Parningotan ni namonding

ACARA UJUNG TAON PARHURIAON (PARNINGOTAN NA MONDING)

01. JOUJOU MARPARSAORAN TU DEBATA

U    : Hamu dongan sahaporseaon. Asi ni roha ma di hamu dohot dame sian Debata Amanta i dohot sian Kristus Jesus Tuhanta i. Sadarion 21 Nopember 2010, sahat ma hita tu Minggu Ujung Taon Parhuriaon. Nunga itabolus sataon parhuriaon, naeng masuk ma hita tu minggu-minggu Advent, managam haroro ni Tuhanta paduahalihon dohot mangarade diri mamestahon Pesta Parningotan Hatutubu ni Tuhanta Jesus Kristus.

Ndang tagamon so godang na masa na taadopi be di bagasan na sataon on. Pasingki-pasorin ro arsak, parungkilon, sahit, suang songoni las ni roha songgop tu ngolunta. Sipata jut rohanta alani na masa, alai laos di tingki na asing, mengkel do hita ala las rohanta. Ndang adong hape na hot di tano on. Nunga tibu hian i nian dipasingothon Tuhanta tu hita. Na jotjot do hita lupa di hata ni Tuhanta dohot dibagabagaNa.

Antong, hamu angka dongan! Na marsalpuan do angka taon, marsorin do angka na masa, alai na hot do anggo hata ni Tuhanta. Asa, molo tapatupa sadarion, marningot angka donganta naung jumolo marujung ngolu i, na paingothon hita do i dibagabaga ni Tuhan Jesus na mandok:

H    :  Ida ma, sai donganKu do hamu rasirasa ro ajal ni hasiangan on.

U    : Pangkirimon na mangolu diparjumpangan ni angka na porsea, angka naung jumolo i rap dohot na mangolu nuaeng nang haduan, di Harajaon ni Tuhanta na pinarade ni Jesus Kristus, i do na tapatupa sadarion. Antong, tapuji ma Tuhanta, marende ma hita ”NA MULAK JESUS I”

Marende BE. 541 : 1 – 3, 5  ”Na Mulak Jesus i”    BL.373

Na mulak Jesus i dihasangapon i, mangalap na badia i tu hasongangan i

Hutundalhon ma, na dipudingki, Jesus ma haposanki di haroroNa i

So tung na tading au di haroroNa i, so tung ditiop rohangkon na olo sega i

Hutundalhon ma, na dipudingki, Jesus ma haposanki di haroroNa i

— Jongjong —

Tinggil ma pinggolhi di soaraNa i, so tung so begeonku i di haroroNa i

Hutundalhon ma, na dipudingki, Jesus ma haposanki di haroroNa i

01. VOTUM-INTROITUS-TANGIANG

U    :  Marhitehite Goar ni Debata Ama dohot Goar ni AnakNa Tuhan Jesus Kristus, dohot Goar ni Tondi Parbadia. Amen. Songon duhutduhut do saluhut daging jala songon bungabunga ni duhutduhut i do saluhut hasangapon ni jolma. Nunga malos duhutduhut i, jala nunga marurus bunga i.

H    :  Alai na hot do Hata ni Debata ro di saleleng ni lelengna.

U    :  Sai burju ma ho rasirasa mate, dung i lehonongku ma tu ho tumpal hangoluan i. Haleluya.

H    :  (Mangendehon) : Haleluya, Haleluya, Haleluya.

U    :  Martangiang ma hita! Ale Amanami, Tuhan ni angka na mate dohot na mangolu. Marpungu hami di ari on marningot angka dongannami naung jumolo borhat maninggalhon portibi hasusaan on, mamungka sian Minggu Parningotan di na monding 23 November 2009 sahat tu parningotan  sadari on. Ndada na manungguli lungun ni roha hami di parningotan on, na marningot denggan ni basaM do tu angka dongannami naung parjolo borhat mandapothon Ho, uju rap hami di rura partangisan on. Mauliate Tuhan ala marhite parningotan on disungguli Ho hami marpanghirimon di hangoluan sogot dohot diparsaoran sogot dohot dongan naung jumolo borhat i. Angkup ni, marhite parningotan on dipaingot Ho hami asa unang lalap di portibi on, ai surgoi do sambulonami. Antong padungo hami asa hobas mandapothon Ho marhitehite pangoloionnami di HataM. Amen.                 …… hundul…..

