Rekaman Khotbah

REKAMAN KHOTBAH ( Dikutip Dari Beberapa Sumber)
Jamita Minggu 28 Oktober 2012, Jeremia 31: 7-9
Di : HKBP Wahidin Baru, Resort Wahidin Baru Medan
Minggu : Siang Pkl 10. 00 Wib
Huria ni Tuhanta, mansai hansit do ngolu ni halak na tartaban hona jajah, songoni ma Bangso Israel  Tartaban do bangso Israel hinorhon ni pangalaosionna di angka patik naung niaturhon ni Debata. Gok do parungkilon na niadopan ni bangso i hinorhon ni i. Alai dung diae bangso i na hansit , dipatubegehon si Jeremia ma barita hatiuron na pahehe roha ni bangso i laho manghirim. Dibagasan turpuk on naeng idaonta sangkap hatuaon ni Debata dibagasan uhum na mangonai tu bangso Israel. Tangkas do i didok di jolo ni trpuk on di Jeremia 29 : 11 na mandok : “
Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna “.  Sian hata i taida, na laho paulihon bangso Israel do Debata, laho paubahon arsak gabe las ni roha.  Di Turpuk Minggunta sadarion idaonta ma Pangaramotion ni Debata d BangsoNa

Dongan Sahaporseaon dibagasan Jesus Kristus tangkas do di ondolhon di ayat 7 : Paulion ni Debata ma pomparan ni si Jakob, Tabereng ma pandonganion ni Tuhani di bangso na pinilliNa i.
Surak surak dohot olopolop dison dipahombar do tu si Jakob, ai goar ni si Jakob do songon sada parsadaan ni sude marga Israel na manjalo padan sian Debata.  Laos boi dohonon  goar “Jakob” ido dison isarani na mamboan hatiuron ditonga tonga ni angka bangso parbegu uju i, jala asa ibana na gabe ihutan (panutan) na manindangi  Jahowa. Alasan na asing umbahen na pola dipahombar tu si Jakob suraksurak dohot olopolop ni bangso Israel di ayat on ima : ala tardok pinompar ni si Jakob do nasida saluhutna angka na naeng manjalo haluaon i, jala na pinapulik sian angka bangso parbegu.  Sian Goar Jakob on ma muse Gabe Israel.

Huria Ni Tuhanta  : Debata do namanogihon bangsoNa muse mulak sian habuangan
Na parjolo digombarhon di ayat on ima hansit ni panghilalaan ni halak na tarbuang, isarani halak na marserak, mapitung, na pangpang, jala songon hansit ni na mangintubu. Angka gombaran do i dibahen di hapariron ni nasida na tarbuang i.
Alai tung tangkas do dipatubegehon dison paboa na so torus masa angka na songon i, ditatap Jahowa do bangsoNa i marhite balga ni holongNa. Alani ma dijouhon si Jeremia dison bagabaga ni Debata na manogu nasida muse sian habuangan i. Pandohan di ayat 2 na mandok “ Ahu manogihon nasida sian tano na tungkan utara “, na manudu inganan Babel do na nidokna disi. Na marlapatan, Debata do na manogihon bangsona mulak sian Babel, ndada hinorhon hagogoon ni bangso i, alai tung ala na tinogihon ni Debata Jahowa do umbahen na tarbahen mulak sian tano na tungkan utara (Babel).
Diuduti do muse di ayat 2 on hata na mandok : “Tung luhutan na bolon do nasida angka na mulak i tuson “. Hata i naeng pabotohon paboa tung saluhutna do nasida dijou mulak sian habuangan, manang tung godang do bilangan ni bangso i na tarjou mulak sian habuangan.

Huria Nahinaholongan Ni Tuhanta  : Hamubaon ni roha manghorhon hangoluan na denggan
Ido naniondolhonna di ayat 9 on, na manolsoli do muse bangso i di sude angka parulaonna na sai laon tu Debata. Panolsolion i digombarhon do songon halak na tumatangis dohot na marhuraja. Ima patuduhon panolsolion ni roha na sai laon manundali Debata. Dung pe diae bangso i na


hansit di habuangan asa mamoto nasida di sude angka hahuranganna. Penyesalan selalu dating terlambat nina peribahasa melayu, Menyesal tua tiada berguna
Panolsolion jala hamumulak ni bangso i tung dijanghon Debata do, gariada tahe diparbaga Debata do tu nasida hangoluan na dumenggan tu angka ari na na naeng ro. Boi do i idaonta sian pandohan di ayat 9 na mandok : “Ahu ma manogihon nasida tu angka batang aek di dalan na hornop, ndang tagamon tarsulandit nasida disi “. Gombaran ni parngoluan na dumenggan, manang parngoluan na maduma do na naeng gombarhononna disi. Ima parngoluon sijaloon ni bangso na marhamubaon i. Jala ndada holan i, tung dipatongon Debata do muse pinompar ni si Epraim gabe songon anak buha baju ni Debata.  Pinompar ni si Epraim na nidokna dison dihonahon tu bangso na mulak sian habuangan i. Molo pe ditodo Debata nasida songon anak buha na baju, na marlapatan do i asa gabe songon sada tiruan do muse nasida ditonga tonga ni angka bangso na adong di hasiangan on.

Dongan Shaporsean , alani ingkon do hita mulak tu dalan ni Debata, tatinggalhon ma angka pambahenanta nahurang denggan I na sai laon ai ido di halomohon Debata, Ai Parsiroha do Debata lambat tarrimas jala parasiroha godang
Alani naeng ma ringkot ingotonta
     Sai na mulak do roha ni Jahowa mida halak na mangharinghothon hamubaon ni roha.      Taeahi ma ngolu  na dumenggan dohot hinalomohon ni Debata , ai di asii Debata do  halak na so olo tumundalhon dalanNa.
     gabe anak buha baju ni Debata ma hita halak noporsea dohot namarhamubaon, asa gabe tiruan di tonga tonga ni angka bangso na so haru tangkas dope mananda Debata.  Amen


























Jamita  Minggu 4 November 2012
Di : HKBP Wahidin Baru
Minggu : Siang Pkl 10.00 Wib
                                                                        Markus 12;28-34

