MARSIHOHOT DI BAGASAN PODA NI JESUS KRISTUS, JAMITA MINGGU 06 NOPEMBER 2022

 

Bahan Sermon HKBP Resort Kisaran

Minggu XXI Dung Trinitatis, 06 Nopember 2022 Evangelium: 2 Tesalonika 2:13-17

 

MARSIHOHOT DI BAGASAN PODA NI JESUS KRISTUS

 

Dongan na hinaholongan ni Tuhan Jesus!

            Najolo molo adong na so diantusi ruas tarigot tu Hata ni Debata manang taringot tu hakristenon, marpanungkun tu pangula ni huria do nasida, ima pandita, guru huria, bibelvrouw, diakones manang sintua. Alai molo saonari, nunga marhusor be; jumotjotan nama nasida manungkun tu "google." Ai molo browsing tu internet, pintor hatop jala godang do alus taringot tu na niluluan. Mansai denggan do nian godang informasi na boi dapoton ni ruas taringot tu Hata ni Debata nang hakristenon, alai ingkon manat ai godang doi na maralo tu poda na sintong. Ido na pinaingot ni Debata tu huria Tesalonik marhite apostel Paulus. Ndada holan di partingkianta na maju on godang poda haliluon; di huria bona pe nunga godang poda haliluon. Antong, tauhal ma turpuk Evangeliumta on asa dapot hita mutiha na arga sihangoluhononta di partingkian saonari.

 

Parjolo, marsitiopan ma hamu tu angka poda na huajarhon hami tu hamu (ayat 15)

            Adong na mangajarhon poda haliluon tu huria Tesalonik songon na tarsurat di ayat 2, ima: "nunga dapot ari ni Tuhan i." Panghorhon ni poda haliluon on, dang di haringkothon nasida be mangula ulaon si ganup ari, jala gabe diula nasida ma nasa lomo ni rohana. Boi tangkas tajaha di 3:11, "Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama." Mangalo poda haliluon on ma gabe diondolhon Apostel Paulus di 3:10, "Na so ra mangula, unang ma ibana mangan." Ima poda haliluon na masa di huria Tesalonika. Asa unang lam rarat haliluon on, ditongos Apostel Paulus ma suratna tu huria Tesalonik na mandok: marsitiopan ma hamu tu angka poda na huajarhon hami tu hamu (ayat 15). Molo tung pe sanga adong ruas ni huria Tesalonik na mangihuthon poda nang ngolu haliluon i, anggiat mulak nasida tu poda nang ngolu na sintong. Apostel Paulus mangajarhon asa unang mura nasida dilindak-lindak pangajarion na mamboan nasida dao sian hasintongan.

            Boha hita di partingkianta sisaonari? Songon na hudok di patujolo ni jamita on, tahalashon do godang ni pangajarion na boi dapot hita di internet alai ingkon manat do hita; ai adong do disi poda haliluon, isarana "Teologi Sukses" na mangajarhon: molo mangihuthon Tuhan Jesus, pasti sukses dalam arti mamora di arta, marpangkat timbo, dohot lan na asing. Sintong doi? Daong. Teologi na sintong, na niajarhon jala na hinangoluhon ni Tuhan Jesus ima Teologi Salib. Lapatanna, rade mangihuthon dalan ni Kristus mangulahon hasintongan. Ingkon tongtong satia mangihuthon Jesus manang aha pe na masa, las ni roha manang arsak. "Teologi Salib," dang marlapatan gabe so adong kesuksesan, dang marlapatan gabe so boi mamora dohot marpangkat; boi do sukses jala denggan do molo mamora, alai ndang kesuksesan gabe ukuran mutlak ni pasupasu; ndang boi kesuksesan di portibi gabe tujuan ni ngolu ni na porsea. Tontu, tumabo do umbege Teologi Sukses sian Teologi Salib. Di huria Tesalonik pe hatihai tumabo do umbege poda haliluon: "nunga ro Tuhani alani dang pola mangula ulaon, jala lomo niba ma niula." On do na tinulak ni Apostel Paulus di turpuktaon. Dang ala tabona begeon, dang ala hombar tu pingkiranta gabe ima poda na sintong. Tutu, ndada holan Teolog Sukses na gabe poda haliluon di partingkianta saonari; ragam nari isarana na ro ma Tuhanta tanggal, bulan, dohot taon tertentu, mambakar ulos ala hasipelebeguon do ulos, ingkon tardidi paduahalihon marhite pandidion selam asa malua, dohot lan na asing. Ragam pangajarion taringot haluaon, alai ingkon mulak do hita tu Hata ni Debata songon na tarsurat di Bibelta. Dia ma haluaon na binaritahon di Bibelta?