02. Marende BE  336:3-4   “Sonang ma modom” BL.45

Molo soara ni Tuhan Jesus i, na manorusi sude tanoman i.

Ro manungguli angka naung mate. Hehe nasida marhasangapon.

Hamuliaon di Ho O Debata, ala pambaenMu di hami on sude;

Mate do hami ala ni dosa. Mangolu hami dibaen AnakMu.

03. PATIK : KONFESSI II HKBP BINDU 15

U    :  Tahatindangkon jala tahaporseai do; Hamatean i do ujung ni ngolu ni jolma di portibi on, maradian ma ibana sian sandok ulaonna. Adong haluaon di angka na porsea paboa Jesus Kristus naung hehe i do pangoluhon jolma i sian na mate, Rom 14:7-9

H    :  Martua do na mate dibagasan Tuhan i na satia ro diujungna.

U    :  Dipatupa huria do parningotan di angka na monding laho padungohon haporseaonta marningot ajalta sandiri huhut pahothon pangkirimon di hamonangan ni Kristus manaluhon hamatean, songon i nang pangkirimon di banua ginjang sambulo ni tondinta dohot hadodomu ni na porsea i dohot Tuhan Debata sahat tu na ro Jesus Kristus paduahalihon. Marhite poda on taondolhon do pangkirimon di haluaon ni jolma sian angka na mate di bagasan Jesus Kristus.

H    :  Taalo do pingkiran na mandok boi na mangolu manjalo pasupasu sian na mate.

U    :  Taalo do pingkiran na mandok paboa na adong pardomuan ni na mate dohot na mangolu marhite tangiang (Mendoakan arwah-arwah). Taalo do pingkiran na mandok ingkon pajongjong tugu laho pasangaphon na monding, dalan pangalapan pasupasu tu pinomparna. Jala marhite poda on tatulak do sude rumang ni na pinodahon ni ugamo hasipelebeguon lumobi poda taringot tu tondi na mandok Tading do tondi ni na mate i, jala tondi ni na mate i gabe begu dohot sumangot.

H    :  Di parningotan di na monding siparateatehononhon do mandok mauliate tu Debata.

U    :  Di na marningot ulaon na denggan uju di ngoluna, alai ndang na mangigil pasupasu dohot tanda siarsiaran sian na monding i. Antong rap ma hita mangido gogo sian Tuhanta laho mangulahon patikNa i.

H    :  Ale Tuhan Debata, sai pargogoi ma hami mangulahon na  hombar tu patikMi, Amen!

04. KOOR

05. Marende BE 348:3-4    “Lobi timbona dope” BL.42

U    : Nunga sahat tu hita Patik ni Debata marhitehite Konfessi ni hurianta HKBP. Tahalomohon ma PatikNa i jala taulahon asa dipasupasu Ibana hita di bagasan ngolunta : tiur langkanta, bulus rohanta mandalani ariari ni ngolunta. Taparhatopot ma i marhite ende na mangihut : “Lobi Timbona”

Lobi timbona dope sian bintang, Ndang hahuaon ni musu be ho.

Sahat tu ho ma di si hamonangan. Marolopolop tongtong nama ho,

Marolopolop tongtong nama ho.

……. Jongjong ……

Lobi timbona dope sian bintang surusuruan na manomu ho,

Endehononna ma ho ala monang sian sitaonon na porsuk ho ro.

Sian sitaonon na porsuk ho ro.