Huria ni Tuhanta hea do didok Tuhan Jesus sahali songonon“Ndang sadia dao ho sian Harajaon ni Debata,” ninna Tuhanta Jesus tu sibotosurat na ro manungkun Ibana . Harajaon ni Debata, apala i do pamusatan ni pangulaon dohot panindangion ni Jesus mangihuthon na tolu panurat ni Evangelium na parjolo, si Mateus, si Markus dohot si Lukas. Molo tapamanat rupani di bona ni Evangelium Markus on, di na dipungka Jesus marjamita apala i do na parjolo dihatindanghon, didok, “Nunga dapot tingkina, nunga songgop Harajaon ni Debata.” (1: 15). Harajaon ni Debata, aha do i?
            Harajaon ni Debata, i ma panghuasoion ni Debata di jolma di bagasan rumang ni parsaoran na mansai rosu, na nirahut ni dame dohot holong ni roha, suman tu holong ni roha ni ama tu angka anakna. Patulushon i, dosa na na manegai dohot mangambati parsaoran i, ingkon do jolo dipasisi, disegai jala dibolonghon. Di bagasan Kristus do i diulahon Debata. Marhite haroroNa, pangulaon dohot panobusionNa nunga be ditaluhon dosa i, dipasidung jala disalesehon. Ala naung disalesehon, tercipta ma muse parsaoran dohot pardomuan tu Debata. Hombar tu lapatan ni Harajaon ni Debata na nidok ondeng, laos dohonon ma, di bagasan Jesus Kristus, ala ni haroroNa, pangulaon dohot panobusionNa, nunga songgop be Harajaon ni Debata, jala sian asi ni rohaNa dijangkon ma jolma tu bagasanna, gabe wargana.
            Huria nahinaholongan ni Tuhanta Jesus Kristus, Mulak tu naung nidok ondeng, tu sibotosurat i didok Jesus do, “Ndang sadia dao ho sian Harajaon ni Debata.” Ndang sadia dao, lapatanna nunga jonok. Alai nang pe naung jonok, ndang bongot dope. Dohot hata na asing, ndang parsidohot dope ibana di harajaon i, ndang parjambar dope; ndang dijangkon dope ibana tu bagasan songon warga na sah. Ndang adong guna ni na songon i. Ingkon na bongot do asa marguna. Songon i, nang pe naung songgop Harajaon ni Debata di tongatonganta, boi do hita holan jonok; boi ndang bongot jala ndang partohap di bagasanna. Asa malua hita sian kenyataan na songon i, marojahan di jamita on naeng pamanatonta do, angka dia ma na patut ulahonon jala hangoluhononta.
            Taidama nangkin, disungkun sibotosurat i do Tuhanta Jesus Kristus, didok, “Dia do patik na umangat sian patik i sudena?” Molo martaringot ‘patik’ di Israel di jaman ni Jesus, boi do dua na nidokna, i ma:
1.    Patik ni Debata songon na tarsurat di Buku Musa. Mansai godang do patik i. Na paling terkenal, i ma Patik na Sampulu i, Kesepuluh Hukum, Dasa Titah manang Decaloog.
2.    Patikpatik. Ala mansai godang jala rumit do patik i, diuji angka rabbi do pahibulhon. Dirumushon nasida ma 613 pasal patik; 248 ma i parenta, 365 oraora. Na 613 patik i, ndang polin be sude na dienet sian patik ni si Musa, alai godangan nama na diojakhon tu tafsiranna. Dipabidang do na deba, diorui na deba nari. Rupani, molo di Buku Musa didok, “Holong ma roham di donganmi,” di patikpatik i ditambai do i, didok, “Holong ma roham di donganmu, hosom ma ia di musum.”
Di pudian ni ari, gabe patikpatik i nama na gumodang ditanda halak. Molo martaringot hata ‘patik’ tusi nama laho rohanasida.
            Songon i ma dison, di na sinungkun ni sibotosurat i Jesus taringot tu patik na umangat, sian na 613 i do nidokna, ndang sian patik ni Debata songon na tarsurat di Buku Musa i. Alai Jesus mamboan ibana mulak tu bona, tu surat i, didok, “On do patik na umangat: Tangihon ma ale Israel, Tuhan sasadasa do Debatanta i. Jala sihaholonganmu do Tuhan Debatam sian nasa ateatem, sian nasa hosam, sian nasa roham dohot sian nasa gogom!” Pandohan on dienet sian 5 Mus.6:4-5. (Ida Turpuk Minggu on, 5 Mus.6:1-9). Disi disimpulhon do haporseoan ni halak Israel taringot tu Debata. Ndang adong sian Israel na so umboto i, ai i do ayat na parjolo diajarhon tu ganup dakdanak ni bangso i, jala di ganup kebaktian sai dipajojor do i. Panandaon di Debata na sasada i, ingkon i do haborhatan laho manjalo dohot mangoloi patikNa.
            Laos songon i ma di hita, ia naeng sintong tandaon jala ulahononta sintuhu ni patik dohot lomo ni roha ni Debata, ingkon parjolo do Ibana tandaonta. Debata sasadasa do Ibana, Allah yang Esa; Debata na mangula, na bertindak paluahon jala manobus hita. Luhutna i diulahon sian asi dohot holong ni rohaNa. Ndang adong debata na asing na manghaholongi hita songon i. Hata ni endenta mandok, “Tung di dia jumpang ahu Tuhan sada songon Ho, na manogunogu ahu tu na sonang songon Ho?” (BE 149:2). “Tung sura lao au tu na dao mangalap hatuaon. Ndang dapot i di tano i di nasa hajolmaon.” (BE 162: 2). Olo, ndang adong debata manang tuhan na asing na manghaholongi hita. Di konsepsi hatuhanon ni Batak rupani, ndang adong hea tarjaha taringot tu sumangot manang sombaon na manghaholongi jolma. Di teologi ni  Islam, nang pe sai digoar nasida Allah i yang pengasih dan penyayang (ar’rahman ar’rahim), sasintongna gumodang do dibayanghon nasida Allah i songon panguhum na manguhumi jolma. Sogot di ari uhum i, timbangan do pangkeonna, kilo laho manontuhon na malua dohot na laho mago. Ndang adong disi asi ni roha, ndang adong holong, ndang adong sayang. Ndang songon i anggo Debatanta i. Na holong roha do Ibana, na bertindak manobus jala paluahon hita; naung menciptakan parsaoran na denggan antara ni hita dohot Ibana di bagasan harajaonNa. Maringot i, patut ma hita manghaholongi Ibana sian nasa ateatenta, sian nasa hosa dohot sian nasa gogonta. Ateate manang roha (Heb.labaabkaa/heart), i ma hapeahan ni pangantusion; hosa (Heb.naphsakaa/soul/tondi), i ma pusat ni ngolu dohot hadirion; jala gogo (Heb.maodekaa/might), i ma enerji manang daya hidup. Na nidokna disi, ingkon haholonganta do Debata Jahowa i sian sandok hadirionta, i ma hajolmaonta parbagasan dohot parduru. Maribadah hita tu Ibana di bagasan haholongon. Tu Ibana sambing, ndang tu na asing, ai holan Ibana do na patut manjalo somba dohot pangoloionnasida.  Alai boha ma hita manghaholongi Debata?
            Tu sibotosurat i diuduthon Jesus do, “Haholongi ma donganmi songon dirim!” Pandohan on dienet sian 3 Mus.19:18. Sian i torang ndang apala marpardomuan i secara langsung tu hata haporseaon ni halak Israel ondeng. Tangkasna, patik taringot tu na manghaholongi Debata dohot patik taringot tu na manghaholongi dongan jolma, dibereng halak Israel do i songon dua patik na jongjong sandiri. Ala na jongjong sandiri do i, ungkap do kemungkinan tu na patujolohon na sada sian na sada nari. Tutu, sai dipatujolo Israel do na parjolo i, i ma holong tu Debata. Mansai tangkas do pangondolhonasida taringot tusi, neang ia tu na paduahon. Di Mrk.7 rupani, ditaringoti Jesus sada contoh ni pangalaho ni Israel na patujolohon holong ni roha tu Debata alai patutoruhon holong ni roha tu dongan jolma, ai dipodahon nasida do na so sala agia ise nang so dianturehon natorasna di ari hatutuana asal ma dipelehon tu Debata hepeng manang ugasan na aturan pangkeonna patureturehon natorasna i. Alai Jesus menyejajarkan na dua i di level na dos. Holong tu Debata ingkon na disorminhon do i di bagasan holong tu dongan jolma. Si Johannes mandok, “Pargabus do halak na mandok: Holong rohana di Debata, hape dihosomi donganna. Ai na so manghaholongi donganna na niidana, tung songon dia ma haholonganna Debata na so niidana?” (1 Joh.4:20). Holan sada do dalan manimbangi holong tu Debata, i ma holong ni rohana tu donganna. Ndang tarsirang na dua i, alai nda ung laos tarpados. Alai ise do dongan i? Dibatasi halak Jahudi do pangantusion ni dongan i olat ni sesama Israel. Alai disalpui Jesus do batas i, dihonahon do i tu saluhut jolma. Secara sangat mengesankan, digombarhon do i di umpama na taringot tu halak Samaria na asi roha i.
            Suang songon i ma hita, di bagasan panghaholongion tu donganta jolma do patuduhononta holong ni rohanta tu Debata. Patokanna, i ma holong ni roha tu diri. “Songon dirim,” ninna Tuhan i. Ndang egoisme na nidokna disi, alai pangargahonon di diri do songon jolma naung pinalua jala na jinangkon ni Debata tu harajaonNa. Arga do ganup hita di Debata, ala ni argana pola do ditobus marhite Jesus Kristus AnakNa i. Molo Debata sandiri nunga mangargahon hita, hita pe patut do mangargahonsa. Alai ndang holan hita na diargahon, ndang holan hita na dipalua jala ditobus, dohot do donganta, tarmasuk musunta. Ala sude diargahon songon hita, hita pe ingkon ma manghaholongi donganta.
            Mulak muse tu turpukta ari on, diparhatopot sibotosurat i do sude na nidok ni Jesus i, didok, “Tingkos do didok Ho Guru hombar tu hasintongan.” Sian i torang, nunga adong hian di ibana parbinotoan di Debata, parbinotoan taringot tu holong dohot pangoloion. Alai olat ni i do. Dung dibege ibana hata ni Jesus i, ndang dibuat ibana haputusan manghaporseai dohot manjangkon Ibana. Ala ni i do asa didok Jesus – sahali nari – “Ndang sadia dao ho sian Harajaon ni Debata.”
            Di hita pe, nunga adong be parbinotoan taringot tu Debata. Nunga tibu taboto paboa holong do na niigilNa sian hita, holong tu Ibana dohot holong tu dongan songon holong tu diri. Masalahna nuaeng, nunga beha parsaoranta tu Debata na badia i? Nunga beha panghaholonginta di Ibana dohot tu sesamanta? Mamoto taringot tu Debata ndang dos i dohot na manghaporseai, mangantusi holong ndang dos i dohot na manghaholongi. Jadi na ringkot di hita, i ma na porsea jala mananda dohot manghaholongi Debata, mananda jala manghaholongi dongan jolma. Holong tu Debata dohot jolma ndang targonti i dohot pelean. Molo dung digarar halak rupani guguan manang iuranna, pelean pembangunan manang persepuluhanna alai ndang hea marminggu, ndang hea ro tu partangiangan, ndang hea marulaon na badia, tung so adong do dalanna mandok naung dihaholongi do Debata. Angka i ma na so sadia dao sian Harajaon ni Debata, alai ndang anggo bongot.
            Naeng bongot do hita sude, naeng partohap jala parjambar di harajaon i? Molo i do, tatanda ma Debata jala tahaholongi, tatanda donganta jala tahaholongi ma donganta I doshon dirinta. Amen. 











