesus.

13.         Mangendehon BE 55: 1– 2 “Hatuaon do”

^♫♪♫ Hatuaon do las ni roha do Hatutubu ni Jesus i.

Mago do jolma Ro ma Tuhanta Las be, las be ma rohanta i.

^♫♪♫ Hatuaon do las ni roha do Hatutubu ni Jesus i.

Domu do hita Tu Debatanta Las be, las be ma rohanta i.

14.         Liturgi 5 : Res. Air Batu, Res. Pulo Raja, Res. Aek Loba, Res. Sukarame

Prolog : Saut do bagabaga ni Debata tu portibi on marhitehite hatutubu ni Jesus Sipalua i.  Ibana do hapataran ni Debata Ama, na mangarumari diriNa gabe jolma : na tinubuhon ni si Maria na gabegabean sian Tondi Porbadia andorang so habubuhan. Ibana do Tuhan na humophop dohot paluahon jolma manisia. Tabege ma barita hatutubu ni Sipalua i :

1. Matius  1 : 18 – 19                 5. Lukas   2  :  1 – 2             9. Lukas   2  :  10–11

2. Matius  1 :  20                         6. Lukas   2  :  3 – 4             10. Lukas   2  :  12–13

3. Matius  1  : 21– 22                 7. Lukas   2  :  5 – 7             11. Lukas   2  :  14

4. Matius  1  : 23+25                 8. Lukas   2  :  8 – 9

15.         Perenungan – Pagalak Lilin

L = Liturgist, H = Huria, Pj = Parjamita, S = Sude

L     :    Nunga ro Tuhanta manopot bangsoNa jala mamboan haluaon. Ido na tatomutomu di Advent Fulltimer Distrik XIII Asahan Labuhabatu on. Alai haholomon do jotjot manghuphupi tano on jala lam tu jorbutna do pangela ni sibolis i mangihoti torop jolma, disegai do tondi, haporseaon dohot panghirimon sogot. Digunturi na marrumatangga, disegai nang roha ni ianakhon asa tois tu hata ni Debata. Alani i tama do hita di pesta Natal borngin on pahusorhusorontai dibagasan rohanta be.

H    :    Tung godang do tutu ale Tuhan, parungkilon na hubolus hami, topot ma tutu sandok ngolunami asa sumuang las ni rohanami.

L     :    Lam godang pe angka parungkilon namasa di tongatonga ni ngoluon, torop angka na pengangguran, torop angka na pesimis di disihirimon torop angka na pogos di arta lumobi di partondion, torop na mangadopi pardangolan na marragam, alai ingot ma, ala ni i do umbahen na tuat Jesus sian banua ginjang sorang tu portibi on, asa disondangi sandok ngolunta, antong songon dia pe rumang ni parngoluan na niadopanmu nuaeng, di arsak manang las ni roha, sai ungkap ma tongtong roham asa sorang Ibana di bagasan ngolum.

H    :    Sorang ma Ho tutu ale Tuhan tu bagasan rohanami, sondangi ma ngolunami.

Solo: (Mangendehon BE No.616 : 3   “Ulina i di borngin na badia”)

Uli na i sude marlas ni roha,  Ala naung songgop harajaonNai

Huria i ria do ro marsomba, Mamuji Raja na sun sangap i

Ibana do panondang hangoluan, Na mangalehon pangkirimon i

Uli na i marende do suruan di borngin i do tubu Kristus i

Di borngin i do tubu Kristus i.

• Di tingki marende solo, ro ma Parjamita, Liturgis, utusan Pandita, Utusan Guru Huria, Utusan Bibelvrouw, Utusan Diakones, Utusan Keluarga Fulltimer.
• Galahan ni parjamita dohot angka utusan ma lilin na dilanggatan.

Pj    :    Nunga galak be lilin di tongatonganta, ima hataridaan ni panondang i. Jangkon ma sondang na sian Tuhantai, las ma roham manjalo, laos tendehon ma hatutubuna i.

H    :    Mangendehon BE No. 54 : 1 – 3 “Sonang ni bornginnai” (Jongjong)

^♫♪♫ Sonang ni bornginna i uju ro Jesus i, sonang modom do halak sude

Holan dua na dungo dope, mangingani anakna Jesus Tuhantai

^♫♪♫ Denggan ni bornginnai uju ro Jesus i, tu parmahan di betlehem i

Dipaboa na di surgoi, nunga ro sipangolu Jesus Tuhantai.

^♫♪♫ Godang ni tua disi, di naro Jesus i, tung malua pardosa muse

Sian hamagoanna sude, ala ro sipangolu Jesus Tuhantai (Hundul)

16.         Marende BE No. 56: 3“Sai roma hamuna”

^♫♪♫ O Jesus Tuhanku sai naeng pujionku, pambaenMu di ahu pardosaon on.

Ai gabe jolma Ho humophop ahu. Tasomba ma Ibana, tasomba ma ibana, tasomba ma Ibana Rajanta.