06. TANGIANG HASESAAN NI DOSA + BAGABAGA HASESAAN NI DOSA

U : Na jongjong do hita nuaeng di jolo ni Debata, na umboto saluhut. Tatopoti ma dosanta na godang i tu adopan ni Debata. Martangiang ma hita! Ale Debata, Amanami na di banua ginjang, Pargogo na so hatudosan! Pardenggan basa do Ho, jala ro di salelengleleng na do asi ni rohaM. Sai marpamuati ma rohaM di hajahatonnami, jala sai unang be ingot angka dosanami, ai jotjot do hami mardosa maradophon Ho,  jala jotjot do husungguli hami rimasMu marhite sian pangalaosionnaMi, di HataM.

H  :      ASI MA ROHAM DI HAMI ALE DEBATA, SAI SESAMA SALUHUT DOSANAMI.

U  :      Ndang hibul hujangkon hami AnakMu di bagasan ngolunami, ai jotjot do ndang huulahon hami lomo ni rohaM, baliksa angka na hinasogohon ni rohaM do na hupatupa hami, gabe manghorhon hasusaan di masyarakat, bangso nang negaranami on. Jotjot do ndang gabe sira dohot panondang ngolunami, baliksa tahe laho manopot huriaMi sipata sai marsidalian do hami. Tartait do rohanami holan tu hariburon dohot hagiot ni portibion, gabe lupa do hami mangguruhon: hapistaran na marguna di hajolmaon.

H  :      ALE TUHAN TOMPA MA ROHA NA IAS DIBAGASAN HAMI, JALA SESA MA SALUHUT DOSANAMI NA GODANG I.

U    :  Ale Debata Amanami parasiroha na sumurung! Marunduk ni roha ma hami nuaeng di joloM. Lomos do rohanami mangadopi angka hamaolon dohot marnida angka na masa di tonga-tonga ni bangso nami on: bencana alam, demonstrasi, angka hajahaton na martamba-tamba dohot krisis ekonomi, gabe sipata mambahen hami muramura mandele, sipata lupa do hami martangiang dohot manangihon hataM. Sai pingkiran dohot gogonami do hupangasahon hami.

H    :  ASI MA ROHAM DI HAMI, SAI MARPANGULAHI MA ROHAM DI DOSANAMI I, MARPAMUATIMA ROHAM DI DOSA NI BANGSO NAMI ON.

L    :  Sesa ma saluhut hageduhonnami dohot pangalaosionnami marhitehite pangulunami na sasada i, AnakMu Tuhan Jesus Kristus. Sai pahot ma asi ni rohaM di hami marhitehite panindangion dohot hagogoon ni Tondi Parbadia asa tarapul situtu rohanami manjou Ho, asa pantun, tigor jala daulat hami marpangalaho, bahen hasangapon di goarMu na badia i.

H    :  Mangendehon BE.  182 : “Haholongan Na Badia”

Husolsoli do rohangku, na gok dosa i tongtong ;

Ai Godang ariaringku na hubahen ambolong.

Mangihuthon Ho Tuhanku, ima las ni rohangki

Ima naeng padanhononku, dok ma amen mi disi.

L : Tangihon hamu ma bagabaga ni Debata taringot tu hasesaan ni dosa: Songon on do Hata ni Tuhan Jahowa: Nunga diarsahi ho Ahu marhite sian angka dosam, jala nunga dilojai ho ahu marhite sian angka hajahatonmu. Ahu tutu, Ahu sandiri manalesei angka pangalaosim ala ni hadirionKu, jala ndang be hupaingotingot angka dosam. Hasangapon ma di Debata na di ginjang !

H    :  Amen

07. Marende BE.354:1-2 “Sai tong maimaima do”  BL. 134

U    : Ingkon mulak do Jesus tu portibion mangalap angka na badia i, i ma angka na porsea jala tongtong marsihohot dihabengetonna. Tundalhon ma angka na mangihoti roham; arta, sangap dohot roha portibion, asa unang tading ho di haroro ni Jesus i, haposi ma ibana. Taendehon ma ende “Sai tong maimaima do”:

Sai tong maimaima do rohanta i di Jesus;

Ibana haluaon do di angka na tinobus.

