JAMITA 20 OKTOBER

Riston Eirene Sihotang

MINGGU XXI DUNG TRINITATIS, 20 OKTOBER 2013
Ev. Markus 12: 28-34
Tema: Manghaholongi Jahowa Dohot Dongan Jolma

I. Barita Masa
Denggan do botoonta, ugamo patik (hukum) do ugamo Jahudi. Sude gulmit ni ngoluna diaturhon do di toru ni patik (untuk segala sesuatu ada peraturannya). Jala ndang asal dibahen angka aturan i, adong do ahlina patomutomuhonsa ima na ginoarina Siboto surat (Ahli Taurat). Jadi halak on ma na mangarangrangi aturan i asa hombar tu lomo ni roha ni Debata. Sian tolap ni gogonasida marusaho do na torop pahombarhon ngoluna sandiri dohot keluargana asa saurdot tu aturan/patik i.
Alai hombar tu pardalanan ni tingki, gabe hira hasomalan sambing (rutinitas) nama ngolu parugamaonnasida i. Mardalan secara otomatis mangihuti angka aturan naung tinotophon ni siboto surat. Mansai tertib ma nian parturena, alai gabe mago ma holong ni roha di nasida, ai ndang marlangku be perasaan. Marhite na ringgas manguhal/manigati buku na badia i, gabe tangkas do diboto nasida angka dia lomo ni roha ni Debata. Unur do sude diboto angka parture ni paribadaton. Diboto do na ingkon haholongan dongan jolma, alai lelengleleng holan sesama Jahudi do na dietong donganna, asing sian i ndang be (isarana halak Samaria ndang dietong i donganna, apalagi ma ra halak hita Batak ateh?).
4 ari nai andorang so panaonon di Jesus, di Jerusalem do Ibana raphon siseanNa hatiha i. Mangihuthon kalender Jahudi, tongon ma i di tanggal 10 bulan Nisan . Tongon 2 ari na mangihut (tgl 12 Nisan) ro do halak Saduse mandapothon Ibana, marsoal jawab ma nasida taringot tu haheheon ni angka naung mate (ayt.18). Alai dipabegebege sahalak Siboto surat do nasida na masialusan i. Sintong di roha ni Siboto surat alus ni Jesus na tu Saduse i, gabe ro ma ibana jumonok, disungkun ma Jesus taringot tu dia do patik na ummangat (yang lebih utama) sian sude patik ni si Musa i (ayat. 28). Alus manang hatorangan ni Jesus tu sungkunsungkun on ma jamitanta sadari on.

II. Hatorangan ni Turpuk
Laos so sombu (belum jera) dope roha ni angka uluan ugamo Jahudi i mangunjuni (manjebak) Jesus. Ai nunga marulak loni jala nunga mansam cara dibahen nasida alai so hea marhasil. Somalna saleleng on sai maraloalo pandapot do Siboto surat tu Saduse, alai muba sahali on sada (bersekongkol) nasida laho mangunjuni Jesus. Tarsongon i do huroha, mura do domu na maraloalo i molo sapanghilalaan nasida di sadasada tingki. Disungkunhon nasida do dia patik na ummangat sian sasude patik i (ayt.28). Diboto halak i do adong 2 patik na ummangat (ayt.32-33), alai antar sada patik do dipangido alusanNa, asa tarunjun Jesus i di rohana.
Mati kutu do antong na dua i dibahen Jesus. Mamungka sian i ndang adong be nasida na hum roha (yang berani) pasungkunsungkun Ibana (ayt.34). Torang do alus dilehon Jesus tu nasida. Nang pe sada patik dipangido, alai 2 patik do dialusi, ima manghaholongi Tuhan Debata dohot manghaholongi dongan jolma songon diriniba (ayt.30-31). Ala memang ido tutu sintongna, jala ditohoi Siboto surat i do pandok ni Jesus on (ayt.32). Holan mangulahonsa nama na so tarida di nasida.
Ummangat dope di nasida mangalehon pelean situtungon dohot pelean na asingnai, hape ianggo donganna jolma so dihaholongi. Jadi holan na mandok do malo nasida, ianggo mangulahonsa ndang adong. Saleleng on holan halak Jahudi do na dietong donganna, di duru ni i ndang. Berarti ndang sian nasa roha, ateate, hosa dohot gogo dope nasida manghaholongi Debata. Satongasatonga dope pangulahononna. Buktina marpilipili do jolma dihaholongi. Gari donganna Jahudi pe so sude dihaholongi, taida ma kasus na hona samun di dalan Jeriko gabe halak Samaria do mangurupisa. Ido umbahen ndang markutik be nasida mangalehon alus balik tu Jesus.
Nang pe sai martahi paunjunhon halak on na saleleng on, alai ianggo Jesus ndang hea dendam manang marsogo roha mida nasida. Gariada halak na pantas roha (bijaksana) do nasida (siboto surat) dietong Jesus, ai didok Ibana do “ndang sadia dao ho sian harajaon ni Debata” (ayt.34). Ndang didok naung parjambar masuk tu harajaon i, alai ndang sadia dao ninna do. Na marlapatan do i ala satongasatonga do pangulahononna.