17.         Liturgi 6 : Res. Aek Kanopan, Res. Kualuh Selatan, Res. Pardomuan Nauli

Prolog: Ro do Tuhanta Jesus Kristus tu portibi on asa malua angka jolma pardosa sian pangalaho na roa i. Ingkon ma tarida i di perilaku ni hita jolma, jala on do di halomohon Tuhanta, i ma : hamubaon ni roha  manang  pertobatan. Antong, tabege ma joujou ni Tuhanta taringot tu : ngolu na imbaru, songon na tarsurat di Rom 12 : 2, “Jala unang sarombang hamu dohot portibi on, alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinahalashonNa dohot na sun denggan.”

1.  Galatia  5 : 6 + 22

2.  Efesus  4 : 22 + 24

3.  Efesus  5 :  1 – 2

4.  1 Tesalonik 4:3–4

5.  Efesus 5 : 21-22+25

6.  Josua  24 : 15

7.  Ulaon Ap 16  : 31

18.         Marende BE No. 57 : 1 “Nunga Jumpang”

^♫♪♫ Nunga jumpang muse ari Pesta i.  Hatutubu ni Tuhanta Jesus i.

Tuat do Ibana sian surgo i Mebat tu hita on. Hasangapon di Debata, dame,dame ma di jolma. Las ni roha ni Debata Hajolmaon muse.

19.         Liturgi 7 : Res. Hutabaru, Res. Sei Apung, Res. Teluk Pule Dalam, Res. Tanjung Leidong.

1. 1 Timoteus  6 : 6-8

2. Filipi  1 : 9

3. Filipi  1 : 10 – 11

4. Jakobus  4 : 7

5. Jakobus  4 : 8

6. Filipi  4  : 13

20.         Mangendehon BE No. 592 : 1 “Hosiana di Anak ni Raja Daud”

^♫♪♫ Hosianna di Anak ni Raja Daud partigor jala parmonang. Marsurak ma ho boru Sion Rajam manopot ho, Amen haleluya! Puji, tasomba Raja na sian surgo i, Amen haleluya! Puji, tasomba Raja na sian surgo i, Puji ma goarNa Raja si parmonang
Amen haleluya! Puji, tasomba Raja ni hadameon i, Amen haleluya! Puji, tasomba Raja ni hadameon.   

21.         Jamita:

22.         Marende BE 62: 1.... ”Halalas ni roha godang”      (Papungu Pelean)

^♫♪♫ Halalas ni roha godang, na hubaritahon on,  Nunga tubu Sipalua di hita jolma on.

Reff. Hasangapon di Debata, laos dame, dame dame ma di jolma. Lomo ni roha ni Debata do hita jolma on.

^♫♪♫ Tuhan Jesus hadomuan na disuru Debata,  na pasaehon sude dosa di dolok Golgata.  Reff. Hasangapon di Debata......

--- musik ---

^♫♪♫ Sai sondangi ma rohangku, ale Tuhan Jesus i, asa dohot au maruli di hatutubuMi. Reff. Hasangapon di Debata......

^♫♪♫ Halalas ni roha godang sai songgopi rohangki.  Asa dohot au ummalo, mamuji goarMi. Ref. Hasangapon di Debata.........

23.         Parsuruon - Tangiang Pelean- Ale Amanami - Pasupasu!

 Uluan  : Sian on ma tatanda haholongon  ni roha I, sian Ibana na mangalehon hosanna  hamokhop hita, hita  pe tama do masihaholongan sama hita.

Huria  : Olo Tuhan, sai didongani jala dipargogoi TondiMi ma hami, mangulahon haholongan i.

Uluan :  Sai mian dibagasan Ahu ma hamu, Songon Ahu dibagasan hamu

Huria  :  Pargogoi ma hami Tuhan  marhitehite TondiMi, asa tongtong mian hami dibagasan HataM i.

Uluan :  Molo mian hamu dibagasan Ahu, gabe marsangap ma Damang, mamparbuehon  na godang ma hamu, jala gabe angka siseanKu ma hamu.

Huria  :  Olo Tuhan, Sai dipargogoi TondiMi ma hami mamparbuehon na godang, jala asa gabe siseanMu hami, siulahon  Patikmi.

Uluan :  O hamu halak Kristen, mian ma hamu dibagasan Kristus i.

Huria  :  Olo Tuhan, sai tambai ma hiras ni rohanami, mangulahon hatigoranmi, Amen.

Uluan :  Antong tapasahat ma pelean na tapapungu on tu Debata, martangiang ma hita : Ale Debata, Amanami na di banua ginjang……..

Huria  :  ( Mangendehon ) Nasa na ni lehon Mi……dst

Uluan :  Ale amanami na di banua ginjang………...dst

Huria  :  ( Mangendehon ) Ai Ho do nampuna……..dst

Uluan :  Pasupasu :

Huria  :  ( Mangendehon ) Amen, Amen, Amen.

D.     Ulaon Di Sopo :

A. Marsipanganon

B. Hata Sambutan Sian :

Mandok Hata :

1. Utusan Sian Pandita

2. Utusan Sian Guru Huria

3. Utusan Sian Bibelvrow

4. Utusan Sian Diakones

5. Pasahat Penali Kasih tu Janda/Duda na Fultimer na berdomisili di Aslab

6. Bimbingan sian Praeses Distrik XIII Asahan Labuhanbatu

7. Angka Informasi sian Sekdis molo adong.