Ro do muse Tuhanta i, mardongan hasangapon i,

sai ro ma Ho O Jesus, sai ro ma Ho O Jesus.

Marlas ni roha ma disi sudena naung tinobus,

Masihol situtu do i di Jesus i partobus.

Ro do muse Tuhanta i, mardongan hasangapon i,

Sai ro ma Ho O Jesus, sai ro ma Ho O Jesus

08. KOOR:

09. EPISTEL : HESEKIEL 39:1-7

U    :  Ia ho ale anak ni jolma, manurirangi ma ho dompak Gog jala dohononmu ma: Songon on do hata ni Tuhan Jahowa: Ida ma, na ro ma ahu marlulu dompak ho ale Gog, induk sian Ros, Mesek dohot Tubal!

H    :  Jala ahu paundarhon ho jala ahu mangela ho dohot panangkokkon ho sian ujung ni utara sahali, huhut parohon ho tu atas ni angka dolok Israel.

U    :  Jala ahu mameuthon siormu sian tanganmu hambirang ahu huhut mameuthon angka sumbiami sian tanganmu siamun.

H    :  Ingkon di atas ni angka dolok Israel ho marragean rap dohot sude parduaan ni paranganmu, ro di bangso angka na hinaram; tu angka pidong panoro, parhabong na marragamragam dohot tu binatang di harangan lehononku ho sohalanna.

U    :  Ingkon di atas sisik ni ladang i ho marragean, ai ahu mangalumbahon songon i hian, ninna Tuhan Jahowa.

H    :  Jala ahu manongoshon sada api tu bagasan Magog dohot tu tongatonga ni halak na maringan marsonangsonang di angka pulo, asa tung ditanda nasida, ahu do Jahowa.

U    :  Jala ahu pabotohon goarhu na badia i di tongatonga ni bangsongku Israel, jala ndang be marlea bahenonku goarhu na badia i, asa tung ditanda angka bangso parbegu, ahu do Jahowa, na badia di tongatonga ni Israel!

I do sahatna. Martua  do angka na tumangihon hata ni Debata jala umpeopsa.

H    :  Amen.

10. KOOR :

11. Marende BE 539:1+3  “ Sai hutagam do Tuhanku” BL.371

U    : Martiti do saluhutna nasa natinompa ni Tuhanta : Hatop manang lambat, ingkon ro do ajal ni ngolunta. Ala ni ndang taboto sadia ganjang umurta. Sadarion, di na tabege hata ni Tuhanta, tapaujung ma paraloanta tu dosa i, tahamonangkon ma silang: Sai Hutagam do Tuhanku”:

Sai hutagam do Tuhanku sai masihol rohangki,

Di haroro ni Tuhanku songon na nidokNa i.

Sai mardongan olopolop huriaM managam Ho,

Maranata, ro o Tuhan, amen sai tibu ma ro

……. Jongjong ……

Sai rade ale tondingku, tagam panjouonNa i.

Sai tu langit au manomu ho di Jesus Tuhanmi.

Sai mardongan olopolop huriaM managam Ho,

Maranata, ro o Tuhan, amen sai tibu ma ro

12. MANGHATINDANGKON HAPORSEAON

U    : Rap dohot donganta sahaporseaon di sandok portibion, rap ma hita mandok tangiang haporseaonta ta I, Ahu porsea

H    : Ahu porsea…du.                                                                                   -– hundul—

13. KOOR :

14. TINGTING + TANGIANG

15. KOOR:

16. PARNINGOTAN DI NA MONDING

A. Marende BE. 520 : ”Partangisan do hape”

Partangisan do hape anggo hasiangan on;

Holso, arsak, sahit pe, Sai manosak do tongtong

Ingkon songgop hamatean tu sudena jolma i;

Ai sude do na manean Uhum ala dosa i.

