Barita Jujur Taon 2012

BERICHT

BARITA JUJUR TAON HKBP WAHIDIN BARU TAON 2012

I.                    Patujolo

Pujian dohot Hamauliateon ma di pasahat rohanta tu Amanta Pardenggan basai, ala Godang dohot denggan ni basaNa naung pinatongon na tu hita ganup marsada sada, boi hita taripar bolas marhahipason sahat tu ombas nauli naleheton. Godang ma tongon nabinahen ni Jahowa tu hita alani Marhilas ni roha ma hita. Dilehon hangoluan di udut do hosanta umbahen na boi hita marpungu di bagas JoroNa on. Sihamauliatehonon ni rohanta do nang pardalanan ni Hurianta dibagasan na sataon bolonon denggan do mardalan Hurian ta di Tumpak asi dohot holong ni roha ni Tuhanta. Boi hita sonang so hariboriboan marsaor di Huriantaon so pola adong parmaraan naboi manganmpat parpunguanta sahat tu ujung ni taonon. Hasangapon jala Hamuliaon ma di Jesus Raja Ni Huria naung mangaramoti dohot mamasu masu Hurianta.

II.                  Parmingguon

a.       Minggu Pagi

Mardalan dohot denggan do parmingguon pagi na marhata Indonesia, dohot mamakke Kidung Jemaat Yamuger, dang holan Remaja dohot Naposobulung be ruas na alai nunga tong dohot angka natuatua alai memang didominasi sian horong remaja dohot naposobulung dope parmingguoni mangihuthon torop ni naro, Mauliate di parsidohoton ni angka naposobulung namangalehon roha laho manghobasi marhite Songleader, Papungu pelean. Pardosdosan ni ruas parminggu 70 sahat tu 120 halak siganup minggu.

b.      Minggu Siang

Denggan do mardalan parmingguon siganup Minggu di Hurianta, dang adong pangambat di pardalanan ni parmingguon I, sudenai tahe holan ala Asi dohot holong ni rohan ni Tuhanta doi. Pardosdosan ni na ro marminggu siganup minggu 200 sahat tu 300 halak, molo ta timbang sian torop ni Ripe ni Hurianta hira 55 porsen dope na ro rap marsaor siganup minggu, gomos pangidoan lam tutorop na hita laho marsaor siganup minggu di bagas joro on.  Lam taparinggad ma ro manopot Bgas joro on ai boi dohonon naung leleng 2 jam hita di parmingguan i. Lam di Tambai Tuhanta ma angka bilangan ni na porsea jala na ringgas marminggu tu taon na naneng ro. Di tuktuhi Tuhan ta ma roha ni sude ruas ni  Huria na lalap tarpodomi dope. Tamba do haulion ni Parmingguoni marhite angka parendeon na mansai tangkas na niluhon ni angka song leader sian ganup sector dohot organis na mangalehon gogo pingkiran nang parbinotoanna gabe lam dasip parmingguoni, di tambai Tuhanta ma tio, uli ni soara, gogo nang hahipason di nasida, lam marsangap jala marmulia ma Tuhan i

III.                Singkola Minggu

Mauliate dohonon tu amanta pardenggan basai naung umpasupasuhon angka nauli na denggan tu angka ianakkonta singkola minggu, nasida ma sipasuang hosa loja ( Generasi penerus di hita angka natoras) las doroha marnida nasida na ringgas ro mandohoti parsingkola Mingguon siganup minggu, mauliate nang dohonon di haradeon ni angka sundut naumposo ni hurianta ( Naposobulung) namangalehon rohana laho mangajari angka anggi nasida sikkola Minggu) torop nasida 6 halak na tiniroan ni amanta St Drs J Siburian songon Seksi Singkola Minggu.  Diparbohali nasida do gogo nang pikkiranna laho mandohot sermon Guru Singkola Minggu dalan laho mamohali nasida laho mangajari Sikkola Minggu. Gabe bonggas pangungkitma sermoni di nasida laho patota angka parsiajaran nanaeng siajarhonon nasida. Mauliate nang diharadeon ni natoras na sai tongtong olo mengantarjemput ianakkon nasida siganup manogot ni ari minggui.  Sai lam tamba ma haringgason ni angka ianakkonta singkola Minggu laho marsiajar dohot mangguruhon Hata ni Debata asa adong bohal ni partondionna di ari hagodangan na, tadasdas jala tapaborhat ma nasida huhut tatangiangkon ro tumopot Joro i. Taingot Ma Hata NI Tuhan I namandok “ Loas hamu ma ro angka dakdanaki, unang ambati hamu nasida rot u Ahu, ai di angka sisongoni do harajaon banuaginjangi, Mat 19:14, Los tapaumbuk ma tu hata namandok “ Ditingki metmet do haui boi sior sioran” ditingki haetehonna ta sior sior I ma dakdanaki tu Hata ni Debata.