Jamita Minggu 18 November 2012 Heber 9 : 24-28
Di : HKBP Wahidin Baru
Minggu Siang : Pkl 10.00 Wib
    Huria nahinaholongan dibagasan Jesus Kristua ia surat Heber on disurathon tu angka Kristen Jahudi na di pangarantoan, laho patoguhon haporseaonnasida. Boasa porlu patoguhon ? Ala tubu ganggu ni roha di angka na porsea uju i taringot tu bagabaga ni Debata dohot tu haluaon dibagasan Kristus. Marhite surat on, diondolhon do taringot tu hasasaut ni bagabaga haluaon ni Debata di bagasan Kristus di angka na porsea. Jala Kristus i do na gabe hasisingkop ni hapapatar ni Debata tu portibi on. Kristus i do Sintua ni Malim na Bolon i naung mamelehon hosaNa sandiri gabe tobus ni dosa ni portibi on tu Debata marhite silang na sahat tu Ibana.  Jala marlangku do i sahali ro di saleleng ni lelengna sahat tu na ro Ibana muse paduahalihon. Asa botoon ni angka sipanjaha surat Heber on, ai dibagasan Kristus do dalan manopot inganan naung pinaradeNa di angka na porsea di Ibana. Laos i do nang na diondolhon di turpukta on, asa lam bagas pangantusion laho patoguhon haporseaon tu Debata di bagasan Kristus.

      Dongan Sahaporseaon adong 3 pangondolan ni turpuk on tu hita. Dia ma i ? ima naparjolo . Tuhan Jesus Kristus do parhiteanta tu Debata. Di ay. 24 didok :”Ai ndada bongot Kristus tu bagasan na badia na pinauli ni tangan, gombaran ni na sintong i; tung tu bagasan banua ginjang sandiri do, laho patuduhon diriNa nuaeng di adopan ni Debata humonghop hita”. Kristus i do Debata na gabe jolma, na so dung mardosa songon jolma somal, marharoroan sian surgo, jala ndada tu bagasan na badia na pinauli ni tangan (Bagasa Joro na parjolo i) Kristus i laho, alai tu surgo do mangadop tu Ama i laho paradehon inganan di angka na porsea di Ibana. PangadopanNa tu Ama i, ndada holan tu hasangaponNa sandiri alai dohot do mambuha dalan di angka na porsea asa parsidohot mangadop tu Ama i. Singkop do ngolu nang panghobasionNa saleleng di portibi on. Umbahen na talup Ibana gabe parhitean laho padomuhon jolma na mardosa tu Debata na badia. Ndang adong parhiteanta asing ni Kristus i.

Huria nahinaholongan dibagasan Jesus Kristus Tuhanta di Johannes 14 : 6 didok Tuhan Jesus do  Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu”. Lapatanna ; Molo naeng sahat tu Ama i, ro ma tu Tuhan Jesus. Molo naeng mangantusi/mangalului hasintongan, ro ma tu Tuhan Jesus. Jala molo naeng dapotan hangoluan ro ma tu Tuhan Jesus. Molo adong halak  na manghatindanghon hadirionna gabe dalan tu Ama i manang parhitean tu surgo, hata gabus  do i. Sai unang tartait jala olo hita manghaporseai panindangonna i manang mangihuthon podana.  Ai tardok do i, parpoda haliluon.

 Napaduahon didok Turpukon tu hita Panobusion ni Kristus do na singkop. Mangihuthon 3 Musa 16 : 15 – 22 ingkon patupaon ni halak Israel do marhite malim pelean pardamean/pardengganan ala ni dosa ni bangso nang malim i tu Debata. Alai, ndang singkop pelean na hinobasan ni malim i (ay.25). Mulahulak do dipatupa asa mardame jolma i dohot Debata. Ganup taon, ingkon ro do jolma i mamboan pelean pardamean tu Debata. Boasa ? Ala jolma i do na mardosa dompak Debata. Targade jolma i tu dosa, umbahen na porlu panobusion. Alai ise ma na tuk manobus, ai rap mardosa do sude. Ingkon mudar ni jolma na so siula dosa do na tuk manobus singkat ni jolma naung targade tu dosa. Tuhan Jesus Kristus do halakna. Ndang adong na asing. Kristus i do Birubiru ni Debata na mamorsan dosa ni portibi on (Joh. 1 : 29), na gabe pangondianta dohot pardenggananta (I Joh.2 : 1 – 2; Rom 3 : 24 – 26). Holan mudar ni Sintua ni Malim na Bolon i do na tuk pasingkophon pelean pardamean i. Ndang mulahulak be patupaon pelean pardamean, alai sahali do i jala marlangku ro di salelenglelengna (ay.26).

Dongan Sahaporseaon napotuluhon Holan sahali do masa hamamate ni Kristus singkatta manaon uhum ni dosa. Ampe tu Ibana uhum na laho tu hita hian. Hita do na mardosa, alai Ibana do manaon uhumanta. Didok do :”Songon na ampe tu jolma: mate sahali, dung i diuhum, songon i do nang Kristus, naung sahali dipasahat laho mamorsan dosa ni natorop i; alai paduahalihon ndada ala ni dosa, tarida ma Ibana disi, mantat haluaon di angka na paimahon Ibana (ay.27-28 . Holan sahali do i masa : Kristus mate ala mamorsan dosa ni jolma, alai jolma mate ala upa tinuhor ni dosa (Rom 6 : 23a). Di tingki na ro pe Kristus paduahalihon tu portibi on, ndada laho manjalo uhuman be, alai laho mandabu uhum nama tu angka na so porsea dohot mangalehon haluaon diangka na paimahon (porsea) di Ibana. Tung so i nama hinatabo ni na manghaporsea i Debata dibagasan Kristus. Ala ni i, nda patut ma hita satia di panghaporseaon tu Ibana. So tung unang ganggu ala ni na masa di portibi on, manang gabe maninggalhon haporseaonna hian asa tu haporseaon na asing (murtad). Nda songon i do na torop dibahen halak di partingkian nuaeng on ? Ala ni karejo, arta, parsahiton, baoa manang boruboru na uli, dohot angka paraturan na so mamihak tu halak Kristen i ,dna, maninggalhon Kristus. Boasa songon i? Ala ndang diantusi panghophopon ni Kristus di ibana. Mangarajumi dibagasan neang ni roha panobusion ni Kristus i di ibana. Autsugari arga panobusion i di ibana (angka na murtad i), ndang tundalhononna/tinggalhononna Kristus i, nang pe ditawarhon portibi on angka na uli ni portibi on. Sidalian na jotjot dihatahon ima :”Semua agama kan sama, hanya banyak jalan menuju Roma”. Sintong do godang dalan tu Roma. Alai tu Roma do i, ndada tu surgo. Hata sisongon i ndang marlangku di hita halak Kristen jala dang bo dalanta laho tu surgo.  Boi tajaha Joh 4:16 I,  i do dalan tu surgo. Asing ni ndang adong ! alni Tajamothon ma dirinta ganup nang angka pomparanta i, so tung ditinggalhon Kristus i.  Sotung lao tu ugamo na asing radot jala jamot ma hita disi. Alani naeng ma hatindanghononta

   
      Kristus i do pardenggananta dohot Debata, asa dung i gabe mardame ma hita (jolma pardosa) dohot Debata na sun badia i. Dang adong na asing dungkon ni Kristus
      Panobusion ni Kristus marlangku jala marhuaso sahali ro di salelenglelengna.
      Tahaporseai ma Kristus i dibagasan ngolunta, ai ido lombulombunta (perisai) laho manaluhon sumbia ni sibolis i.  Jala taingot ma Hata ni Endenta No 219 Ise do Alealenta na so olu mubai Ale ale nasumurung ima Tuhan Jesus I, Amen.