Unang marsak hita be naung mananda Jesus i;

Ai inganan na rade dapot ho di surgo i.

Tatadingkon pe luhutna. Na diatas tano on;

Dapotonta di lambungNa hasonangan na tongtong

Pdt :  Hamu angka dongan sahaporseaon di bagasan Goar ni Tuhanta Jesus Kristus. Sadari on, ingotonta do angka donganta naung jumolo monding sian tongatonganta di bagasan sataon parhuria on. Ndang na mangarungkari lungun manang sidangolon hita nuaeng disi. Ai tapatupa pe parningotan di angka naung monding i, na paingothon hita do i, paboa hita pe monding do muse songon donganta naung monding i, jala tahaporseai do, ndada hamatean ujung ni pardalananta, tung dalan hangoluan do i. Songon nidok ni Apostel Paulus tu huria Korintus: ”Ai apala Tuhan i ma na tuat sogot sian banua ginjang, mardongan soara ni sintua ni surusuruan ni Debata, dohot mardongan sarune ni Debata, dung i, hehe ma jumolo angka na mate, angka na marhitehite Kristus”.

H    :  Marende BE. 525: Na laho Ma Au”

Na laho ma au tu na sonang diginjang,

Disurgo tutu sai na sonang ma au

O, ho donganki, na gok dosa, gok arsak,

Sai dohot ma ho, sai tu surgo ma lao.

Sai ro dohot ho, dohot ho, dohot ho,

Sai dohot ma ho, sai tu surgo ma lao.

Pdt : Angka on ma goar ni ruas ni hurianta na marujung ngolu di bagasan sataon parhuriaon on: … dijaha huria ma goar-goar ni na monding.( …… Manjaha…..).

Asa torop ni ruas ni hurianta na marujung ngolu, ima : ….halak

Naposo bao: ….halak Ama: ….halak

Pdt :  Nunga maradian nasida sian nasa ulaonna di portibi on. Alai nang pe ingkon ampe tu ganup jolma hamatean i, songon naung masa tu angka haholongan ni rohanta naung jumolo i. Dibagasan pangaramotion ni Debata do nang angka i saluhutna. Ai Kristus do Tuhan ni na mangolu dohot na mate.

R  :    Ingkon sude do pe jolma mamolus hamatean i. Ndang mardia imbar manang ise pe, na metmet nang na magondang, na mora nang na pogos, na sangap nang na lea, na gogo dohot na gale.

Pdt : Didok di Pangungkapon 20:12 ”Dung i huida ma angka naung mate i, angka na metmet nang angka na balga, jongjong di jolo ni habangsa i; jadi diungkap ma angka buku. Dung i diungkap ma sada buku na asing, i ma buku hangoluan, gabe diuhumi ma angka na mate i marguru tu na tarsurat di bagasan angka buku i, hombar tu na niulanasida be”

Antong rim ma hita jongjong. Dibagasan unduk dohot serep ni roha, martangiang ma hita be di bagasan rohanta, asa tongtong ingot hita pasahathon dirinta tu Tuhanta, sahat ro di hasusuda ni bohalta be, laso mangendehon ”Loas Au, Asa Lao”

H    :  (mangendehon BE.No. 335: “Loas Au, Asa Lao)

Loas au asa lao Tu Jesusku tu na dao

Ai malungun do rohangku Mandapothon Debatangku

Asa di lambungNa au Asa di lambungNa au

Jesuski, Sondang i Sitorusi ombun i

O andigan ro tingkingku, Asa borhat ma tondingku

Lao marnida bohiMi?, Lao marnida bohiMi?

Pdt : Martangiang ma hita: Ale Tuhan Debata, huingot hami do sadarion angka dongannami naung jumolo monding sian hami. Songon duhutduhut do tutu saluhut daging, jala songon bungabunga do saluhut hasangapon ni jolma. Nunga malos duhutduhut i jala nunga marurus bungabunga i, alai na hataMi ro di salelenglelengna. Ajarajari jala pargogoi ma hami asa marsihothot di haporseaonnami, asa burju hami rasirasa mate, asa dohot hami parjambar di tumpal hangoluan i. Amen.

