PODA TOHONAN PANDITA

Poda Tohonan Pendeta HKBP

PODA TOHONAN HAPANDITAON  HKBP

Parjolo

Ramotanmuna ma arta na sian Tuhan Jesus, songon na binahen ni parmahan mangaramoti na di  ibana, asa unang mago. Ai peakhononmuna do sogot rujiruji taringot tu angka na pinarmahanmuna di jolo ni Tuhan i. Na gabe sitiruon do hamu di jolo ni angka na pinasahat tu hamu. Dibahen i tangkas ma hatahon hamu tu nasida Hata ni Debata, na tarsurat di angka surat na di Padan na Robi dohot di angka surat na di Padan na Imbaru. Buat hamu ma sian Hata i poda, apoapo, sipaingot, apulapul dohot hata paminsangon, hombar tu angka na masa. Songon i do dibahen angka apostel, songon na nidok ni Apostel Petrus: Molo adong na marjamita, dihatahon ma hatana songon Hata ni Debata;  Molo adong  manang ise na marhobas hombar ma i tu gogo na nilehon ni Debata, asa dapotan hasangapon Debata marhitehite Tuhan Jesus Kristus di na saluhutna (1 Petrus 4:11). Sialoonmuna jala sitaluhononmuna ma nasa hatahata, na marsalisi tu Hata ni Debata. Marlambok ni roha ma hamu maminsangi angka na mangalo, anggiat dilehon Debata hamubaon ni roha, asa diboto nasida hasintongan (2 Timoteus 2:25). Antong, ramoti hamu ma dirimuna dohot na sapunguan i, manang tu dia hamu dipaojak Tondi Parbadia asa diparmahani hamu Huria ni Debata, na hinophopNa i marhitehite Tuhan Jesus Kristus (Ulaon 20:28). Ingkon baritahononmuna do hata sihaporseaan i, i ma na nilehon ni Debata padengganhon jolma tu Ibana, ai i do dalan tu hangoluan, dalan tu hamubaon ni roha dohot dalan pardamean ni jolma tu Debata.  Pardengganan na songon i ma paboaonmuna tu angka na pinasahat tu hamu. Antong singkat ni Kristus i do   hamu mangelekelek  jala   dohononmuna ma tu jolma i: Sai olo ma hamu padengganon tu Debata.

Mangaramoti arta na sian Tuhan Jesus, songon na binahen ni parmahan Mangaramoti dorbiana, asa unang mago. Mamodai, mangapoi, paingothon, mangapuli dohot maminsang marhite Hata ni Debata Ai singkat ni Kristus do hamu (1 Petr. 4:11; 2 Tim. 2:25; 2 Kor. 5:20)

Paduahon

Songon tangkas ni pamodaionmuna di angka na olo tu hadaulaton tu Debata, ingkon songon i ma tangkas paminsangonmuna di angka na so olo tu hangoluan, asa unang adong na mago, ala so ada sipaingot,  jala unang marsapata nasida tu hamu. Ingot hamu ma na tarsurat i: Ia ho ale anak ni jolma! Nunga Hupabangkit ho gabe siparmahan ni halak Israel, ingkon tangihononmu Hata na ruar sian pamanganHu. SingkatHu ma ho, palumbahon nasida. Molo Hudok tu angka pardosa na tu hamatean nama ho, gabe so dipalumba ho ibana, ndang diapuli ho ibana, asa dipauba rohana, asa mangolu, na mate do tutu pardosa i ala ni dosana, alai sian tanganmu do tungguonHu mudarna. Alai molo dipalumba ho pardosa i, hape ndang dipauba rohana dohot pambahenanna, mate ma ibana tutu di bagasan dosana, alai malua do ianggo tondim.

Mamodai dohot maminsang angka na so olo tu hangoluan asa unang adong na mago alani dosa (Hes. 33:7-9)

Patoluhon

Alai ndada holan ulaon ondeng na pinasahat tu Pandita. Ai di na laho manadingkon tano on Tuhan Jesus, jumolo do dipadiri ulaon na badia na dua ragam i.  Na mangan parpadanan na badia do na saragam. Na saragam nari, i ma pandidion na badia, na tinonahonNa i di na laho manaek Ibana tu banua ginjang. Asa radotanmuna ma ulaon na badia na dua ragam i; songon parhobas di bagas ni Debata ma hamu mangulahonsa. Tangkas ma pamanat hamu angka dongan i, asa holan angka na tau, angka na tumanda dosana, angka na mangarsakhon pambahenanna jala na olo paubahon rohana manjonohi panganon na badia i. Ambatonmuna do angka na jungkat, angka na lomo roha di dosa, asa unang dijonohi na badia i. Ingot hamu ma: Dipasahat Tuhan Jesus do anak hinsu ni banua ginjang tu HuriaNa i, asa dipabali angka na so olo paubahon rohana, ai ninna do: Hulehon pe tu ho anak hinsu ni harajaon na di angka banua ginjang i. Nasa na niihotanmi di tano on, na tarihot do i dohot di angka banua ginjang, jala molo adong diharhari ho di tano on, harhar do i nang di angka banua ginjang. Didok Tuhan Jesus dope: Jalo hamu ma Tondi Parbadia! Molo disesa hamu dosa ni manang ise, naung sesa ma  i, molo dipahot hamu dosa ni manang ise naung hot do i .