 

Paduahon, ala dipillit Debata hamu sian mulana, asa saut hamu malua (ayat 13)

            Di ayat 13 tarsurat do paboa nunga dipillit Debata hita sian mulana asa malua. Lapatanna, dang hita na mambahen dalan haluaon, dang adong jolma na boi palua dirina sandiri; Debata sandiri do na paluahon hita di bagasan Tuhan Jesus, alani nasa na porsea di Tuhan Jesus nunga dapotan haluaon sian dosa dohot hamatean. Haluaon na nidokna ndada holan ngolu di portibi on alai dohot do ngolu sogot songon na tarsurat di ayat 14b: "partohap hamu di hasangapon ni Tuhanta Jesus Kristus." Di ari parpudi, di haroro ni Tuhan Jesus, boanonNa ma angka na porsea tu hangoluan salelengnilelengna, tu hasangapon na di lambung ni Debata Ama raphon Tuhan Jesus Kristus. Ima jambar sihirimonta 'saleleng mangolu di portibí on! Unang adong sian hita na merasa na so dohot dapotan haluaon ai silehon-lehon ni Debata doi tu hita asal ma tajangkon di bagasan haporseaon, so marimbar na mora manang na pogos, na marpangkat manang na so marpangkat, na marjabu balga manang na manewa. Dang adong na boi mangunsati. Alani, so tung olo hita dilindak-lindak poda haliluon na mungkin tumabo begeon jala hira na ussuman tu pingkiranta. Di bagasan Teologi Salib," dapot hita jaminan ngolu di portibi on nang sogot. Ndada boban Teologi Salib/ Teologi Silang alai Barita na Uli do i.

 

Patoluhon, Tuhanta Jesus Kristus dohot Debata Amantama mangapuli jala pahothon rohamuna di bagasan nasa ulaon nang hata na denggan! (ayat 16-17)

            Ndada mura mangihuthon Teologi Salib, jala ndada mura manirang poda na sintong sian poda haliluon ala ni bahat, hatop, jala mura ni informasi di partingkianta saonari. Alai, ndang pola mabiar hita disi. Dilehon do jaminan tu hita di ayat 16-17: Debata sandiri na pahothon rohanta. Apala AnakNa Tuhan Jesus dilehon asa malua hita, gabe pasombuonna ma hita lilu? Loaşonna ma hita dilindak-lindak poritibi on? Tontu daong. Unang tapangasahon dirinta, unang tapatujolo pingkiranta, baliksa tapasahat sude ngolunta, rohanta, pingkiranta hibul holan tu Debata; Ibana sandiri na pahothon hita di poda na sintong, asa gabe tubu ma ulaon dohot hata na denggan. Na ringkot ima martangiang tu Tuhan i asa dilehon tu hita Tondi Parbadia laho mananda dia poda na sintong jala dia poda haliluon.

            Antong, marsihohot ma hita di bagasan poda ni Jesus Kristus songon na tarsurat di Bibelta jala marpanungkun ma hita tu pangula ni hurianta ai nunga dipalua hita sian mulanai. Amen.