— H u n d u l —

17. Marende BE 535:1…   “Ise do alealenta” BL.183        (P.Pelean 1A-IB)

Hamatean parhitean lao manopot Jesuski,

dohot au ingkon mamolus asa sahat au tusi,

Nang pe pinadaodao dompak hamatean i,

Lam jonok do hapengani, langkangki tu ajalhi.

Alani sai golomonku sitaluhon musungki

I ma Jesus Sipalua naung mamolus songon i.

Nang pe sai mangogaoga bolis si pangago i.

Ndang adong be huasona ala Jesus donganki

— music —

Molo i hugolomgolom, sabam  sonang rohangki,

Nang marnigot angka dongan, naung jumolo lao tusi.

Ai denggan tohapnasida di banuaginjang i,

Na marende do nasida raphon pardisurgo i.

18. JAMITA : 2KORINTUS 5:1-10

19. Marende BE 522:1…  “Surgo i sambulonta do i “ BL. 359     (P.Pelean II)

Surgo i sambulonta do i, ndang adong siaeon disi.

Na mamuji tongtong na disi, pinalua ni Tuhanta i.

Surgo i surgo i, ndang adong be siaseon disi,

Surgo i, surgo i, surgo i ndang adong be sisaeon disi.

Na marloksa naung sahat tusi, tu inganan na sai denggan i.

Aut naung domu ma au dohot i, gok ma las ni rohangku disi

Surgo i, surgo i . . . .

—musik —

Na mangkirim rohangku dison, paima sahat tusi nang au on

Taiti au ale Tuhan tusi, asa rap dohot Ho au disi.

Surgo i,  surgo i . . . .

Holan sada nama holsongki, unang tading haholonganki.

Na tu au pinalumehonmi, nang nasida sai togu tusi

Surgo i,  surgo i . . . .

— music —

20. MANGHANGOLUHON HATA NI DEBATA

Pdt : Alai naeng ma botoonmuna tangkas ale angka dongan taringot tu angka naung monding i, asa unang marsak hamu songon angka na leban na so marpanghirimon i, surgo i do na hot tongtong, parsatongkinan do anggo portibi on.

R    : (mangendehon)  BE. 539 : 1 “Sai Hutagam Do Tuhanku”

Sai hutagam do Tuhanku, sai masihol rohangki

Di haroro ni Tuhanku, songon na nidokNa i

Sai mardongan olopolop huriaM managam Ho

Maranata, ro o Tuhan, Amen, sai tibu ma ro

Pdt : Na manghirim do hita malua sian panguhuman ni Debata na bolon i, asa di hita hangoluan sisaleleng ni lelengna. Ai dung sahat tu panguhuman i, patedekhononNa ma pambahenan ni saluhut manisia. Ai di banua ginjang do sambulonta, sian i do tapaimaima Sipangolu hita, i ma Tuhan Jesus Kristus.

R    :  (mangendehon)  BE. 539 : 2  “Sai Hutagam Do Tuhanku”

Reff : Sai mardongan olopolop huriaM managam Ho

Maranata, ro o Tuhan, Amen, sai tibu ma ro!

Pdt :  Didok Tuhanta Jesus Kristus: ”Magira ma Au ro, tiop ma na di ho, unang adong mambuat tumpalmi! Sai burju ma ho rasirasa mate, dungi lehononKu ma tu ho tumpal hangoluan i!

R    :  (mangendehon) BE. 539 : 3  “Sai Hutagam Do Tuhanku”

Sai rade, ale tondingku, tagam panjouonNa i,

Sai tu langit an manomu ho di Jesus Tuhanmi.

Sai mardongan olopolop huriaM managam Ho,

Maranata, ro o Tuhan, Amen, sai tibu ma ro!

21. TANGIANG PANUTUP:

Sumber : haumanarata. Advendt Leonard Nababan