Jamita Minggu Advent I , 2 Desember 2012 Jeremia 33:14-16
Di : HKBP Perumnas Mandala

JANGKON MA BAGABAGA NA SIAN JAHOWA
UNANG bagabaga NA SIAN JOLMA
Patojolo
            Huria ni Tuhanta adong sungkun sungkun na sai jotjot di sukkun halak Kristen “Didia do uhum dohot hatiogoran?” On ma na sai jotjot dihatahon torop jolma, patuduhon nunga mapeol uhum dohot hatigoran i. Torop do jolma mangalului uhum dohot hatigoran holan tu hasonangan manang tu dirina sambing. Dilului pe uhum dohot hatigoran ndang na laho mambahen hademakhon tu humaliangna, nang pe adong pigapiga jolma dibahen do alus tu hademakhon tu humaliang, alai sasintongna tu dirina do. On ma na masa tu halak Israel, songon sada bangso na pinillit (chosen people/nation) sian bangso na humaliangna. Masa do tu nasida uhum ni Jahowa, ala dang olo nasida mangoloi angka pinsangpinsang na naung disuriranghon Jeremia uju so tarbuang nasida.
            Dung masa paruhuman i di nasida, pintor mangangguhi do nasida di angka sitaononnasida. Torop do halak Israel manghilalahon parsitaonan na mansai dokdok na masa tu nasida. Nang pe torop halak Israel na di Babel denggan parngoluanna, alai tongtong do nasida manghilalahon parsitaonan na mansai dokdok ala dang boi mulak nasida dohot paulihon bonapasogitna, ai mansai arga do di halak Israel bonapasogitna. Dihasiholi do laho mulak tu bonapasogitna. Deba halak Israel mansai dokdok do parsitaonan na diadopi alani haraparon na mansai bolon masa tu nasida, tarlumobi angka halak Israel na tading di Israel. Antong didia do hatigoran tu bangso i? songon na naung hupabotohon, dilului pe hatigoran i, laho tu dirina sandiri do.
            Antong, aha do hatigoran i? Marhite si Jeremia dipabotohon Jahowa do bagabagana na martumbur ma hatigoran sian pinompar ni si Daud. Boasa sian pinompar ni si Daud? Daud di halak Israel ima sada gombaran sahalak uluan na boi pasadahon bangso i muse. Sahalak raja na pistar di parporangan jala na unduk maradophon Jahowa uju di harajaonna. Jala sian pinomparna i ma muse dibagabagahon martumbur hatigoran songon na dihasiholnasida, na boi muse padomuhon bangso i (Jehuda (Israel Selatan) dohot Efraim (Israel Utara)), jala na unduk maradophon Jahowa. Laos on ma turpuk jamita di minggu on, na tolhas do jamita on sahat tu hita na mangolu di sadari on. Boha do hahonaan ni jamita on di ngolunta sadari on? Tapaihuihut ma hatorangan ni jamita on.

            Di tongatonga parsorion na diadopi bangso Israel, sai tongtong do adong sosososo laho mangaringkoti hasonangan ni huta habuangonnasida jala asa ditangianghon tu Jahowa. Laos diuduti do, molo marhasonangan huta i, marhasonangan ma dohot nasida (ida Jeremia 29: 7). Hasonangan, ima sada sian hapapatar ni angka uhum dohot hatigoran ni Jahowa, laos dipabotohon do dia do sangkap ni Jahowa di tongatonga na masa angka parsorion na dokdok di bangso i (Jeremia 29: 11). Jala laho mangapuli bangso i di ganup parsorionnasida laos dilehon Jahowa do bagabaga-Na taringot tumbur ni uhum dohot hatigoran ni Jahowa (tunas keadilan dan kebenaran TUHAN). Uhum dohot hatigoran ni Jahowa na so boi dipapeol manang dituhor manang aha pe di portibion, termasuk angka sinamot na di jolma. Bagabaga ni Jahowa on patuduhon ndang manongtong rimas ni Jahowa, alai ro di salelenglelengna do molo asi ni roha-Na; bagabaga ni Jahowa patuduhon hapapatar ni Jahowa mangalehon tumpal (upah) tu ganup halak na manahan di angka parsorion i di bagasan hata ni Jahowa, ido na mandapot hajujumpang ni bagabaga i. Molo pe naung ditontuhon turpuk jamita ayat 14-16, alai hutolhashon ma sahat tu ayat 18 turpuk on.

  Dia ayat 14 didok “….na ro do angka ari sogot, ninna Jahowa” Pabotohon Jahowa sandiri do na manghatahon tu si Jeremia. Molo Jahowa do manghatahon, manjadi do. Alani i, turpuk on, Jahowa sandiri do na manghatahon, marlapatan do i, manjadi do songon na didok-Na. Ayat on pabotohon sada panghirimon taringot ari marsogot, adong do na naeng masa. Mula ni ayat on pabotohon mual panghirimon. Molo Jahowa do mual ni panghirimon marhite hata-Na, marlapatan na manjadi do sudena. Diuduti do tu isi ni panghirimon na pinasahat Jahowa marhite Jeremia, “Ahu ma pasintongkon huta na denggan songon naung dibagabagahon di Jeremia 23: 5 – 6 jala dipatangkas di Jeremia 29: 10 taringot tu pinompar ni Israel dohot taringot tu pinompar ni Juda. Sada huta hasonangan, huta na gok dame, jala gok las ni roha. Marhite ayat on, dipabotohon, Jahowa sandiri do na patupahon saluhutNa i. tarida do i sian hamumulak ni bangso i sian angka habuangannasida, mulak tu bonapasogit. Jala disi ma jumpang songon na dihirimnasida uju di habuangan dope nasida (eskhatologi presentris), “jala ari sogot” sai tongtong do berlanjut sahat tu sadari on, jala singkop ma i di ari na parpudi songon na dihaporseai halak Kristen, ima haroro ni Kristus paduahalion (eskhatologi futuris).
 Ayat 15 - 16
Dongan Sahaporseaon Ayat on ima udut ni na masa di ari sogot songon na dibaritahon di ayat 14. Jahowa sandiri do na patupahon na patabuhon di si Daud, sada tumbur hatigoran”. Tumbur hatigoran on ma na manghajongjonghon uhum dohot hatigoran di tano on. Bagabaga on pabotohon na ro ma sada Raja na manghajongjonghon uhum dohot hatigoran na sian Jahowa, Raja na mambahen jolma na ginomgomanna demak, jala marsonangsonang, jala Raja na unduk dohot pasolhothon diriNa dohot jolma na ginomgomanna solhot tu Jahowa.
            Ayat on ma na na maralo tu parange ni angka raja na diportibi on, raja na holan manggosagosa dohot mambahen susa angka jolma na ginomgomanna asa dapotan hasonangan raja i. Dibahen angka raja na di portibi on pe uhum dohot hatigoranna, holan manarihon dohot tu hasonangan tu dirina dohot tu angka jolma na sahorong tu ibana jala manggomgomi pe ibana holan tu hagiot ni dagingna do dipatupa dohot marsilomolomo, dao sian Jahowa. Dipasiaksiak do angka sidok na sintong, mapeol di dibahen uhum dohot hatigoran ni Debata, jala gabe dipardebatahon do dirina tu jolma na ginomgomanna.
            Molo nungnga jumpang be bagabaga i, dapotan tua ma Juda dohot Efraim, jala marsonangsonang isi ni Jerusalem maringanan (Jerusalem = Yerusalem marlapatan huta na dame). Jala ari i ma goarhonon ma: “Jahowa do parpintoranta”. Sada panghatindanghonon na mansai balga ala dihilala do pangaramotion ni Jahowa uju di parsitaonan manang parungkilon na mansai dokdok. Sian Jahowa do didapot tumpal ni angka na satia jala manahan ro di ujungna, Jahowa sandiri do patupahon haluaon tu halak na sai tongtong manghirim tu Ibana, molo jumpang tingkina, dapotan tua ma jolma na mambahen Jahowa parpintoranna, jala marsonangsonang ma Ibana di sada Huta na dame, na pinauli Jahowa sandiri.

 Ayat 17 – 18
            Ayat on pabotohon tu hita, Jahowa sandiri do na paulihon jala patupahon pardengganan tu pinompar ni si Daud na naeng pajongjonghon uhum dohot hatigoran ni Jahowa. Songon naung dipatorang di patujolo di turpuk on, Raja Daud, ima sada gombaran sahalak uluan na boi pasadahon bangso i muse. Sahalak raja na pistar di parporangan jala na unduk maradophon Jahowa uju di harajaonna. Jala sian pinomparna i ma muse dibagabagahon martumbur hatigoran songon na dihasiholnasida, na boi muse padomuhon bangso i (Jehuda (Israel Selatan) dohot Efraim (Israel Utara)), jala na unduk maradophon Jahowa. Dung marganti ma raja dung si Daud, gabe bola dua ma harajaon. Israel Selatan (Yehuda, bagas joro Yerusalem) dohot Israel Utara (Efraim, bagas joro Betel), jala angka raja na manggantihon ima raja nang sian pinompar ni Daud  na so olo unduk tu Jahowa, songon gombaran ni raja di portibi on naung dipatorang di ayat 15-16. Alai marhite ayat on, sian pinompar ni si Daud do muse ro tumbur ni hatigoran, jala ro di saleleng ni lelengna do jongjong harajaon ni Daud (dynasti Daud).
            Songon i dohot angka malim dohot lepi pe na so tupa tos sian adopan ni Jahowa. Andorang so tarbuang dope bangso Israel (utara dohot selatan) nungnga godang be ulaon ni hamalimon dohot lepi ndang songon naung diaturhon partording ni ulaonnasida. Nungnga godang be angka malim dohot lepi holan asal na adong (formalitas). Alai di ayat on, mulak songon naung diaturhon ma ulaon ni malim dohot lepi, ima patupaon ulaon pamujion dohot panombaon tu Jahowa. Denggan ma muse mardalan parngoluan ni bangso i, laos ido na binagabagahon Jahowa tu bangso i di tongatonga parsorion na mansai dokdok.