III. Impola ni Turpuk
1. Holong dua saihot (perintah ganda) do pangibulan ni patik i.
Suman tu dua bariba di sada limper do patik i di ngolunta. Molo sosa sambariba gambar ni limper i gabe ndang marnilai be limper i. Jadi ingkon na rap di si do duansa asa marnilai manang boi palakkuon. Suman tu si ma pangibulan ni sude patik i, ingkon haholongan do Debata dohot dongan jolma. Jala ndang boi satongasatonga, ingkon sian nasa roha, hosa, ateate dohot gogo do i ulahononhon. Kewajiban do di hita manghaholongi Debata, jala hakta ma manjalo holong dohot manghaholongi saluhut jolma.
Mansai torop do halak kristen ringgas situtu mandohoti paribadatan, sonang rohana mamangke atribut keagamaan, bangga situtu patuduhon paboa ibana sisomba Debata, luar kepala manghatahon ayat-ayat na di bibel i, alai parohahon ma ngolu siaparina; nunga sintong dihaholongi donganna satohonan, sahuria, sahuta, apala hombarjabuna, apala keluarga sisolhotna, dna?. Atikna holan hosom do dipagukguk di rohana?. Bangga do halak Indonesia apalagi pangisi ni Aceh Tenggara didok parugamo na utusan (saleh), rarak jala baltukbaltuk do marjongjongan angka Masjid, gareja, dna, alai boha lam martamba/hakkot do taida roha holong di ari na parpudi on, manang lam ngali do?. Ndang huboto na sala mangida au, huida lam martimpulak do korupsi, panipuon, pandoboon, haormuson, hamunafikon, dna. Torop do pe halak Batak Kristen na lomo rohana manginap di HOTEL (Hosom, Elak, Late, Teal), elat rohana marhasil donganna, sonang rohana mar-SMS (Senang Melihat orang Susah, manang Susah Melihat orang Senang). Halak kristen na si songon i ima halak kristen na satongasatonga dope mian holong ni rohana. Marhite jamita on, dihalomohon Debata do asa sadalan tabahen manghaholongi Tuhan Debata dohot donganta jolma sian nasa roha, ateate, hosa, gogo dohot pingkiranta. Mangulahon na dua on ingkon rap mamangke perasaan do i.

2. Di bagasan holong na dua i do dapot hita las ni roha naso halompoan.
Molo tapamanat do ngolu ni halak na serba marhasungkupan di portibi on mansai sonang ma tahe idaon. Tu dia pe so sungkot jala boi tampil, tano pe hira so hea be didege jala sohea martaon udan dohot las niari, hona AC nama torus; sian pesawat tu restoran dung i tu hotel dohot di Mobil nang di jabuna. Di Amerika do ibana mangan, di Jakarta minum jus alai di Aceh Tenggara do ibana buang air besar. Amang tahe santompu sonangnai idaon nasida. Alai tapamanat ma, molo so tangkas sitanda Debata nasida, halak sisongon i ma na sumusa di ngoluna ai tong do lalap mengeluh, bosan do hona AC hape so tahan hona ari, bosan do nang maniop hepeng alai so tahan so marhepeng. Sabalikna parohahon ma, nangpe susa idaon ngolu siapari ni sada halak na tangkas sitanda Debata, alai ibana ma na sumonang di rohana. Nangpe tarrobung patna mardalan sai lalap do maruntung, ai didok do untung do ndang maponggol nangkin bah, ninna do. Sian i dapot hita parsiajaran, ndang sian arta na di portibi on hape silehon hasonangan na rimpas i, alai sian Debata silehon arta i do. Antong mangolu ma hita di bagasan holong na sian Tuhan i marhite na manghaholongi saluhut jolma dohot pangisi ni portibi on, asa sonang ngolunta, Amen!