JAMITA EVANGELIUM Jesaya 35:4-10

 

Bahan Sermon Full Timer Distrik XIII ASLAB, Minggu XIV Dung Trinitatis, 5 September 2021

 

EV :  Jesaya 35 : 4 – 10           Ep : Jakobus 2 : 5 – 13

 

“ Pir ma Tondim, Unang Ho Tahutan “

====================================================================================================

1.    Patujolo

Bagian ni Proto Jesaya turpuk on ( bindu 1 – 39 ), andorang so habuangan ni Jehuda tu Babel, gumodang mangalumbahon hamamasa  ni panguhumon sian Debata, ndada holan tu halak Israel, alai laos dohot do tu bangso na asing pe. Tutu jumolo halak Israel diuhum, alai ujungna dohot ma sude parbegu songon pamaloson laho martumbolhon  Sion ( 34 : 8 ). Alai sada hal siingoton ni bangso ni Debata, ndada sian jolma haroroan pangurupion alai sian Debata do ( bindu 31 ), jala bangso ni Debata paluahonNa ma tu Sion. Kekuatan dohot las ni roha ni angka parbegu i hian paubaon ni Debata ma gabe arsak ni roha dohot angka na paet, hasangapon nasida dipauba gabe haleaon ( 43 : 9 – 17 ). Di hamamasa ni pamaloson i ma adong las ni roha ni angka na pinalua ni Jahowa songon na pinaboaNa di turpuk on.

2.    Hatorangan

Ayat 4  Dibagasan hagaleon, maheu, roha na magopu jala putus harapan bangso Isarel ditingki tarbuang i. Nunga daukdauk jala telluktelluk pat nasida, so adong be gogo nasida, tamba muse nunga dibagasan roha na mabiar jala tahutan nasida. Ro ma nuaeng hata ni Debata laho patoguhon dohot paposhon roha nasida dihaluaon nanaeng patupaon ni Debata. Didok tu nasida : “ Pirma tondimuna, unang hamu mabiar……Mangalehon semangat na imbaru, patoguhon roha, asa unang sai cemas, khawatir, biahaton.  Asa Debata sandiri langsung bertindak laho paluahon marhite na martumbolhon dohot mamaloshon pambahenan ni bangso na manaban  nasida. Marhite huaso dohot hagogoonNa Debata mamboan mulak bangsoNa i sian habuangan. Sekaligus  asa diboto bangso i ndada boi jolma mengusahaon haluaonna manang mangido pangurupion sian bangso Mesir alai Debata do na paluahon

Ayat 5 -7 Diturpuk on digombarhon do haroro ni Debata na paluahon bangsoNa i ma marhite tanda halongangan dohot las ni roha, ia halongangan i ma : boi marnida angka na mapitung jala marbinege angka na nengel, manghatai jala mariaia jala marlas ni roha ma angka na ngungu, marhajingjang ma halak na pangpang. Panurirangon on laos martudutudu do tu haluaon na gabe tanda ni ulaon ni Tuhan Jesus na ro paluahon jolma na ginosagosa ni parhatobanan ni Sibolis dohot ragam ni parsahiton ( Luk 4 : 18 – 20 ). Hataridaan haluaon na pinatupa ni Debata i ma malua jolma sian gomgoman ni dosa dohot hamatean i songon i nang sian roha na ganggu dohot roha na mabiar.  Haluaon na pinatupa ni Debata ndada terbatas holan tu jolma alai dohot do tu saluhut na tinompa ( alam dohot suansuanan ) manghalashon haluaon na sian Debata. Didok marbuhalbuhal ma aek di halongonan ( padang gurun ) dohot sunge di adaran lapatanna mabaor ma hangoluan. Sian i boi ma idaonta adong terjadi haimbaruon di alam on, na dohot do alam dipalua sian penderitaanna gabe marsuraksurak dohot mariaia. Di son ma tarida integritas ni haluaon  na sian Debata manghamham sude jadijadianNa. Jadi haluaon i mencakup sude nasa na mangolu dohot alam ciptaan ni Debata.

Ayat 8-9 Dalan haluaon napinatupa ni Debata i, i ma dalan manuju Sion, bangso na tarbuang i mardalan raphon Debata mulak tu Sion. Na mardalan di dalan i, i ma angka nabadia na marlas ni roha ala ni haluaon na pinatupa ni Debata. Dalan i digoari dalan bolobung ( jalan raya ) na balga, na so adong na mangambati disi. Halak na mardalan disi ndang adong ancaman dohot mara sitagamon, ai gari halak na oto ndang lilu mardalan di dalan ni Debata. Nunga dipature Debata di haroro ni Jesus tu portibion dalan tu hangoluan marhite Ibana sandiri na ro tu portibion gabe jolma.

Ayat 10 Dibagasan las ni roha bolon dohot pariaiaon situtu do digombarhon bangso na tarbuang i mulak tu Sion di na malua nasida sian parhatobanan, penderitaan dohot hasusaan naung leleng diae nasida. Gabe jolma na bebas ndang  be dirajai bangso na leban nasida alai sumuang ma nasida muse mulak songon bangso ni Debata jala bolas ma nasida beribadah  holan tu Debata Jahowa. Dapotan hiras ni roha ma bangso i sian Jahowa jala maporus huhut marujung ma nasa arsak dohot hoihoi sian ngolunasida. Las ni roha saleleng ni lelengna tongtong di atas ulu nasida ( sukacita abadi meliputi mereka ) lapatanna las ni roha dohot pariaiaon i ndang mansohot be sian nasida, baliksa arsak ni roha dohot hoihoi nasida mansohot ma jala marujung

3.   Sipahusorhusoron

Ø  Ndang dipasombu Debata bangsoNa dibagasan parungkilon, haporsuhon. Di tatap Debata do pardangolan, penderitaan dohot haporsuhon dibagasan asi dohot holong ni rohaNa. Marhite turpuk on taida do songon dia Debata paluahon bangsoNa sian biar ni roha ditongatonga ni parungkilon, haporsuhon ni ngolu. Debata sandiri do na berinisiatif laho paluahon bangsoNa sian ondamondam bangso na asing songon  i nang parhatobanon  ni Babel. Songon i nang haluaon ni jolma Debata sandiri do na berinisiatif laho paluahon jolma i sian dosa marhite haroro ni Jesus Kristus. Halak Kristen disosoi do asa dibagasan unduk ni roha, gabe sipangoloi di Tuhan

Ø  Di minggunta sadarion paingothon “ Pir ma tondim, unang tahutan “. Sada pos ni roha di lehon Tuhanta tu hita asa unang tahutan hita laho mandalani ngolunta aha pe namasa. Nang pe godang parungkilon, sitaonon, arsak tung tadingkon Tuhan i hita. Paluaonna do hita sian ragam angka na masa I termasuk  sorimago covid 19, banjir, doho lan na asing.  Amen.  

 

                                        ( Biv Lenni Simanjuntak HKBP Resort Kisaran II )