Mangaradoti dohot mangulahon Ulaon na Badia, naung dipadiri Tuhan Jesus laho paluahon halak na olo paubahon rohana (Mat. 16:19; 26:20-30)

Paopathon

Angkup ni i, radot ma hamu patureturehon angka dakdanak, maniru pambahen ni Tuhan Jesus. Ai didok Tuhan Jesus sahali: Loas hamu ma angka dakdanak i ro tu Ahu, unang orai hamu nasida, ai di angka sisongon i do harajaon ni Debata.  Dibahen i ajarhon hamu ma pamusatan ni Hata ni Debata (Katekhismus) dohot jamita tu angka dakdanak. Podai hamu ma nasida, asa diboto hadaulaton tu Debata dohot hapantunon tu jolma.  Ambati hamu ma nasa na tau mangago dakdanak, ai parmahan do hamu, songon naung nidok ni Tuhan Jesus: Parmahani ma angka anak ni birubirungKu

Radot Patureturehon angka dakdanak maniru pambahenan ni Tuhan Jesus (Mark. 10:14). Mamodai asa diboto hadaulaton tu Debata dohot hapattunon tu jolma      (Yoh. 21:15c)

Palimahon

Ramoti hamu ma saluhut pangisi ni Huria i, angka na mabalu, angka ama, ina, dolidoli dohot anak boru, maniru pambahen ni Apostel Paulus.  Ai ninna do tu halak Epesus: Dibahen i jaga ma hamu, ingot hamu ma na so mansohot ahu saleleng ni tolu taon arian dohot borngin, paingothon ganup hamu huhut mariluilu.  Tangiangkon hamu ma saluhut na pinasahat tu hamu, asa diramoti Tuhan Jesus nasida jala dipasupasu marhitehite Tondi Parbadia

Ramoti jala jaga hamu saluhut pangisi ni Huria i, angka namabalu, angka ama, angka ina, angka dolidoli dohot anak boru, maniru pambahenan ni Apostel Paulus (Ul. 20:32)

Paonomhon

Angkup ni i, sai ture ma parangemuna, asa tau tiruan hamu di angka na pinarmahanmuna i, tiruan di hata, di pangalaho, di haporseaon dohot di holong ni roha. Ingot hamu ma na nidok ni Hata ni Debata: Ingkon unang marhaurahon sintua i, harajaan ni sada boruboru, unang parmabuk, na marroha, na ture marparange, na las roha di tamue, pangajari, unang sisobur tuak, unang pangalinsingi, unang parpangomoan na so tama, alai ingkon partalup ni roha do, na so parbada, na so impolan di perak, na denggan mangarajai donganna sabagas, parianakhon sioloi ajar di bagasan nasa hatomanon. Ai molo adong manang ise, na so malo manggomgomi isi ni bagasna tung beha ma tarpaturesa Huria ni Debata.

Marparange na ture asa gabe tiruan tu angka napinarmahan:

unang marhaurahon, harajaan ni sada boruboru, unang parmabuk, na marroha, na ture marparange, na las roha di tamue, pangajari, unang sisobur tuak, unang pangalinsingi, unang parpangomoan na so tama, ingkon partalup ni roha do, na so parbada, na so impolan di perak, denggan mangarajai donganna sabagas, parianakhon sioloi ajar di bagasan nasa hatomanon, (1 Tim. 3:2-4)

Papituhon

Ingkon ture bahenonmuna saluhut aturan ni ulaonmuna i mangihuthon patik ni indukmuna. Sahata ma hamu dohot angka dongan Pandita: Di pangalaho ni pangoloion tu Debata, unang pulikpulik marpingkiran, unang marsalisi hata dohot roha, unang masigasipan, asa saut di hamu na pinangido ni Tuhan Jesus sian AmaNa di na nidokNa i: Sai tongtong ma di GoarMu nasida na nilehonMi tu Ahu, asa sada nasida songon Hita.

Ingkon ture bahenon saluhut aturan ni ulaon mangihuthon patik ni induk, Sahata ma hamu dohot angka dongan Pandita: Di pangalaho ni pangoloion tu Debata. Asa saluhut sada dibagasan Tuhan i (Yoh. 17:21)