Barita Mardongan Poda Taringot tu Hasadaon ( Filipi 2:2 )

Di sada borngin, na marrapot do angka alat-alat tukang dung sidung nasida karejo. Na tubu do angka persoalan di nasida, pola naeng masipecatan. Dung i jongjong ma si Meter, mandok: Na olo do ahu dipecat, alai jumolo ma si Gergaji an. Ai baeon pe so niantusan on, sai holan na manirang do diula on. Di hutanami Panjaitan do adong, sipadomu na sirang, alai ianggo on, angka na domu do dipasirang, dipotong disan, disirang dison. Ingkon pecaton do tong baeon”. Umbege i hehe ma si Gergaji, huhut didok: OK, olo do au disi, alai si Martil an ma parjolo dipecat. Ai holan na manggaori do ulaon ni baeon, diantuk disan, gaor sude, so boi iba modom dibaen. Ingkon dipecat”. Ro ma muse si Martil: OK, tarjalo au do i, alai ingkon jumolo ma si Tuhil an. Ai baeon pe, holan na manggali lubang do ulaonna, sude jolma terperosok, madabu tu lubang binahenna i. Ibana pe ingkon pecaton do. Hehe ma si Tuhil: OK, sadar do au disi, alai ndada holan au. Si Paku an pe ingkon dohot do. Boasa ? Ai baeon holan na manusuhi ulaonna. Hatana sai manusuhi panghilalaan, mambahen hansit roha. Molo ditarik ibana pe hatana i, alai nunga sanga marbokas di rohaniba, sai hansit do roha dibahen. “Bah, gabe dohot au ate, ninna si Paku. OK! Alai ho pe Meter, memang tung so haampinan do ho. Ai ho do mamulai on sude. Ai sai mangasangi do ho, holan na mangasta. Diukur ho tusan, diukur ho tuson, sai hira ho nama natumingkos. Ho do parjolo pecaton”, ninna si Paku ……. Songon i ma nasida marsoal torus, laos so modom, torus sahat tu manogot, sahat tu na ro tokena, si Tukang i. Dibuat ma nasida jala dipake ma sadasada marguru tu ringkotna be, jala sidung ma dibahen nasida sada langgatan, ai tongon martukang di gareja do nasida uju i. Gabe boi do sidung ulaon ala marasing be nasida di fungsi, ala olo marsada ni roha di bagasan na masipatutoru dirina be pakeon ni si tukang i.

Naeng ma songon i hita. Di angka keperbedaan-ta i, rap ringkot jala rap denggan i, molo sude hita olo marsada ni roha dibagasan pangoloion huhut patutoru diri pakeon ni Raja na sumurung i, ima Debatanta. PakeonNa ma hita sude marguru tu talenta nanilehonNa i di hita. Ima mangarahut hita di hasadaon.

Antong, taeahi ma hasadaon, di rumahtangga, di huta, di masyarakat tarlobi di huria.

Angka perbedaan unang ma mambahen hita marsirang alai tapake ma i laho masiurupan, masipasingkopan, untuk saling membutuh- kan.

Tapadao ma ginjang ni roha dohot roha na egois na holan mangharingkothon na di dirina.

Alai sude ma hita paserephon roha, merendahkan diri maniru Kristus. Molo dapot na songon i, lam togu ma hasadaon i. Sian i ma tandaon ni halak, na tutu situtu do hita siihuthon Kristus.( Filipi 2:2 )