DEBATA PAIMBARUHON NGOLU NI BANGSONA. Mateus 6 : 25 – 34

                                               MINGGU, 21 SEPTEMBER 2025

XIV DUNG TRINITATIS

 

1.  Marende        : BE No. 1 : 1 – 2  “RINGGAS MA HO TONDINGKU”

2.  Votum            : A.XV.A14 – D.XIII.49

3.  Epistel            : Amos 9 : 11 – 15

4.  Marende        : BE No. 775 : 1  “UNANG HOLSOAN”

5.  Jamita                  : Mateus 6 : 25 – 34

 

DEBATA PAIMBARUHON NGOLU NI BANGSONA

 

Huria ni Tuhanta,.

Hira naso adong do idaon “hata sae” di hajolmaon taringot tu saluhutna i. Ndang mansadi hajolmaon, sumarihon jala manghalojahon mandiori angka na ringkot di ngoluna siganup ari. Di sude kesibukan ni hajolmaon I, gabe olo do sipata tading hinaringhot ni na manghalungunhon Harajaon dohot hatigoran ni Debata. Dang be prioritas harajaon ni Debata di rohani torop jolma. Huriani Tuhanta, andorang so turpuk  on, adong do jamita dohot pangajarion na arga sian Tuhan Jesus, ima taringot tu na so tama do holan na mangalului arta na di portibi on, asa unang soluk angka parange haholomon. unang ma holongan di hepeng dohot angka na di portibi on diharinghothon hajolmaon, gabe lilu maon haporseaonna, laos diaithon godang na bernit tu ngoluna. sipasidingon ma parange sisongoni, dipareahi ma hatigoran, hadaulaton, holong ni roha, habengeton dohot lambok ni roha ( Pat 1 Tim 6: 10-11). Unang ma lalap papungu arta na targagat tasik dohot ngitngit, ai di horhoni do ganda angka siholsohononhon.

Huriani Tuhanta, na masirainan do ngolu na patorbanghu mangalului arta di tano on tu na holsoan, ala sai dipingkirima boha lam suksuk arta I dohot angka na ihut tusi. Habis tingki, gogo, pikkiran, mangeahi saluhutna I, taru so adong be tingki mangulon dohot papungu arta na di banua ginjang i. ala ni ido, molo didok “unang holsoan” marlapatan doi; unang suda tingki holan marhoi, bubuason, gelisah hape dang  adong usaha laho haruar sian holso i. Holsoan sian dua hata “Hol dohot So” HOL lapatanna; ndang adong be sihirimon ( isarani sada ina na so adong be tagamon boi marhagabeon), SO ; pasif, ndang marpangulaon. Molo didok unang holsohon hamu, ndada na so ringkot be ngolu pardagingon, parabiton, sipanganon dohot siinumon. Alai unang gabe mago hinaringkotni na marsaor tu Tuhan i.Songon pandok ni Marthin Luther : Ora et labora/ Martangiang huhut mangula. Tinangianghon na niula, niulahon na tinangianghon. Alai dang gabe talu tangiang alani rongking dohot ronsot ni ulaon. Unang tading tangiang alani panghuduson mangeahi ulaon. Ringkot mangulon, haru Tuhantai, 6 ari do dipangke tingki panompaon, dung I mangulon. Ala ni ima dihalomohon Tuhantai do asa tahamonanghon holsa na adong di rohanta marhite:

Na pasahathon holso i tu Debata. Dibahen Tuhanta Jesus do di turpuk on, tudosan laho sipamanaton ni jolmai, ima pidong namartongatonga langit dohot bungabunga di ladang  na so manabur alai disarihon Debata. Nda andul ummarga jala tumimbo jolma sian angkai saluhutna? Dilehon Debata do jolma I hasurungan sian angka na tinompa naasing. Imago Dei; ditompa jolmai tudos tu rupa dohot pangalaho ni Debata.

Marsihohot ma marhaporseaon tu Tuhan Debata. Dung tapamanat nahumaliang, saluhut diparmudu Debata hombar tu angka hinaringkotna, jala diaturhon Debata songon dia pardalan ni ngoluni sude na tinompaNai. Tapamanat ma saluhutna I, asa holang ngolunta sian na mandele. Songon nidok ni pandohan ni halak Batak “ Hotang binebebebe, hotang pinulospulos, unang ho mandele, godang do tudostudos. Tinatap tu jolo, pinamanat humaliang jala tinailihon tu pudi”. Marsihohot porsea di panarihonon ni Debata. Haporseaon  na marpangulaon, jala kreatif pahembanghon angka naung diparade Debata. Asa dang be siholsohononhon sipanganon, siinumon, parabiton songon pangholsohonon ni na so tumanda asi ni roha ni Debata. Sandok niulahon ma nionjarni haporseaon tu huaso ni Debata. Tung so mangan ma angka na mangula? Tung so manggotil ma angka na manabur.

Haporseai ma na paluaonni Tuhan I do ngolunta sian holso ni rohanta. Godang hamaolon na tabolus, alai  ndada boi malua hita sian hamaolon i binahen ni holsoan hita,baliksa tahe gabe lam ganda do angka hamaolon molo sai lalap holsoan hita. Alai tatompashon ma tu Tuhan I, ai so adong gogonta paluaon dirinta sian hamaolon I pasarisari sipanganon, parabiton dohot angka kebutuhan na asing. Ala ni I sigop ma jumolo mangalului harajaon ni Debata dohot hatigoraNa, ai tambahononNa do sude angka ondeng. Unang magotap parsaoran tu Tuhan I, gomos ma marsihohot sian nasa roha, porsea ma Tu Tuhan Jesus dasor ni gogo dohot huaso na tangkan mangalehon jaminan laho manghamonanghon roha na holsoan. Amen.

Diskusi :

a.    Aha do na mambahen hita bobonosan mangadopi angka na hurang di tongatonga di ngolunta ?

b.    Boha hita mangadopi molo sonson habiaran i mangarajai roha dohot pingkiranta?

6. Marende         : BE No. 713 : 1 – 2  “TOGU AU O TUHANKI”

7. Tangiang               : Sian ruas na ro

8. Marende           : BE No. 834 : 2  “NA MASIHOL DO ROHANGKU”

9. Tangiang               : Sian na manjabui

10.Marende        : BE No. 474 : 1- “INGKON JESUS DO DONGANKU”    

11.Tangiang Ale Amanami – Pasupasu.

Pdt. Juwita Nababan, S.Th.

 (Pendeta HKBP Resort Exaudi)