IV.                Partangiangan

Pinujima Tuhan I ganup ari, ai dipatongon do angka naringkoti dingolunta, Denggan do mardalan partangiangan sector siganup minggu ima na di patupa siganup ari rabu bodarina dohot ari kamis bodarina na hinobasan ni Pandita, Guru Huria (Calon Pandita) nang angka Sintua Sektor nabe, sihalashonon ni rohanta mai torop do na ro mandohoti partangiangan I nangpe godang dope tong na so ro , dang tiala roha nian olo mai ala ni angka kesibukan kerja dohot lan angka na asing dope tahe, cuaca na sipata rondo, alani I naeng ma taharingkothon mandohoti angka partangiangan I ai disi boi hita patangkashon dohot patanakhon Hatani Debata, taingot ma hata ni Tuhani na mandok “ Unang mansadi hamu martangiang ( 1Tes 5:17). Lam di tambai Tuhanta ma dihita sipatu haringgason laho borhat tu partangiangan na adong di ganup sector tabe.  Lam martamba ma bilangan ni angka na ro mandohoti partangiangan sector tu taon nanaeng ro.

V.                  Kategorial

a.       NHKBP

Bunga Bunga ni Huria, Tarajumi do ia Naposobulung ima Bunga bunga na hushus na paangurhon goar ni huriai , suang songon goarnai las do roha marnida punguan on ai parsidohot do nasida di angka parendeon siganup minggu, dipatupa nasida do nang partangiangan naposo sahali sabulan di ganup bagas ni angka anggota, dalan pabagashon hata ni Tuhan I, denggan do mardalan punguan nasida dibagasan nasataonon na tiniroan ni amnat St G Simarmata ( Seksi Naposobulung) anggiat ma tu angka tingki nanaeng ro lam martamba bilangan ni angka NHKBP/Remaja di Hurianta on, dipangido jala di parsinta rohanta do asa lam tu hembangna nasida nang di kwalitas nang di kwantitas, marhite Barita Jujur taonon tadasdasi ma angka ianakkonta Remaja / Naposo asa dohot tu parpunguan on.

b.      Punguan Ina Pararikamis

Denggan do mardalan Punguanon dibagasan na sataonon , marguru dohot Patanakhon hatani Debata siganup ari kamis botarina ( Pkl 16.00 na niuluhon ni Pdt & Calon Pandita), parsidohot do nasida patubegehon ende pujian pujian siganup ari minggu, rajuman do nasida songon anggi ni parhalado di angka ulaon parasinirohaon isarani na mandulo namarsahit, maningkir tu namonding , suang songoni manggohi angka gokhon dohot jou jou ( Undangan) molo adong pesta sian bagas manang sian luar ni Hurianta, Lam margogoma nasida, laho mandohoti angka parguruan dohot angka ulaon huria, lam tamba ma haringgason di nasida hahipason nang ganjang ni umur. Punguanon di tirio inanta St A Br Simarmata , Seksi Ina.

c.       Punguan Ina Naomi

Las do roha ni Huria Marnida punguan on, mardalan dohot denggan do punguanon dibagasan na sataonon, ringgas do nasida ro laho marguru siganup ari minggu nangpe naung godang sian nasida na suda gogo, jala parsidot do nasida diganup ari minggu patubegehon ende puji pujian, sitiruon do nasida di haringgason atik pe tong do sai adong na so ro diganup ari parguruon. Lam di tambai Tuhanta ma gogo nang ganjang ni umur dinasida Punguanon ditiroi amanta St A Siahaan ( Seksi Lansia)

d.      Mannen Koor

Immanuel: Donganta ma Debata Mauliate ma di Tuhanta  denggan do mardalan punguan Mannen Koor Immanuel, tong do parsidohot nasida di parendeon di Minggu bolon, ima sahali 2 Minggu, marguru ma nasida 2 hali 1 minggu ima di bodari ni ari selasa dohot ari jumat,. Dipatupa nasida do partangiangan dohot Keluarga ganup sahali sabulan, anggiat ma lam tamba tu majuna punguanon tu taon na naeng ro, lam ringgas di parendeon, parmingguon nang di angka ulaon ni huria, margogoma nasida lam di tambai ma hahipason nang gogo ( ditiroi St Drs S Simbolon Seksi Ama), Margogo ma angka pangajari nang angka pangurus laho padimundimun punguanon

e.      Gabungan Maranatha

Roma Ho Tuhan mamasumasu hami, Maranatha : denggan do mardalan punguanon , las patubegehon ende Koor siganup minggu di Hurianta, marguru ma nasida di bodari ni ari jumat pkl 20.00 Wib, dihalashon roha do punguan Marantah di angka parsidohoton di angka ulaon Huria, lam marbungaran ma punguanon tu angka tingki nanaeng ro margogo ma angka pangajari dohot pengurus laho pahembanghonnsa.

f.        Ina Debora.

