Jakobus 5 : 12 – 18 DITANGIHON DEBATA DO TANGIANG NI NAPOSONA

 

MINGGU, 02 NOVEMBER 2025

XX DUNG TRINITATIS

 

 

1. Marende     : BE No. 811 : 1 - 2     “DI AU MA HO TUHAN”

2. Votum         : A.XV.A.20 – D.XIII.45       

3. Epistel         : Nehemia 1 : 1 – 11  

4. Marende     : BE No. 743 :  2   “O TUHAN TOGUTOGU MA”

5. Jamita         : Jakobus 5 : 12 – 18

 

DITANGIHON DEBATA DO TANGIANG NI NAPOSONA

 

Dongan sahaporseaon di bagasan Jesus Kristus Tuhan ta i! Surat jakobus on termasuk do on gabe surat katolikhos. Tujuan ni akka surat on, ima laho dipasahat tu saluhut halak Kristen di portibion. Marhite surat katolikhos on ma diondolhon na sahat do asi ni roha ni Debata tu saluhut jolma na porsea, dang holan di haporseaon ni halak Jahudi. Hatihai disurathon on laho manopot akka halak na porsea na adong di saluhut portibion, akka na targasip, akka na tarpasiding dohot akka na diolati tahi-tahi ni portibion. Gomos dipangidohon si Jakobus marhite surat na on asa tang haporseaon ni jolma i maradophon Debata, unang lilu haporseaon nasida jala asa diingot nasida padan na tu Debata. Mansai porlu do hataridaan ni parulaon na ro sian haporseaon. Ido na dipangidohon di turpuk ta on. Porlu do haroro ni tondi na ias dibagasan parrohaon, panghataion nang pangalaho. Unang bonom jolma i di hadosaon nang akka rumang ni pangalaho na so ture. Margabus do jolma na mandok togu haporseaon na alai dang ture parulaon na. Sipalessem do molo didok jolma na ingot ibana di Tuhanna alai dang ingot ibana di hatana. Di bagasan parngoluan na di hasiangan on godang do akka rumang ni parungkilon, gok ni akka siadopan, sipikkiran na sai marganti sorin, partikkian na muba-uba, dohot akka haporluan na lam mandosak. Marhite surat jakobus on diondolhon do asa sude jolma manuan haporseaon di bagasan parngoluanna be. Adong tolu impola na naeng pasahaton marhite turpuk on, ima:

 

Hasatiaon di bagasan Hata (Ayat 12)

Dengke ni sabulan tu tonggina tu tabona, manang ise si ose padan tu ripurna tu magona. Pangalapation na bagas do on taringot tu parngoluan na sai godang marsipalensem, alai dang ditapu parbue ni hata i. Sai dipandok hatana, alai dang dipadasip dirina laho mangulahonsa. Na marpadan do hita on tu Debata. Parpadananta tu Debata do na taulahon di haporseaon ta asa paluaon na hita sian hamatean. Lam gomos haporseaon i, lam asi roha ni Debata laho paluahon hita. Molo di ose sahalak jolma do padanna dohot Debata, hamagoan ma jambarna jala hamatean ma ujungna. Dang jadi sahalak jolma manolon marhite goar ni Debata. Na manghosom Debata do nasida disi. Sai unang ma nean ala ni hata na manolon na haruar sian pamangan ta gabe parohon jea tu parngoluan ta.

 

Hadaulaton di Parngoluan (Ayat 13)

Ngolu na marhadaulaton ima ngolu na mansai ringkot di tingki parngoluan sinuaeng. Molo idaonta na masa sinuaeng ndang adong be biar ni roha ni jolma laho mangulahon dosa. Torop do jolma mangulahon hadaulaton holan hasomalon sambing jala ndang marparbue. Aha do tua (pasupasu) na didapot ni angka na manghangoluhon ngolu hadaulaton. Hata daulat dison marlapatan tongam, jala adong karisma na denggan di ngoluna. Dohot do sude angka pinomparna dapotan tua i. Jala laos diuduti muse tu na mandapot pasupasu sundut ni angka partigor, ima angka pinompar na sai mian di ngolu na marhadaulaton i. Laos diuduti di hamoraon na marlobilobi na so boi habilangan di jabuna, jala hot do hatigoranna (kebijaksanaan) i ro di salelenglelengna. Hadaulaton ikkon badia, jala na daulat ikkon tigor do marroha. Tung na so jadi hurangan manang aha sogot ngolu ni angka partigor manang ngolu ni halak na daulat marroha. Sai na taruli do di angka na denggan sian Jahowa, jala margogo do dagingna dohot tondina laho mangoloi Jahowa. Taida ma ngolu ni si Abraham na sai tongtong manghangoluhon hadaulaton di adopan ni Jahowa.