Hahonaan ni Turpuk
            Tolhas do bagabaga on sahat tu hita na mangolu nuaeng jala hona tu parngoluan sadari on. Masuk ma hitadi Minggu Advent I (Adventus = minggu panomunomuon). Torop do halak Kristen gabe asing pangantusionna taringot minggu Advent, alana di toropan halak Kristen minggu Advent di parngoluanna (secara praktek) ima minggu hasibukhon, sibuk do halak Kristen laho paradehon ganup angka ulaon isaranana, natal, dohot mambahen angka gabagaba. Ingkos tangkas do botoonta ise do na sitomutomuon?
            Di minggu Advent I on, na ditomutomu ima haroro ni Kristus na paduahalihon i. Nungnga boha hita paradehon dirinta dohot angka rohanta? Tolhas do bagabaga on tu hita na mangolu di portibi on dope, sai tongtong do hita paimahon hajujumpang ni bagabaga i. Na martumbur ma hatigoran na pajongjonghon uhum dohot hatigoran ni Jahowa. Antong molo songon i, taruli tumpal do sude jolma hombar tu na naung diulana di hangoluanna di bagasan uhum dohot hatigoran ni Jahowa. Tung na so boi do dipapeol dohot dituhor uhum dohot hatigoranNa, ala patar do angka parange dohot pangalaosionta di adopanNa.
            Jahowa sandiri do na patupahon hangoluan salelenglelengNa, dohot patupahon hadameon tu ganup halak na sai tongtong marhaposan di Ibana, jala na so olo manundalhon angka uhum dohot hatigoran ni Jahowa. Sai tongtong do hita paimaimahon dohot managam haroroni Kristus, Raja silehon Dame na sumurung dohot uas ni angka na tahalungunhon adong do di Ibana. Hita na mangolu dope di portibi on, parsidohot do hita taruli gabe panean bagabaga i, na patuduhon parsidohot do hita taruli di angka pangaramoti dohot pandonganion ni Jahowa nang pe ragam angka hasusaan dohot ragam ni angka parsorion na tadopi.
            Molo songon i, aha be alusta laho sai tahuton manang haporseaonta sai olengoleng? Sai olo dope hita ganggu taringot pandonganion ni Jahowa. Antong aha ma na ringkot patupaonta?
1.        Parade dirim managam haroro ni Kristus na paduahalihon i, Ibana ma tumbur hatigoran songon naung dibagabagahon di turpuk on.
2.        Tajangkon ma bagabaga i na sian Jahowa, unang ma bagabaga na sian jolma. Molo nungnga Jahowa na mandok, manjadi do sudeNa jala taruli las ni roha ma jolma na manjangkon bagabaga i. Alai jolma na manjangkon bagabaga sian jolma, gabe tubu ma disi hansit ni roha (kekecewaan) ala so jumpang na binagabagahon ni jolma.
3.        Molo tajangkon do bagabaga i, ngolunta pe ingkon boi do papatarhon hita naung manjangkon bagabaga i marhitehite hata, nang ulaon.
Bahan Jamita Paskah II, 1 April 2013
Buha buha Ijuk : Pkl 4.30 Wib
HKBP Wahidin Baru
Manghatindangkon Jesus
Johannes 20 : 24 – 29
      A.      Patujolo
Maol do sosa di roha ni angka na porsea i taringot tu silang na badia i, ala i do lombulombuna. Tiris ni mudarNa sian hau parsilang i, ido mual paridian ni halak na porsea i, dung i umbahen na sai sonang jala mardame rohana dohot pingkiranna. Ida ma, dung hehe Jesus sian na mate, mangihuthon buku Johannes, dipatandahon Ibana ma diriNa jumolo tu si Maria Magdalena, ditonahon Ibana do tu si Maria asa dihatahon ibana tu angka siseanNa: “Na laho nangkok ma Ahu tu Damang jala Amamuna, tu Debatangku, jala Debatamuna (20:17). Sian hata ni Jesus on, botoonta ma paboa naung sun gok jala singkop ulaon haluaon na hinobasanNa humonghop portibi on. HaluaonNa i, hot do ditadingkon di portibi on. Ndang piga leleng nari be nasida boi pajumpang. Ala naung ditaluhonNa i hamatean marhite haheheonNa i, naeng mulak ma Ibana tu ingananNa hian, bagas ni Debata na di surgo i. Dibaritahon si Maria Magdalena do parjumpanganna dohot Jesus na hehe i tu angka siseanNa. Barita haheheon ni Jesus gabe sada perhatian na mansai luar biasa di nasida. Marpungu do nasida di sada inganan. Ia parpunguan nasida seolah-olah tertutup jala rahasia na marpungu i. “Dirahasiahon” nasida parpunguan nasida naung hehe Jesus i sian na mate, asa unang gabe di “politisir” halak taringot tu barita haheheon ni Jesus, naeng jumolo nasida tumangkasi, songon siseanNa. Disordak nasida pintu inganan parpunguan i, ala ni biar ni nasida mida angka Jahudi. Tutu ingkon dohononta do, ia barita taringot tu Jesus naung hehe sian hamatean i, dung dibege angka siseanNa i hira na gabe tubu do roha nasida sungkunsungkun: beha do tutu ni i? Ganggu ni roha sasintongna ndnag holan si Tomas  (bnd. Mark.16:14; Luk.24:36)
      B.      Hatorangan
      1)      Ayat 24 – 27 : Si Tomas papulik dirina.Ditadingkon si Tomas do parpunguan nasida dohot angka sisean na asing, ala ponjot pingkiranna, ala di pingkiranna na so tutu ianggo Jesus hehe sian tanoman i, Di pingkiran ni si Tomas, hamatean do ujung ni sude na masa tu Jesus, ndang siat tu rohana na hehe Jesus di ari patoluhon. Dipingkir rohana peristiwa silang i songon sada titik akhir. Bonsa ni rohana i do mambahen na gabe mamulik ibana, jala laos songon i alusna. Lupa ibana, pigapiga hali sai sipaboa Jesus do sitaononNa, hamateanNa dohot haheheonNa di ari patoluhon (Luk.18:33). Ido umbahen denggan masipaingotan, tungkar pikiran asa unang holan ni piningkiranniba sandiri na toho jala na dumenggan. Disada sisi; dipingkiri si Tomas do ra, ndang adong be na boi mambahen ibana bersemangat, ala Jesus do na mambahen marlapatan ngoluna, naung mate di hau pinarsilang. Anggo angka sisean na asing i, dihatindanghon do; “Nunga huida hami Tuhan i” (ay.25). Ido hata ni sisean i tu si Tomas na so dohot mamereng haroro ni Jesus. Haroro ni Jesus manopot nasida ndang sian pamotoan nasida manang ndang adong boaboa tu nasida. Denggan do antong molo adong na niida dohot na binege barita na uli paboahon tu angka dongan, asa dohot taruli dongan. Alai gumodang do si Tomas mangasahon pingkiranna sandiri dohot rohana. Sai dietong dope i songon nipi. Dibagasan situasi na songon i, jongjong ma Jesus manopot nasida, asa tung tangkas nasida mananda Jesus. Dioloi Jesus do pangidoan ni si Tomas. Maralus do pangidoan ni si Tomas na manjalo bukti na langsung sian Jesus. Saut ma tutu dipataridahon Jesus diriNa tu ibana. Ndang diloas Jesus ibana dibagasan roha na lulululu, asa unang mago lalap pingkiranna mangarajai ibana. Didok Jesus ma tu ibana: “Surdukhon ma tanganmi manjama andorangku, unang ganggu roham, sai porsea ma ho” (ay.27). Nunga langsung si Tomas marnida hasintongan ni barita haheheon ni Jesus i, ndang be holan barita, jala ima bukti nang bohal ni si Tomas laho mamaritahon Jesus naung hehe sian na mate.
      2)      Ayat 28 – 29: adong do tolu poko na mansai ringkot idaonta sian dua ayat on:
                                 i.            Dung dijama si Tomas andora ni Jesus dohot tanganNa i, ipe asa porsea ibana na tutu do hape na hinatindnaghon ni angka donganna i taringot tu Jesus. Dungi didok si Tomas ma : “Tuhanku jala Debatangku”. Tarida do panindangionna marhite na pinangkulingan ni Jesus ibana. DI ganup inganan dohot tingki na tongtong do hita hape dipangkilingi Jesus jala dipataridahon diriNa tu hita. Siala ni i, aha do dohononta mangalusi joujou ni Debata. Naeng dohononta ma songon na nidok ni si Tomas i. Lapatanna di ginjang ni sude huaso na adong di tano on Debata do haporusanta jala partanobatoanta.
                               ii.            Ndang boi pingkiran dohot utokutok laho mananda Debata. Alai marhite haporseaonta do, Solafide nina si Martin Luther. Molo didok Jesus tu si Tomas: “Martua ma angka na porsea atik pe so diida”. Marlapatan do i asa unang dipangke ibana logika ni pingkiranna sambing laho mananda pambahenan ni Debata. Dingolu ni jolma na holan mamangke akal dohot pikiran, maol do i manghaporseai na so niidana taringot tu pambahenan ni Debata. Hape haporseaon i, ima pos ni roha dohot pamotoan na tontu tu na so niida (Heb.11:1). Tapangke ma haporseaonta laho mananda asi dohot pambahenan ni Debata dibagasan ngolunta.
                              iii.            Molo tasigati tutu di buku na badia i, godang do angka tanda na pinatupa ni Jesus dijolo ni angka sisean i dohot ditongatonga ni portibi on (Joh.21:25). Jala saluhutna tanda i, naeng patuduhon huaso ni Jesus songon anak ni Debata. Tajalo ma tanda i marhitehite haporseaon, unang mangasahon pingkiran dohot parbinotoan. Sude angka tanda na binahen ni Jesus i ma laho mambahen jolma i mangantusi hadirion ni Debata na sasintongna, asa sintong panindangionta.
3) Sipahusorhusoron
 v  Jotjot do sai tabege pandohan: “unang songon si Tomas ho”. Ala si Tomas hea ndang manghaporseai barita haheheon ni Jesus. Godang do tanda manang bukti na pinatupa ni Debata laho patuduhon hadirionNa di portibi on. Jala saluhut angka tanda i maol do antusan marhite roha dohot pingkiran. Alai ingkon parhatopotonta do tanda i dalan ni Debata patuduhon holong ni  rohaNa tu hita. Laos marhite tanda i naeng do patuduhon panindangionta na sintong di adopan ni Debata. Aha ma tanda na pinatupa ni Debata di ngolunta ? ima hahipason, habisuhon, hapantason, hadameon, las ni roha dohot lan na asing. Tarjou do sude halak Kristen songon sisean ni Jesus gabe hasahatan ni tanda na binahen ni Debata marhitehite Parsaoran, panindangion, dohot panghobasion na sintong. Usde parhalado dohot ruas ni huria ingkon pataridahon kehadiran noi Debata di portibi on.
 v  Diganup tingki dohot inganan na tongtong do hita dipangkulingi Tuhan i marhite pandohan : “Dame ma dihamu” (damai sejahterah bagimu) . Pandohan i manogihon hita tu pos ni roha dohot haporseon di pandonganion ni Debata. Ima dame na sian Kristus, dinamis so i, jala proaktif. Ingot hita ma hata ni Tuhan Jesus mandok : “Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna” (Joh.14:27). Molo sai uhir tu roha dohot pingkiranta disoara ni hata dame na sian Jesus Tuhanta i, sai na mardame do hita dibagasan Ibana tongtong nang mardame dohot diriniba sandiri dohot dongan jolma pe (pat.Joh.16:13).
 v  Naeng ma jumpang  dihita sada panindangion ni haporseaonta na mandok ; “Tuhanku jala Debatangku”; marlapatan do i, na Debata do mangalehon asini rohaNa di hita. Ibana do partanobatoanta, parmahan na denggan di ngolunta (Psalm 23:1;  Joh.10:11). Unang adong keraguan be di hita taringot tu hagogoonNa. Jotjot do hita dihantui keraguan siala angka parsualon na taadopi. Keraguan bukanloah suatu masalah, yang terpenting adalah apa yang kita lakukan untuk mengatasinya di saat hal itu muncul atau menyerang kita. Sian ganggu ni roha i dapot hita do pangantusion na sintong taringot: beha ma hita manghaporseai Tuhan i. Secara mendasar diajari Tuhan Jesus do, beha hita asa porsea ima: “Martua ma angka na porsea, atik pe so diida! Lapatan ni i, ndada na mansoadahon rasionalitas. Alai didok roha “alternatif” na asing do i asa porsea jolma tu Jesus Tuhanta i. Molo pe dipataridahon Jesus diriNa tu si Tomas paboa naung hehe  Ibana. Dalan pangururpion ni Jesus do i tu si Tomas. On ma pandok ni apostel Paulus mangonjar hita asa porsea: “Asa sian na tumangihon do ro haporseaon, ia panangihoni, sian hata ni Kristus do “ (Rom 10:17). Morot ma hita sian na sai mangasahon utokutokta na mar-Tuhan on, tatiru ma songon si Tomas naung paubahon sudut pandnag na rasional i, dok ma: Tuhanku jala Debatangku. Taingot ma haroroan ni sude pangidoanta dohot na taparsinta, ima Debata. Angkup ni inaeng jumpang dihita parbue ni haporseaon marhitehite na mangulahon angka na denggan jala hombar tu lomo ni roha ni Debata songon na nidok ni si Jakobus : “Haporseaon i pe songon i do, anggo so adong pangulaonna, naung mate do hadirionna” (Jak.2:17). Amen.




























