NUNGA TANGKAS HUIDA BOHI NI DEBATA, Lukas 18 : 1 – 8

 MINGGU, 19 OKTOBER 2025

XVIII DUNG TRINITATIS

 

 

1. Marende     : BE No. 182 : 1 + 4   “TU JOLOM O DEBATANGKU”

2. Votum         : A.XV.B.4 – D.XIII.52

3. Epistel         : 1 Musa 32 : 22 – 32

4. Marende     : BE No. 30 : 1 – 2    “JESUS LEHON HATORANGAN”

5. Jamita         : Lukas 18 : 1 – 8

 

NUNGA TANGKAS HUIDA BOHI NI DEBATA

 

                        Uju di portibi on dope Jesus diula do mangajari, marjamita, pamalum na marsahit, dohot patupa tanda halongangan. Saihot do idaon saluhut ulaon na pinatupa ni Jesus, ima: laho manosoi dohot manogihon saluhut halak asa bulus manghaporseai Debata sitompa saluhut, dohot Jesus Kristus Sipalua portibi on, jala na tongtong mian di bagasan panggomgomion ni Tondi Parbadia (Debata Sitolu Sada). Dang adong alternatif na asing na gabe mual dohot haroroan ni pasupasu so holan Debata sambing. Tu Ibana do sandok manisia mangido gogo dohot pangurupion. Holan Tuhan  do hasahatan ni nasa pangidoan, haporusan di saluhut holso dohot hoi na gompang di bagasan rohanta marhite tangiangta.

            Laho pamurahon antusan ni natorop lapatan dohot hinaarga ni tangiang gabe dihatahon Jesus ma sada umpama. Cara tersendiri do i di Tuhan Jesus di nalaho mangajari natorop i sekaligus gabe media/alat pangajarionNa. Jala ondolan ni umpama on songon na di ayat 1 i do paboa, “ingkon tongtong nasida martangiang, na so tupa lemba”. Dison diumpamahon do halak na martangiang tu sahalak ina na mabalu dohot sada panguhum na so mangkabiari Debata jala ndang dipardulihon jolma. Adong perkara ni inanta i jala ro ma ibana tu panguhum nangkin. Pangidoanna ima “pintori ahu maralohon alongki”. Lapatanna urupi au manghamonanghon perkarangkon. Disi ndang dipaboa ise alona jala aha perkarana. Alai goarna ma hakim na so parduli, ndang dipardulihon manang aha. Apalagi ma on, sahalak na mabalu do na ro, sama sekali tidak digubris. Ra didok, laho ma ho! Ndang adong be na tarbahen ina na mabalu i, holan sada do, ima ro ibana muse. Tong muse ditolak, diulakhon ibana muse ro. Songon i ma torus, ganup ari ibana ro tu hakim i dengan satu permintaan yang sama; “Pintori ahu” .

            Aha ma namasa? Gabe didok hakim i ma tu dirina, “ tutu do ndang huhabiari Debata, jala ndang parduli ahu tu jolma. Alai hupintori nama na mabalu on “ala dinengnengi ahu, atik beha ro ibana annon manggariang ahu”. Sasintongna ndada na pala mabiar ibana tu serangan fisik, ndang! Ala kegigihan ni na mabalu i do na menaklukkan ibana. Aha ma nanaeng dohonon ni turpuk on tu hita nuaeng? Dipatorang Jesus do di ayat na mangihut, “tangihon hamu ma pandok ni panguhum na geduk i”. hata ni hakim i do siparrohahononta na mandok “alai hupintori nama namabalu on ala dinengneng i ahu” sian i ma dibahen Jesus laho paposhon rohanta, “ia Debata tung so pintoranNa ma napinillitNa? Angka na manjou ibana arian dohot borngin? Tung pangerngeronna ma di nasida? Hudok ma di hamu : magira ma pintoranNa nasida”. Na naeng dohononna ima : molo hakim na tangkang pe olo mamintori ina namabalu na so pardihana i, ba lam ma Debata maradophon hita angka anakhonNa na hinongkopNa i. Mansai ambal situtu do

perbedaan ni hakim i tu Debatanta. Ibana hakim na so parduli tu Debata nang tu jolma, ndang adong partalianNa tu na mabalu i, hape Debatanta i ima Debata naung manghaholongi hita bahkan naung mangalehon Jesus anakNa i laho manobus hita. Debata na sai manarihon na ringkot di hita, naung mambahen hita gabe anak haholongan ni rohaNa.

Memang jotjot do ndang sai pintor dilehon/dioloi Debata angka na tapangido. Alani i do diajari hita marhite umpama on, molo so pintor dioloi unang mandele, unang pintor lao mangalului na asing, tu datu/orang pintar, manang mangalului hambalingan (pelarian), alai benget ma martangiang tu Debata Sitolusada i. Alani i dijouhon turpuk on do tu hita, pasahat ma sude perkaram, aha persoalanmu, masalahmu na dokdok/na solot di roham. Tangiangkon marhite parsitutuon, torus, unang mandele, perjuangkan ke hadapan Allah dengan iman , alai paloas ma Debata mangalehon alusNa sian kedaulatanNa. Alani i tajugulhon ma tangiang jala huhut tadok: “Unang ma lomongku, alai lomo ni rohaM ma nasaut. Amen.

Diskusi :

1.         Songon dia do pangantusionmuna taringot tu na “jugul martangiang”

2.         Dia do lapatanna tadok di tangiangta; “Unang ma lomongku, lomo ni rohaM ma na saut?

 

6.    Marende   : BE No. 814 : 1 + 3  “SAI AJARI AU TUHANKU”

7.    Tangiang  : Sian ruas na ro

8.    Marende   : BE No. 769 : 1  “TU DEBATA DO PANGHIRIMON”

9.    Tangiang  : Sian na manjabui

10. Marende : BE No. 758 : 1 -“JAHOWA PANGURUPI”        (Pel.)

11.  Tangiang Ale Amanami – Pasupasu

 

Pdt. Glory Simamora, M.Div.

(Pendeta HKBP Resort Padang Mahondang)