Pinuji ma Jahowa , ai Ho do Partogi na manguluhon Hami, Denggan do mardalan punguanon , tongtong do nasida patubegehon Koor siganuap ari Minggu ( sadali dibagan dua minggu) ringgas do nasida marguru diganup ari selasa bodarina 9 Pkl 20)  sihalashonon do parsidohton nasida di angka ulaon ulaon Huria, lam tu doharna ma punguanon tu angka tingki nanaeng ro, margogo pangajari dohot pangurus laho manogu nogu punguan on

g.       Koor Sektor I-IV

Marlasniroha ma hita tongtong Dibagasan Tuhani ( Fil 4:4), Mansai las doroha di Punguan Sektor na adong di Hurianta, ai  sada ujung tombak do nasida di angka ulaon Huria,  dang holan di parendeon alai dohot do di angka ulaon ulaon Huria isarani angka pesta pesta Huria. Mansai torop do sian angka ama/ina nang naposo na adong di sector ni Huriantaon mandohot Koor Sektor na adong di sektornabe, mauliate ma Di Tuhanta mauliate nang di angka pangajari nang di angka pangurus na tiniroan ni angka Sintua Sektor, anggiat ma lam tu majuna angka punguan sector na adong di Hurianta, mauliate na di angka pangajari Koor di setiap sector, nang mangalehon gogo dohot talenta laho mangajari parendeon diganup sector.

h.      Koor Parhalado & Keluarga

Sihalashonon ni rohanta do nang Punguan Koor Parhalado dohot Keluarga, nang pe di angka tingki naparpudion adong halembaon, anggiat ma tu taon nanaeng ro totop mardalan punguanon jala boi patubegehon ende puji pujian di bagas joro ni Tuhanta on.

VI.                Angka Ulaon Huria

a.       Sakramen

Mardalan do Sakramen di Hurianta ima Pandidion Nabadia dohot Parpadanan nabadia di Bulan 4 nasalpu dohot di tanggal 24, 25 Desember 2012

b.      Pesta Resort

Di Bulan Mei 2012 nasalpui , marhadomuan tu angka haporluan ni Resort, denggan do mardalan ulaon i.

c.       Pesta Gotilon

11 November 2012, denggan do mardalan ulaon Pestai

d.      Pesta Natal

Secara umum denggan do Mardalan angka Perayaan Natal di Huriantaon mamungka mai sian Natal ni angka ianakkonta Singkola Minggu, SD HKBP Maranatah,  Naposobulung, Natal Bersama, Natal Umum Pesta Natal I, II

VII.              STATISTIK

Torop ni ruas ni Hurianta

Ama                                                               :  300 Halak

Ina                                                                  :  335 Halak

Naposo Baoa                                             :  270 Halak

Naposo Boru                                              :  330 Halak

Dakdanak Baoa                                           430 Halak

Dakdanak Boru                                         : 440 Halak

Pungu                                                           :2105 Halak

Torop ni Ripe Kepala Keluarga           : 350 Ripe/ KK

Torop ni Parhalado                                  : 19 Halak, Pdt 1 Halak, Gr: 1 Halak, Sintua : 17 Halak

Torop ni na Tubu                                      : 27 Halak

Torop ni natardidi                                    : 23 Halak

Torop ni na M. Haporseaon                                 :

Torop ni na Marbagas                            : 10 Halak

Torop ni na Ro Pinda tu Huria on       : 2 Ripe

Torop ni na pinda                                     : 1 Ripe

Torop ni na Hona uhum Huria           : 1 Halak

Torop ni na Mulak tu Huria                   : 2 Ripe

Torop ni namandohoti U Nabadia     : 186 Halak

Torop ni Namonding                               : 14 Halak

Pardosdosan ni Parminggu

Minggu Siang                                             : 300 Halak

Minggu Pagi                                               : 80 Halak

Singkola Minggu                                       : 175 Halak

Partangiangan                                           : 30 Halak

VIII.            Pangujungi

Songonima Barita Jujur Taon naboi ginurithon dibagasan taon on, Gala gala sitelluk ma telluk mardagul dagul, molo tung adong na hurang lobi di guritan on nanget ma hita mangapul apul, anggiat ma gabe sorminan on dihita tu taon 2013 nanaeng ro, taon parasinirohaon ma tongon taon nanaeng si pasahaton ni Tuhanta di hita , lam tu hembangna tu hinsatna parngoluon pardagingon nang partondiopn ni sude ruas ni  hurianta, lam ganda pasupasu si jaloonta tu taon nanaeng ro, Horas Tuhanta ma mamasu masu hita ganup marsada sada, Selamat Menjelang Tahun Baru 1 Januari 2013.

                         Medan,   Selasa 31 Desember 2012

Pendeta HKBP                                                                             Guru Huria HKBP

Resort Wahidin Baru                                                                              Wahidin Baru

Pdt. A. Aritonang, Sm.Th                                                              Cal. Pdt . B. Sianturi