Bahan Jamita Evangelium Minggu II Dung Trinitatis, 9 Juni 2013
Di : HKBP Jln Panglima Denai , Resort Perumnas Mandala
Minggu : Pkl 10.00 Wib
Huaso ni Jesus Pangoluhon
Lukas 7 : 11 – 17
      Patujolo
Huria ni Tuhanta, Somalna molo dipamalum Jesus na marsahit, sai adong do sarana na dipangke Jesus songon media pasahathon hamalumon i. Isarana, tingki dipamalum Jesus sahalak na mapitung gabe marnida, jumolo ditijuri Jesus simalolong ni na mapitung i, gabe marnida ma ibana (Markus 8: 23). Dung i di tingki na asing muse, laho didapholhon ma i tu mata ni na mapitung i, dung i disuru ma na mapitung i marsuap tu dano Siloam, gabe marnida ma ibana (Joh.9:6-7). Manang tu angka na marsahit na asing, ingkon na ro do Jesus langsung mengunjungi na marsahit i, dijama tanganna manang ulu ni na marsahit i , ditangiangkhon ma dung i malum. Alai anggo na di turpuk on, ndang na marsahit dipaboa alai sahalak dakdanak baoa na mate, anak ni sahalak ina na mabalu jala na pogos dipabangkit Jesus di Nain.

