1 Timoteus 6 : 11 – 16 NA SUN BADIA DO DEBATA JALA PARBINOTO DI SALUHUTNA

 MINGGU, 05 OKTOBER 2025

XVI DUNG TRINITATIS

 

1.    Marende       : BE No. 559 : 3 – 4  “DEBATA NA SONGKAL”

2.    Votum   : A.XV.A.6 – D. XIII.55

3.    Epistel    : Habakuk 1 : 12 – 17

4.    Marende       : BE No. 29 : 1 – 2 “IMA TINGKI HASONANGAN”

5.    Jamita                : 1 Timoteus 6 : 11 – 16

 

NA SUN BADIA DO DEBATA JALA PARBINOTO DI SALUHUTNA

 

Damang dainang nahinaholongan ni Tuhan Jesus…. Adong do deba halak mandok “hepeng do na mangatur”. Molo so adong hepeng ndang boi ulahonon manang aha. Na sala do molo gabe mamora? Dohonon ma, ndaong!. Ringkot do mamora? Ringkot! Alai adong dope na rumingkot sian na mamora, di ma i? mamareahi hatigoran, hadaulaton, haporseaon, holong ni roha, habengeton dohot lambok ni roha! I do na rumingkot di ngolu ni halak ni Debata. Dia ma ringkot ni hepeng i di ngolu ni hajolmaon. I ma sebagai alat tukar ni nasa na marpardomuan tu ngolu siganup ari. Alai dohonon ma, denggan manang na ndang hepeng i (baik buruknya uang) tontu saguru di na umpeop hepeng i do i. Boi do patudosonta hepeng i tu “raut” (pisau). Boi do pangkeonta raut i laho manegai laos boi do laho paulihon. Ngolu on boi do pahombaronta tu sasahalak na tongon mandalani parngoluonna huhut papunguhon bohalna na ringkot tu pardalanan ni ngolu tu ari na ro. Ndang sukunon ni Tuhan i sadia godang hepengta. Molo adong tapeop sinamot manang hepeng, lam jonok do ngolunta tu Tuhan i manang lam dao? Lam tapatuduhon do holong ni rohanta tu dongan manang ndang? Lam ginjang do roha mannag lam tu serepna? Molo lam dao do ngolunta sian Tuhan i, molo lam dao do holong ni rohanta sian maradophon dongan jala molo lam ginjang do rohanta hinorhon ni hepeng na tapeop i, disi ma hita nunga madabu be tu ragam ni pangunjunan. Di buku Parjamita 5 : 9 didok: mannag ise na holong roha di perak, ndang olo marna mahap diperak, jala manang ise na holong roha di hamoraon ndang tagamon gabe parsaulianna. Nang I haotoon do i. Ndang hepeng patuduhon hinadenggan ni ngolu ni sasahalak, songon i nang sabalikna. Ndang sai dohonon, ia halak namora i ma pinasupasu ni Tuhan i, jala halak na pogos i ma na binuraan ni Tuhan i manang na so tarpasupasu. Toho do tuk gogo ni Debata mangalehon nasa pasupasu tu saluhut halak jala boi do sipata maradu marlobilobi. Unang lupa hita, ai sibolis pe boi do mangalehon hamoraon. Uju marpuasa Jesus 40 ari 40 borngin di parhorsihan (padang gurun), diunjuni Sibolis do Ibana, jala sada dalan pangunjunan i dipatupa sibolis I ma; “ima naeng mangalehon harajaon portibi dohot hamoraonna asal ma olo Jesus marsomab tu Sibolis i (Mat. 4 : 8,9).

Tuhanta Jesus pe jotjot do manaringoti angka na masa di pigpiga halak hinorhon ni “hepeng” jala mangalehon sipaingot paboa” tung maol do habongotan halak na mora harajaon banua ginjang i. (Mat. 19:23-24). Boasa didok Jesus songon i? ala  boi do tartait manang madabu tu bagsan pangunjunan roha ni jolma hinorhon ni hepeng, gabe dao holong ni rohana tu Tuhan i jala boi do gabe so diboto deba halak mangulahon holong ala ni arta nang sinamotna pe, songon I nang laho manglului hanoraon i, boi do diula torop halak manang songon diape dalanna (menghalalkan segala cara) asal ma taruli ibana di arta na godang manang sinamot.

Alani i ma tung tangkas Apostel Paulus paingothon si Timoteus, “alai anggo ho halak ni Debata maporus ma sian i, Ay. 11. Ala angka na naeng gabe mamora madabu do tu bagasan ragam pangunjunan dohot sambil dohot tu lan hahisapon haotoon ….Ay. 9. Jala diuduti muse di Ay. 10 didok: Ai urat ni nasa hajahaton do roha na holongan di hepeng. Songon halak ni Debata naeng tangkas naposona si Timoteus asa tongtong mangaradoti Patik so marlindang jala so hasurahan paima tarida Tuhanta Jesus Kristus i (hingga pada saat Kristus menyatakan diriNya). Tung maasai ringkot mangaradoti hasatiaon saleleng mangolu dohot mangaradoti patik ni Kristus sahat tu haroroNa paduahalihon. Ngolu na songon i ma na nidokna ngolu di bagasan hasintongan mangihuthon Tuhan i (standar kebenaran yang ditetapkan oleh Tuhan) jala i ma na patut ulahonon ni jolma i asa tung dao manang soding sian pangunjunan na boi manegai haporseaonna. Ala ni i naeng tangkas di roha ni halak Kristen na gabe “halak ni Debata” asa sai suan dibagasan rohana:

-          Ndang boi arta manang na sinamot laho manjamin ngolu ni jolma i, ai na laho salpu do i saluhutna. Kristus i do na hot jala Ibana do na tau mangalehon ngolu di hasiangan on nang ngolu sisalelenglelengna.

-          Tongtong mamareahi hatigoran, hadaulaton, haporseaon, holong ni roha, habengeton dohot lambok ni roha! Jala mangulahon angka na denggan dibagasan biar mida Debata.

-          Maporus ma halak ni Debata sian roha na holongan di Hepeng asa sian di Debata, ai boi do i gabe mangaithon tu dirina godang na bernit.

Diskusi:

a)      Dingolunta siganup ari, tu ise do humolongan rohanta Tu “pasupasu (arta, hepeng) i do” manang tu Debata silehon pasupasu i?

6.    Marende : BE No. 481 : 1 “GODANG DOPE”

7.    Tangiang : Sian ruas na ro

8.    Marende : BE No. 587 : 2 “TAENDEHON LAS NI ROHA”

9.    Tangiang : Sian na manjabui

10.  Marende : BE No. 820 : 1 … “PANGKE MA TINGKIM”    (Pelean)

11.  Tangiang Ale Amanami – Pasupasu.

 

Pdt. Lamhot Simbolon, M.Th

(Pendeta HKBP Resort Teluk Pulai Dalam)