 

Parale-aleon dohot Debata (Ayat 14-15)

Di bagasan parale-aleon dohot Debata do mardomu holong na bagas. Tarida mai sian haradeon ni akka na porsea laho mangulahon parsuruon ni Debata. Dihalomohon Debata do hita asa gabe alealeNa. Hea do tarpingkir hita gabe aleale ni sada Hadirion na tumimbul di hasiangan on? Si Abraham, na ujui digoari do ibana aleale ni Debata. Angka halak na asing pe na disurat di Bibel manghilala paralealeon tu Debata jala dipasupasu do nasida. Saonari pe, torop do halak di liat portibi on nunga gabe aleale ni Debata. Hita pe boi do gabe aleale ni Debata. Maraleale tu Debata dumengganan sian maraleale tu jolma. Ndang hea Debata pajuthon roha ni angka aleale na marsihohot tu Ibana. Gabe aleale ni Debata dumengganan do sian mararta hamoraon. Di tingki mate halak na mora, gabe di halak na asing do hepengna. Alai, angka halak naung manghilala parealealean tu Debata dapotan arta na so boi ditangko manang ise pe. Gabe aleale ni Debata i ma na sun denggan na boi ta hilala. Na laho ajaran ni Debata do hita asa boi martua jala dame; paluaonNa ma hita sian angka haporseaon na sala dohot pangalaho na parohon jea. TangihononNa do angka tangiangmu. UrupanNa ma hita asa manghilala hadameon ni roha dohot marpos ni roha. Diurupi Debata do hamu tingki jumpang hasusaan. Jala, lehonon ni Debata do basabasa-Na tu hita on, i ma hangoluan salelenglelengna.

 

 

 

Ias ni Roha di Bagasan Tangiang (Ayat 16-18)

Jugulhon martangiang! Porlu do nihajugulhon laho mangelek asi ni roha ni Debata, unang dipalua hita sian gonggomanna. Diondolhon turpuk on do sada pandohan “Margogo situtu do tangiang ni partigor, molo dihaburjuhon”. Tung jotjot sahalak jolma martangiang, alai ragam na pinangido na, sursar pikkiran na, jala dang diboto aha na nidok na di bagasan tangiang na be. Nungnga tung torop jolma na martangiang holan laho mangido tamba ni basa-basa sian Debata, so jolo diharinghothon mandok mauliate tu na marhuaso i. Ikkon takkas do roha i manghamauliatehon naung adong i, asa marpangidoan muse tu Debata mangelek asi ni roha-Na. Jala ingot hita di hata na mandok “Pangido hamu ma, sai na lehononna do i tu hamu; lului hamu ma, sai na jumpangan do hamu; tuktuki hamu ma, sai na ungkaponna do i di hamu.”Mateus 7:7. Unang lilu haporseaon i. Disi mangido tu Debata, di papos ma rohana uju mandok “Amen!” na oloan ni Debata do tangianghu! Unang mardua roha, alang las alang ngali. Gomos dipangido di bagasan tangiang na be, asa tarida holong ni roha ni Debata marhite tangiang i. Amen

 

Diskusi:

1.      Dipartikkian saonari on, tung godang jolma na manolon/marpadan (bersumpah) di bagasan goarni Debata. Alai laos diporso manang dilaosi do padan naung binaen nasida i. Aha do mambahen i?

2.      Dia do tagonan, martangiang ditikki hasusaan manang ditikki hasonangan?

 

6.   Marende         : BE No. 487 : 1 + 3 “TUNG HALAK NA MARGOGO”

7.   Tangiang         : Sian ruas na ro

8.   Marende         : BE No. 814 : 1 – 2  “SAI AJARI AU TUHANHU”

9.   Tangiang         : Sian na manjabui

10. Marende         : BE No. 789 : 1-“LULUI HAMU HARAJAON” (Pelean)

11. Tangiang Ale Amanami – Pasupasu

 

 

 

Pdt. Sopar Mangido Tua Manurung

Pendeta HKBP Ressort Persatuan Tanjung Balai