      Hatorangan
1.    Ayat 11- 12; Parjumpangan Jesus dohot Ina Namabalu. Andorang so turpuk on Jesus pamalum sahit ni naposo ni sada letnan (Luk7:1-10), alai dibagasan turpuk on dipangolu Jesus sahalak dolidoli ima anak ni sahalak ina na mabalu na mate di Huta Nain. Pandok ni si Calvin, molo dipaboa diturpuk on goar ni huta Nain napatuduhon sada sejarah do on. Torop do na mangihuthon Jesus asing ni angka siseanNa i jala laos nasida do na gabe sitindangi di na masa i. Jala na ringkot pinarrohahon, na masa i topet manodonokhon Bahal ni huta i. Uju i somal do dipatupa parjumpangan di bahal ni huta (1 Musa 23:10; 34:10; 5 Musa 17: 5; 22:24; 25:7; Jos.20:4; Rut 4:1,11). Jadi bahal ni huta on jotjot do inganan ni torop jolma pajumpang. Parjumpangan ni Jesus dohot ina namabalu i ndada na kebetulan, alai nunga di aturhon Debata; Providentia Dei (pemeliharaan Allah); Lukas 22:22 Tong do nian langka ni Anak ni jolma i, songon naung diaturhon tu Ibana; alai marjea do halak na manjehehon Ibana! (ptds. Pslm.31:16; 33:11; 39:5-6; 119:89-91; Poda 16:4,33; 19:21; Dan.4:34,35; Ul.Ap.2:23; 4:27,28; 17:26; Ef.1:4,11). Boi do sungkunsungkun rohanta mandok; Boasa ditingki i marujung ngolu dakdanak i? jala boasa laos sadari ari pananomonna? Boasa Jesus pola mardalan 40 km daona di ari i asa boi sahat tu Huta Nain di arianna i? Boasa boi topet Jesus masuk sian dalan tu Huta i na gabe dalan haruruar ni bangke na niusung i ? (ptds. 1 Musa 22:13; 24:15; Pang.7:13-15; Rut 2:3; Jer.38:7-13; Ul.Ap.23:12-22) Molo sanga tarlambat pajumpang dohot Jesus nunga tartanom dakdanak i. Rom 8:28 Alai taboto do, saluhutna do manumpak tu na denggan di angka na marholong ni roha di Debata, angka na jinouna sian tahina hian. Jala molo dibagasna dope na mate i ndada adong na boi manjouhon Jesus asa paheheonNa. Alai diboto Debata do mangaturhon saluhutna, jala ndada na so pamotoan ni Debata na masa i nang dingolunta dihasiangan onpe). Ia dao ni huta Kapernaum tu Nain ima hirahira 40 km jala sadari pardalanan.Jala hatiha i ndang boi masa pananomon di huta ni halak Jahudi ia so pinompar nisi Daud dohot si Samuel napinarsangapan i – 1 Sam.28:3). Ido umbahen asa dipataru bangke ni dakdanak i tu duru ni huta i.
2.      Ayat 13 -  15; Sian asi ni roha tu hangoluan. Dung dibereng Jesus na mabalu i, maras ma rohaNa siala hamamate ni anakhon ni na mabalu i, holan i do anakhonna.   Jotjot do maras dohot asi ni roha ni Debata patubu halongangan (ptds. Mat.14:14; 15:32). Didok Jesus tu ina na mabalu i; “Unang ho tangis!” pandohan on ndada mangorai hita asa tangis uju masa hamatean tu halak na tahaholongi. Alai pandohan i nanaeng patuduhon kepastian manang jaminan ni Jesus pauba habot ni roha (tangis) gabe las ni roha (hangoluan). Jala paboa na marhuaso do Jesus pauba tangis i gabe las ni roha. Holan batang i do di jama Jesus marhite parenta asa dungo dakdanak i. Uju i ndada poti inganan ni bangke alai batang usungan do. Di tingki i marlangku do uhum na mangorai asa unang dais tu bangke manang holiholi na mate ai dianggap ramun (najis) do i (ptds. 3 Musa 21:11; 4 Musa 5:2; 6:6,11; 9:6,7,10; 19: 11,13,16,18) alai ndang ramun molo holan mangonai usunganna. Alai molo tajaha di Lukas 6 : 54 dipangolu Jesus do anak ni si Jairus jala ditiop do bangke ni dakdanak i. Alai ndada gabe ramun Jesus bahenon ni i, alai sabalaikna dakdanak i do na gabe mangolu. Ndada dipaima Jesus asa adong na mangidhon tu Ibana laho pangoluhon. Johannes 5:25 Na tutu situtu do na hudok on tu hamu: Na ro ma tingkina jala nunga masa nuaeng, begeon ni angka na mate i ma disi soara ni Anak ni Debata; gabe mangolu ma angka na umbegesa. Jala adong tolu macam inganan ni na mate na dipangolu Jesus ima : anak ni si Jairus di podomanna dipangolu, anak ni na mabalu na diturpuk on sian usungan, si Lasarus di tanoman (udean) di pabangkit. Lapatan ni i ndada marhuaso inganan nang partingkian laho mangambati huaso ni Jesus. Dung mangolu dakdanak i dilehon ma tu inana. Dipasahat do nang si Lasarus tu angka ibotona (ptds. 1 Raja 17:23; 2 Raja 4:36). Marhite i ma antusanta na dihahalongi Debata do ganup keluarga asa tongtong dibagasan hasadaon jala masihaholongan.
3.      Ayat 16 – 17; pangalaho na masa sian na halongangan i.  Dibaritahon do gabe hatahutan do nasida sasude ala manghilalahon na maringan Debata ditongatonganasida. Ndang apala bagas diantusi nasida ise do Jesus, dilapati nasida do Jesus songon sahalak Panurirang Bolon, hape lobi sian pangantusion nasida i, ia Jesus ima Debata i sandiri. Tarida do ha-Debata-on ni Jesus na so apala maol pangoluhon na mate martimbanghon si Elia, Elisa dohot si Petrus boi tasulingkiti di 1 Raja 17:19-23; 2 Raja 4: 28-36; Ul.Ap.9:40; 20:9-12 na maol pabangkithon na mate. Tar sar ma baritaNa tu sandok luat Jude, napatuduhon gabe sada barita las ni roha tu na manjangakhonsa, ala olo do adong na do lomo rohana mambege barita i, songon halak Farisi, Saduse, dohot siboto surat.

        C.      Sipahusorhusoron /aplikasi
Ø  Sude do angka natoras manghilala molo ianakhon i ima arta na mansai arga dibagasan ngoluna. Alai nang pe songon i sai adong dope natoras na manggadis ianakhonna holan ringkot ni hepeng dingoluna. Jala adong na mangambolongkhon anakhonna ala maila dohot alasan na asing (na parpudi on di Cina sada dakdanak posoposo na sorang  diambolongkon tu Toilet, alai mangolu do posoposo i dung diselamatkan). Alai gumodang do natoras mangarop hasosorang ni dakdanak ditongatonga keluargana. Pola do sahat na berusaha angka natoras asa adong ianakhonna. Jala keluarga na so marianakhon dihilala do i songon hailaon bolon. Pangalaho i dos do di halak Jahudi. Ala ni iturpuk on ndada holan na patuduhon habalgaon ni Debata alai dohot do laho paintophon hailaon bolon di ina na mabalu i. Mansai borat do ngolu ni na mabalu hatiha i apalagi diparmate ni anak sasadasa, na marlapatan nunga suda be pinompar ni keluargana. Dison ma dipatuduhon ringkot ni na pangoluhon holong ditongatonga keluarganta sandiri. Ganup na keluarga na porsea (siihuthon Jesus Kristus) ndang boi malua sian angka parmaraan dohot angka tangis ala ni pandelean di ngolunta. Ala ni i ma ingkon jouonta Jesus dibagasan ngolunta asa malua hita sian tangis nang angka parmaraan dibagasan ngolunta.
Ø  Tapatuduhon ma songon na diulahon Jesus. Ataik pe so tinandana i alai maras rohaNa. Dipatuduhon Jesus do kepedulian tu humaliangna. Laos songoni do angka siihutho Jesus, ingkon mangihuthon pangalaho ni Jesus na perduli tu angka na masa di humaliangna. Asa tinggil ma hita tumangihon angka pandelean nang arsak ni angka jolma na dihumaliangta. Talehon ma nasa holongta marhite gogo, pingkiranta tu nasida asa mangolu dihilala ibana. Tunga mansai godang na angka na masa na boi pamatehon semangat ni ngolu ni hajolmaon, ala ni dijou Jesus do hita sian turpuk laho pangoluhon angka na mate panggora ni rohana, pangoluhon  semangat hidup ni hajolmaon (patudos tu lapatan Patik 6 on). Ala jotjot do tahilala na deba jolma na holan pamatehon semangat ni donganna jolma, manang  menindas dohot membunuh karakter seseorang dengan berbagai ancaman. Sian turpuk manjou hita asa lam manghuling panggora ni Tondi Parbadia i laho pangoluhon semangat ni angka naung mandate jala mandele hinorhon ni panosak ni portibi on. Saluhutna i tarpatupa hita marhite Jesus Kristus na margogoihon hita. Lukas 1:37 Ai ndang adong na so tarpatupa Debata.
Ø  Hea do masa sahalak ruas ina mengebati keluargana di bona pasogit sian pulo jawa, alai dung piga ari di hutana marsahit ma ibana. Alai tarbege ma baritana tu dongan sahuriana di parserahan na tongon marsahit ibana. Dungi ai ro ma sms marhite barita tangiang na margogoihon inanta on asa gira marhahipason ibana. Manjalo sms i tung mansai las situtu roha ni inanta on huhut tumatangis ala ni holong dohot kepedulian ni donganna sahuria i. Ala ni i mambahen smenagat ibana jala hatop malum sahitna i.
Sian barita gabe sada gombaran do nang di hita angka siihuthon Jesus Kristus; adong kepedulian, na sapangkilalaan. Tung saotik pe tapatuduhon kepedulianta tu humaliangta nunga gabe sada jamita na pangoluhon i. Isara ni  molo na marhombar balok pe, molo holan senyum pe hita tuhombar tai boi do i gabe sada pangalaho na pangoluhon. Alai molo sai murhing do bohinta maradophon donganta nang hombarta boi do pamatehon semangat hidupta i. Ala ni i angka siihuthon Kristus naeng ma patuduhon pangalaho na pangoluhon. Ndad disuru hita ingkon boi pangoluhon na mate; songon na hea masa di huria na hinobasan di HKBP Bandung; di parmate nisahalak sintua tarboto ma na dihuphupi angka keluargana parmate ni amanta on pola nunga malangke daging ni bangke i. Ai dihaporsea i nasida, na boi paheheonna dung tolu ari parmate ni amanta i, songon haheheon ni Jesus sian na mate i. Hape ndada adong  agia aha na masa. Nunga sega haporseaonna mangalapati taringot tu Jesus i.
Ulaonta nuaeng ima intap na tolap taurupi angka dongan jolma ala ni haotoon, hapogoson, na sai dihaholomon dope (pangalaho na so dihalomohon Debata) jala pogos di partondion (na so mananda asi dohot holong ni roha ni Debata)asa ulaon na marbarita nauli do molo taulahon angka ulaon asi ni roha dohot na mangurupi jolma. Taulahon ma i marhitehite huaso dohot gogo na sian Tuhan Jesus i, songon topik ni minggunta: “Huaso ni Jesus Pangoluhon na Mate”. Johannes 15:5 Ahu do hau anggur i, hamu do ranting i. Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu. Amen







                   


Jamita Evangelium Minggu X Dung Trinitatis, 4 Agustus 2013
Di : HKBP Wahidin Baru
Minggu : Siang Pkl 10.00 Wib
Mata Ni Tuhan Tu Angka Partigor
1 Petrus 3 : 8 – 12
       Patujolo
Huria Ni Tuhanta Dipungka do turpukta on marhite angka poda tu ama nang tu ina ni halak Kristen asa marpangalaho na denggan nasida songon na tama di rumahatangga ni halak Kristen. Mansai ringkot do ama dohot ina masihormatan, masitumpahan di ulaonna, jala unang ma dirajumi ama ummangat dirina sian ina i, ai rap partohap di hangoluan sogot do ama dohot ina ni halak Kristen ( 1 Petrus 3: 1-7). Udut ni poda i ma nuaeng turpuk jamita evangelium on. Dipaingot do sude angka keluarga ni halak Kristen di ganup huria asa tangkas diradoti hasadaon dohot pangalaho na denggan maradophon angka na di balian n huria, i ma angka sipelebegu, na so tumanda Jesus Kristus i dope. Na marlapatan, naeng ma ganup rumatangga ni huria i tangkas saroha, sapingkiran, sapanghilalaan jala masihaholongan dibagasan haserepon.
      Hatorangan
1.     Ayat 8-9 ;  Dipangido do sian ayat on hasadaon ni roha di huria i laho maralohon angka na marsogo ni roha dompak huria i, ihut do muse ingkon manjaga pangalaho nasida sahuria i asa unang gabe hasurahan. Hasadaon i dipatuduhon do i dipangalaho na saroha, sapangkilalaan, marholong ni roha, jala marserep ni roha. Disi ma dipatuduhon hadosan ni sada tu donganna ( Rom. 12:15,16; 2 Kor.13:11; Pil.4:2). Hasadaon i diigil do sian pangalaho na rap martangiang, rap mamuji Tuhan dohot na rap na tumangihon Hata ni Debata. Ihut ni i ringkot do di huria i na satondi, asa dipatuduhon ma disi roha na olo ni rajaan ni Tondi Parbadia i patupahon na hombar tu lomo ni roha ni Debata. Molo nunga sada tondi disi ma tarida roha na manghilala sisada ulaon di tonga ni huria i ( 1 Kor.6:17; 1 Kor.12:4,13,26 ; Ep.2:18; 4:4; Pil.1:27, 1 Pet.5:5). Mansai ringkot do jamot huria i di bangko manang karakter ni huria i songon angka na badia, naung mananda holong ni Debata. Asa ndang jadi dos cara ni halak Kristen mangadopi hajahaton songon angka na so porsea i. Unang ma madabu huria i tu pangalaho na anarkis manang na pajolo gogo papudi uhum. Molo di angka na so porsea i, hajahaton do balos ni hajahaton, panginsahion balos ni panginsahion; unang ma songon i anggo halak Kristen. (jaha; Luk.6:27-28; 1 Tess.5:15). Alai naeng ma mamasumasu huria i di angka na manjungkati nasida: ingkon na denggan do bahenon balos ni na jat na binahen ni musu i, sadalan doi songon na didok Ap.Paulus di Rom 12: 21 “Unang ma talu ho dibahen hajahaton; alai taluhon ma hajahaton i marhitehite na denggan!” Lapatanna tatiru ma Kristus naung manghamonanghon paraloan i, nang pe godang jolma na manghosomi Ibana, manijuri, mangalinsingi, laos marparsilangkon Ibana, ndang dibaloshon i, baliksa tahe dilehon do diriNa laho manobus hasalaannasida i, dihophop do jolma pardosa i asa malua tondina. Alai ndang diantusi na deba jolma umbahen so porsea, na deba dijalo do jala dipeop doi gabe patigorhon haporseaonna sahat tu hangoluan sogot i.
2.     Ayat 10-11: Molo tajaha di Alkitab Bahasa Indonesia digurithon do marasing sai hira puisi, jala memang dibuat do on sian turpuk Evangelium di minggunta on ima psalmen 34 : 13-17. Disosoi do asa jaga ma huria i, molo adong na mangasupi huria i, manang adong na naeng manggunturi huria i marhite parbadaan dohot lan pangulaon na manghehei roha asa tarrimas, manang na mangaluhon huria i tu panguhum marhite angka sitindangi gapgap, ingkon jamot do huria i maralus, asa unang tarela di sangkapsangkap na roa. Ala ni  mansai ringkot do huria i marningot poda ni parpsalmen i, asa tongtong arga di hita hosanta dohot hademahon i, sipasidingon do nasa hajahaton na boi mambahen hita agoan hosa jala gaor. Intap ni na boi, naeng ma pinasidin porang, alai niluluan ma dalan asa  jumpang pardamean. Lapatanna, ingkon adong do panghataion dohot angka pihak na mamusui hita; luluan ma dalan asa unang sanga masa konflik horizontal. Sada dalan laho mangeahi pardamean, i ma mangorom pamangan asa unang sanga ruar angka hata  na boi manghehei rimas dohot partontangan (Pslm.12: 3-5). Angkup ni i, unang adong panghilalaan na talu hita ala so taalusi musu i hombar tu cara na so hombar tu lomo ni roha ni Debata. Ai pos do rohanta di pangaramotion ni Debata, alai sabalikna dialo Debata do angka sibahen na jat songon na tinonahon ni Debata marhite Si David di Psalmen 34 : 14-15 Sai jaga ma dilam maradophon hajahaton, jala bibirmu maradophon pangkuling sipaotooto. Sumurut ma ho sian hajahaton, jala ulahon na denggan, lulu i hasonangan jala pareak ma i.
     2.Molo tapamanat manjaha pandohan “na holong roha dihosana” dohot pandohan ni Jesus di Joh.12:25“Agoan hosa ma na marhamaolhon hosana; alai na mangkasogohon hosana di portibi on, i do na mangaramotisa sahat tu hangoluan salelenglelengna.” Sai songon na maralo do nihilala, alai boi do pinatorang, molo na nioraan ni Jesus ima na marhamaolhon hosana ala tu kepentinganna sandiri do. Jala molo di turpuk on ayat 10 i diajari si Petrus do hita asa mangolu dibagasan hasintongan.
     3.       Ayat 12: Angka siula hatigoran jotjot do mangadopi godang angka ambatambat, laos songon i do angka na porsea i di portibi on, godang do na manghosomi  dohot na manghasogohon angka halak Kristen i songon na nidok ni Jesus di Johannes 15: 18-19 Molo dihosomi portibi on on hamu, boto hamu ma, naung jumolo Ahu dihosomi. Aut na sian portibi on hamu, haholongan ni portibi on do donganna. Alai ndang sian portibi on hamu. Ahu do tahe mamillit hamu sian portibi on; ala ni i do, umbahen na dihosomi portibi on hamu. Marhite Hata ni Tuhan Jesus i, tontu ingkon marpos ni roha do hita laho patupahon angka na uli jala na denggan hombar tu lomo ni roha ni Debata. Molo taulahon na denggan tu humaliangta, ndang pola mabiar hita di portibi on. Asa molo sai tadatdati manggulahon na denggan tu angka na manghosomi hita, songon aek na sai manetek tu atas batu do i, lam leleng lam gamuk do i jala ditorusi do mansai bagas, ujungna ndang pulut be rohana manjahati hita. Nang pe didok hita ingkon manghaholongi dongan jolma, alai na jumolo do dipangido manghaholongi dongan sahaporseaon songon na tarsurat di Galatia 6:10 “Antong, binsan sadihari dope, taulahon ma na denggan di saluhut halak, alai gumodang ma tu donganta sahaporseaon!”

      C.      Hahonaanna tu ngolu siapari
Sipata molo taparrohahon sai hira tarbalik do na masa dihajolmaon. Molo angka jolma na burju i sai maol do manghilalahon haburjuon ni Debata, sai hira so parduli Debata. Hape molo tabereng angka parjahat i, so i nama jagona, lam tarpasupasu, jala songon na lam tenang do ngoluna. Hape nunga di suarthon taringot tu pangalaho i di Parjamita 8 : 14 “Adong dope sadanari halongangan masa di atas tano on: Adong halak partigor, hira pambahenan ni halak parjahat niulana, parsorionna timbangon; jala adong halak parjahat, hira pambahenan ni halak partigor niulana, parsorionna timbangon. Nunga pola hudok halongangan do i.”
Dungi ditaringoti do i muse di Jeremia 12 : 1-2 “Na tigor do anggo ho, ale Jahowa, tung sura naeng manarita ahu dompak ho; asal angka uhum naeng taringotanku tu ho: Boasa tung * mardohar dalan ni angka parjahat? Boasa tung marsonangsonang saluhut angka pangoseose? Nunga disuan ho nasida, huhut marurat nasida; lam ganda nasida huhut marparbue. Talpe do ho di pamangannasida, alai holang do anggo sian bagasan rohanasida.”
Molo tajaja di Pesalmen 73:12 Ida ma, i ma angka parjahat sai mardohar salelenglelengna, lam tu suksukna hamoraonnasida.: “Ai tu angka parroha na tigor do mata ni Tuhan”. Amen!